On wara men wîîkes awya so, pahxaro tak omtapotarî yekatîmn̂e wen̂epesî iina. Noro tak oyesamarî nakir̂wamesî. Ero yinhîrî tak Kporin komo mokyasî, enî xe xa awehtopo. Ponan̂e rma mokyasî tîmîn yaka. Kakronomexe so oyewehcataw awya so, kan̂e rma Mîkî. Yiixe xa awehtopo komo xa tak Mîkî. Noro rma mokyasî, kesî Kporin komo, kantoman̂e ro.

2 Nai ha ma re tko Noro mohtopo yînîmn̂e? Onoke thakwa re n̂ececece iina esenpetaw. Wehto wara rma nasî tmokyataw, ooru yukuin̂e wehtorî wara nas oco. Sakmu wara marha nasî mokyataw, poono korokan̂e sakmun wara.

3 Iina tmokuche prata yukuin̂e wara n̂eremesî, yusmunkan̂e wara ha. Repita komo nakir̂wamesî ooru yakir̂waman̂e ro wara rma, prata yakir̂waman̂e ro wara marha. Ero yimaw tak kir̂wan̂he nakn̂iyaxe Kporin komo ya tîmsom.

4 Ero yimaw tak tawake nasî Noro Xuta komo nîmrî poko, Xerusaren pono komo nîmrî poko marha. Pahxa tawake xakn̂e yînîmrî komo poko ero wa xa marha nasî yînîmrî komo poko xa hara amn̂e.

5 Ahyaka so men kmokyasî awen̂ekan̂e komo me, yohno so en̂ekano wiitîkesî. Erem pokono komo wen̂ekesî, cipici yai ro cehsom komo, cemarontaxmu komo, tînapickarî komo yepeman̂e pîn komo, iin̂o waixapu yemetanmekn̂e komo, yîmîhnî yemetanmekn̂e komo, acheka mohxapu yermonon̂e pîn komo, noro yipu komo men wen̂ekesî iina omokuche. Opoko twerîhra naxe okwe. Ero wa ehtopo komo poko wen̂ekesî, kesî Kporin komo, kantoman̂e ro komo.

6 On wara marha kesî Noro awya so, Aporin komo xa Ow ha. Omtapotachonho town̂e pînî ro mak Owî. Ero wa oyexirî ke awaikatîkara so wasî, wîîkes awya so Xako yepamtho komo ya.

7 Mehxa ro rma owya apanatanmetopo komo yai cetowsom amyamro okwe, aporin pen komo yimawno n̂ixa ro rma. Owya apanatanmetopo komo yewetîn̂e pînî ro mak amyamro mehxa ro rma. Ohyaka tak amohcoko hara. Ohyaka amokuche so ahyaka so marha tak kmokyas Ow hara, kesî Kporin komo awya so. On wara tko mîîkexe owya, Ahce wa thakwa re amna mokya hara ahyaka? mîîkexe okwe.

8 On wara wîîkes awya so, Kaan yemyawno poko ma re n̂en̂epana tooto awya so? Oyemyawno poko rma tko men̂epanaxe amyamro rma okwe. On wara tko mîîkexe owya, Ahce poko ma re awemyawno poko n̂en̂epanakn̂e amna awya? mîîkexe owya. On wara keyukyaxe so, Cisimu me owya tîmsom poko men̂epanaxe, awanme ro so anîmrî komo poko marha, owya tîmsom poko ha, wîîkes awya so.

9 Ero ke yîwîrîmaxapu me maxe ahnoro amyamro Ixaw Yana komo okwe. Oyemyawno poko awen̂epanîmrî komo ke so ero warai me maxe okwe.

10 Ahnoro tak ehcoko cisimu me anîmrî komo, omîn yaka ehcoko yîmtotopo yaka. Iina ehcoko tînahke tak ehtome so omîn yawno komo, wîîkes Ow Aporin komo, awantoman̂e ro komo. Owya tîmtopo poko xe ka yukukmacoko awakren̂e komo me oyehtopo yentome tak awya so. Kaapu yewkanapan wahrunkesî ro mak. Awakrecho komo warpesî ro mak ahyaka so. Ero ke rma tak n̂esekenkesî awemyawno komo. Yîmtotopo yopo ro mak tak nasî. Yukukmacoko xe ka.

11 Onok na komo tak Ow wahkocesî anatîrî komo yahn̂enho komo. Yawko warai wahkocesî, makaka warai marha, torowo marha, ahnoro mak anaputhîrî komo yahn̂enho komo wahkocesî. Epetan me exihra marha tak nas anatîrî komo uupa, kesî Kporin komo kantoman̂e ro komo.

12 Ero yimaw tak on wara kexe anarmerpan yana komo apoko so, Kaan nakronomatho xa mîkyam Ixaw Yana komo okre, kexe apoko so. Kir̂wan̂he ro mak nasî arowon komo okre, kexe tak tooto komo, kesî Kporin komo kantoman̂e ro komo.

13 On wara tko kesî Kporin komo awya so, Oyein̂e wara rma mîmtapowaxe opoko okwe, kesî. On wara mîîkexe, Ahce wa ha re amna nîmtapowa apoko kicicme awya? mîîkexe owya.

14 On wara tko mîîkexe, Tohnaw mak Kaan cewehcaxe okwe. Ahce ma re tahsîce Kporin komo ya kpanatanmetopo komo yewetîtamci? Kporin komo wero ro rma re cetar̂atken̂e, kantoman̂e ro komo wero ro, tîwrataxmu me cetar̂atken̂e okwe. Ahce ha re tahsîce ero wara kehtamci okwe? mîîkexe kica.

15 On wara marha mîîkexe kica, Akronomaxapu me rma tko naxe cehcoyoponkaxmu komo. Anarî komo yopono me n̂ehtîkexe kicicitho komo rma kica. Kaan yîrwonmekn̂e komo rma naxe etwîrîman me rma, mîîkexe kica. Ero wara mîîkexe kica.

16 Ero yimaw tko on wara xatken̂e anarî komo, Kporin komo ponaro xatken̂e. Nîmtapowatken̂e marha Kaan poko, n̂examro re mak. Yîmtapotarî komo tî n̂encekn̂e Kporin komo. Ehtopo komo tî mewrepekn̂e tîn̂enîrî. Tpoko tweeno komo yehtopo mewrepekn̂e, tosotî poko ceserepokaxmu komo yehtopo ha.

17 Oyananî ro me tak naxe amn̂e noro yipu komo, kesî Kporin komo, kantoman̂e ro. Pahxaro tak naxe owyanî ro me, cepethîkem warai me xa okre. Ero wara naxe n̂examro cepethîkem yukuknometaw owya. N̂examro wukurunpesî tumumuru nukurunpesî yîîm, cewetîn̂e ro, ero wara n̂examro wukurunpesî.

18 Ero yimaw tak camkîra maxe tooto komo yehtopo poko. Kicicitho komo mîkyam, mîîkexe kicicitho komo poko. Kir̂wan komo mîkyam, mîîkexe kir̂wan komo poko hara. Kaan ya n̂etantomapesî noro, mîîkexe anarî komo poko. Kaan ya etantomara reha nai noro hara, mîîkexe marha. Esewkukmara tak maxe tooto komo yehtopo poko, kesî. Ero wara kesî Kporin komo kîwya so.