Taa, ero yinhîrî Kporin komo tak ween̂akn̂e. Cececetoso xakn̂e tîmsom yakn̂itopo mîtwo. On wara kekn̂e owya, Mapata kanahtawno etapakî. Kar̂pe etapakî esewsîtome tak metata makokorono. Ero wa etapetaw n̂emacakesî tak omîntho. Ero yawno pen komo n̂erewnukyas oko. Emahcixapunhîrî komo tak Ow paraxkesî kacipara ke. Cewn̂e n̂hema emahcira thakwa nasî, pîra ro mak ha.

2 Anarimaw na yuhnaka roro nahcetu miya ro mak roowo yatumnaka roro. Iina rma tko n̂examro wahsîyasî oyamorî ke. Anarimaw na kainatu kah yaka roro. En̂exa rma tko n̂examro wenîhces hara.

3 Anarimaw na n̂eseyamyatu Kahmeru Yîpîn meretkoso rma. Iina meero n̂examro wepor̂asî. Wahsîyasî tak. Anarimaw na n̂eseyamyatu tuuna imo kwaka, weyun yaka ro makî. Iina n̂eseyamyatu enîhra oyehtome. Iitono rma tko wantomesî okoyi n̂examro pen yeskan̂e me.

4 Anarimaw na n̂examro pen naar̂atu yiixatî pîn komo, anarî pona thakwa roowo pona. Iitono rma tko wantomesî sowtatu n̂examro pen waihkarî poko kacipara imo ke. N̂examro wentîkesî emetanmechome, akronomara ro mak oyehtome ha.

5 On warai Ow Aporin komo, Aporin komo xa Ow awantoman̂e ro komo. Roowo yapeyataw owya xukrape tak n̂ehtîkesî. Ero pono komo tak nîwracexe ahnoro. Ahnoro roowo tak nukmesî N̂iru Yepu wara. Ero yinhîrî napayas hara yaporî wara, Exipsiu komo yewkuru wara.

6 Kah yaw rma omîn wiir̂asî. Ero yapon wiir̂asî roowo pona. Tuuna yekpon̂e marha Ow tuuna imo kwaino rma. Ero rma wukmamyasî roowo pona. Aporin komo Owî, oyosot ha.

7 On wara maxe amyamro Ixaw Yana komo, Eciope komo wara rma maxe owya, wîîkes Ow Aporin komo. Exitu poi Ixaw Yana komo wekyakn̂e, awekîra so katî wîxakn̂e awya so? Piristew komo wekyakn̂e Kaptorî poi. Siriu komo wekyakn̂e Kiri poi hara. Ero wa ekno rin̂enho Ow ha.

8 Kicicitho maywen komo yenîn̂e roro Ow Aporin komo. N̂examro pen waihketîkesî exihra cehso ro roowo po. Xako pen yepamtho reha waihkatîkara wasî, wîîkes Ow Aporin komo.

9 Ero yimaw oyanton komo wantomesî Ixaw Yana komo yîmyapotopo poko. N̂examro pen tak wîmyapesî mîk hak rowon pono komo chew exitaw so. Puruma nîmyapexe mararî yosom komo ero wara wîmyapesî. Wara rma cewn̂anî rma ciki yathîrî epîrkara nasî roowo pona.

10 On wara tko kexe kicicitho komo, oyanan komo poyino, Keporîra ro mak mexe nasî kahwokacho komo. Mokuhra ro mak naxe waapa komo. Enîhra ro mak taxe kahwokacho komo, kexe. Ero wara kan̂e komo waihyaxe rma ahnoro kacipara imo ke paraxkaxapu me.

11 On wara marha wîîkes awya so, ero kaamo po tak Tapi pen mîntho wiir̂as hara emacakaxaputho. Ero wacantho wakir̂wamesî awkaxaputho. Ero yahrutho marha wiir̂as hara, yukuraranthîrî marha ecahxaputho. Pahxa xakn̂e ero wa xa marha wiir̂as hara.

12 Ero wa n̂examro wiir̂as hara Eton pono pen komo yahsîtome tak tmaywen me so, etîmtoxapu komo yahsîtome me. Ahnoro Xenciu komo kayaritomon me naxe ero yimaw, oyosoken komo kayaritomon me ha. Ero wa naxe amn̂e, wîîkes Ow Aporin komo. Ero wara ciino rin̂e rma Ow ha.

13 Amn̂e tak on wara maxe, anatîrî komo yeperîrî yenmekn̂e komo wenari rma tak mokyasî roowo pomon̂e kom hara. Ero yimaw marha uupa yatî ciin̂e komo tak mokyaxe uupa yeperîrî yewkukan̂e komo wenari rma. Uupa yukun tak n̂ewkwasî îîpî poi ero po rma ciixapu. Matîwîn poi so rma tak nîhcesî ero yipu tuuna yaporî wara rma.

14 Oyanan komo tak wekyas hara oona, Ixaw Yana kom ha. Waapa komo narîtho mîkyam wekyas hara. Ewtotho mko tak n̂iir̂axe hara cewton komo me. Tînatîrî komo marha n̂iir̂axe uupa yatî. Ero yukun n̂eer̂axe. Tmararîn komo marha n̂iir̂axe. Ero pono yeperîrî nahyaxe okre.

15 Ixaw Yana komo tak wiir̂asî yîrowon komo pona rma onatîrî wara. Mohkan me ro mak tak naxe iito. Yîrowon komo wîmyakn̂e thakwa yîwya so. Ero ke ero poi mohkan me tak naxe, wîîkes Ow Aporin komo Kaan. Ero wa wîîkesî Ixaw Yana komo poko.