On wara marha kekn̂e Kporin komo, Aporin komo Ow ha. Oyakro mak amtapotacoko tuuna xe awehtopo komo poko. Tuuna cma re mekmexpes Apa, kacoko owya. Okomn̂an mohtopo me exitaw kacoko owya. Ero wa kache owya tuuna yewru tak wakîhcesî, pepe kan̂e ken̂arî. Tuuna tak wekpes Ow tooto komo mararîn pona. Mararî pono yatîkrecho wekmexpesî.

2 Awemîknon̂e komo makî reha mîn, mîk hak warai me ciixapu kom ha. Yaskomo komo rma re n̂een̂axe enîhnînhîrî, cemaro makî tko mîn yîn̂enîthîrî komo kica. Twosoto tîn̂enîthîrî komo n̂ekatîmyaxe tohnawno ro mak ha tko okwe. Tohnawno n̂ekatîmyaxe awya so awahworetome so mak. Ero ke waimamyaxe mak oyanan komo okwe, oper̂a wara mak naxe. N̂esemetanmekyaxe mak okwe cenîn̂e komo exihtorî ke.

3 Kîrwonasî tak oyok warai yenîn̂e komo poko. Boce yaan̂e komo panaresî. Oyok warai komo yakronomaxi kmokyas Ow Aporin komo. Xuta komo mîkyam oyok warai komo. Oyok warai komo tak wiir̂asî kawaru warai me hara, waapa me tîtosom warai me.

4 Xuta komo rma wiir̂as amn̂e toopu warai me mîîmo peyecepu warai me. N̂examro poyino marha nasî mîîmo mici yecetî warai me hara, n̂examro poyino marha nasî krapa warai me, ketwotopo warai me ha, n̂examro poyino komo marha naxe miyan komo yenîn̂e me hara.

5 Karitî komo wara rma n̂etar̂mexe. Tîîxatî pîn komo yapikn̂e wara naxe apacakrî yapikn̂e wara, esama yawno yapikn̂e wara. Ero wara naxe cetar̂metaw so Aporin komo exirî ke akronoman̂e komo me. Kar̂pe ro mak n̂etar̂mexe, kawaru mkawno komo yopono me meero naxe.

6 Xuta komo karihton̂e me wasî. Xose yepamtho komo marha wukurunpesî. N̂examro wekyas hara oona yîpînîn yaw so oyexirî ke. Oyanan mera tak naxe n̂examro, kachonho pîn wara tak naxe. N̂examro Porin xa Ow, ponaro ehtopo komo. Yîmtapotarî komo weyukyasî.

7 Karitî komo me tak naxe Eprain komo. Tahwore tak naxe wooku yeen̂e wara rma. Tahwore marha naxe yîmxîkrî komo tîpînîn yaw so oyehtopo yeen̂ataw. Opoko tak nahwowaxe, Tporin komo poko.

8 Pii wîîkesî n̂examro yan̂ihtome. Ero wa n̂examro wenmekyasî. Towno wiir̂asî kicicitho yantonînho komo. Mer̂pora tak n̂epamyaxe, pahxa n̂epamyatken̂e ero wicakî xa marha.

9 Anarî yana komo cheka rma re wakpayasî. Meyeno komo chew rma tko cexitaw so oponaro naxe. Waipîra so rma naxe, yîmxîkrî komo meero waipîra so naxe. Oona mokyaxe hara.

10 Exitu pono komo chewnonho n̂examro wekyas hara oona, Asiriu komo chewnonho marha. Xireace pona tak ekno wiir̂asî, Ribanu pona marha. Ero wa ekno wiir̂asî yîrowon komo tawronohkatîkaxi ro.

11 Tuuna imo kwawno wara rma mokyaxe. N̂examro pen yîwîrîmacho rma mîn tuuna imo, kacho. Yamarataka tak n̂etapesî tuuna imo kwawno. Napaitîkesî tak N̂iru Yepu pen. Noro pîntho me tak naxe Asiriu komo cehcoyoponkaxmunhîrî komo. Kayaritomo yamoyin exihra tak nasî Exitu pono komo yemyaw.

12 Oyanan komo tak karihces Ow ha oponaro exirî ke so, Tporin komo ponaro. Oyosotî pona enîn̂e me cexirî ke so n̂etar̂axe. Ero wara naxe, kesî Kporin komo. Ero wa kesî.