Ero yinhîrî tak wencekn̂e xa hara Kporin komo mtapotarî Ixaw Yana komo pokono. Kaapu mko yehyatkan̂e Mîkro Kporin komo. Roowo yapon ciin̂enho marha Mîkro, kekatî ciin̂e marha Mîkro, kropotawno ciin̂e ha.

2 On wara kekn̂e Noro owya, Parakwe warai me tak ciino wiir̂asî Xerusaren pono komo, wok yen warai me ha. Anarî yana komo wenmekn̂e me n̂examro wiir̂asî, yîmîtwono komo wenmekn̂e me. Xuta yepamtho komo yewton ahnoro wamcexe waapa komo kopi, Xerusaren marha wamcexe.

3 On wara tko n̂examro pen wiir̂asî ero kaamo po, ahnoro mokyaxe mîk hak yana komo iina, roowo poko hakno komo. Xerusaren pono komo waparî me mokyaxe. Ero yimaw Xerusaren wiir̂asî toopu wara, tawsîn̂em wara. N̂examro kr̂a tar̂macerî Xerusaren pono pen kom ha, kan̂e komo tak n̂etametîkexe takpotuso ro mak oko. Anarimaw mîk hak rowon pono komo ahnoro n̂esenmekyaxe Xerusaren pono komo waparî me. Ero yimaw rma n̂etamexe.

4 On wara marha ciino wiir̂asî ero kaamo po, cesekatkaxmu me tak wiir̂asî kawaru pen komo. Kawaru mkawno pen komo wiir̂asî camkîno me tak. Xuta komo poko reha cewke wasî. Anarî yana komo yoku tko wewkanoyasî kawaru pen.

5 Ero yimaw on wara kexe Xuta kopenaton komo, Karitî me nat ham Xerusaren pono komo Kporin komo ponaro exirî ke so. Kantoman̂e ro komo Mîkro Kporin komo, ponaro n̂examro yehtopo, kexe.

6 Ero kaamo po on wara marha naxe Xuta kopenaton komo, wehto roron yen wara rma naxe wehto kamerî chewno wara, enmexapu chewno wara. Poturem wara marha naxe puruma yecepu chewno wara, awrutamixapu chewno wara. Anarî yana komo yakn̂in̂e wara rma naxe, tîmîtwono komo yakn̂in̂e wara. Kaari n̂ixan pen komo waihkexe, powa n̂ixan pen komo marha. Iito rma tko nasî Xerusaren cekenî ro to rma.

7 Xuta yewton pono komo ka wukurunpesî cokorî Ow Aporin komo. Ero wa yukurunpeno wiir̂asî iyoponkano cirihra ro mak ehtome so Tapi pen yepamtho komo, Xerusaren pono komo marha. Xuta komo yoponkara ehtome so n̂examro ka wukurunpesî yihcirî me.

8 On wara marha was Ow Aporin komo ero kaamo po, Xerusaren pono komo kurunpen̂e me tak wasî. Ero ke on wara naxe iitono komo kar̂pen komo rma ha re, Tapi pen wara tak naxe. Kaan wara rma naxe Tapi pen yepamtho kom hara. Kporin komo yancun wara marha naxe n̂examro, poturme tîtosom wara ha.

9 On wara marha ciino wiir̂asî ero kaamo po, mîk hak rowon pono komo yîhcamnotopo poko tak wasî, Xerusaren pono komo waparî me mohxapu komo poko. Ero wa n̂examro pen ciitopo poko wasî.

10 On wara marha Tapi pen yepamtho wiir̂asî, Xerusaren pono komo marha, Oyekatî yukmamn̂e wara wasî n̂examro pona, Ow xa mîwakrekn̂e ham okre, kan̂e me n̂examro wiir̂asî, Owî cma re mîwakresî xa hara, kan̂e me marha wiir̂asî. Ero yimaw tak owece n̂een̂axe tînparaxkathîrî komo wece rma. Noro pînîn yaw tak nîwracexe etîmrekaxapu wara, cewn̂anînhîrî pen pînîn yawno wara ro mak. Okwe okwe, kexe ro mak cerewre ro mak. Cewru komo naar̂axe yîîm komo tîmxîkîthîrî pînîn yaw, poturme ewruxapu pînîn yaw. Ero wara ro mak naxe n̂examro opînîn yaw.

11 On wara marha naxe Xerusaren pono komo ero kaamo po, cerewre ro mak tak nîwracexe. Pahxa Ixaw Yana komo nîwracetken̂e Atace-Himon po, Mexito woskaran po ero wara xa marha nîwracexe n̂examro xa hara amn̂e.

12 Ahnoro orowon pono komo nîwracexe, cewyaro so nîwracexe noro re me cehsom komo. Tapi pen yepamtho komo nîwracexe cewyaro, yipici komo marha nîwracexe cewyaro hara. Natan pen yepamtho komo marha nîwracexe cewyaro, yipici komo nîwracexe cewyaro hara.

13 Repi yepamtho komo marha nîwracexe cewyaro, yipici komo cewyaro hara. Simei pen yepamtho komo marha nîwracexe cewyaro, yipici komo nîwracexe cewyaro hara.

14 Ero wara so nîwracexe cewyaro noro re me cehsom komo ahnoro, yipici komo cewyaro so hara. Ero wara nîwracexe.