Ai, on wara wîîkes awya so, on pono komo amyamro, roowo pono kom ha. Kicicme ro mak nas amna, kan̂e pin komo amyamro okwe. Esenmecoko ha ka, yaaro wîîkesî, esenmecoko ha men.

2 N̂examro pen tak waihkacoko ha, kahra ka oyexitaw esenmecoko. On kaamo kokmamyas ha men okwe. Puruma pîpîtho cesî miya ocowo yanme ero wara rma on kaamo ces ha. Awecmamyataw so n̂enmayas ha men okwe Kporin komo yîrwonîmtopo me. Apoko so men Noro nîrwonas oko.

3 Aporin komo men epocoko amyamro tîrwonporem komo, Noro mtapotarî yewetîn̂e kom ha. Kir̂wan̂he awehtopo komo ponaro xa ehcoko, kyopono pîn me awesehtînotopo komo ponaro marha ehcoko. Ero wara awexitaw so tukurui tak na matu amn̂e Aporin komo yîrwonîmtopo me enmapuche amn̂e. Ero wa na matu amn̂e.

4 On wara naxe Piristew komo amn̂e, yarîhra tak nasî Kasa amn̂e ewtotho me mak okwe. Wemronho me marha nasî Askaron hara okwe. Astoce pononho pen komo n̂en̂epetîkexe kamarakataw rma. Naatîtho wara tak nasî Ekron hara mohkaxaputho wara.

5 Kerecita komo amyamro hara, tuuna imo yecihtawno kom ha, metwîrîmexe marha amyamro hara. Awaikacho komo poko tak nîmtapotai Kporin komo. Amyamro hara Kanan pono komo, awaikacho komo poko marha nîmtapotai Noro. Piristew komo yeken mîn Kanan. Kîwîrîmesî amoro pen roowotho. Pohnî me ro mak tak masî ero yimaw.

6 Tuuna imo yecihtarî tak nasî oper̂a nahrî yewtî me amn̂e. Oper̂a yosom mînî mko tak nas iito, oper̂a wacan marha nas iito yaake.

7 Xuta yepamtho komo rowon me tak nasî iitono roowo, asak makno etîmtoxapu komo rowon me ha. Iina cexe toh komo nahmaxi cuupu ke. Kokmamche roro Askaron pononho mîntho yaka n̂etakriyaxe Xuta yepamtho komo. N̂examro wakronomes Owî. Aporin komo Ow ha, ponaro Xuta yepamtho komo yehtopo. N̂examro poyino pen komo marha wekyas hara waapa narîtho komo. Ero wara n̂examro wiir̂asî.

8 Taa, on wara wasî anarî komo poko hara, Moabita mtapotarî wencesî oyanan komo yîwîrîyakacho kica. Amonita komo marha nîmtapowatken̂e oyanan komo poko, nîwîrîyaketken̂e kica. N̂examro rowontho amna nîwîrîmesî ro mak okwe, ketken̂e kica.

9 Ero ke n̂examro pen yîwîrîmacho poko kîmtapowasî. Yaaro xa wîîkesî, yaaro xa, waipîn me ro mak wasî, ero wa xa marha yaaro kîmtapowasî yîwîrîmacho komo poko. Aporin komo Ow ha awantoman̂e ro komo, ponaro Ixaw Yana komo yehtopo ha. Sotoma pen wara rma tak nasî Moabita komo rowontho amn̂e. Komoha pen wara marha tak nas Amonita komo rowontho hara. Peen ken̂e mak tak nasî, cewtake so marha yîmîtî ken̂arî ke. Pohnî me ro makî tak nasî yîrowonthîrî komo eroromero. Iitono komo yemyawnonho yaan̂e me tak nasî oyanan komo, etîmtoxapu kom ha. Moabita komo rowontho tak nahsîyaxe ero yimaw oyanan komo, etîmtoxapu komo, Amonita komo rowontho marha nahsîyaxe.

10 Ero wara tak naxe amn̂e n̂examro pen cehcoyoponkachonho yepetho me okwe. Kporin komo yanan komo nîwîrîyaketken̂e kica, iyopono me so nîmtapowatkekn̂e kica. Noro pîntho me ro mak n̂etahcatken̂e oyanan komo okwe, Kantoman̂e ro komo yanan kom ha.

11 Eraspeto xa nasî Aporin komo n̂examro poko. Ponaro roowo pono pen komo yehtoponho tak nîhcamnoyasî Noro. Ero yimaw tak Noro poko mak tak nahwowaxe mîk hak rowon pono komo, tanhamyan komo ro mak. Tîrowon po so rma Noro poko nahwowaxe.

12 Amyamro marha Eciopia pono pen komo, okaciparanî rma tak nasî awaparî komo me hara oko, kesî Kporin komo.

13 On wara marha nasî Kporin komo anarî komo poko hara, nohce n̂ixan pono pen komo wece tak n̂etapoyankesî. Asiriu pen komo nîhcamnoyasî. Ninipe pen tak nasî yarîhra ro mak tak okwe. Turpe tak nas iitono roowo, axawa imo wara rma nas okwe.

14 Iito tak n̂etîrapesî okno, oper̂a, paaka marha. Mîk hak mak n̂etîrapesî iito okno pîn komo. Iitono poko n̂etahsîyasî tarin̂em, kosope cetarisom, pupuri warai komo. Mîîmo mapatantho kanahtaka n̂etahsîyasî. Mîîmo yewkanapantho yaro n̂esencesî yîmtapotarî komo. Wemronho tak nasî cesenmeso mîîmotho potaw so. Mîîmo makwanantho marha n̂esenpesî setru sahsamaxapu.

15 On wara xatken̂e n̂examro Ninipe pononho pen komo, esemetanmekîra ro mak xatken̂e, erasîra ro mak n̂enmayatken̂e. On wara ketken̂e n̂examro tîropotaw so, Amna xa nasî anarî komo yopono me. Amna yecenarîno komo exihra ro mak naxe, ketken̂e kica. Enko ha ka, ewtotho me ro mak tak nas okwe. Okno pîn yeken me tak nasî ewtotho ha. Ahce okwe, kexe tak iito xari tîtosom komo kopi erotho poko, pokupoku kexe marha tamorî ke so. Ero wa tak nasî Ninipe pen amn̂e.