Kicicme Ro Mak Xerusaren Pono Komo Yehtopo N̂ekatîmyasî
3
Ewto imo pono komo poko tan kîmtapowasî, n̂esemetanmekyaxe ro mak tak iitono komo. Kicicitho ken̂e naxe kica. Tpoyino komo yemetanmekn̂e ro komo mîkyam. Kanwekn̂e komo marha mîkyam okwe.
2 Kewetîn̂e pîn komo ro mak iitono komo kica. Tpanaretopo komo yentara ro mak naxe okwe. Kporin komo pona enîn̂e pîn komo mîkyam iitono komo. Meyehra tohra ro mak naxe ponaro cehtopo komo yaka.
3 Reaw warai mak mîkyam iitono yantoman̂e komo, tmayan̂em wara naxe. Robu warai marha mîkyam iitono en̂ekano rin̂e komo, kokmache cetarisom komo warai. Tootî yocho yîmton̂e pîn mîk robu enmapuche tonotome. Noro yipu mîkyam iitono komo.
4 Kyoponkan̂e ro komo mak iitono komo, n̂examro weronoman̂e kom ha, Kemîknon̂e komo marha mîkyam. On wara marha naxe iitono komo, tîmsom pokono kom hara, omîn nîwîrîmexe, apanatanmetopo komo marha nanwekyaxe kica.
5 Kir̂wanî ro tko Mîkî Kporin komo, yîchewno kom ha. Kicicme exihnî ro mak Mîk ha. Enmar̂atîxera n̂esenpesî yaaro en̂ekano rin̂e me. Ehn̂an ro mak Mîkî. Wara rma, Kicicme wasî kica, kahra ro mak naxe akpîn komo. Ero wara naxe kica.
6 On wara tko kesî Kporin komo, Mîk hak rowon pono komo waihkan̂enho Owî. Yîmînthîrî komo tak nasî takn̂iso twacayemînhîrî mko rma. Yarîhra ro mak wiire esamathirî komo. Ero yaw so tîtosom komo exihra ro mak naxe okwe. Cecahso nasî ewtonthîrî komo. Iito exihra ro mak tak nasî tooto, cewn̂e n̂hema exihra ro mak nasî.
7 On wara wîîkekn̂e iitono komo ya, Opoko twerî tak na matu amyamro reha. Owya apanaretoponhîrî ponaro tak na matu, wîîkekn̂e cma re yîwya so. Ero wara awexitaw so awewton komo yîhcamnopîra wasî, wîîkekn̂e. N̂examro wemetanmekyakn̂e emapona roro okwe. Noro yipu rma tko pahxaxaro paketken̂e kicicitho me cehtome so ahce na poko cexitaw so.
8 Ero ke on wara kesî Kporin komo, Ow men momohcoko. Pahxaro tak kawomyasî yîwîrîmano ritohme. Mîk hak rowon pono komo wenmekyasî, mîk hak maywen kom ha. Enmekno riche tîrwon̂e xa tak n̂examro pen war̂mesî. Kîrwonîmtîkesî tak ero yimaw. Cerewre xa n̂examro pen waihkesî. Ahnoro roowo pen wakn̂iyasî orwon ke, oyehtopo yewyomacho ke.
Ixaw Yana Komo Nakir̂wames Hara Kaan Amn̂e
9 Ero yimaw tak anarî yana komo mtapotarî wakir̂wamesî ero yaro tîmtapotachome so Aporin komo yakro. Ayanan komo amna, ero ke amna cma re makronomesî, kexe. Owya tak n̂etantomapexe ero yimaw. Iito re mak nîhtînoyaxe omtapotarî yewetîtopo poko.
10 Miya ro mak cetakpaxi naxe oyanan komo, opoko tahwotaxmu kom ha. Meye naxe anarî komo Eciopia pono komo yewkuru mehxa. En̂exa rma tko owya tîmsom n̂ekyaxe.
11 Kicicme ka maxe opoko. Ero kaamo po tko tîhyapamnosom mera tak maxe kicicme awehtoponhîrî komo pona. Ero yimaw on ewto pononho komo tak wen̂epesî on poi. Ero wa wen̂epesî, Amna xa takîhsom okre, kan̂e komo. N̂examro pen wen̂epesi noro yipu komo ke yîchewnomra tak awehtome so. Ero yinhîrî tak ehcoyoponkara ro mak maxe tan oyîpînî ro po.
12 Achew so rma tko wîmcesî tîrwonporem komo, kyopono pîn me cesehtînosom kom ha. Kporin komo yosotî pona enîn̂e komo mîkyam okre. Iito rma naxe noro yipu komo.
13 Ero yimaw on wara tak naxe Ixaw Yana komo, etîmtoxapu komo, akpîn me exihra tak naxe okre, cemarontan me marha naxe okre. Cesemîknosom me yîmtapotan me ro mak naxe. Ero yimaw n̂eseresmexe, ceseresmache so n̂etakriyaxe. Cemetanmekn̂e komo pona erasîn me ro mak naxe okre, kesî. Ero wara kesî Kporin komo awya so.
Ahwotacoko Tak Kaan Poko. Noro Marha Nahwowasî Apoko So Hara
14 Taa, ewanomakî amoro Siaw yemsîrî. Emtarakacoko amyamro Ixaw Yana komo tahwore awexirî ke so. Tawake ehcoko, ahwotacoko yaaro xa tak. Ero wara tak esko Xerusaren yemsîrî.
15 Awemetanmetoponhîrî komo tak nowye Kporin komo. Aaxatî pîn komo n̂en̂epekn̂e. Awakrono komo me tak nasî Kporin komo, Ixaw Yana komo kayaritomon. Ero ke awîrîman̂e komo yenîhra tak maxe okre.
16 Ero kaamo po tak on wara kexe tooto komo Xerusaren pono komo ya, Ai, Siaw pono komo amyamro, erasîra ro mak tak ehcoko. Kar̂pera exihra ro mak ciicoko awamorî komo.
17 Awakro so wa nasî Aporin komo Kaan, Karitî xa Mîkro. Akurunpetopo komo poko n̂ekaricesî. Nahwowasî ro mak apoko so. Awereporexe so aaxe so cehtopo ke. N̂ewanomesî marha. Ero wara nahwowasî Noro apoko so.
18 Iito naxe ahwon komo marha. Ahwora naxe Kaan poko esenmekîra awexirî ke so. Tîwîrîyakaxmu kîwyam okwe, kan̂e komo mîkyam. Noro yipu komo tak wenmekyas hara.
19 Ero yimaw tak awemetanmekn̂enhîrî komo wîwîrîmesî. Apoyino pen komo tak wenmekyasî yîhrepun komo. Ahnoro miya so en̂epexapunhîrî pen komo wenmekyas hara. Ero yimaw tak oyanan komo poko nahwowaxe hara mîn hak rowon pono komo. Kir̂wan komo ro mak mîkyam Ixaw Yana komo, kexe iitono komo, yîwîrîyakan̂enhîrî komo ahnoro.
20 Ero yimaw kenmekyaxe so. Aweken komo pona kekyaxe so hara. Apoko so tak nahwowaxe anarî yana komo ahnoro, roowo poko hakno komo. Kir̂wan komo ro mak mîkyam Ixaw Yana komo, kexe apoko so. Ero wa kexe apoko so apoyino komo yekyataw awero ro so rma. Waapa narîtho komo mîkyam wekyasî iina hara. Ero yimaw cekaiporesom me xa maxe, kesî. Ero wara kesî Kporin komo.