Taa, Atarake pono pen komo yîwîrîmacho makîrha tak n̂ekatîmyas hara Kporin komo. Tamasku pono komo pona xa mokyasi yîwîrîmacho cerewre xa. Kporin komo pona xa n̂een̂axe tooto komo. Ixaw Yana komo marha n̂een̂axe Noro pona ahnoro n̂examro tribun komo.

2 Amace pono komo yîwîrîmacho marha n̂ekatîmyasî. Atarake rowon yemyatwono mîn Amace pono komo rowon. Ciru pono pen komo yîwîrîmacho marha n̂ekatîmyasî Noro, Siton pono pen komo yîwîrîmacho marha. Mîn hak poko ehcamhokaxapu mîkyam Ciru pono komo, Siton pono komo marha. N̂etwîrîmexe rma tko okwe.

3 On wara xatken̂e Ciru pono komo, mîîmo n̂iir̂atken̂e kawno ro mak. Prata n̂epamnoyatken̂e roowo pupuntho wara ro mak okyo. Ooru marha n̂epamnoyatken̂e mer̂pora ro mak apacakrî wara, esama yawno wara.

4 Iitono komo n̂emyawnonkesî tak Kporin komo. N̂examro kanawatho mko marha n̂enorinokesî tuuna imo kwawnonho pen. Yîmînthîrî komo marha n̂ecakyasî. Ero wa naxe amn̂e iitono komo okwe.

5 N̂examro pen yîwîrîmacho n̂een̂axe Askaron pono komo. N̂eraswaxe ro mak tak ero yipu yenîche. Ahwora marha naxe Kasa pono komo ero yipu yentache, Ekron pono komo marha. Ciru pono komo pona cma re ka n̂een̂atken̂e Ekron pono komo. Okwe, waihyatken̂e tak Ciru pononho pen komo okwe, kexe tak n̂examro. Kasa pono komo kayaritomonînho pen marha waihyas ero yimaw. Pohra ro mak tak nasî Askaron. Ewtotho me tak nas okwe.

6 Anarî yana komo tak n̂esekenmexe Astoce pona. Akpîn me tak Piristew komo wiir̂asî cehcoyoponkaxmunhîrî komo.

7 Kamxuku tak wowyasî yîmtai so, Piristew komo mtai. Iyotî komo marha wowyasî iyorî komo yotawnonho rma. Kicicitho puntho tonohra ehcoko, kacho mîn wowyasî. N̂etîmcexe rma tooto komo asakî mak. N̂examro tak naxe Kaan yanton me. Xuta komo yantoman̂e warai me naxe n̂examro. Xebusew komo wara marha naxe Ekron pono komo.

8 Omîn mamhoko kenmayasî roro waapa komo wahkoton̂e me. Iito xa re tîto xatî komo wahkocesî, iito xa re tmohsom komo marha. Oyanan komo yemetanmekn̂e mokuhra ro mak tak naxe n̂examro chere. N̂examro yenîn̂e me roro tak wasî. Ero wara wasî.

9 On wara marha wîîkes awya so, Siaw yemsîrî ya, ahwotacoko ro mak amyamro. Emtarakacoko amyamro hara Xerusaren yemsîrî tahwore ro mak awexirî ke so. Ahyaka so tak men mokyas amn̂e akayaritomon komo. Yaaro ciino rin̂e xa tak Mîkro. Akurunpen̂e komo me tak nasî. Kyopono pîn wara rma tko mokyasî buhu mkaw mak. Buhu xîkrî mkaw xa mokyasî.

10 Ero yimaw tarara mko wen̂epesî Eprain komo chei. Kawaru marha wen̂epesî Xerusaren poi. Krapa marha waxikwesî waapa me tîtosom komo yemyawnonho. Tawake tak ehcoko etpoko, kesî tak Noro mîk hak rowon pono komo ya. Ahnoro roowo nahsîyasî tîrowon me. Miya rorono nahsîyasî tuuna imo yecihtaka rorono, xiyan marha nahsîyasî anarî tuuna imo yecihtaka rorono hara. Tuuna yepu yecihtaka rorono marha nahsîyasî. Ahnoro roowo nahsîyasî. Ero wicakno roowo nahsîyasî tîrowon me.

11 On wara wîîkes hara awya so Siaw pono komo ya, omtapotachonho ponaro rma wasî, Kakronomexe so oyewehcataw awya so, kachonho ponaro. Kamxuku men̂epetken̂e amyamro ero wa kacho yencetaw. Ero ke apoyino komo tak wanîmyas ewtarî yawnonho tuuna exihnî yawnonho.

12 Awacan yaka tak amohcoko hara amyamro waapa nahsîthonhîrî komo. Oroto rma on wara wîîkes awya so, pahxa ahce na poko kemetanmekyatken̂e so cewn̂e ro so mak, oroto tak asakro kakronomexe so awemetanmechonhîrî komo yopo.

13 Xuta komo wehsasî okrapan wara rma. Eprain komo tak wiir̂asî ero yakan wara oyuhre wara. Ai, Siaw pono komo, on wara wiir̂asî amumuru komo amn̂e, n̂examro wahworesî Krexa waparî me totohme so. Eprain komo wiir̂asî kacipara imo wara, karitî kaciparanî imo wara, kesî. Ero wara kesî Kporin komo awya so.

14 Ero yimaw tak Kporin komo rma tak n̂esenpesî Siaw pono komo yepoi. Noro yuhre sakasaka kesî pepe kan̂e wara rma. Tuu kesî marha Noro tîratîn ke. Noro cetaw waapa me ocowo imo chew rma cesî, suu n̂ixan chew ha.

15 Tîyanan komo tak nukurunpesî Noro ero yimaw. Mer̂pono pîn komo yantoman̂e rma Mîk nukurunpesî. Tîîxatî pîn komo waihkesî, n̂examro pen nar̂mesî toh ke, woiwoi kacho ke ar̂maxapu ke. Ero yimaw twokru komo n̂eer̂axe, n̂emtarakexe marha kawaxiyem yeen̂enho wara rma kopi. Tmaxmike so tak naxe kamxuku ke. Basia wara rma naxe copoyem wara, Kporin komo ya tîmsom yakn̂itopo yeknu pono wara.

16 Ero kaamo po tak n̂examro nukurunpesî Kporin komo, ponaro n̂examro yehtopo. Tooku nukurunpesî oper̂a yosom ero wara xa marha tîyanan komo nukurunpesî. Kporin komo rowon po n̂examro naxe ciyamanci wara rma, kayaritomo yarokorî pokono wara okre. Kporin komo rowon po tak n̂esenpexe pepeitaxmu wara rma okre.

17 Kir̂wan̂he ro mak naxe iitono komo ero yimaw, cenporem me ro mak. Kar̂pe marha tak naxe kar̂pamxan komo puruma yahrî ke. Tahwore marha naxe emasî kom hara uupa yukun yerîrî ke, ciixan yerîrî ke. Ero wara naxe okre.