Taa, Abakuke mtapotarî tan wekatîmyas awya so, Kporin komo yakro yîmtapotachonhîrî. Waano rma on. Weronomano rin̂e mîk xakn̂e Abakuke.

2 On wara kekn̂e, Apa kah yawno, amtapotarî wenta. Pahxa kar̂pe xa awehtopo menpekn̂e ayanan komo ya. Pahkî tko n̂icimn̂ipunwakn̂e ero yipu yenpora okwe. Ero ke oroto n̂he cma re ero wa awehtopo menpes hara. Arwonataw rma amna poko amna pînîn yaw rma cma re masî. Ero wa wîîkes awya Apa.

3 On wara xakn̂e Kaan, Teman po mokye. Kir̂wanî ro Mîk mokye Paran Yîpîn poi. Kir̂wanî ro me Noro yehtopo n̂esenpekn̂e kah yakwerî poko hakî. Kir̂wan̂he mai ham Apa, kacho n̂esencekn̂e miya ro mak roowo yakwerî poko hakî.

4 Kîkatparen̂e me xa mokye, enmarî wara rma. Pepe kan̂e n̂esenpekn̂e Noro yamorî yai tîtosom. Iito rma xakn̂e kar̂pe ro mak Noro yehtopo ceyamso mak.

5 Eper̂a cekn̂e Noro puturme. Ocoro tak xatken̂e Noro wenatho yawno pen komo.

6 Ero yinhîrî n̂ecececekn̂e tak Noro. Roowo pen tak nukuknomekn̂e kopi. Mîk hak rowon pono komo wece n̂een̂akn̂e. Ero ke tatanatken̂e tak n̂examro. Pahxanî ro mîn îîpî, pahxanî ro marha mîn matîwîn. Ero yipu rma tko n̂ewakrokekn̂e Noro yanme, n̂emacakekn̂e marha. Eroromerono mîn ahce wa so na Noro yehtopo.

7 Kusan komo ween̂e yîmîn komo yaw. N̂esemetanmekyatken̂e iitono komo. Ero wa xa marha ween̂e Mician komo yîmîn yaw so hara.

8 Kicicme na meen̂e Apa tuuna yepu? Mîrwonakn̂e eepu mko poko, tuuna imo poko marha? Ero wa na mîxakn̂e atararan yaw awcetaw, kawaru n̂ihxikrî yaw so? Amna kurunpetopo mîn atararanî mko.

9 Akrapan mayintoi, mer̂pora ro mak mahsîye awuhre waiwî. Roowo mîraconkekn̂e tuuna yepu ke.

10 Awen̂akn̂e rma Apa, îîpî mko. Ero ke n̂esewsîyakn̂e. Tuuna tak nîhcekn̂e mer̂pono pîn. N̂ewtunakn̂e xa tak tuuna imo yîmtapotarî wara. Tapockantaxmu wara xakn̂e.

11 N̂ececetoi tak kaamo, nuun̂i marha kah yaw rma. Ero wa xakn̂e awuhre yenîrî ke, waiwî, tpepeyurem. Arahnu marha n̂een̂akn̂e tpepeyurem. Ero ke n̂ececetoce.

12 Tîrwon̂e xa metar̂akn̂e roowo pore. Tîrwon̂e marha mîk hak rowon pono komo mapikmekn̂e.

13 Miya mîîcekn̂e ayanan komo yukurunpeso, anîhkapethîrî yukurunpeso marha. Kicicitho komo mîn meretîrî metapekn̂e. Noro yipu komo pun marha mipikekn̂e yîhtîpîrî n̂ixa ro yîhtarî pona roro.

14 Yîhtîpîthîrî mîparaxkekn̂e yîrahnuthîrî ke rma. Ero wa noro pen mîwaikekn̂e noro sowtatun komo mokyataw. Kar̂pe ro mak mokyatken̂e n̂examro amna yakpaxi. Ocowo wara rma mokyatken̂e cetaporisom wara. Nahwowatken̂e n̂examro amna wece tmokyataw so. Emyawnomnî komo yer̂momn̂e wara rma mokyatken̂e kopi, en̂epa me ermomn̂e wara.

15 Tuuna imo kwari rma tko metapikyakn̂e awoku kawaru yakro. Porinî ro mak mîn tuuna imo, ero kwari rma mîîcekn̂e.

16 Ero wa awtotoponhîrî yentache kîtatanakn̂e ro mak, kîmtakmakmanakn̂e marha. Mataxapu wara tak n̂ehtîkekn̂e oyocho. Oyosokmuru marha tak tatanakn̂e. Wara rma expokara wasî. Enmarî komo momokyasî, amna waparî komo yar̂macho me enmarî ha. Ahrika ero me n̂enmape, wîîkesî mak ha.

17 On wara na ka tatu amn̂e, knatîrî na epemrutuntara nai okwe piiku yepu. Epetara marha na nai knatîrî uupa yatî. Oripa yepu marha na epetara nai. Ahnoro kmararîn pono na epetara nai. Oper̂a wacan yaw marha na exihra ro mak nai kooku okwe. Paaka mîn yaw so exihra marha na nai kooku. Ero wara rma na tatu amn̂e.

18 Ero wara oyesemetanmekyataw rma tko Kporin komo poko kahwowasî. Tahwore rma wasî Kaan poko okurunpen̂e poko.

19 Kar̂pe oyehtopo rma Noro, Kporin komo, ponaro kehtopo komo. Kooso tarî wara rma n̂iir̂asî ohtarî. Îîpî yawnukn̂e ro me oriyas okre. Ero wara oriyasî Kporin komo. Taa, ero wa nasî owanorî, waano yaan̂e komo yenîn̂e n̂enîrî on waano. Oratîn wîyorkai ero waano me. Ero yipu mîn waano.