On wara marha kesî Kporin komo, kantoman̂e ro komo, Akn̂ino ritopo me tak men n̂enmayas amn̂e okwe. Ero po tak wehto me mak tak n̂enmayas oco. Puruma yeputho wara mak tak naxe ahnoro cehcoyoponkaxmu komo ero yimaw, ero wara xa marha naxe ahnoro kicicitho poko cehsom komo. Ero ke noro yipu komo n̂ecakyaxe ro mak wehto chew ero yimaw. Yimicinthîrî komo warai meero n̂ecahtîkesî, peremthîrî komo warai marha. Exihnî me tak n̂ecahtîkes okwe.

2 Anarî me maxe amyamro ero yimaw, twerî oyetacin̂e kom ha, Kir̂wanî ro mokyasî ahyaka so kaamo wara rma cepatakaxmu wara. Tarin̂em warai me marha mokyasî Noro ahyaka so. Noro yaporî nasî awehceman̂e komo me okre. Ero yimaw amîn komo yai mepatakexe kar̂pe ro mak. Mahronaxe meero paaka xîkrî wara mîîmo yaw yîmhokaxapunhîrî wara okre.

3 Ero yimaw tak kicicitho komo yapikn̂e me maxe. Wermonho mapikyaxe ero wara xa marha noro yipu komo mapikyaxe. Ero wara maxe kicicitho komo poko ero me enmayataw tak, owya akn̂ino ritopo me enmayataw ha, kesî Kporin komo, kantoman̂e ro komo.

4 Moises ya apanatanmetopo komo ponaro men ehcoko. Oyantonînho pen mîk xakn̂e. Orebe po exitaw aporin pen komo ero yimaw apanatanmetopo komo wekatîmyakn̂e yîwya, atwermacho komo marha. Ahnoro Ixaw Yana komo ya yîn̂entamexporî wekatîmyakn̂e yîwya. Ero ponaro men ehcoko.

5 On wara marha yîhtînocoko, Erias tak wen̂epes amn̂e ahyaka so, aweronomano rin̂e. Aporin komo kamon me enmapîra rma ka exitaw noro wen̂epesî. Eraspeto ro mak men ero kaamo n̂enmayas amn̂e anarî kaamo warahra ro mak.

6 On wara ciino n̂iir̂asî Erias ahyaka so tîtoche, tîmxîkrî komo xatî me tak yîîm komo n̂iir̂asî. Tîîm komo xatî me marha yîmxîkrî komo n̂iir̂as hara. Ero wara ciino n̂iir̂as Erias ero kaamo me enmapîra ka exitaw. Ero wara ciino cirihra exitaw ketaw ha re Owî rma kmokrî ha re arowon komo yîwîrîmaxi okwe. Ero wara mak wîîkesî.