Taa, pahxa tî kayaritomo me xakn̂e Tar̂u. Asakî cimn̂ipu xakn̂e kayaritomo me ehtoponhîrî. Ero yimaw tak Axew n̂encekn̂e Kporin komo mtapotarî. Weronomano rin̂e mîk xakn̂e Axew. Sorobabew ya yîn̂ekatîmrî tî mîn n̂encekn̂e, Xoswe komo ya. 6-înhîrî nuun̂i po n̂encekn̂e, yihcirî po ha ka kaamo po. Xuta yepamtho kopenato tî mîk xakn̂e Sorobabew, Seawciew mumuru ha. Xosatake mumuru tî mîk xakn̂e Xoswe hara, Kaan yaka cewomsom.

2 On wara kacho tî n̂encekn̂e, Ai, Axew, on wara wîîkes awya. Aporin komo Ow ha, awantoman̂e ro komo. On wara kexe moxam oyanan komo, Kporin komo mîn ciitopo mera ka nasî, kexe okwe.

3-4 Weronomano rin̂e mîk xakn̂e Axew. On wara kekn̂e Kporin komo yîwya yîn̂ekatîmrî, Ai, Ixaw Yana komo, kir̂wanî ro yaw so maxe amîn komo yaw. Onî reha omîntho nasî wemronho me mak kica. Kir̂wan̂he ma re nai ero wara exitaw omîn awya so?

5 Ero ke on wara wîîkes Ow Aporin komo, awantoman̂e ro komo, Awehtopo komo poko men esehtînocoko takîhso.

6 On wara maxe okwe, mer̂pora ro makî cma re miice anatîrî komo yatho. Amn̂e anatîrî komo yeperî yenmekyataw wahra ro mak xakn̂e okwe cenmesom. Meseresmexe rma re erepotan me mak okwe. Awokru komo rma ciki re meer̂axe awecenarîra so rma okwe. Aponon komo rma re mamruyaxe, mîkomsînaxe rma okwe. Apurantan komo rma re mahsîyaxe awetapickachonîrî komo yepetho, cewtakem yaka tko menkayaxe okwe apurantan komo yen yaka.

7 On wara men kesî xa hara Aporin komo awya so, awantoman̂e ro komo, Awehtopo komo poko men esehtînocoko takîhso.

8 Îh pona etocoko weewe kotoso omîn me ciisom. Omîn tak ciicoko tawake oyehtome ero poko. Ero cirirî ke tak kir̂wanî ro me oyehtopo menpexe okre, kesî Noro awya so.

9 Mer̂pora wenmekyas amn̂e onatîrî yeperîrî, mîîketken̂e cma ha re. Wahra makî tko menmece okwe. Amîn komo yaka an̂enmekîthîrî komo rma Ow pahyakn̂e oyapepen ke rma. Ahce poyero wa puu wîîkekn̂e ero poko? Omîn poyero puu wîîkekn̂e. Wemronho me mak nasî omîntho kica. Cemyarke maxe amyamro okwe amîn komo poko mak.

10 Ero wara awexirî ke so cicakî namenmekyasî kaapu. Naatî yepetanmekîra marha nasî roowo okwe.

11 Tuuna mokuhtorî wan̂ikye amararîn komo pona so, îh pona so, puruma pona so, uupa yukun pona so, ciixan pona, aseci pona so. Tuuna mokuhtorî wan̂ikye ahnoro anatîrî komo pona, tooto komo pona marha, awoh komo pona so. Ahnoro an̂irithîrî komo pona so wan̂ikye tuuna mokuhtorî, wîîkes awya so, kekn̂e Kporin komo.

12 Ero yinhîrî Kporin komo mtapotarî tak n̂ewehcatken̂e n̂examro, ponaro cehtopo komo mtapotarî. Axew n̂ekatîmîtho rma n̂ewehcatken̂e weronomano rin̂e n̂ekatîmîtho. Ero poko Kporin komo nantomatho rma mîk xakn̂e Axew. Ero ke tak cetken̂e Kporin komo mtapotarî yanme. Noro ponaro xa xatken̂e okre. On wara xatken̂e ewetîn̂e komo, Sorobabew, Seawciew mumuru, Xoswe, Xosatake mumuru, Kaan yaka cewomsom ha, ahnoro Xuta komo, etîmtoxapu kom ha.

13 Ero yinhîrî on wara kekn̂e hara Axew Xuta komo ya, On wara marha kesî Kporin komo awya so, Awakro so rma was ha, kesî, kekn̂e. Kporin komo mtapotarî rma mîn n̂ekatîmyakn̂e yîwya so.

14-15 Ero wa n̂examro nahworekn̂e Kporin komo tîmîn ciitopo poko. Sorobabew nahworekn̂e, Xuta komo kopenato, Xoswe, Kaan yaka cewomsom ha, ahnoro Xuta komo, etîmtoxapu kom ha. Noro yipu komo nahworekn̂e tîmîn ciitopo poko. Ero ke tak mokyatken̂e Kporin komo mîn ciiso, ponaro cehtopo mîn ciiso ha. Asakî cimn̂ipu xakn̂e kayaritomo me Tar̂u yehtoponho, 6-înhîrî nuun̂i po, 24-nhîrî kaamo po, ero po xa n̂ihciyatken̂e Kporin komo mîn ciitopo. Ero wara xatken̂e.