On wara wîîkes ow, ahwora ro mak was okwe. Naatî yeperîrî yenmekn̂e wara mak was okwe, kaamo yimawno yenmekn̂e wara. Uupa yeperîrî yepon̂e wara wasî, potun̂enhîrî komo nîmtotho yepon̂e wara. Cewn̂e n̂hema exihra ro mak nas onahrî uupa yeperîrî cewnapomxemînhîrî. Yihcirî me epetaxapunhîrî exihra ro mak nasî yiixe oyehtopo xa.

2 Kaan ponarono pen komo n̂ehcamnoce ro mak okwe. Cewn̂e n̂hema exihra ro mak tak nasî takîhsom. Ahnoro rma tînwaikarî komo wapancexe. Taknonhîrî pen komo yahsî xe naxe okwe mîîye warai ke okwe.

3 Tamorî ke so rma emetanmekno ritopo poko naxe, ecececoka rma naxe ero poko kica. Ow men ka wakreko puranta ke aponaro so tak oyehtome, kexe n̂examro yantoman̂e komo. Tupurantan komo nahsîyaxe en̂ekano rin̂e komo kicicitho komo yen̂ekara cehtome. Emetanmkno ritopo poko nîmtapowaxe yukurumîkno komo. Iito re rma n̂esehtînoyaxe emetanmekno ritopo poko kica.

4 Wara n̂he cik naxe anarî komo. Cekyekyem wara rma tko naxe noro yipu komo meero kica. Kicicme cehtopo komo ponarora n̂he cik naxe anarî komo. Aweko wara rma tko naxe iito re cehsom wara oko. Pahxa rma awaparî komo mohtopo n̂ekatîmyatken̂e awya so waapa yekahton̂e komo. Yîn̂ekatîmthîrî me tak n̂enmayas amn̂e. N̂enmayasî men kicicme awehtoponhîrî komo yepemacho me okwe. Ahce wa tatu kopi, mîîkexe mak ero yimaw.

5 Ero ke on wara wîîkes awya so, amîtwono komo pona enîhra ehcoko. Awakrono komo pona marha enîhra ehcoko. Ero wa xa marha twerî ehcoko apici poko, awenaka cetakrisom poko rma. Twerî men amtapotacoko.

6 On wara marha maxe okwe, tîîm nîwîrîyakesî yumumuru rma okwe. Tîsonî rma n̂emetanmekyasî emsîrî okwe. On wara marha nasî wooxam hara, ciin̂o yonî rma n̂emetanmekyas okwe. Mîîmo yosom xatî pîn me tak naxe okwe yîhyawno komo rma. Ero wa maxe okwe.

7 On wara tko was owî reha, Kporin komo pona makî reha ween̂asî oyakronomacho. Ahri kapu, Kaanî rma okurunpesî, wîîkesî mak ow. Omtapotarî tak n̂encesî Noro amn̂e.

8 Awya kr̂a, kahra esko opoko amoro ooxatî pîn. Oyepîrkache kawomyas hara amn̂e. Awarpan chekan wara oyeremetaw Kporin komo rma oweipesî.

9 Noro poko kicicme wîxakn̂e kica, Kporin komo poko. Ero ke Noro nîrwonas opoko. Wînîmyasî mak oyemetanmetopo yîwya. Amn̂e tak oyemetanmekn̂enho komo n̂en̂ekesî Noro. Ero yimaw tak oyepanîyasî. Katpanawno wara oyenpon̂e wara tak nasî. Kir̂wan̂he xa Noro yehtopo tak ween̂asî.

10 Ero yimaw marha oyen̂asî ooxatî pîn. Nîhyapamyasî ro mak tak. On wara kan̂enho mîkro owya, Ahto nai hara Aporin komo, ponaro awehtopo ha? kekn̂e owya. Ero wa kan̂enho penî rma ween̂as amn̂e. Noro tak nasî tapihsom me apacakrî wara rma kica, esama yawno wara.

11 Pahxaro tak n̂enmayas awacan ciitopo me xa hara. Ero kaamo rma nasî arowon komo wokpan yewyetakacho me hara, miya so tak n̂esewyetakes okre.

12 Ero yimaw marha awenso so tak mokyaxe Asiriu komo, Exipsiu yewton pono komo marha. Meye nasî Exitu, xeye nasî Ewpratesî Yepu hara, ero mko yotawno komo ahnoro mokyaxe. Tuuna imo yotawno komo, îîpî yotawno komo marha, ero warai komo mokyaxe awenso so.

13 Pohnî me rma tko nasî arowonthîrî komo ero yimaw. Ero wa nasî kicicme exirî ke iitononhîrî komo. Kicicme ehtoponhîrî komo yepetho me ero wara nasî.

14 Taa, on wara wîîkes awya Apa, ayanan komo nahman̂e me tak esko. Awamoyin ke cemyanoi n̂examro enko. Ayanan komo me rma mahsîyatken̂e n̂examro. Cewyarono me mak naxe n̂examro comota pono me mak, Kahmeru pono me ha. N̂examronhîrî rma tak n̂eseresmacowpe Basan po, Xireace po marha. Pahxa iito n̂eseresmetken̂e iina xa marha n̂eseresmacowpe hara.

15 Pahxa ka Exitu poi amokyataw so wenpekn̂e kar̂pe ro mak oyehtopo, aweserepokacho komo ciitopo poko. Amn̂e tak ero yipu xa marha tak wenpesî xa hara awya so.

16 On̂iritho tak n̂een̂axe amn̂e mîk hak rowon pono komo. Ero yeen̂ataw nîhyapamyaxe ro mak kopi. Cehn̂axmu me rma n̂esen̂axe karitî me ehxapunhîrî komo rma. Ero yimaw n̂emtayahruyaxe mak tak yîmtapotan me. Entan̂e pîn me tak nasî n̂examro panarî kom hara.

17 Roowo yemen̂e me mak tak naxe okoyi wara. Sehrere me tîtosom komo wara rma naxe. Cewtarî yaino wara mak n̂epatakexe tatan̂e mak. Kporin komo Kaan wece tak n̂etaknamexe cerahtîmrî ke so. Apona so tak n̂eraswaxe. Ero wara naxe mîk hak rowon pono komo amn̂e.

18 Apa, onoke ma re nai anarî kaan awarai? Kicicme amna yehtoponho yîhcamnon̂e Amoro anarî komo warahra. Asakî mak amna n̂etîmcekn̂e ayanan pen. Kicicme n̂examro yehtoponho poko rma tko metîrwoxinkesî, Awanwetoponhîrî komo marha mîhcamnoyasî. Onoke ma re nai awarai? Eroromero yîrwomnî Amoro. Tahwore xa masî etpînîn yaw awehtopo yenpetaw.

19 Amn̂e tak amna pînîn yaw mas hara. Kicicme amna yehtoponho yapikn̂e wara kr̂a tak mai. Kicicme amna yehtoponho ahnoro tak mar̂mesî miya ro mak tuuna imo kwaka, weyun yaka rma.

20 Towîhra rma masî amtapotachonhîrî, Xako pen ya mîîkekn̂e ero wa kacho. Abraaw pînîn yaw marha mas okre. Pahxa amtapotarî mekatîmyakn̂e amna porin pen komo ya. Yaaro xa mîîkekn̂e yîwya so, towîhnî me ro mak. Ero wa kacho yaw roro rma tak amna miir̂as amn̂e. Ero wara mas amn̂e Apa.