On wara marha ciino wiir̂asî amn̂e ero kaamo po, tuuna pîtho warai tak wiir̂asî Xerusaren po iitono komo yehtoponho korokacho me, yusmunthîrî komo towtopo me. Tapi pen yepamtho korokacho me marha wiir̂asî.

2 On wara marha wiir̂asî ero kaamo po, mîk hak warai me ciixaputho yosotî kr̂a tak wîhcamnoyasî. Ero yipu komo poko twen̂ekarî tak naxe orowon pono komo ero yimaw. Ero wara wîîkes Ow Aporin komo, awantoman̂e ro kom ha. Weronomano rin̂e komo marha wen̂epesî orowon poi. Kicicitho yekatî marha wen̂epesî ero poi.

3 Anarimaw na weronomano n̂iir̂a iitono. Ero wa yîmtapotarî yentache on wara tak kexe yîîm, yînocwan marha yîwya, Mîwaiyasî mak okwe. Kporin komo mtapotarî warai tak mekatmo cemaro okwe. Ero ke mîwaiyasî, kexe. Noro ya ekatîmyataw rma noro pen paraxkexe yîîm komo rma.

4 On wara marha naxe weronomano rin̂e komo ero kaamo po, Ero wara maxe amn̂e, kacho yeen̂ataw nîhyapamyaxe mak tak ekatîm xera. Anarî kuknon yaw mak naxe, weronomano rin̂e ponon yamrura ro mak naxe, boce poci kahxaputho ha. Ero wara naxe weronomano rin̂e me cehtopo yîhtnopîra ehtome tooto komo.

5 On wara marha kexe noro yipu komo, weronomano rîn̂e pînî ro mak Owî. Mararî pokono ro mak ow ha. Paaka yenîrî poko ohcamhokekn̂e tooto kar̂pamxan me rma oyexitaw, kexe.

6 On wara kesî anarî yîwya, Onoke aparaxkai hara awamorî poko? kesî. On wara n̂eyukyasî noro, Oyakrono komo mîn yaw wîxakn̂e. Iitono komo rma oparaxkace oko, kesî. Ero wa kesî ekatîmn̂e.

7 On wara wîîkes hara Ow Aporin komo, awantoman̂e ro kom ha, Kacipara imo, apakakî amoro. Oyok yenîn̂e pen tak paraxakî, oyakrononho pen ha. Oyok yenîn̂e pen paraxkakî. Ero yinhîrî n̂etakpayaxe tak oyok pen okwe, oper̂a pen. Owî rma tko ketîrames hara oper̂a xîkrî yenso hara.

8 On wara marha wîîkes Ow Aporin komo, On wara naxe orowon pono komo ahnoro, 2 tehsa wicakî waihyaxe kacipara imo ke amaxapu me. N̂etîmcexe rma tko 1 tehsa wicakî iito rma.

9 N̂examro tak wekyasî wehto chere oco, etîmtoxapu kom ha. N̂examro wakir̂wamesî prata yakir̂wamacho wara rma. Ooru nukuyaxe ero pokono ro komo ero wara xa marha n̂examro wakir̂wamesî. Oyosotî tak n̂etahcaxe takronoma xe so cexitaw so owya. Ero ke n̂examro tak weyukyasî. On wara wîîkesî yîwya so, Oyanan komo xa amyamro, wîîkesî. On wara oyeyukyaxe n̂examro hara, Ponaro amna yehtopo xa Amoro, amna Porin ha, kexe. Ero wara kexe oyanan komo owya ero yimaw.