Ero yinhîrî tak kesewyar̂akn̂e xa hara. Iito tak tooto ween̂akn̂e xa hara. Xapopo warai ween̂akn̂e noro yemyaw. Ewto yukuknomacho mîn xakn̂e xapopo warai.

2 Ero ke on wara wîîkekn̂e yîwya, Ai, oyakno, ahna mîîce? wîîkekn̂e. On wara kekn̂e, Xerusaren yukuknomaxi kîwcesî, ewto yukuknomaxi. Akwerî wukuknomesî, ehyatkawnon marha, kekn̂e owya.

3 Iito rma ka xakn̂e ancu, oyakro tîmtapotaxmu rma. Ohyai tak cekn̂e. Ero yimaw rma anarî mokyakn̂e hara ancu ohyai toxapu esepotpona.

4 On wara kekn̂e mohxapu ohyai toxapu ya, Ai oyakno, Kporin komo mtapotarî ekatîmta xa hara noro ya, kar̂pamxan ya. On wara kasko yîwya, On wara tak nasî Xerusaren amn̂e, wacamnî me tak nasî mer̂pora exirî ke iipono komo. Mer̂pora marha nasî okno komo iitono komo yoku.

5 Owî rma tko wasî ewto wacan me, kesî Kporin komo. Wehto warai me wasî ewto mamhokono me. Ewto rakatawno me marha wasî. Ero wara wasî Xerusaren poko. Kir̂wan̂he iitono komo yehtopo me tak wasî, kesî Kporin komo, kasko yîwya so.

6 On warai xa marha ekatîmko Aporin komo mtapotarî xa hara. Ai, oyanan komo, emahcicoko roowo poi nohce n̂ixan poi. Pahxa miya ro mak kakpayatken̂e so, nohce yaw roro, suu yaw roro, resce yaw roro, oesce yaw roro.

7 Amohcoko tak amyamro Siaw pononho komo. Emahcicoko amyamro Babiron̂a yemsîrî warai komo chewnonho.

8 On wara marha kesî Kporin komo, awantoman̂e ro komo, Kyopono ro me cehtopo n̂enpesî mîk hak rowon pono komo yemetanmekrî ke. Ero wa ciitome n̂examro yar̂maxi oyen̂epesî, awemyawnonhîrî yaan̂enho komo yar̂max ha. Amyamro awapeyataw so aaxatî pîn komo ya, Aporin komo yewru yatho yapen̂e wara rma naxe oko.

9 N̂examro wece tak kapockanwasî ar̂machome so. Ero yimaw tantonînhîrî komo yanton me tak naxe n̂examro hara awemetanmekn̂enhîrî komo. Ero yimaw tak on wara mîîkexe opoko, Kporin komo n̂en̂epetho mîkro ham, kantoman̂e komo n̂en̂epetho ham, mîîkexe tak opoko ero yimaw.

10 On wara marha kesî Kporin komo, Ai, Siaw yemsîrî amyamro, on wara wîîkes awya so, ewanomacoko tak ha, ahwotacoko ha. Kmokyasî rma ahyaka so. Ahyawno ro komo me tak wasî, kesî Kporin komo.

11 Ero yimaw tak mîk hak rowon pono komo naxe Aporin komo pokono me, mer̂pora ro mak tak naxe ero warai me. Oyanan me xa marha tak naxe n̂examro hara. Ahyawno ro komo me tak wasî. Ero yimaw on wara mîîkexe opoko, Kporin komo yanme mohxapu mîkro ham, kantoman̂e ro yanme mohxapu ha, mîîkexe opoko.

12 Ahnoro Ixaw Yana komo rowon nasî Kporin komo rowon me. Xuta komo rowon xa tak nahsîyasî tîrowonî ro me. Xerusaren marha nahsîyasî xa hara cewton me.

13 Tîtken̂e tak ehcoko amyamro tooto komo ahnoro Kporin komo mtapotarî yentachome. Cekenî ro poi tak n̂epatakai. Ero wa nasî Noro.