Ero yinhîrî tak mokyakn̂e xa hara ancu, oyakro nîmtapowakn̂e noro. Yîwînîkyatawno wara wîxakn̂e. Oyenpakekn̂e tak.

2 On wara kekn̂e owya, Ai Sakarias, ahce meen̂a? kekn̂e. On wara weyukyakn̂e, Ramha yecepu ween̂asî ooru ciixapu. Tutum nasî ero kanahtaw. 7 ramha marha nasî ero poko. 7 marha nasî tpotokoyem, katî totopo mko mîn ha ramha yaka.

3 Oripa yepu marha ween̂asî asakî, ramha yecepu panaw. Tutum mehxa ween̂asî oripa yepu kaar̂i n̂ixa, tutum xehxa ween̂asî anarî hara oripa yepu, poowa n̂ixa hara.

4 Ero ke on wara wîîkekn̂e ancu ya, oyakro tîmtapotaxmu ya, Apa, ahce kuknon mîn ha? wîîkekn̂e.

5 Yîhtînopîra mai ero mko? kekn̂e owya. Pîra, camkî was okwe ero poko, wîîkekn̂e.

6 Ero ke on wara kekn̂e noro owya, On wara men kesî Kporin komo, Sorobabew ya, Kar̂pe awehtopo ke mak ahce na cirihra ro mak masî. Oyekatî ke mak xa yo awemyawno miir̂asî, kes awya Kporin komo, kantoman̂e ro komo, kekn̂e owya.

7 On wara marha kekn̂e owya, Onoke xa amoro îîpî imo warai? Ahyaka cetaw Sorobabew capahno me tak mehtîkes hara. Ero yimaw tak toopu n̂iir̂as hara noro mîîmo peyecepu me. Ero ciir̂ataw rma kar̂pe tak nîmtapowaxe tooto komo. On wara kexe, Kir̂wan̂he ciri xe wasî Kaan mîn, kir̂wan̂he xa ciri xe wasî, kexe kar̂pe.

8-9 Ero yinhîrî Kporin komo mtapotarî tak wencekn̂e xa hara. On wara kekn̂e owya, On omîn yapon ka n̂iire Sorobabew tamorî ke rma. Noro rma tak omîn n̂iitîkesî amn̂e tamorî ke rma. Ciitîkache tak on wara mîîkexe, Kporin komo yanton mîkro ham Sakarias, kantoman̂e ro yanton, mîîkexe tak opoko.

10 Onoke xa ero pîntho me n̂een̂a enmacho, wahrai ciitopo me enmacho ha? Nahwowaxe rma tko moxam, 7 komo, patawnon yukuknomacho yeen̂ataw Sorobabew yemyaw. Aporin komo yewru mîn 7 kom ha. Roowo poko hak cesewyarisomu mko mîn, kekn̂e owya.

11 Ero yinhîrî on wara wîîkekn̂e ancu ya, Ahce kuknon mînî mko oripa yepu asak hakno, ramha yecepu panawno mko. Anarî nasî kaari n̂ixa, anarî poowa n̂ixa, ahce kuknon mînî mko?

12 On wara wîîkekn̂e xa hara yîwya, Ahce kuknon mînî mko hara oripa yepu peremru asak hakno? Ero mko poi cesî katî tpotokoyem yaro, katî totopo yaro, ooru ciixapu yaro ha? Ahce kuknon ero mko ha? wîîkekn̂e yîwya.

13 On wara oyeyukyakn̂e, Yîhtînopîra ma mai ero? kekn̂e owya. Pîra ro mak okwe, camkî was okwe ero mko poko, wîîkekn̂e.

14 Ero ke on wara kekn̂e owya, Kporin komo yanton me yîhkapexapu mîkyam asak hakno, roowo poko hakno komo kayaritomon yanton me cehsom, kekn̂e. Ero wara kekn̂e ancu owya.