Ero yimaw tak Mikew n̂ekaricesî apoyino komo yukurunpetopo poko. N̂examro yukurunpen̂e ro mîk Mikew, yukurumîkno xa. Ero yimaw marha yîwîrîmano ritopo me xa tak nasî. Ero warai exihra ro makî ka xakn̂e yîwîrîmano ritopo, yihcirî me xa tooto komo kayaritomon ciitoponhîrî n̂ixa ro. Ero yimaw tko apoyino komo nukurunpesî Kaan, karita yaka osotî komo mewrexapu kom ha.

2 Ero yimaw marha mer̂pono pîn komo tak pakexe hara roowo chew yîwînxapunhîrî kom ha. Anarî komo pakexe waipîn me ro mak tak. Anarî komo reha pakexe tîhyapamsom me, Kicicitho ro mak mîkyam, kacho me cehtome so mak miya roro.

3 Ero yimaw takîhso cesehtînosom komo tak naxe katpape xa okre kaapu rarî wara ro mak. Ero wa xa marha naxe mer̂pono pîn yaknaman̂e komo kir̂wan̂he so tak ehtome so. Xir̂ko wara rma n̂esenpexe eroromero noro yipu komo.

4 Taa, Taniew, on ahruko karita, ahkoromak marha. Ero wa n̂expe eromanhîrî yimawno me cehso ro. On wara tak naxe tooto komo amn̂e, miya xiya wara so cexe mer̂pono pîn komo, kar̂pe so cexe. Mîn hak poko marha tak n̂ehcamhoketîkexe. Ero wa naxe amn̂e tooto komo, kekn̂e. Ero wa kekn̂e owya tooto warai.

5 Ero yinhîrî tak kesewyar̂akn̂e. Tooto warai tak ween̂akn̂e asakî. Tuuna yepu yecihtaw xakn̂e anarî, eeco po xakn̂e anarî hara.

6 Iito marha xakn̂e riin̂u ke tponoyem. Tuuna yepoi xakn̂e. Noro ya tî kekn̂e ecihtawno on wara, Keserepokacho xa mekatmo moso ya. Atî wicakî pahkî nai amtapotachonhîrî yaw roro tooto komo yehtome tak ha? kekn̂e.

7 Ero ke n̂eyukyakn̂e tak riin̂u ke tponoyem, tuuna yepoyino ha. Ececoka rma ka napockanwakn̂e kahsî. Nîmtapowakn̂e tak on̂entarî me. On wara kekn̂e, Yaaro xa tan wîîkesî, Kaan xa nasî omtapotarî yakronoman̂e me, waipînî ro Kaan ha. Cewn̂e cimn̂ipu nasî, asakî cimn̂ipu tak nas hara, cimn̂ipu raconho xa hara nasî, ero wicakî pahkî nas ero yipu yaw roro tooto komo yehtîkacho. Kaan yananî ro komo yemetanmetîketaw xa tak ero yimaw tak nasî omtapotarî yaw roro ehtîkacho kom ha, kekn̂e.

8 Yîmtapotarî rma re wencekn̂e, camkî rma tko wîxakn̂e okwe. Ero ke on wara wîîkekn̂e hara yîwya, Apa, ahce wa tak amna nai ero yaw roro amna yehtîketaw xa tak? wîîkekn̂e.

9 On wara oyeyukyakn̂e, Etoko tak Taniew. Tahruso mak nasî karita omtapotachonho mewrexapu. Tahkoromaxi nasî ahrunkan me pahkî. Eromanhîrî yimaw tak n̂esehtînomexpe hara.

10 Mer̂pono pîn komo tak n̂etakir̂wamexe amn̂e. Tumutwe ciiso tak naxe okre, yusmunkaxapu me ha. Kicicme rma tko naxe kicicitho komo reha. Camkîno me thakwa naxe noro yipu kom okwe. Takîhso cesehtînosom komo reha naxe camkîra.

11 Kaamo tukuknomapore nasî, Kaan ya tîmsom tîmîhra tak ehcoko, kacho n̂ixa ro tukuknomapore. Kicicitho me ro mak ciino ritopo n̂iir̂axe, pohnî me ro mak ciino ritopo ha. Ero n̂ixa ro tukuknomapore nasî 1.290 kaamo.

12 Tawake xa naxe expokan komo, 1.335 kaamo pona roro expokan kom ha.

13 Amoro reha etoko. Eromanhîrî kaamo ka momohko. Mepokares amn̂e. Yukuknomaxapu yenatîtopo yimaw tak mîpakes hara, kaamo yenatîtopo yimaw ha. Ero yimaw Kaan nîmrî tak mahsîyasî. Ero wara mas amn̂e ha, kekn̂e. Ero wa kekn̂e tooto warai owya.