Ero yinhîrî tak on wara xakn̂e oyakro tîmtapotaxmu, Xoswe n̂enpekn̂e owya, Kporin komo yaka cewomsom. Kporin komo yancun yeepatai n̂ecececekn̂e Xoswe. Iito marha n̂ecececekn̂e Satanas hara. Xoswe panaw xakn̂e kaari n̂ixa. Noro pen ponanîmton̂e me kr̂a xakn̂e Satanas iito.

2 On wara tko kekn̂e Kporin komo Satanas ya, Tooto komo Porin Ow ha. Kicicitho amoro Satanas. Xerusaren men̂ekan̂enho rma Ow oyekenî ro me. Noro yipu rma wîikes awya, Kicicitho amoro. Wehto kametho warai rma moso Xoswe, wehto ywai mohkaxapu warai rma, kekn̂e.

3 On wara tko xakn̂e Xoswe, tusmuyem yaw xakn̂e kica poono yaw. Ero wa xakn̂e kica ancu yeepatai rma.

4 Iito rma tko xatken̂e anarî komo Xoswe panaw cececetoso. Ero ke n̂examro ya kekn̂e ancu on wara, Tusmuyemtho mohkacoko noro ponontho, kekn̂e. Ero yinhîrî tak on wara kekn̂e Xoswe ya hara, Taa, enko, kicicme awehtoponhîrî tak wou. Kir̂wanî ro ke tak kpononmes hara okre, kekn̂e.

5 Ero yinhîrî on wara wîîkekn̂e ow hara, Kir̂wan tak amrupoko noro xapikan hara yusmumnî, wîîkekn̂e. Ero ke kir̂wan tak namrupetken̂e yîwya yixapikan. Noro pononmetken̂e marha. Iito rma n̂ecececekn̂e Kporin komo yancun noro ponon yamrupetaw.

6-7 Ero yinhîrî tak on wara kekn̂e Kporin komo yancun Xoswe ya, Ai Xoswe, on wara kesî Kporin komo awya kantoman̂e ro, Oyehtopo yaw roro xa esko. Owya apanatanmetopo komo marha ewetko. Ero wara awexitaw omîn yenîn̂e me xa maxe. Omîn yaka tmohsom komo panatanmekn̂e me masî. Tan naxe ancu komo apanaw. N̂examro chere tîtosom me marha kiir̂asî, kekn̂e.

8 Ero yinhîrî on wara kekn̂e hara Kporin komo, Omtapotarî xa hara ka entacoko, Ai, Xoswe amoro, on wara wîîkes awya, awakrono komo ya marha, awepatai ceremaxmu komo ya ha. Awehtopo komo kuknon amyamro. Amn̂e tak oyanton wekyasî. Weewe peremru, kacho Mîk Noro. Noro wekyasî xiya.

9 On toopu encoko, Xoswe yamrinaka wiirî ero. 7 nasî ero yewru. Ero poko marha Ow mewresî omtapotarî, wîîkes Ow Aporin komo. Ero kaamo po rma tak tantono komo yehtoponho wowyasî, kicicme ehtoponhîrî kom ha.

10 Ero kaamo po tak on wara maxe ahnoro, amîtwono komo man̂ikyaxe. On wara mîîkexe, Mokuhra mai oyenso? Onatîrî makataka erematamko yiixe awexitaw uupa yatî yapomyaka, piiku yepu yapomyaka ha na, mîîkexe, wîîkesî. Ero wara wîîkes Ow Aporin komo, awantoman̂e ro komo, kekn̂e.