On wara marha kesî Kporin komo Ninipe pono komo poko, N̂etwîrîmexe ro mak tak iitono komo okwe kamxuknano yen̂epen̂enho me cexirî ke so. Ahnoro iitono komo naxe tîcemarontaxmu me kica. Ahnoro marha naxe cen̂epan̂em me kica. Tîn̂emetanmekrî komo yen̂epera ro mak naxe.

2 Entacoko ka cmaicmai kacho ososwa ke kawaru yîhyotopo. Entacoko marha tarara pen tarî mokrî. Kar̂pe xa mokyasî kawaru, nîyorwasî marha tarara kar̂pe tmohsom.

3 Kar̂pe ro mak mokyaxe sowtatu komo, kawaru mkaw tmohsom komo. Kanapa wara rma n̂esenpesî n̂examro kaciparan. Tpepeyure marha nasî n̂examro rahnu. Mer̂pora ro mak nasî waihxapu pen yokoputho okwe. Yukuknomarî yopo ro mak nasî. Okoputho pona n̂ehrokexe sowtatu komo tmokyataw so.

4 Wooxam wara ro mak nasî ewto pono komo, kîîrî pohkan̂e ro wara. Pohkano rin̂e ro komo mîkyam iitono komo. Ceremkem komo xa mîkyam iitono komo. Mîk hak rowon pono komo tîmn̂enho mîk epethîrî pona. Antonano me nîmyakn̂e. Tweeno pîn me exirî ke ero wa nîmyakn̂e, erem poko exirî ke marha. Noro re me cehsom komo rma nîmyakn̂e eremkarî ke.

5 Awaparî me tak was Ow okwe, kesî Kporin komo mer̂pono pîn komo yantoman̂e. Asayan warai wanîmyasî awewru yahruru me. Ponomra ro mak tak kenpesî mîk hak rowon pono komo ya. Mîk hak maywen komo ya wenpesî akicicin kica.

6 Tusmuyemtho ro mak war̂mesî apona so. Tîwîrîyakaxmu me tak kiir̂axe so. N̂eserepokexe ro mak tak tooto komo awewtonthîrî komo yeen̂ataw.

7 N̂emahciyaxe awenîn̂enhîrî komo ahnoro. On wara kexe, Ewtotho me tak nas okwe Ninipetho. Onoke xa iitono komo pînîn yaw nîwrace ha? kexe. Ahtono komo ma re awahworen̂e komo ween̂a?

8 Wara n̂he katî matu No Amon pono komo yopo? N̂iiru yecihtawnonho mîn xakn̂e No-Amon ha. Tuuna ke twamkem mîn xakn̂e ewto. Tuuna yepu rma xakn̂e iitono komo kurun me. Tuuna marha xakn̂e n̂examro wacan me.

9 Eciopia pono komo xatken̂e iitono komo yakronoman̂e me, Exitu pono komo marha. Karitî komo ro mak mîkyam xatken̂e. Puce pono komo xatken̂e n̂examro kurunpen̂e me, Ribia pono komo marha.

10 Wara rma iitononhîrî pen komo naar̂atken̂e waapa komo tapomiso so rma okwe. N̂examro xîkîtho pen komo cor̂or̂ometken̂e oko toh pona esama yawno pona. N̂examro yantoman̂enho pen komo marha nahsîyatken̂e waapa komo tanton komo me. Men̂ekacho nar̂metken̂e tînahsîrî ro komo yîhtînotome. Antomano rin̂enho pen komo ahnoro napomiyatken̂e kanawa mici warai ke oko. Ero wa xatken̂e iitononhîrî pen komo.

11 Amyamro marha mîwenaxe amn̂e. Eseyamso mîîcexe. Awetkurunpetopo komo mepor̂axe awahsîra ehtome so aaxatî pîn komo.

12 Piiku yepu wara rma nas ahnoro asowtatun komo mîn. On wara nasî piiku yepu eperîrî yucwataw, eperîrî yenîhmetaw ahn̂e komo mtaka rma n̂emarakesî.

13 Enko xe, woxam wara mak naxe ahnoro asowtatun komo. Awewton komo wacan metatan nasî swaa wara ro mak aaxatî pîn komo yewomtome. Awacan komo metatan yecetîtho mko nasî cecahso okwe.

14 Atunarî komo ka enmetatko awokru komo me awamtochen komo. Yahcome tak ciicoko asowtatun komo wacan emacakan me n̂he. Kawau amkacoko, esmacoko marha. Kawau amnonoxapu ke ahrucoko awewton komo wacan.

15 Ero poko rma awexitaw so awakn̂iyaxe so wehto oco. Kacipara imo ke awamexe so oko awaparî komo. Awahtîkan̂e komo wara rma naxe. Naatî nahtîkesî makaka, ero wa xa marha naxe awaparî komo apoko so. Epamcoko rma re makaka wara, epamcoko marha re makaka anarmen wara. Wara rma awamatîkan̂e wara naxe oko.

16 Mepamnoyatken̂e awemyawno komo poko twarawantaxmu komo. Mer̂pora ro mak tak naxe xir̂ko yopo okyo. Makaka warai wara rma tko naxe, tatîhtaxmu komo nahtîkesî. Ero yinhîrî miya ces hara ahn̂enhîrî.

17 Asowtatun yantoman̂e komo naxe makaka wara rma. Makaka imo wara marha naxe awantoman̂e komo. On wara nasî makaka imo, twotme enmayataw peen poko n̂etahsîyasî mîîmo mîtwono poko. Potow kache tak kaamo miya tak ces okwe ahna ha na, yîhtînopîra tasî. Ero wara naxe awantoman̂enhîrî pen komo.

18 Ai, Asiriu komo kayaritomon amoro, on wara wîîkes awya, nîwînîkyaxe tak okwe amaywen komo, antomano rin̂e kom ha. Antomano rin̂e me cehsom komo marha nîwînîkyaxe okwe. Cetakpaxi tak naxe amaywen komo. Enmekn̂e komo exihra ro mak tak nas okwe.

19 Awetapachonhîrî komo yehci exihra ro mak nas okwe. Ecpîn me ro mak nas aweper̂an komo. On wara naxe awepîrkachonhîrî komo yentan̂e komo, knowknow kexe tak tahwore cexirî ke so. Exihra ro mak nasî anwîrîmathîrî pîn komo okwe. Yîpînîn yaw so exihra ro mak mîxatken̂e okwe. Ero wa mak wîîkes apoko so, Ninipe pono komo poko.