Ero yinhîrî tak 4 cimn̂ipu xakn̂e kayaritomo me Tar̂u yehtoponho. Ero yimaw Kporin komo mtapotarî wencekn̂e xa hara, Sakarias ow ha. 9-nhîrî nuun̂i po wencekn̂e, Kisrew po. 4-nhîrî kaamo po xa wencekn̂e.

2 Ero yimaw on wara tî xatken̂e Betew pono komo, kîrkomo n̂en̂epetken̂e Kporin komo mîn yaka. Sarese, Hexen-Mereke, n̂examro yakrono komo, ero warai komo n̂en̂epetken̂e iina. Kaan yakro yîmtapotaxi tî cetken̂e.

3 Cesenta xe tî xatken̂e tîmsom pokono komo yakro, Kporin komo mîn yawno komo ya. Weronomano rin̂e komo ya marha ka xe tî xatken̂e. On wara ketken̂e, Ai, apa komo, ahce wa amna nai awya so? Pahkî eseresmara nas amna anarimaw so. Amna marha nîwracesî ero yimaw so. 5-nhîrî nuun̂i po roro ero wara nas amna. Yaake cimn̂ipu nasî ero wara amna yehtoponho. Ahce wa katî amna nai awya so, ero wara exihra tak nai amna awya so? ketken̂e yîwya so.

4-5 Ero yinhîrî tak Kporin komo mtapotarî wencekn̂e. On wara kekn̂e owya, Ai, Sakarias, on wara kasko iitono komo ya, tîmsom pokono komo ya marha kasko, Ai, oyakno komo, pahkî mîxatken̂e meye Babiron̂a po, 70 cimn̂ipu mîxatken̂e. Iito awexitaw so pahkî eseresmara mîxatken̂e, mîwracetken̂e marha ero yimaw so. 5-nhîrî nuun̂i po ero wara mîxatken̂e, 7-nhîrî nuun̂i po marha ero wara mîxatken̂e. On wara tko wîîkes awya so, oponaro ma re mîxatken̂e eseresmara awexitaw so, oponaro xa mîxatken̂e ha awya so?

6 Onoke ponaro awehtome so meseresmetken̂e hara, wooku marha meer̂atken̂e? Aponaro so rma awexirî ke so tko na meseresmetken̂e?

7 On wara wîxakn̂e Ow Aporin komo, pahxa omtapotarî wekatîmyakn̂e aweronoman̂e pen komo ya. Oroto wîîkes awya so ero wara kacho rma wekatîmyakn̂e yîwya so. Ero yimaw mer̂pora xatken̂e Xerusaren pono komo. Cerepore so xatken̂e ahce na poko ehn̂an me. Ixaw Yana komo marha xatken̂e cekenke so suu n̂ixan po, woskara po so marha. Ero wa exitaw so wekatîmyakn̂e omtapotarî yîwya so, kasko yîwya so, kekn̂e.

8-9 Ero yinhîrî Kporin komo mtapotarî tak wencekn̂e xa hara, Sakarias ow ha. On wara kekn̂e owya, On wara men wîîkes Ow Aporin komo, awantoman̂e ro komo, Ai, oyanan komo amyamro, on wara xa wîîkes awya so, yaaro mak en̂ekano ciicoko. Apoyino komo pînîn yaw marha ehcoko, esemetanmekyataw so akronomacoko.

10 Iin̂o waixapu komo emetanmekîra ro mak ehcoko, rikomo komo, yîîmîhnî komo, acheka so mohxapu komo, emyawnomnî komo, noro yipu komo emetanmekîra ro mak men ehcoko. Apoyino komo yemetanmetopo yîhtînopîra marha ehcoko, wîîkekn̂e aporin pen komo ya.

11 Omtapotarî yentara ro makî tko xatken̂e aporin pen komo okwe. Ohyai tak n̂etaknametken̂e, n̂epanayahruyatken̂e marha okwe omtapotarî yentara cehtome so.

12 Tîropotarî komo ceipamnoyatken̂e saama wa mak okwe. Tpanatanmetopo komo yenta xera ro mak xatken̂e kica. Omtapotarî wekatîmyakn̂e aweronoman̂e komo ya, pahxan pen komo ya. Oyekatî ke rma wîhtînomexpekn̂e yîwya so. Aporin komo Ow, awantoman̂e ro komo Ow ha. Omtapotarî yenta xera ro mak xatken̂e kica. Ero wa exirî komo yanme kîrwonakn̂e ro mak tak n̂examro poko. Aporin komo Ow ha awantoman̂e ro kom ha.

13 Omtapotarî men ka entacoko, wîîkekn̂e cma re ka yîwya so. Omtapotarî tko entara xatken̂e kica. Ero yinhîrî oyakro tîmtapota xe tî xatken̂e hara. Apa, amna mtapotarî cma re mencesî, ketaw n̂examro hara, yîmtapotarî komo makîrha entara ro mak wîxakn̂e Ow hara. Ero wara wîxakn̂e, wîîkes Ow Aporin komo, awantoman̂e ro kom ha.

14 Ero wa exirî komo ke n̂examro pen wakpayakn̂e ocowo ke cetapomrisom ke. Mîk hak rowon pono komo cheka so wakpayakn̂e, tînîhtînorî pîn komo cheka. Pohra tak xakn̂e yîrowonthîrî komo. Erotho pore tohra ro mak xatken̂e pawana komo. Ero pore mokuhra marha xatken̂e. Pohnî me ro mak tîrowonthîrî komo n̂iir̂atken̂e n̂examro rma. Tpoxwemînhîrî ero wa n̂iir̂atken̂e okwe. Ero wa xatken̂e okwe.