1-2 Ero yinhîrî tak Kporin komo mtapotarî wencekn̂e xa hara. On wara kekn̂e owya, On wara marha wîîkes awya so, Siaw pono komo xe ro mak wasî. Ocorono wara ro mak nasî oropotarî yiixe so oyehtopo ke.

3 On wara marha wîîkes Ow, Aporin komo, Ketîrames hara Siaw pona. Xerusaren pono ro me tak was amn̂e. Ero yimaw on wara kacho me tak nasî Xerusaren ero yimaw, Yaarono komo Yewton, kacho me nasî. On wara kacho me marha nasî, Aporin Komo Yîpîn, Awantoman̂e ro Komo Yîpîn ha. Kir̂wanî ro Îîpî, kacho me marha nasî. Ero wa kacho me nasî Xerusaren ero yimaw.

4 On wara marha wîîkes Ow Aporin komo, awantoman̂e ro komo, Xerusaren yesamarî yakumyaw tak n̂eremexe poritomo komo, nor̂wa komo marha. Tamoyiy so n̂etar̂axe poritomotho me cexirî ke, nocwakomo me cexiri ke so marha.

5 Mer̂pora marha naxe kîîrî mren komo ewto yesamarî yaw so, woosî mren komo marha. Iito so n̂eseman̂iyaxe okre.

6 On wara marha wîîkes Ow Aporin komo, Meserepokexe xa na ero wa kacho poko. Ahce wara nai owya hara, Ow hara keserepoke ero yipu poko awya so? kesî Kporin komo, kantoman̂e ro.

7 On wara marha wîîkes Ow Aporin komo, oyanan komo wukurunpesî amn̂e resce n̂ixan komo chewnonho, oesce n̂ixan komo chewnonho marha.

8 Oona tak n̂examro wekyas hara Xerusaren pona hara. On pono ro me tak naxe ero yimaw. Oyananî ro me tak naxe. Ponaro n̂examro yehtopo me marha was Ow hara. Kir̂wan̂he wasî n̂examro poko. Ahce wa na n̂examro ciir̂ataw owya yaaro mak wiir̂asî.

9 On wara marha wîîkes Ow Aporin komo, awantoman̂e ro komo, aweronoman̂e komo mtapotarî mencexe oroto. Pahxa rma n̂examro xatken̂e tan omîn yapon ciir̂ataw, Aporin komo mîn yapon ciir̂ataw ha. Ero ke kar̂pe tak etapickacoko oroto omîn ciitîkachome.

10 Pahxa ka, omîn yapon cirihra ka exitaw apurantan komo yahsîra ro mak mîxatken̂e awetapickachonhîrî komo yepetho, awoh komo yapickatoponho yepetho yahsîra marha mîxatken̂e. Cerahso mak metar̂atken̂e amîn komo yai. Ero wa xa marha mîmokyatken̂e hara. Awaparî komo pona mak mer̂aswatken̂e okwe. Etîxatî pîn me kiir̂atken̂e so amîtwono komo yakro rma okwe.

11 Oroto tak anarme wasî moxam poko oyanan komo poko, etîmtoxapu komo poko. Pahxan pen komo xatken̂e cerahso. Ero warahra tak n̂examro wiir̂asî oroto, wîîkes Ow Aporin komo, awantoman̂e ro komo.

12 Oroto tak anatîrî komo yatho yeyamuche awya so kir̂wan̂he natîkwasî. N̂eperwasî marha anatîrî komo uupa yatî okre. Naatî yewtî me xa tak nasî amararîn komo. Kah yai marha mokyasî cicakî. Ero warai ke moxam oyanan komo yakwenho wakresî amn̂e.

13 Mîk hak rowon pono komo yîwîrîman̂e me makî ka mîxatken̂e okwe. Ero wa ka mîxatken̂e amyamro Xuta komo, Ixaw Yana komo marha. Amn̂e tak kukurunpexe so okre. Owya akronomano ritopo yehyun me tak maxe okre. Ero ke erasîra ehcoko. Kar̂pe xa matko ehcoko.

14 On wara marha wîîkes Ow Aporin komo, Pahxa orwonmekyatken̂e aporin pen komo. Ero ke n̂examro pen yîwîrîmacho tak wîhtînoyakn̂e anarme esehtînopin me ro makî, wîîkes Ow Aporin komo, awantoman̂e ro kom ha.

15 Oroto tak anarme Xerusaren pono komo ciitopo wîhtînoyasî, Xuta komo ciitopo ahnoro. Awakronomacho komo xa hara wîhtînoyasî, anarme esehtînopîn me ro mak xa hara. Ero ke erasîra ehcoko.

16 Ero ke on wara xa ehcoko, Yaaro tîmtapotaxmu me mak ehcoko amîtwono komo yakro. Yaaro marha en̂ekano ciicoko, tawake marha ehcoko apoyino komo poko.

17 Amîtwono komo yemetanmecho poko esehtînopîra ro mak ehcoko. Poxumra ro mak entacoko on wara kacho, Kaan n̂entarî me tan wîîkesî yaaro xa, kacho tohnaw ketaw. Ero wara kacho xatî pînî ro mak Ow ha, wîîkes Ow Aporin komo.

18-19 Ero yinhîrî tak wencekn̂e xa hara Kporin komo mtapotarî, kantoman̂e ro mtapotarî. On wara kekn̂e owya, Pahxaro tak tahwore maxe okre eseresmara awehtopo komo yimaw. 4-nhîrî nuun̂i po, 5-nhîrî nuun̂i po, 7-nhîrî nuun̂i po, 10-înhîrî nuun̂i po, ero po eseresmara awehtopo komo tak nasî awahwotacho komo me hara. Ero wa tak maxe amn̂e amyamro Xuta yepamtho komo. Ero ke tpoxwe tak encoko yaaro cesehtînosom me awehtopo komo, etpoko tawakem me awehtopo komo marha. Ero wa awehtopo komo ponaro xa ehcoko.

20 On wara marha kesî Kporin komo awya so, Anarî yana komo tak mokyaxe oona, mîn hak pono komo, ewto pono kom ha.

21 On wara naxe anarî ewto pono komo, anarî ewto pona cexe. On wara tak kexe iitono komo ya, Kaikatko yohno Kporin komo yakro yîmtapotaxi, yîmtapotarî yentaxi marha. Owî marha kmokyasî, kexe takî.

22 Anarî yana komo mokyaxe mer̂pono pîn kom ha. Mîk hak rowon pono komo mokyaxe, karitî kom ha. Kporin komo mtapotarî yentaxi wa mokyaxe Xerusaren pona. Noro yakro yîmtapotaxi marha mokyaxe.

23 On wara marha kesî Kporin komo, mer̂pono pîn komo yantoman̂e, Ero yimaw on wara naxe ahnoro anarî yana komo, anarî yaro tîmtapotaxmu komo marha, 10 komo rma Xutew nahsîyaxe noro ponon poko. On wara kexe yîwya, Ai, oyakno, awakro cma re ces amna. Kaan xa nasî Xutew komo yakronoman̂e me, kacho amna n̂encesî. Ero ke awakro tmoku xe nas amna, kexe. Ero wa kexe Xutew ya, 10 komo kexe cewn̂an ya rma. Ero wa kexe.