Ero yinhîrî tak kesewyar̂akn̂e xa hara. Tarara tak ween̂akn̂e, 4. Îîpî marha ween̂akn̂e asakî. Bronse mîn xakn̂e îîpî, ero re mak. Îîpî yotari tak mokyakn̂e tarara.

2 Kawaru komo xatken̂e tarara yaan̂e. Poturu yaan̂e xakn̂e cucure so. Ponan yaan̂e xakn̂e cicwii so.

3 3-înhîrî yaan̂e xakn̂e tumutwe so. 4-nhîrî yaan̂e kwacakwacape so hara. Karitî komo mîkyam xatken̂e kawaru.

4 Ero ke on wara wîîkekn̂e ancu ya, owya ekatîmn̂e ya, Ahce kuknon mîn hara? wîîkekn̂e.

5 On wara oyeyukyakn̂e ancu, ekatî komo kuknon mîkyam, 4 ekatî kom ha. Kporin komo yawno mîkyam, ahnoro roowo poko hakno komo kayaritomon yawno ha.

6 En̂exa tîtararan naar̂axe cicwiyem komo miya nohce yaw roro. Tumutwem komo naar̂axe tîtararan cicwiyem komo wenari rma. Kwacakwacano komo reha cexe suu yaw roro hara.

7 Ero ke cetken̂e tak kawaru karitî kom ha. Cerewre tîto xe xa xatken̂e. Roowo poko hakî cetari xe xatken̂e. Ero yinhîrî on wara kekn̂e Kporin komo yîwya so, Miya so etaricoko roowo poko hakî, kekn̂e. Ero ke miya so tak cetken̂e roowo poko hakî.

8 Ero yinhîrî tak on wara kekn̂e hara ancu owya, Ai, Sakarias, nohce yaw roro tîtosom komo tak oyereporetken̂e nohce n̂ixan komo poko, kekn̂e. Ero wa kekn̂e Kporin komo owya.

9-10 Ero yinhîrî Kporin komo mtapotarî wencekn̂e xa hara. On wara kekn̂e owya, Ai, Sakarias, mînto naxe waapa narîtho komo. Babiron̂a poi mohxapu komo. Ewtai, Tobias, Xetaias, ero wa nasî n̂examro yosotî. N̂examro n̂ekîtho ahsîta. Ero yinhîrî tak arko Xosias mîn yaka, Sopon̂ias mumuru mîn yaka. Ero kaamo po rma etoko.

11 Prata mîn yîn̂ekîthîrî komo, ooru marha. Ero tak akîhtoko aroko me. Akîhtoche Xoswe tîpîrî pona tak cirko, Xosatake mumuru tîpîrî pona. Ohyaka cewomsom mîk Xoswe.

12 On wara kasko yîwya, Ai, oyakno on wara men kesî Kporin komo, kantoman̂e ro, Tan men n̂esenpesî tooto amn̂e, Naatî Peremru, Mîk ha, noro yosotî. Noro xa nasî cekenî ro po tatîhtaxmu wara. Aporin komo mîn tak n̂iir̂asî Noro.

13 Yaaro wîîkesî, Noro xa Aporin komo mîn n̂iir̂as amn̂e. Kayaritomo ponon yaw xa nasî Noro kir̂wanî ro yaw. Kayaritomo yapon pona n̂eremesî. En̂exa rma antomano n̂iir̂asî. Kaan yaka cewomsom me marha nasî Noro iito tapon poi rma. Cewn̂anî rma Mîk ha, asakî tko nasî Noro yemyawno. Ohyaka tmohsom me nasî, antomano rin̂e me marha. Ero wara exirî ke erasîn me ciino riin̂e me nasî.

14 Taa, anakîtothîrî tak tîmko iitono komo ya, kayaritomo yarokorî. Eren, Tobias, Xetaias, Een. Sopon̂ias mumuru mîk Een ha. N̂examro ya tîmko. Ero rma tak nasî omîn yaw, ponaro ehtome so oyanton komo iitono kom ha. Aporin komo mîn yaw rma nasî.

15 Meyeno komo tak mokyaxe Aporin komo mîn ciiso. Ero yimaw on wara mîîkexe opoko, Kporin komo yanme mohxapu ham mîkro Sakarias, mîîkexe yaaro. Ero wara rma maxe amn̂e Aporin komo Kaanî mtapotarî yewetîn̂e me xa awexitaw so. Ero wa maxe okre.