On wara marha kesî Kporin komo, Ai, Ribanu, amoro, on wara wîîkes awya, ahrunkakî tak ametatan ecahtome setru yepu pen, arowon pononho pen okwe.

2 Ai siprexte yepu, amoro marha awratakî. Setru yepu pen n̂emokotoi okwe. Tamaxi tak naxe weewe yepu pen, kawno pen kom okwe. Basan pononho pen komo marha awratacoko kahpar̂u yepu. Tamatîkaxi tak nasî comota pen cehkemînhîrî pen okwe.

3 Entacoko ka oper̂a yosom pen yîwratacho ha. Cuupu tak exihra nasî woskara po so n̂examro yeken mîtwono po so. Kawno ken̂arînho rma mîn woskara cuh ken̂arînho pen. Waw waw, kacho marha entacoko reaw komo yîwratacho. Cecahso marha nasî peen pen okwe Xotaw yecihtawnonho pen.

4 On wara marha kesî Kporin komo, ponaro oyehtopo, Iito nasî oyoh komo twaihkaxmu me yukuknomaxapu komo. N̂examro rma tko arko woskara pona cuupu yahtome tak yîwya so.

5 N̂examro pen waihkexe osom komo. Kicicme taxe kica, kahra rma naxe waihkan̂enhîrî komo. On wara mak kexe, Kir̂wan̂he nai ham Kporin kom okre. Tupurantai tak was okre, kexe mak kica. Yîpînîn yawra naxe osom komo rma okwe.

6 Ero ke orowon pono komo pînîn yawra tak wasî, kesî Kporin komo. N̂examro pen tak wemetanmekpesî yîmîtwono komo ya rma okwe, n̂examro kayaritomon komo ya marha. Orowon pono pen komo n̂emetanmekyaxe ro mak okwe. Yukurunpera rma was Ow okwe.

7 Ero ke oper̂a waar̂akn̂e woskara pona cuupu yahtome tak. Twaihkaxmu moxam, kacho rma waarakn̂e. Cesemetanmesom komo ponaro xa wîxakn̂e. Ero yimaw asakî wîhkocekn̂e oyamoyin. Anarî wosohcekn̂e, Kaan Ya Kakronomacho me. Anarî tak wosohcekn̂e, Noro Re Me Kehtopo me hara. Oper̂a marha wînahmekn̂e.

8 Ero yinhîrî oyok nahman̂enho komo tak wahsîpînkekn̂e osorwawno komo. Oper̂a komo xera tak wîxakn̂e okwe. Ooxera marha xatken̂e n̂examro hara okwe.

9 On wara wîîkekn̂e yîwya so, Anahmara so tak was oroto. Waiporono pen komo waihcowpe rma kr̂a. Cehcamnosom komo marha kr̂a n̂ehcamnocowpe rma. Waipîn komo tak n̂etonocowpe n̂examro re rma okwe, wîîkekn̂e yîwya so.

10 Ero yinhîrî tak oyamoyin wahsîyakn̂e, Kaan ya Kakronomacho, kacho. Ero tak waxikwwkn̂e. Ero yaxikworî ke omtapotachonho tak wowyakn̂e mîk hak yana komo yakro omtapotachonho ha. Kakronomexe so, kachonho mîn wowyakn̂e.

11 Ero ke cetaxikwoso tak xakn̂e oyamoyintho ero kaamo po. Ero wa oyamoyin yaxikwetaw owya oyen̂atken̂e oyoh komo, esemetanmexapu kom ha. Ero ke on wara ketken̂e, Tîmtapotachonhîrî yaw roro rma tamoyinthîrî naxikwo ham, ketken̂e opoko.

12 Ero yinhîrî tak on wara wîîkekn̂e hara yîwya so, Kir̂wan̂he exitaw awya so owî cma re mepemexe. Oyepema xera awexitaw so reha n̂expe rma, wîîkekn̂e. Ero ke oyepemetken̂e rma, 30 exepeyu nîmyatken̂e owya prata.

13 Ero yinhîrî tak on wara kekn̂e Kporin komo owya, Exepeyu tak ar̂makî er̂mo kahn̂e yaka. Cepethîkem me xa oyenîn̂enho komo nîmîtho mîn ar̂makî, kekn̂e. Ero ke exepeyu war̂mai Kporin komo mîn yaka er̂mo kahn̂e ya tîmsom me. 30 exepeyu mîn war̂mai.

14 Ero yinhîrî tak anarînhîrî waxikwekn̂e oyamoyintho hara. Noro Re Me Kehtopo, kachonho ha. Ero wa axikworî ke noro re pîn me tak wiir̂akn̂e Xuta komo, Ixaw Yana kom ha.

15 Ero yinhîrî tak on wara kekn̂e hara Kporin komo owya, Oper̂a yosom yamoyin xa hara ahsîko, akpîn yamoyin ha.

16 On wara men was amn̂e, oper̂a yosom wiir̂asî oyanan komo yenîn̂e me takî. On warai mîk wiir̂asî, tacixapu yepon̂e pîn mîk, ewruxan komo yepon̂e pîn marha, eseper̂antoxapu yehceman̂e pîn marha, kar̂pe cehsom komo yînahman̂e pîn marha. Oper̂a puntho tonon̂e xa matko mîk wiir̂asî tupurukyem puntho tonon̂e me. Yîhroxoxonthîrî mohkan̂e marha mîkî. Noro yipu mîk wiir̂asî n̂examro yenîn̂e me amn̂e.

17 N̂etwîrîmesî ro makî tko amn̂e oper̂a yenîn̂e tuwun̂uremtho ha. Oper̂a tînomn̂e mîk kica. Ero ke noro pen yapotho tak nasî tamaxi kacipara ke, noro yewtho marha nasî tamaxi kaari n̂ixan. Nuskurumincetîkesî marha noro yapotho pen. N̂esewketîkesî marha tak noro yewtho pen kaari n̂ixan. Ero wa kr̂a nas amn̂e noro pen oper̂a yosom tuwun̂urem pen ha.