Taa, oroto owayapan warai yaw tak wasî. Sowtatu mîn warai yaw wasî cececetoso. Kporin komo ya oyeyutopo momokyas iito. Ahce wa na wîîke yîwya Noro ya opanatanmekyataw.

2 Ero yinhîrî oyeyukyakn̂e Kporin komo. On wara kekn̂e owya, Ai, Abakuke, on wara wîîkes awya, oroto tak owya ciino ritopo wenpes awya. Ero rma men mewreko. Kir̂wan̂he mewreko toh poko enporixapu poko kir̂wan̂he entome anarî komo ya. Ero yenîn̂enho kar̂pe tak cexe ekatîmso anarî komo ya.

3 Oroto tooto komo yehtopo wenpes awya. Amn̂e n̂he mak ero wa kacho yaw roro tak naxe. N̂ex ha, kacho yimaw tak ero nîmtapowasî. Cemarontara ro mak nasî omtapotacho. Pahkî rma re ka nai an̂enîthîrî yaw roro ciino ritopo. Wara rma momohko. Ehn̂ara ro mak n̂enmayas amn̂e ero yaw roro ciino ritopo. Ecmamra rma nasî. Ero wa nasî omtapotacho.

4 Taa, noro enko kicicitho, an̂enîthîrî ha, cehcoyoponkaxmu mîk kica. Akpîn me so cesehtînosom mîk. Kir̂wan komo reha naxe kar̂pe roro opona enîrî ke mak.

5 On wara nasî noro, Kaan yanwekn̂e me nasî kawaxiyem yanme rma kica. Ow xa takîhsom, kan̂e ro mak mîk kica. Tîtken̂e mak exihnî ro mak mîkî. Tîroman̂em xa mîkî. Kwaihtopo nîromanasî ero wara xa marha nîr̂omanasî noro hara. Mîk hak rowon pono komo nahsîyasî tmaywen me rma. Anarî yana komo nahsîyasî ahnoro.

6 Pahxaro tak noro pen makîrha tak nîwîrîyakexe yînahsîthîrî komo hara. N̂etaporexe marha tak noro poko. On wara kexe yîwya ha, Kaan nîwîrîmarî me kr̂a tak mas amoro hara anarî komo yemyawnonho yepamnorî ke ahyaka rma. Awemyawno mepamnotîkesî ro mak eraspeno rirî ke mak kica. Atî wicakî pahkî mai ero wara kica?

7 On wara men naxe amn̂e an̂epethîkathîrî komo, nawomyaxe men ponan̂e rma. Pakexe men okwe aweraspetome so kopi. Ero yimaw tak n̂examro n̂emetanmekrî me maxe amoro hara.

8 Mîk hak rowon pono pen komo yemyawnonho maar̂akn̂e okwe mer̂pono pîn komo yemyawnonho. Ero yinhîrî tak awemyawnonhîrî tak naar̂axe n̂examro hara, etîmtoxapu komo rma. Waihkano rin̂enho amoro okwe. Anarî pen komo rowontho yîwîrîman̂enho marha amoro, ewtonthîrî komo yakn̂in̂enho marha amoro. Iipononhîrî pen komo marha mîwaikekn̂e ahnoro okwe, kexe yîwya. Ero yanme awemyawnonhîrî naar̂axe hara.

9 Kaan nîwîrmarî me men nasî cemyawno yepamnon̂enho, kicicme cehtopo ke rma epamnon̂enhîrî. Ero wa awemyawno mepamnoyakn̂e anarî komo yopono me awehtome, esemetanmekîra ro mak tak awehtome.

10 Mer̂pono pîn komo yîwîrîmacho poko panatanmekno rin̂e amoro okwe. Ero wa awexirî ke ayanan komo yîhyapamnon̂e me mas okwe, ero yanme marha mîwayas okwe.

11 Toopu rma n̂ekatîmyasî kicicme awehtoponhîrî, waaca me ciixapu ha. Mîîmo makwanan marha yîmtapotarî n̂eyukyasî.

12 On wara kesî, Kaan nîwîrîmarî me men nasî ewto ciin̂enho, waihkano rirî me ha ciin̂enho ha. Ero wara xa marha nasî kicicme cehtopo komo ke ciin̂enho kica.

13 Kporin komo yanmera ro mak nasî tooto komo yetapickacho ero pîntho yepetho me okwe. Mîk hak rowon pono komo n̂etapickexe cekar̂kaxi ro okwe. Tohnawno poko mak n̂etapickexe okwe.

14 On wara tko nas amn̂e roowo, tawronohkatîkaxe tak nasî Kporin komo yehtopo yîhtînotopo ke, kir̂wanî ro me ehtopo yîhtînotopo ke ha. Roowo nahruyasî tuuna imo mer̂pora ro mak exirî ke. Ero wa xa marha roowo pen nawronohkesî Kporin komo yîhtînotopo. Ero wa men nas amn̂e.

15 On wara naxe anarî komo, tîmîtwono komo rma wokpexe kawaxiyem ke. Eecoko ha, kexe yîwya wenmetome kica. Narkexe mer̂pora n̂examro wokru twenîmso ro kica. Ero wa wenmekno n̂iir̂axe yupun yentome ponomnî. Ero wa wokpano ciin̂enho komo naxe Kporin komo nîwîrîmarî me okwe.

16 On wara tak maxe noro yipu komo amn̂e, cenporem me exihra tak maxe. Tîhyapamso xa matko masî, tîhyapamso xa tak. Kawaxiyem tak erko amoro hara apun komo yesenpotome hara. Parakwe men nasî Kporin komo yamorî yaw kaari n̂ixan yaw. Ero tak n̂erpes awya hara. Ero yimaw tahruso tak nasî cenporem me awehtoponhîrî ahyapamtopo ke hara kica.

17 Ribanu pononho pen komo mîwaikekn̂e okwe. N̂examro pen waihkachonho rma awahruyas okwe. Okno pen marha meraspekn̂e okwe. Tooto pen kamxukutho yen̂en̂epen̂enho amoro okwe, yîrowonthîrî yîwîrîman̂enho marha, ewtonthîrî yakn̂in̂enho marha, ero pononho pen komo waihkan̂enho marha amoro. Noro yipu amoro kica.

18 Kakronoman̂e me ma re nai weewe ciixaputho awya? Ciin̂e ma re nakronome awya so? Anarî komo nukuiyasî bronse ero yipu xa marha ciitome. Cemaro poko kpanatanmekn̂e makî reha mîn ero yiputho kica. Tîn̂irithîrî pona enîn̂e me rma nasî ciin̂e. Yîmtapotanî ro mak n̂iir̂axe ponaro cehtopo komo me kopi.

19 Kporin komo nîwîrîmarî me men naxe weewetho yakro tîmtapotaxmu komo, Apakakî, kexe ero yipu ya okwe. Awomko tak amoro, kexe kopi toopu ya hara yîmtapotantho ya. Tîmkarinomaxi rma re nasî ooru ke, prata ke anarimaw. Esesîn me ro mak nas okwe. Ero wa so nasî enporixaputho kica.

20 On wara tko nasî Kporin komo, tîmîn yaw nasî kir̂wanî ro yaw. Ero ke tîtken̂e mak ehcoko amyamro roowo pono komo ahnoro. Noro ponaro awexirî ke so tîtken̂e ehcoko. Ero wara ehcoko.