On wara marha kekn̂e Kporin komo owya, Kporin komo kamon me tak n̂enmayas amn̂e. Ero po tak awemyawnonhîrî komo tak nahsîyaxe awaparî komo. Achew so rma men̂ekexe tînarîrî ro komo ahyai so okwe.

2 Mîk hak rowon pono komo ahnoro wenmekyasî iina Xerusaren pona. Iitono pen komo waparî me mokyaxe. Ewto pona tak n̂epatakexe sowtatu komo. Awemyawnonhîrî komo tak naar̂axe amîn komo yawnonho. Awosîn pen komo poko marha naxe okwe. Ewto pononho komo naar̂axe cemeknumiso so. Ewto raconho pono komo mak nahsîyaxe, naar̂axe marha. N̂etîmcexe rma tko anarî komo arîhnî me rma, kesî Kporin komo.

3 Ero yimaw xa tak Kporin komo cesî iina mîk hak rowon pono komo yakro etar̂maxi. Pahxa n̂etar̂mekn̂e etar̂matopo me xa exitaw ero wa xa marha n̂etar̂mes hara ero kaamo po.

4 On wara marha nasî Noro ero kaamo po, tîhtarî po tak n̂ecececesî Oripa Yîpîn po. Xerusaren yemtacho rma mîn Oripa Yîpîn resce n̂ixan. Ero yimaw tak n̂etîraconkesî îîpî. Resce n̂ixa n̂ihciyasî etîraconkacho, miya n̂etîraconketîkesî oesce yaw roro. Woskara tak nasî porin îîpî rakataw, yîraconhîrî mko yotaw rma. Nohce yaw roro n̂esewyetakesî îîpî raconho, suu yaw roro n̂esewyetakesi eeco, îîpî raconho hara.

5 Ero yimaw tak woskara pore memahciyaxe. Miya rma nasî capape Asew pona roro. Pahxa memahciyatken̂e roowo yesewsîyataw. Usias xakn̂e Xuta komo kayaritomon me ero yimaw esewsîyataw memahciyatken̂e ero wara xa marha memahciyaxe xa hara amn̂e. Ero yimaw tak mokyasî Kporin komo, ponaro oyehtopo. Noro wenari mokyaxe akir̂wamaxapu komo ahnoro.

6 Ero kaamo po tak katpape exihra ro mak nas okwe. Kosope exihra marha nasî.

7 Anarmenî ro mak mîn ero enmarî, Kporin komo nîhtînorî mîn ha. Awarpantara ro mak nasî, enmapîra marha nasî. Kokmamyataw tko katpape rma nasî.

8 On wara marha nas ero kaamo po, tuuna tak n̂epatakesî Xerusaren poi. Kîkariton̂e mîn tuuna. Yîraconhîrî cesî tuuna imo kwaka, resce n̂ixan kwaka. Yîraconhîrî tak ces hara anarî kwaka hara, oesce n̂ixan kwaka hara. Ero wa nîhcesî tuuna kaamo yimaw, cwotu yimaw marha.

9 Ero yimaw ahnoro roowo pono komo kayaritomon me tak nasî Kporin komo. Ero kaamo po tak ero wa nasî. Cewn̂e mak nasî Kporin komo xa. Cewn̂e marha nasî Noro yosotî.

10 On wara tak nasî roowo ahnoro Xerusaren mehxan suu n̂ixan, Capape tak nasî. Ero wa nasî Xeba poi Himon pona roro. Tanîmso n̂he tak nasî Xerusaren. Iito rma tko nasî ewto cekenî ro po. Ewto wokpan tak cesî miya roro Benxamin Metatan yai Yihcirî Metata pona roro. En̂exa cesî Eknutawno Metata yaka hara. En̂exa ces hara Anan̂ew mîn yaka, kawno yaka. En̂exa ces hara kayaritomo wokru yewkukacho yaka. Ero wa nasî Xerusaren wokpan ero yimaw.

11 Tooto yewton me nasî Xerusaren. Ecakîra ro mak tak nas amn̂e yîmîn komo. Erasîra ro mak tak naxe iitono komo.

12 On warai ke tak eper̂antono n̂iir̂asî Kporin komo, Xerusaren pono komo yakro etar̂maxapunhîrî pen komo tak, macesî yupun komo tîhtarî po ecececetaw so rma. Ewthîrî komo marha macesî ewtarî yaw so rma oko. Yun̂uthîrî komo marha macesî yîmtarî komo yaw rma.

13 On wara marha ciino n̂iir̂asî Kporin komo ero kaamo po, cerahsom me ro mak tak ciino n̂iir̂asî. Tîmîtwono komo yamorî nahsîyaxe iitono komo. N̂etar̂mexe tak etpoko iitono komo re okwe.

14 Ahnoro Xuta komo n̂etar̂mexe Xerusaren po. Ero yinhîrî mîk hak rowon pono komo yemyawnonho n̂enmekyaxe Ixaw Yana komo mîtwono yemyawnonho. Ooru n̂enmekyaxe, prata marha, poono marha. Mer̂pora ro mak n̂enmekyaxe.

15 Waapa komo yokutho pun marha macesî tooto pun macesî ero wa xa marha. Kawaru pen, muura pen, kameru pen, buhu pen ahnoro waapa me mohxapu komo yokutho pen waihyaxe yupun matacho ke.

16 Ero yinhîrî tak naxe rma waipîn komo, Xerusaren pono wapatho pen poyinonho komo. N̂examro cexe Xerusaren pona yicimn̂ipuntaxera. Kayaritomo poko ahwotaxi cexe. Kporin komo rma nasî kayaritomo me, mer̂pono pîn komo yantoman̂e ha. Kuum Yarî Yaw Enmatopo yimaw so ahwotaxi cexe iina.

17 Anarimaw tohra na natu anarî rowon pono komo Xerusaren pona. Kayaritomo poko ahwotaxi tohra na natu, Kporin komo poko, kantoman̂e ro komo poko. Ero wa exitaw so mokuhra ro mak tak nasî tuuna n̂examro yeken po.

18 Anarimaw iina tohra na natu Exitu pono komo Noro poko ahwotaxi anarî komo yakro. Ero wa exitaw so n̂examro pona mokuhra ro mak tak nasî tuuna. Ahnoro tooto komo n̂emetanmekyasî Xerusaren pona tohra exitaw so ahwotaxi Kuum Yarî Yaw Enmatopo yimaw so. Ero wa xa marha Exitu pono komo yemetanmecho n̂ekmexpesî tohra exitaw so n̂examro hara.

19 Ero yipu ke Exitu pono pen komo n̂emetanmekyasî, mîk hak rowon pono pen komo marha. Kuum Yarî Yaw Enmatopo yimaw ahwotaxi tohnî komo ahnoro tuuna mokuhtorî ke n̂emetanmekyasî.

20 On wara marha nasî kawaru komo ero kaamo po, kawaru warî poko nasî yoroyoro. Ero poko nasî tmewreso tapota, Kporin komo yoku moso, kacho. Kporin komo yîwyanî rma nasî tutum Noro ya tîmsom yakn̂itopo panawno. Ero kaamo po ahnoro iitono tahremu mko nasî basia mko wara rma, Kaan ya tîmsom yakn̂itopo mitwono wara rma.

21 Ahnoro Xerusaren pono komo tahremnu nasî Kporin komo yîwyanî ro me. Ero wa xa marha nasî Xuta komo tahremnu hara. Iina mokyaxe Kporin komo ya tîmsom pokono komo. Iito cexitaw tootî komo nîyexe iitono tahrem yaw. On wara marha nasî Kporin komo mîn, Kananew komo exihra ro mak tak nasî ero yaw. Ero wa nasî Noro mîn, kantoman̂e ro mîn. Ero wa nasî.