Ero yinhîrî yaake ro enmapuche Kapanaun pona takî tî cekn̂e hara Xesus.

Ero ke iitono komo takî tî n̂encetken̂e Noro mohtopo.

Mînto nai Xesus mîîmo yaw,

kacho tî n̂encetken̂e.

2 Ero ke tooto komo pen takî tî mokyatken̂e hara Xesus yenso.

Mîîmo takî tî nawronohketîketken̂e.

Mîîmo mkai meero tî xatken̂e tooto pen,

takpî ro makî tî xatken̂e.

N̂examro ya takî tî Xesus n̂ekatîmyakn̂e Kaanî mtapotarî.

3 Ero yimaw anarî komo takî tî mokyatken̂e hara kîrkomo,

4 mak.

Pokumnî ro tî n̂ekyatken̂e Xesus yaka.

4 Takpî tko tî xatken̂e Xesus yentan̂e komo yîhyaka roro arîrî yarohra.

Ero ke mîîmo takî tî nawketken̂e Xesus yepoi.

Ewtarî yaro takî tî pokumnî n̂enîhcetken̂e.

Aam po rma tî n̂enîhcetken̂e.

5 Ero ke on wara tî xakn̂e Xesus,

tpona enîn̂e me tak tî n̂examro n̂een̂akn̂e.

Ero ke on wara tî kekn̂e pokumnî ro ya,

Okopuci,

kicicme awehtoponhîrî tak wîhcamnopu,

kekn̂e tî yîwya.

Ero wa tî kekn̂e.

6 Iito rma tko tî xatken̂e Xutew panatanmetopo mewren̂e komo ceremaxi.

On wara tî ketken̂e n̂examro tîhnaw so,

7 Ahce kacho ero wa nîîke Noro kicicitho me ro mak kopi?

Onoke thakwa re kehtoponhîrî komo nîhcamnoya?

Kaan makî reha nasî kehtoponhîrî komo yîhcamnon̂e me,

ketken̂e tî.

8 N̂examro yesehtînotopo rma tko tî nîhtînoyakn̂e Xesus tîropotaw.

Ero ke on wara tî kekn̂e yîwya so,

Ahce kacho meserepoketu omtapotarî poko?

kekn̂e tî.

9 Omtapotarî yanme n̂ehcamnoyasî kicicme tooto komo yehtoponho.

Apehceme rma n̂ehcamnoyasî.

Apehceme marha n̂etakir̂wamexe kar̂penînhîrî komo omtapotarî ke makî.

Ero ke ahce wa wîîke moso ya awya so,

pokumnî ya ha?

Wîhcamnopu tak kicicme awehtoponhîrî,

wîîke katî?

Awomko tak ha,

awamhîrî tak anîmko awtotome ha,

wîîke katî?

10 On wara kan̂e me awexi xe so tko wasî,

Kicicme roowo pono komo yehtoponho yîhcamnon̂e me rma Mîk ham Tooto me Ewruxapu,

kan̂e me,

kekn̂e tî yîwya so.

Ero ke pokumnî ya takî tî on wara kekn̂e hara,

11 Okopuci,

awomko tak ha.

Awamhîrî tak arko.

Amîn yaka tak etok hara,

kekn̂e tî Xesus pokumnî ya.

12 Ero ke yohno rma takî tî nawomyakn̂e pokumnînhîrî.

Taamhîrî tî naar̂akn̂e tooto komo wero ro rma.

Mîîmo yai tî cekn̂e.

Ero ke n̂eserepoketken̂e xa takî tî enîn̂e komo.

Kir̂wan̂he xa Kaan n̂iirî ham okre.

Ero wa akir̂wamano ritopo yenîn̂enho pînî ro mak kîwyam kopi,

ketken̂e tî.

Ero wa tî ketken̂e.

13 Ero yinhîrî tak ecihtaka takî tî cekn̂e Xesus.

Iito exitaw tooto komo mokyatken̂e xa hara yîhyaka mer̂pono pîn komo xa hara.

Ero ke n̂examro marha takî tî panatanmekyakn̂e.

14 Ero yinhîrî takî tî cekn̂e esama yaw hara.

Tîcetaw Repi takî tî n̂een̂akn̂e Awpew mumuru ha.

Ceremaxi tî xakn̂e kayaritomo purantan yahsîtopo yaw.

On wara tî kekn̂e Xesus yîwya,

Amok ha owenari,

kekn̂e tî.

Ero ke,

tok sai,

nawomyakn̂e takî tî Repi.

Xesus wenari tî cekn̂e.

Ero wa tî xakn̂e.

15 Amn̂e takî tî Xesus cekn̂e Repi mîn yaka eseresmaxi.

Yînpanatanmekrî komo marha tî cetken̂e akro.

Yaake marha tî xatken̂e iito n̂examro yakro ceseresmaxmu komo.

Kayaritomo purantan yahsîn̂e komo,

kicicitho komo marha,

ero warai komo tî n̂eseresmetken̂e iito Repi mîn yaw.

Xesus wenari tîtosom tî mîkyam xatken̂e.

Mer̂pora xatken̂e noro yipu komo.

16 Ero wa Xesus yeseresmatopo tî n̂een̂atken̂e Xutew panatanmetopo mewren̂e komo,

Parisew komo marha.

Kayaritomo purantan yahsîn̂e komo yakro eseresmarî tî n̂een̂atken̂e,

kicicitho komo yakro eseresmarî marha.

Ero ke on wara takî tî ketken̂e Xesusu npanatanmekrî komo ya,

Ahce kacho apanatanmekn̂e komo n̂eseresme noro yipu komo yakro kica?

Kayaritomo purantan yahsîn̂e komo yakro n̂eseresmesî kica,

kicicitho komo yakro marha kica,

ketken̂e tî yîwya so.

17 Yîmtapotarî komo tko tî n̂encekn̂e Xesus.

Ero ke on wara tî kekn̂e yîwya so,

Kar̂pe kexitaw kehceman̂e yaka tohra tasî.

Kar̂pera makî reha kexitaw kehceman̂e xe tasî.

Kir̂wan komo panatanmeso mokuhra ro mak wîxakn̂e oona roowo pona.

Kicicitho komo panatanmeso makî reha wa kmokyakn̂e.

Kicicme awehtoponhîrî komo men poxunkacoko,

kaxi kmokyakn̂e yîhyaka so,

kekn̂e tî Xesus.

Ero wa tî kekn̂e Xesus Parisew komo ya.

18 Ero yinhîrî on wara takî tî xatken̂e Xuaw npanatanmekîtho komo,

Parisew npanatanmekrî komo marha,

anarimaw so tî eseresmara xatken̂e pahkî.

Ero ke Xesus yaka takî tî mokyatken̂e anarî komo.

On wara tî ketken̂e yîwya,

Apa,

On wara naxe Xuaw npanatanmekîtho komo,

anarimaw so eseresmara naxe pahkî,

Parisew npanatanmekrî komo marha naxe ero wara.

Ero warahra reha naxe anpanatanmekrî komo.

Pahkî esereman me exihra ro mak naxe n̂examro reha.

Ahce kacho ero wa nat hara?

ketken̂e tî Xesus ya.

19 On wara tî kekn̂e hara Xesus yîwya so,

Ahce wa natu tooto pitacho yenso toxapu komo awya so?

Eseresmara ma re natu ero yimaw awya so?

Eseresman me exihra ro mak wa naxe cipitaxmu yakro cexitaw so.

20 Amn̂e tko cipitaxmu ces hara yîhyai so.

Ero yimaw tak pahkî eseresmara tak naxe,

kekn̂e tî Xesus yîwya so.

21 On wara marha wîîkes awya so,

kekn̂e hara tî,

Pahxantho poonotho etahyaxkache ahce warai ke ceemiya awya so?

Yaxan ke katî ceemiya ero yipu?

Pîra ro mak.

Yaxan ke eemiche pahxantho pen tak n̂etahyaxketîkes okwe.

22 Ero wa xa marha tasî uupa yukun poko hara.

Pahxantho yaka ciixan yarkara tasî een yaka.

Ero yipu yaka arkache n̂etawkesî thakwa enhîrî pen,

wok pen tak cetîkes okwe.

Yaxan yaka makî reha tarkesî ciixan uupa yukun ha,

kekn̂e tî.

Ero wa tî kekn̂e Xesus tîmtapotarî yentaxi mohxapu komo ya.

23 Taa,

ero yinhîrî tak esama yaw takî tî cekn̂e Xesus tînpanatanmekrî komo yakro.

Mararî pore tî cetken̂e kepokaretopo po.

Ero wa cetaw so yînpanatanmekrî komo tî puruma yeperîrî n̂axikwetken̂e.

24 Ero ke tî Parisew komo on wara ketken̂e Xesus ya,

Kica,

ahce kacho kpanatanmetopo yewetîra nat hara kica anpanatanmekrî komo?

Kepokaretopo po etapickara ehcoko,

kacho yewetîra naxe kica,

ketken̂e tî Xesus ya.

25 Ai ha,

kekn̂e hara tî Xesus yîwya so.

Kaan Karitan yenîhra ma matu amyamro hara Tapi pen yehtoponho?

N̂esemetanmekyakn̂e noro pen,

akrono komo marha.

Nîromanakn̂e thakwa okwe.

Akrono komo marha nîromanatken̂e.

26 Ero wa tî xakn̂e pahxa Abiata pen exitaw Kaan yaka cewomsom me.

Kaan mîn yaka marha n̂ewomyakn̂e Tapi pen.

Iitono takî tî nokyakn̂e cuure,

Kaan ya tîmxapu.

Tîmsom pokono komo yuru mak tan ha,

kacho rma nokyakn̂e.

Takrono komo yuru marha tî n̂ekamyakn̂e.

27 On wara xa wîîkes awya so kepokaretopo poko,

ahce kacho tooto nakîhcekn̂e Kaan awya so?

Sabatu po epokaretome so mak katî nakîcekn̂e?

Pîra ro mak.

Tooto komo xe cexirî ke mak,

Ero po epokarecoko,

kekn̂e Kaan.

28 Ero ke,

Ero wa ehcoko kepokaretopo po,

kan̂e me rma nasî Tooto me Ewruxapu,

kekn̂e tî.

Ero wa tî kekn̂e Xesus Parisew komo ya.