On wara marha kesî Kporin komo awya so, Ai, sowtatu yewton xa amoro, on wara wîîkes awya, asowtatun komo an̂ihcoko. Kwaparî komo men mohce okwe. Kmamhoko so n̂ecececexe okwe. Ixaw Yana komo yen̂ekan̂e tak n̂ewkatapexe amoyi ke oko. Ero wa nasî waapa komo.

2 On wara tko wîîkes hara awya ewto ya, Beren amoro Eprata pono. Mer̂pono pîn mîn Xuta yepamtho komo yewton. Wahraitho amoro ero mko xawyakan ha. Aapo tko n̂ewruyasî amn̂e omumuru, Ixaw Yana komo kayaritomon me ciisom ha. Pahxanî ro Mîk yihcitoponhîrî ken̂arî pînî ro mak ha.

3 Ero ke Ixaw Yana komo ka nahsîpînkesî. Ero yinhîrî tak ewruporono komo n̂ewruyasî. N̂examro yakno komo marha mokyaxe miya toxapunhîrî. Ixaw Yana komo yaka tak mokyaxe. Ero yimaw n̂examro nahsîyas hara ahsîpînkaxapunhîrî.

4 Ero yimaw marha tak n̂examro kayaritomon n̂ecececesî tooku yînahmachome oper̂a warai komo. Kar̂pe Kporin komo yehtopo ke rma n̂ekaricesî Noro. Kayaritomo me xa tak n̂esenpesî Kporin komo yosoke cexirî ke, ponaro cehtopo yosoke. Ero yimaw tak erasîn me naxe Ixaw Yana komo. Kyopono me xa tak nasî Noro, roowo poko hakno komo kayaritomon me. Noro rma nasî eraskano rin̂e me.

5 Amn̂e tak mokyaxe Asiriu komo kwaparî komo me okwe. Krowon komo po tak naxe. Kîkayaritomon komo mîn yari cexe. Ero yimaw n̂examro yukurunkan̂e me cicir̂axe oper̂a yenîn̂e warai 7. 8 xa cicir̂axe antomano rin̂e kom hara.

6 N̂examro tak waihkano n̂iir̂axe Asiriu rowon pono pen komo. Kacipara imo ke n̂examro pen waihkexe. Niniroce rowontho pono komo waihkexe kacipara ke, ewto metatan yawno kom ha. Ero wa tak kukurunpexe so Noro Asiriu komo mokyataw kwaparî komo me, krowon pore mokyataw so.

7 On wara naxe Xako yepamtho yakwenho komo ero yimaw, anarî yana komo chew naxe, mer̂pono pîn komo chew. Cicakî wara rma tko naxe n̂examro yîchew so, Kporin komo n̂ekmexpotho wara. Tuuna tmohsom wara marha naxe, cuh pona mohxapu wara. Tooto yanmera mohxapu mîn tuuna tmohsom. Ahrikapu, ooxe ka n̂ehcowpe tooto komo, kan̂e pîn mîn tuuna tmohsom. Ero wara natu Xako yepamtho komo.

8 On wara marha naxe Xako yepamtho yakwenho komo ero yimaw, Xenciu komo chew naxe. Mîk hak yana komo chew naxe mer̂pono pîn komo chew. Reaw wara naxe comota pono komo yopono me. Reaw wara rma naxe kar̂pamxan me cehsom wara. Oper̂a chere tîtosom wara naxe. Oper̂a n̂eskesî, narixkesî marha noro yipu. Yukurunpen̂e komo exihra ro mak nasî. Ero wara rma naxe amn̂e Xako yepamtho komo mîk hak chewno komo.

9 Mapockanwaxe tak ero yimaw aaxatî pîn pen yar̂matîkachome. Waihyaxe tak ahnoro aaxatî pînînhîrî pen komo.

10 On wara marha kesî Kporin komo awya so, Ero yimaw tak awokuthîrî pen komo Ow waihkes okwe, kawaru pen. Kawaru yosom mera tak maxe okwe. Atararanthîrî komo marha tak wakrokes okwe.

11 Awewtonthîrî komo marha wakn̂iyasî. Asowtatun mîntho mko marha wixkesî.

12 Erem ponaro awehtoponhîrî komo marha kr̂a wîhcamnoyasî. Yaskomo exihra ro mak tak nasî achew so.

13 Mîk hak warai me an̂irithîrî komo marha kr̂a wahkesî. Achew so exihra marha tak nasî toopu piirino, anarî ro yakro amtapotachonhîrî komo. Oporin xa amoro, kahra tak maxe ero yimaw awamorî komo ke an̂irithîrî komo ya rma.

14 Mîk hak warai me an̂irithîrî komo marha kr̂a Ow mohkesî. Achew so exihra tak nasî ero yipu. Awewtonthîrî komo marha kr̂a wakn̂iyasî.

15 On wara marha wasî mîk hak rowon pono komo poko hara, oyewetîn̂e pîn komo poko, tîrwon̂e xa tak n̂examro poko kesepanîyasî. Ero wara wasî noro yipu komo poko.