1-2 Taa, Kporin komo mîn yenîn̂e komo amyamro. On wara men apanatanmekyaxe so hara Kporin komo, kantoman̂e ro ha. Anarimaw omtapotarî ponarora rma na matu. Kir̂wanî ro Noro yosotî, kahra marha na mat okwe. Ero wara awexitaw so on wara kiir̂axe so, Awîrîmacho komo men wekmexpesî. Amna cma re makronomesî, ketaw awya so ero wa kachonho rma tak waknamesî awîrîmacho komo me tak okwe. Pahxa rma ero wa kacho waknamai. Ero wa wasî apoko so omtapotarî ponarora awexirî ke so okwe.

3 Kicicme awexirî ke so awepamthîrî komo weiyas amn̂e. Kewtawarexe so paaka wetî ke. Awokuthîrî mîparaxkexe opoko awahwowataw so, noro wetîtho ke rma kewtawarexe so. Erotho paaka wetîtho naar̂axe amn̂e aan̂e ro komo ar̂maxi. Erotho yakro rma awar̂axe so amyamro hara.

4 Ero yimaw tak on wara mîîkexe, Kporin komo xa Mîk ham kîtwermexe so kopi. Ero wara kîtwermexe so repita komo yakro tîmtapotachonhîrî yaw roro rma, mîîkexe, kesî Kporin komo awya so, kantoman̂e ro kom ha.

5 On wara wîîkekn̂e repita komo ya, Kakronomexe so amn̂e okre. Pahkî kiir̂axe so waipîn me, cerepore marha kiir̂axe so okre, wîîkekn̂e yîwya so. Ero ke ero wa kacho yaw roro rma n̂examro wiir̂akn̂e. Ero wara wîxakn̂e n̂examro poko oponaro xa tak ehtome so. Ero ke opnaro rma xatken̂e. Twerî marha oyosotî n̂etahcatken̂e.

6 Yaarono poko makî reha panatanmekno n̂iir̂atken̂e. Kicicme yîmtapotara ro mak xatken̂e. Oyakro n̂etar̂atken̂e ahwokan me. Takîhso marha en̂ekano n̂iir̂atken̂e. Mer̂pono pîn komo marha naknametken̂e kicicme ehtoponhîrî komo yai so. Ero wara ka xatken̂e repita komo pahxa.

7 On wara xa cexpore nasî owya tîmsom pokono komo, Yîhcamhokano rin̂e me cexpore nasî. N̂examro mtapotarî centapore nasî tpanatanmetopo komo. Ero wa cexpore nasî Kporin komo mtapotarî yekatimn̂e me exirî ke so, kantoman̂e ro komo mtapotarî yekatîmn̂e me ha.

8 Ero warahra reha maxe amyamro. Kporin komo yehtopo yaw roro exihra maxe okwe. Mer̂pono pîn komo yîhrokamexpon̂e me maxe okwe. Repita komo yakro Kporin komo nîmtapowakn̂e pahxa n̂examro yakronomacho poko, ero wa kacho tak mowyatken̂e kica, kesî Kporin komo, kantoman̂e ro komo.

9 Ero ke on warai me makîrha tak kiir̂atken̂e so Ow, apoyino komo nîwîrîyakarî me tak kiir̂atken̂e so. Kyopono pîntho me kenpetken̂e so miyan komo ya rma. Ero warai me tak kiir̂atken̂e so oyehtopo yaw rorohra awexirî ke so okwe. Anarî komo men̂eketken̂e takîhso, anarî komo men̂eketken̂e wara kyam mak okwe. Ero wa mîxatken̂e cen̂ekaxmu komo poko okwe.

10 On wara marha kesî Kporin komo awya so, Cewn̂e mak exihra katî nai Kîîm komo awya so? Cewn̂e mak exihra katî nai Kaan kakîhton̂enhîrî kom ha? Cewn̂e mak nas ha. Ero ke ahce kacho apoyino komo yemîknon̂e me mat okwe? Ero wara emîknono cirirî ke kîwya so kporin pen komo mtapotachonho yai cetowsom me maxe okwe, Kporin komo ponaro men cehcerî, kachonho yai cetowsom me. Ero wara maxe kica.

11 Ero wara rma naxe Xuta komo, emîknono ciin̂e me naxe kica. Kicicme ro mak xatken̂e Xerusaren pono komo, Ixaw Yana komo marha okwe. Kporin komo mîn yîwîrîman̂enho mîkyam kica. Yiixe Kporin komo yehtopo nîwîrîmetken̂e ro mak okwe. Anarî yana komo naxe anarî ponarono me so. Noro yipu komo yemsîrî nahsîyatken̂e cipici komo me okwe.

12 On wara cirpore nai noro yipu komo, waihkape Kporin komo, panatanmekno rin̂e pen komo, yînpanatanmekrî pen komo marha. Exihra tak cexpore naxe Xako yepamtho mîn yaw so. Anarimaw on wara na natu noro yipu yahsîn̂enho komo cipici me so, Kporin komo ya tîmsomu rma re nîmyaxe. Kporin komo nwaikarî me n̂ehcowpe noro yipu komo.

13 On wara marha tak nasî Kporin komo apoko so, anmîthîrî komo ponarora tak nas okwe. Tawake exihra tak nasî anmîthîrî komo poko. Ahsîra ro mak nas okwe. Ero ke on wara maxe amyamro, Kporin komo ya tîmsom yapon mîtwo mîwracexe cerewre ro mak aapo tmatanso ro awewyokrî komo ke.

14 On wara mîîkexe, Ahce kacho amna nîmrî yahsîra tak nai Kporin komo? mîîkexe. On wara awen̂axe so Noro, amtapotachonhîrî komo town̂e me awen̂axe so kica. Pahxa kar̂pamxan me awexitaw so apici komo mahsîyatken̂e. Eroromero wa kahsîyas ha, mîîketken̂e cma re yîwya so. Ero yinhîrî memîknoyatken̂e hara kica. Awakrono ro komo xa mîkyam apici komo. Eroromerono me kahsîyasî, mîîketken̂e yaaro xo. Ero yinhîrî memîknoyatken̂e mak kica.

15 Cewn̂an me kiir̂atken̂e so Kporin komo asak haknonhîrî. Cewn̂an me tak nasî kupun komo, kekatî komo marha. Ahce kacho cewn̂an me kiir̂atu so asak haknonhîrî? Kaan ponarono me exi xe so nasî yîmxîkrî komo. Ero ke cewn̂an me kiir̂axe so. Ero ke awekatî komo ciicoko apici ponarono me mak. Pahxa kar̂pamxan me ka awexitaw so apici komo mahsîyatken̂e noro yemîknopîra men ehcoko.

16 On wara men kesî Kporin komo, ponaro Ixaw Yana komo yehtopo, Apici komo yai awetowtopo komo xatî pînî ro mak Ow ha. Cesetapaxmu me awir̂axe so okwe. Ero ke aropotarî komo ponaro men ehcoko apici yemîknotopo ponarora ro mak awehtome so, kesî Kporin komo.

17 On wara marha wîîkes awya so, Kporin komo mîpokaretken̂e okwe amtapotarî komo ke rma. On wara mîîkexe hara kica, Ahce warai poko ma Noro amna pokarekn̂e? mîîkexe. On wara mîîkexe, Kir̂wan̂he rma keen̂axe so Kporin komo kicicme kexitaw so rma. Tawake rma nasî Noro noro yipu komo poko, mîîkexe kica. On wara kan̂e wara rma maxe ero wara ketaw, Ahto ma re nai Kporin komo, yaaro ken̂ekan̂e kom ha? kan̂e wara rma maxe kica, kesî. Ero wara kesî Kporin komo awya so.