Ai, Ninipe pono komo, on wara wîîkes awya so, yarî men cexe awaparî komo. Ero ke asowtatun komo en̂epecoko waaca yaka cecen̂ai so ehtome so. Waapa yekaiporen̂e marha antomacoko awesamarî komo yaw tmohsom yekaiporen̂e me. Miya xiya wara en̂epecoko asowtatun komo waapa porohkan̂e me. Ahnoro asowtatun komo antomacoko ero yipu poko.

2 On wara tko nasî Kporin komo Xako yepamtho poko, cewtoporem me tak n̂examro n̂iir̂as hara Ixaw yana komo yehtoponho wara xa marha. Mokyatken̂e rma re n̂examro waparî komo. N̂examro yewtontho nakn̂iyatken̂e okwe, mararînthîrî pen komo marha nîwîrîmetken̂e kica. Yînatîthîrî komo marha nîwîrîmetken̂e uupa yatîtho.

3 Taa, cucure so nasî n̂examro sowtatun komo yecen̂an. Cucure so marha nasî yîsowtatun komo ponon. Tarara mko nakîhcexe tpepeyure wehto wara ro mak. Eraspetono me nasî ero pokono mko raapu mko.

4 Kar̂pe xa cesî n̂examro tararan ewto yesamarî yaw so. Miya xiya wara cexe mer̂pono pîn komo ewto roron pore. Poturem wara rma n̂esenpesî kopi. Kar̂pe xa cesî n̂examro tararan pepe kan̂e wara rma kopi.

5 Karitî komo xa men̂ekesî sowtatu yantoman̂e komo. N̂examro cetaw tko n̂ehrokexe. Kar̂pe xa cexe ewto wacan wece. Cecen̂an komo marha n̂iir̂axe waaca.

6 Iito nasî tuuna yepu metatan. Ero mko nahrunkexe sowtatu komo. Ero yinhîrî tak n̂emacakesî kayaritomo mîntho.

7 Kaanî rma nîmtapowakn̂e iitono komo yaatopo poko. Tapomiso so rma iitononhîrî pen komo naaraxe waapa komo. Miya ro mak naar̂axe. N̂examro yantonînho komo marha naar̂axe emasî komo. Nîwracexe n̂examro potkuku mtapotarî wara rma. N̂esewankatapexe marha tîwracetaw so.

8 N̂ikithoci wara rma ka xakn̂e N̂in̂ipe pahxa ha ka. Oroto tko nasî apaixapu wara hara okwe. Ececetocoko, ececetocoko ha, kexe ha re iitono komo. Poropîra rma tko naxe.

9 Aacoko ka iitonohîrî prata, aacoko marha iitononhîrî ooru. Enatîn me ro mak nasî iitononhîrî pen komo purantantho okyo. Mer̂pora ro mak nasî n̂examro yemyawnonho kir̂wanî mko okre.

10 Taatîkaxi tko nas okwe iitononhîrî pen komo yemyawnonho. Exihra ro mak tak nasî iito ewtotho po. Nahwoketîkexe iitono komo. Tatanasî tak osokmuthîrî komo. N̂erewasî yîropotarî komo miyan komo ropotarî rma. N̂ewxamanwaxe ro mak ahnoro iitono pen komo.

11 Ahto tak nai reaw yewtatho oroto? Ero yaka tootî non̂ekn̂e yîmxîkrî komo. Iina n̂ewomyakn̂e reaw, kîîrî, woosî marha. Yîmxîkrî komo marha n̂ewomyakn̂e, en̂epen̂e exihra ro mak xakn̂e.

12 Tîmxîkrî yotî ka waihkekn̂e yîîm. Wooto marha nahsîyakn̂e cipici yotî me. Cewtarî nawronohketîkekn̂e reaw yîîm tînahsîthîrî ke, totowathîrî puntho ke ha.

13 On wara men Kporin komo kes apoko so iitono komo poko, Awaparî komo me men was okwe. Atararanthîrî komo tak wakn̂iyasî yîsîn me cehso ro mak. On wara nasî awokuthîrî pen komo, reaw kar̂pamxan me cehsom, waihyasî kacipara imo ke. Awotowarî komo exihra tak nasî, arowon komo po exihra ro mak nasî. Amtapotarî yekatîmn̂e komo mtapotarî marha esentara ro mak tak nas okwe. Ero wa maxe okwe.