Taa, awakro so rma nîmtapowasî Kporin komo. Ero ke yîmtapotarî ka entacoko. On wara kes awya so, Awomko piiri, oyen̂ekacho ka ekatîmko îîpî pono komo ya. Matîwîn pono komo ya marha ekatîmko ooxera awehtopo komo.

2 Ai, îîpî mko, Ixaw Yana komo yen̂ekacho xa matko entacoko, Kporin komo ya en̂ekacho kom ha. Kporin komo mtapotarî ka entacoko amyamro roowo yaponî mko, ehcamnopînî ro mko ha. Tîyanan kom xa n̂en̂ekesî Kporin komo. Kicicme Ixaw Yana komo yehtoponho n̂ekatîmyasî.

3 On wara wîîkes awya so oyanan komo ya, Ahce wa kiice so kicicme awya so? Ahce wa Ow meen̂atu opoko pokaxapu wara awehtome so? Ow men ka eyuhcoko.

4 Exitu poi awekn̂ehîrî komo Owî. Epethîmnî me ro mak awantoman̂enhîrî komo yai awown̂enhîrî komo Ow. Moises pen wantomekn̂e awatopo komo poko. Araw pen marha wantomekn̂e ero poko, Mirian pen marha.

5 Oyanan komo amyamro, pahxa Barake nîmtapowakn̂e kicicme apoko so. Moabita komo kayaritomon mîk xakn̂e Barake pen. Noro tak n̂eyukyakn̂e Baraw hara, Beo pen mumutho. Yîmtapotachonhîrî komo yîhtînocoko. Ahce wa mîxatken̂e awcetaw so Sicin poi Xiwkaw pona? Ero ponaro men ehcoko, Kir̂wan̂he xa nai ham Kporin komo, kachome tak awya so, kesî Kporin komo awya so.

6 On wara na mîîketu anarimaw, Ahce waar̂a Kporin komo ya tîmsom yîhyaka owcetaw? Kyopono ro Kaan mamakan me yutupentaxi owcetaw ahce waar̂a yîwya tîmsom me? Oyokutho pun waar̂a takn̂itîkaxmu yîwya tîmsom ha? Paaka xîkîtho pun waar̂a cewn̂e cimn̂ipu ewrutoponhîrî ehxapu pun ha?

7 Kahn̂eru na waihke yîwya tîmsom me? 1.000 na ow waihke Kaan ya tîmsom me? Ero wicakno owya tîmyataw yîwya tawake ma re nai opoko? Aseci tîmyataw tko yîwya eepu wicakî, 10.000 eepu wicakno tîmyataw yîwya mer̂pono pîn tawake ma re nai opoko? Omumutho katî wîmya yîwya Noro yewetîra oyehtoponho yepetho, poturme ewruxapunhîrî pen mîk wîmya? Opun yeperîrî warai ma re wîmya kicicme oropotarî yehtoponho yepetho?

8 Pahxa rma tko n̂ekatîmyakn̂e Noro awya so apanatanmetopo komo, kir̂wan̂he awehtopo kom ha. On wara men ehcoko, kekn̂e rma Noro awya so, Yaarono me mak ciino ciicoko. Etpînîn yawno me awehtopo komo tpoxwe encoko. Ponaro awehtopo komo mamawno me xa ehcoko ahce na poko awexitaw so. Ero wa xa ehcoko kesî Kaan awya so.

9 Ai, oyakno komo, Kporin komo nîmtapowasî ewto pono komo yakro. Ero ke ka entacoko. On wara kesî, Takîhso awexitaw so oyosotî ponaro xa ehcoko. Kaan yamoyin ponaro men ehcoko, ero ke rma awetapan̂e me men nasî Kaan.

10 Nai rma na kicicitho komo mîn yaw so n̂examro yemyawno kicicitho me ahsîxapu? Warawa yawsîn yukuknomacho na nai iito, yaarono pîn kica. Kica kacho ro mak mîn ero yipu.

11 Kir̂wan̂he keen̂axe so okre, wîîke ha ma re yaarono pîn yosom ya, awsîn yukuknomacho yosom ya? Kir̂wan mîkro, wîîke ma re yaarono pîn exitaw noro kumixin yaw? Pîra ro mak.

12 On wara naxe iitono komo cemyawnoyem kom ha, waapa komo mak mîkyam okwe. Cemarontaxmu marha mîkyam iitono komo. Cesemîknosom ro mak mîn yun̂uru komo kica.

13 Ero ke Ow makîrha tak ketapexe so kar̂pe, mamotoyaxe tak okwe. Akronomnî me ro mak tak kiir̂axe so kicicme awehtoponhîrî komo poyero.

14 Meseresmexe rma re amn̂e, erepotara rma tko maxe. Rooma poko ro mak maxe okwe. Anahrî komo rma na mîmcetu. Eronhîrî rma tko n̂ehcamnoyas okwe. Ero wîmyas awaparî komo ya rma, kacipara ke cemyarkem komo ya ha.

15 Anatîrî komo rma re miir̂axe. Ero yeperîrî tko enmekîra maxe okwe. Asetona rma re mapikmexe, aseci ke tko ekapera maxe okwe. Uupa yeperîrî marha re mewkukexe. Ero yukunu tko erîhra maxe okwe.

16 Pahxa akayaritomonînhîrî pen apanatanmekyatken̂e so. Onhi pen mîk xakn̂e. Yîmtapotachonhîrî rma mewehcaxe kica. Akabe pen yehtoponho yaw roro marha maxe kica. Awakîretopo komo tî re mewrekn̂e noro pen, ero yaw roro rma maxe kica. Ero poko roro maxe awewtonthîrî komo tak ciitome owya ewtotho me okwe. Anarî yana komo nîwîrîyakarî me mak maxe kica. Kaan yanantho mak mîkyam kica, kacho me tak maxe okwe. Ero wa maxe okwe.