Ero yinhîrî tak kesewyar̂akn̂e xa hara. Iito oyepatai ween̂akn̂e karita tamomisom. Kaikokoro cekn̂e.

2 On wara kekn̂e xa hara ancu owya, Ai Sakarias, ahce tak meen̂a hara? On wara weyukyakn̂e, Karita ween̂asî tamomisom. Kaikokoro cesî kopi. Porin mîn, 9 metru ehyatkawnon, 4,5 metru akwerî hara. Ero yipu ween̂asî, wîîkekn̂e.

3 On wara tak kekn̂e ancu owya, Kaan ya yîwîrîmano ritopo mîn ha. Miya tîtosom mîn roowo yakwerî poko hakî. On wara kes ero, yîratai mewrexapu, Ahnoro cen̂epan̂em pen komo tak naxe amn̂e cen̂epesom me, kesî. On wara kesî yîmkai mewrexapu hara, Ahnoro cemarontaxmu pen komo tak naxe cen̂epesom me hara amn̂e. Ero wa kesî karita, kaikokoro tîtosom.

4 On wara men kesî Kporin komo, kantoman̂e ro, Ero tak wen̂epesî miyan komo yîwîrîmacho me rma. Cen̂epan̂em komo mîn yaka n̂ewomyasî. On wara kexe anarî komo, Kporin komo n̂entarî me xa tan wîîkesî yaaro xa, kexe cemaro poko rma kica. Ero wa kan̂e komo mîn yaka marha n̂ewomyasî owya yîwîrîmacho komo. Pahkî n̂enmayasî noro yipu komo yaw. Yîmînthîrî komo tak n̂ixkes okwe. Eceputhîrî mohketîkesî, toopu marha nakpayasî mîîmo me ciixapunhîrî. Ero wara kr̂a noro yipu komo mîntho ciin̂e mîn karita.

5 Ero yinhîrî tak ohyaka mokyakn̂e xa hara ancu, oyakro tîmtapotaxmu rma. On wara tak kekn̂e hara owya, Ai Sakarias, esewyariko xa hara. Ahce mîn meen̂a miya tîtosom hara? kekn̂e owya.

6 Ahce na mîn ha, yîhtînopîra wasî, wîîkekn̂e. On wara kekn̂e noro, Kahxapu mîn, mooxe tîtosom, kekn̂e, Ero wara n̂esenpexe tooto komo ahnoro, roowo poko hakno komo, kekn̂e.

7 Ero yinhîrî tak kahxapu nahrunkekn̂e hara. Xumbu ciixapu mîn xakn̂e ahrutopo. Kahxapu yaw tak wooxam ween̂e ceremaxi.

8 On wara kekn̂e hara ancu owya, Kicicme tooto komo yehtopo mîkro, kekn̂e. Ero yinhîrî tak wooxam n̂enkayakn̂e hara kahxapu yaka. Ahrutopo tak n̂erewnukyakn̂e hara xumbu cewararîno. Ero ke rma kahxapu nahruyakn̂e.

9 Ero yinhîrî kesewyar̂akn̂e xa hara. Iito oyepatai tak ween̂akn̂e wooxam xa hara asakî. Tapokem mîkyam xatken̂e. R̂awr̂a warai yapoke xatken̂e. Powpow kan̂e mîn xakn̂e aporî komo. Taa, kahxapu tak nanîmyatken̂e n̂examro, kaikokoro tak naar̂atken̂e.

10 Ahna naar̂atu kahxapu? wîîkekn̂e ancu ya, oyakro tîmtapotaxmu ya.

11 On wara oyeyukyakn̂e, Sina pona naar̂axe. Iito tak n̂iir̂axe yîmîn. Ciitîkache tak ero yaka n̂iir̂axe kahxapu ekenî ro pona, kekn̂e. Ero wa kekn̂e ancu owya.