Taa, Tar̂u ka xakn̂e kayaritomo me, Metu yepamtho. Cewn̂e cimn̂ipu makî ka xakn̂e kayaritomo me noro yehtoponho. Ero yimaw on wara kekn̂e tooto warai, Taniew mîtwo kecececekn̂e yukurunpetome, karihtotome marha. Ero wara wîxakn̂e, kekn̂e.

2 On wara kekn̂e noro owya, yaarono xa tan wekatîmyas awya. 3 ka naxe amn̂e Pehsia kayaritomon komo. Ero yinhîrî 4-nhîrî tak nasî n̂examro kayaritomon me hara. Noro xa tak nasî cemyawnoyem me anarî komo yopo, kayaritomonhîrî pen komo yopo. Yukurumîkno me xa marha n̂ehtîkesî noro mer̂pora ro mak exirî ke emyawno. Yukurumîkno me cehtîkache tak on wara kesî miyan komo ya rma, Kaikatko Kresia pono komo kayaritomon yakro etar̂maxi, kesî tak miyan komo ya rma.

3 Ero yimaw anarî tak nasî kayaritomo me hara, yukurumîkno xa tak, tanme ro mak ciino rin̂e ha.

4 Kayaritomo me ehtîkache n̂etîraconke tak yîrowonthîrî. Suu n̂ixa nasî anarî yîraconhîrî, nohce n̂ixa nasî anarî yîraconhîrî hara, resce n̂ixa nasî anarî yîraconhîrî hara, oesce n̂ixa nasî anarî yîraconhîrî hara. Yîrowonthîrî yahsîra tko naxe kayaritomonhîrî pen yepamtho komo. Yukurumîkîra n̂hema marha naxe yîrowonthîrî yahsîn̂e komo, yihcithîrî pen warahra, kayaritomo pen warahra. Emohkaxapu wara tak nasî yihcithîrî kayaritomo pen. Anarî komo mak tak nahsîyaxe yîrowonthîrî.

5 Ero yinhîrî on wara tak nasî suu n̂ixan komo kayaritomon, yukurumîkno me xa tak n̂ehtîkesî. Noro sowtatun komo yantoman̂e tko tak nasî kayaritomo me hara tîkayaritomonînhîrî pen yemtaka hara. Miyanî rma tak nahsîyasî roowo tîrowon me.

6 Yaake cimn̂ipu exiche tak, n̂etakronomexe tak n̂examro nohce n̂ixan komo yakro. Ero yimaw suu n̂ixan komo kayaritomon yemsîrî tak cesî nohce n̂ixan komo kayaritomon yaka. On wara kaxi cesî iina, Awakronoman̂e me cexi xe tî nai apapa, takronoman̂e me awexi xe marha tî nai, kaxi tî nîîce. Yukurumîkno mera tko n̂ehtîkes okwe noro, kayaritomo yemsîrî. Yukurumîkno mera marha tak n̂ehtîkesî yîîm hara, noro yemsîrî yaan̂enho pen komo marha.

7 Ero yinhîrî kayaritomo yemsîrî yepamtho tak cesî nohce n̂ixan komo waparî me. Sowtatu komo naar̂asî mer̂pono pîn komo. Nohce n̂ixan yewton wacan yaka rma n̂ewomyasî. Iitono komo yopono me tak nasî.

8 Ponaro n̂examro yehtopo komo tak nahsîyasî suu n̂ixan. Onok na me enporixaputho komo marha nahsîyasî, bronse ciixaputho. Emyawnonhîrî komo marha nahsîyasî mer̂pono pîn. Prata ciixapu, ooru ciixapu, ero warai nahsîyasî. Exitu pona tak naar̂asî. Ero yinhîrî yaake cimn̂ipu tak nasî nohce n̂ixan komo yakro etar̂mara.

9 Ero yinhîrî nohce n̂ixan komo kayaritomon makîrha cesî suu n̂ixan rowontho yahsîso hara. N̂etîrames hara tko tîrowon pona hara.

10 Ero yinhîrî nohce n̂ixan komo kayaritomon mumuru komo tak n̂esencexe cetar̂matopo komo poko hara. Sowtatu komo pen n̂enmekyaxe mer̂pono pîn. Tuuna yukmarî wara mak cexe waapa me mer̂pora ro mak. Ero yinhîrî tmaywen komo wacan yaka ces hara. Iitono komo yakro meero tak n̂eseiyaxe.

11 Ero yinhîrî takî suu n̂ixan makîrha nîrwonas hara. Nohce wecan waparî me ces hara. Sowtatu komo rma re n̂enmekyasî nohce n̂ixan. Kar̂pera tko naxe. Iyopo so naxe suu n̂ixan komo.

12 Nohce n̂ixan sowtatun komo yar̂mache tpoko rma tak nahwowasî suu n̂ixan komo kayaritomon. Mer̂pono pîn komo nar̂mesî noro, yaake miw pen komo. Iitono komo yopono komo me tko exihra nasî.

13 Ero yinhîrî nohce n̂ixan tak ces hara sowtatu komo yenmeso xa hara. Mer̂pono pîn xa tak n̂enmekyasî, pahxa n̂enmekyakn̂e n̂examro yopo xa tak. Yaake cimn̂ipu exiche suu n̂ixan waparî me tak ces hara. Mer̂pono pîn sowtatu komo naar̂asî. Tuwuhreke so cexe noro sowtatun komo.

14 Ero yimaw tak mer̂pono pîn komo cexe suu n̂ixan komo kayaritomon waparî me. Apoyino komo meero n̂etowyaxe kayaritomo maywenînho, apehceme tîrwon̂em komo mîkyam n̂etowyaxe. Ero wa n̂ehcoyoponkexe an̂enîthîrî yaw roro rma. N̂ehn̂exe tko n̂examro.

15 Mokyasî rma tko nohce n̂ixan komo kayaritomon. Ewto imo pen wamcexe noro sowtatun komo. Roowo n̂enmekyaxe merpora ro mak cecen̂an me ehtome. Ewto pona rma n̂ewomyaxe twacayem yaka. Iitono komo tak nar̂mexe. Suu n̂ixan sowtatun komo naxe kar̂pera. Nohce n̂ixan komo yopo exihra naxe okwe. Karitî komo rma n̂epîrkexe nohce komo mamaka.

16 Ero ke tanme ro tak ciino n̂iir̂asî suu n̂ixan komo waparî me mohxapu. Noro yar̂man̂e exihra ro mak nasî. Cenporem pona tak n̂iir̂asî cetarî roowo pona. Iitono komo yopo nasî, ar̂mano n̂iir̂asî ro mak.

17 Ero yinhîrî on wara tak kes hara nohce n̂ixan tîhnaw, Kîwcesî hara ka. Amn̂e kmokyas hara. Ahnoro tak wekyas osowtatun komo. Suu n̂ixan yakro kîmtapowasî. Cetkurunpesom me tak cehcerî, kacho poko kîmtapowasî, kesî. Ero ke ero wara rma n̂iir̂asî. Cemsîrî tak nîmyasî yîwya suu n̂ixan ya noro pen yar̂machome mak. Ar̂mara rma nasî, n̂ehn̂esî mak cesehtînotopo poko.

18 Ero yinhîrî tuuna imo yecihtawno komo yar̂maxi tak cesî nohce n̂ixan. Mer̂pono pîn nar̂mesî iitono komo. Ero yinhîrî sowtatu komo yantoman̂e nasî iyoponkan̂e me. Ow yîwîrîyakara ehcoko, kesî tooto komo ya. Kyopono pîntho xa matko amoro, kes hara yîwya.

19 Ero yinhîrî tak on wara nasî noro, cewtonî pona tîto xe tî nai twacayem yaka. N̂ehrokesî tko tîcetaw, n̂epîrkesî marha okwe. Ero yinhîrî tak n̂ehcamnoyasî. Ero wa nasî nohce n̂ixan komo kayaritomon pen.

20 Ero yinhîrî noro yekenho yakan tak n̂ecir̂asî kayaritomo me hara. Opurantan men tîmcoko, kesî cemyawnoi xa tak cehtome. Yohno rma tko noro pen waihyasî. Tîrwon̂em nar̂matho pîn me waihyasî, waapa nar̂matho pîn me marha. Waihyasî mak.

21 Ero yinhîrî tak yîhretawno tak nasî kayaritomo me hara, kicicitho xa tak kica. Kayaritomo me ciisom moso, kacho mera ka nasî. Tawakem wara rma mokyasî noro. Kayaritomo me tak n̂ecir̂asî rma emîknono rirî ke mak kica.

22 Ero yinhîrî tak sowtatu pen komo tak n̂esenmekyaxe noro porohkan̂e komo cma ha tî re. N̂examro penî tko nar̂metîkesî ro mak okwe tuuna yukmarî wara ro mak. Kayaritomo marha waihkesî, Cetkurunpesom me cehcerî, kan̂enho pen.

23 Noro yakro rma ka nîmtapowasî, Cetkurunpesom me cehcerî, kacho poko. Ero yinhîrî emîknono mak tak n̂iir̂as hara kica. Asak makî ka naxe noro maywen komo. N̂examro ke rma tko kar̂pe n̂ehtîkesî.

24 Ero yinhîrî on wara tak nasî noro, cemyawnoyem komo cheka cesî tawakem wara kica. Anarme ciino n̂iir̂asî noro tîîm pen warahra ro mak, tporin pen komo warahra marha. Tînar̂mathîrî pen komo yemyawnonho takî n̂ekamyasî tmaywen komo ya. Ero yinhîrî yakeno yar̂ma xe tak nasî ewto komo, twacayemu komo. Ero poko n̂esehtînoyasî. Yohno makî tko ero poko n̂esehtînoyasî.

25 Ero yinhîrî mer̂pono pîn tak n̂enmekyas hara sowtatu komo. N̂esewankaricesî tak. Ero yinhîrî suu n̂ixan waparî me tak cesî. Mer̂pono pînî rma tko naxe suu n̂ixan sowtatun kom hara, karitî kom ha. Nohce n̂ixan yar̂mara tko nasî. N̂ehn̂esî mak tmaywen komo yanme rma okwe. N̂examro n̂esencexe tkayaritomon komo yar̂macho poko rma. Ero ke n̂ehn̂esî noro.

26 Noro nînahmatho komo rma n̂esencexe waihkacho poko. Ero yimaw tak noro sowtatun pen komo tak n̂emahciyaxe anarî komo. Mer̂pono pîn komo marha waihyaxe paraxkaxapu komo.

27 Ero yinhîrî n̂examro rma, kayaritomo komo tak n̂eremexe asakno roro rma iina re aapo mîtkoso. Waapa me tîto xatî komo re mîkyam okwe. Cemaro me mak n̂esencexe kica. Tohnaw makî tko n̂esencexe. Kaan nukuknomatho po rma tak n̂examro waihyaxe.

28 Ero yinhîrî nohce n̂ixan takî ces hara ceken pona hara. Mer̂pora ro mak naar̂asî cemyawno iina. Tîcetaw rma tko Kaanî mtapotarî yosom komo poko tak nîrwonasî. N̂examro pen tak n̂emetanmekyasî. Ero yinhîrî tak ceken pona ces hara. Ero wa cesî.

29 Ero yinhîrî yukuknomaxapu po tak suu n̂ixan waparî me ces hara. Ero yimaw tko anarme tak nasî noro totopo. Pahxa totoponhîrî warahra tak nasî.

30 Kanawa yaw tak mokyaxe Kitin pono komo. N̂examro yanme tak nahwokesî noro, nohce n̂ixan. Ero ke yaw xa marha ces hara. Kaanî mtapotarî yosom komo poko tak nîrwonasî ro mak. N̂examro pen n̂emetanmekyasî. Ero yinhîrî ces hara. Kaanî mtapotarî yai etowxapu komo reha tak nakronomesî.

31 Noro sowtatun komo tak cexe Kaan mîn yaka rma. Ero tak nîwîrîmexe okwe. Kaan ya tîmsom tîmîhra ro mak tak ehcoko, kexe tak okwe ero yipu tîmn̂e ro komo ya. Ero yimaw tak kicicitho ro mak n̂iir̂axe iina pohnî me cirmexpon̂e xa tak okwe.

32 Kaanî mtapotachonho yanwekn̂e komo yakro nîmtapowasî kayaritomo. Takîhsom xa amyamro ham okre, kesî yîwya so emku me mak kica. Ero wa karî ke kicicme tak n̂iir̂asî yîropotarî komo. Iito rma tko naxe ponaro cehtopo yîhtînon̂e kom ha. Kar̂pe tak naxe. Kayaritomo nukurunkexe ehn̂ara rma.

33 Ero yimaw yuhnari yîhtînon̂e me naxe anarî komo. Tpoyino komo yakîhren̂e me tak naxe mer̂pono pîn yakîhren̂e me. Noro yipu komo tko waihkexe yiixatî pîn komo. Kacipara imo ke anarî komo waihkexe, wehto ke anarî komo waihkexe hara. Anarî komo mak nahsîyaxe, anana tak naar̂axe. Anarî komo yemyawnonho mak naar̂axe okwe. Ero wa n̂examro pen n̂emetanmekyaxe yohno n̂he mak ha tko.

34 Takîhso cesehtînosom komo yemetanmekyataw emetanmexapu yakronoman̂e komo tak mokyaxe hara. Emetanmexapu komo nakronomexe wahra mak. Kakronomexe so, kexe anarî komo reha tohnaw mak. Kexe ro kyam mak kica.

35 On wara marha naxe takîhso yîhtînon̂e komo, anarî komo mak, n̂epîrkexe tak okwe. Akîrwamachome so makî tko noro yipu komo nar̂mapesî Kaan, kir̂wan̂he xa tak ehtome so, kicicitho ken̂ehra tak, yusmumra xa. Ero wa nasî n̂examro yakir̂wamacho miya roro eromanhîrî yimawno pona roro. Yukuknomaxapu po tak n̂enahcasî tak emetanmetoponhîrî komo. Ero wa nasî.

36 Taa, on wara tak nasî kayaritomo, tanme ro mak ciino n̂iir̂asî. Ponaro tooto komo yehtopo komo yopono xa ow ha, kesî kica. Kicicitho me marha nîmtapowasî Kaan poko, kaan komo yopono poko. Ehn̂ara rma ka nasî noro cemyawno poko. Ero wa nasî Kaanî rwonîmtopo cenatîso ro. Ero wa emetanmekno n̂iir̂asî Kaanî rwonîmtopo me exirî ke. Kicicitho komo poko men kesepanîyas amn̂e oko, kachonho yaw roro rma wa ciino n̂iir̂asî Kaan.

37 On wara marha nasî kayaritomo, Ponaro tporin pen komo yehtopo ponarora ro mak nasî noro. Ponaro wooxam komo yehtopo xera marha nasî. Mîk hak ponaro natu anarî komo, noro yipu komo ponarora ro mak nasî noro reha. Ow xa wasî miyan komo yopo ro mak, kaan komo yopo, kesî kica.

38 Sowtatu komo mak naxe ponaro noro yehtopo. Tporin pen komo nîhtînotorî ponaro mak nasî. Yîwya nîmyasî cepethîkem, cemyawnonhîrî. Ooru nîmyasî, prata marha, toopuci enporixapu marha, ahce na tpoxwem. Ero yipu nîmyasî ponaro cehtopo ya.

39 Ewto mko pona cesî noro ar̂mano riso, sowtatu kenarî pona xa. Ponaro anarî yana komo yehtopo ponaro mak nai noro. Noro yipu tak n̂ewehcasî. Taa, on wara nasî noro cewetîn̂e komo poko, n̂examro wakrexe. Kayaritomo me marha n̂examro n̂iir̂asî mer̂pono pîn komo kayaritomon me. Epethîrî pona tînahsîthîrî n̂ekamyasî roowo. Ero wa cewetîn̂e komo wakresî.

40 Taa, eromanhîrî yimaw tak on wara tak naxe iitono komo, suu n̂ixan komo kayaritomon tak cesî xa hara nohce n̂ixan waparî me. Ero ke nohce n̂ixan komo kayaritomon tak mokyasî noro yakro etar̂maxi. Tarara yaw so mokyaxe noro sowtatun komo, kawaru mkaw so marha mokyaxe. Kanawa yaw so marha mokyaxe mer̂pono pîn yaw. Mîn hak pona cexe roowo pona iitono komo waparî me. Mîn hak pono komo yopo naxe noro sowtatun komo, tooto komo yopo. Anarmerpan komo chere cesî.

41 Cenporem pona marha cesî roowo pona iitono komo waparî me. Mer̂pono pîn komo nar̂mesî kayaritomonhîrî pen komo. Eton pono komo tko ar̂mara nasî, Moabe pono komo marha, Amon pono poritomon komo marha. N̂examro yar̂mara nasî.

42 Mîk hak rowon pono komo nahsîyasî tmaywen me so. Emahcira marha naxe Exitu pono komo.

43 Exitu pono komo purantan nahsîyasî ahnoro, ooru, prata marha. Ribya pono komo marha naxe noro yewetîn̂e me, Eciopia pono komo marha.

44 Ero yinhîrî on wara kacho tak n̂encesî, Aaxera natu nohce n̂ixan komo kopi, resce n̂ixan komo marha kopi. Ero ke nîrwonasî xa tak. Mîk hak waparî me ces hara. Mer̂pono pîn komo xa hara nar̂mesî.

45 Tîmîn tak n̂iir̂asî roowo rakataw. Mehxa nasî tuuna imo, xehxa nas îîpî hara, cenporem îîpî, Kaan yewtonî ro. Ero yotaw n̂iir̂asî tîmîn. N̂exponkesî tko noro pen. Waihyataw akronoman̂e exihra ro mak nasî. Ero wa nasî noro pen, kayaritomo pen.