Ero yinhîrî tak Xutew Komo yesenmetopo yaka takî tî cekn̂e hara Xesus.

Iito tî tooto n̂een̂akn̂e hara amohnî.

2 On wara tî xatken̂e iitono komo,

Xesusu tî n̂een̂atken̂e en̂ekapotome tak amn̂e enîno rin̂e komo ya.

On wara tî ketken̂e,

Kepokaretopo on kaamo,

amohnî na nakir̂wame on po rma.

Ero wa exitaw,

Kicicitho moso kica,

tîtkacerî enîno rin̂e komo ya,

ketken̂e tî kica.

3 On wara rma tko tî kekn̂e Xesus amohnî ya,

Oona ka amok ha,

kekn̂e tî.

4 Ero yimaw rma tî on wara kekn̂e iitono komo ya hara,

Ahce wa xa ciino cirpore nai kepokaretopo po awya so?

Akir̂wamano cirpore nai?

Emetanmekno katî cirpore nai awya so?

Karihtono cicir̂a waipîra ehtome so?

Waihkano katî cicir̂a awya so?

Ahce wa xa katî cirpore nai awya so kepokaretopo po ha?

kekn̂e tî yîwya so.

Tîî,

ketken̂e makî tî,

eikura ro makî tî xatken̂e iitono komo.

5 Rîîwoxe takî tî esenmexapu komo wece n̂een̂akn̂e Xesus.

Ahwora ro makî tî xakn̂e poko so ceipuru wara exirî ke yîropotari komo.

Ero yinhîrî amohnî yakro takî tî nîmtapowakn̂e hara,

Etamoyankak ha,

kekn̂e tî yîwya.

Ero ke takî tî n̂etamoyankekn̂e.

Kir̂wan̂he takî tî amorî xakn̂e eeco wara rma okre.

6 Ero ke Parisew komo takî tî n̂epataketken̂e.

Ero yimaw rma takî tî Xesus waihkacho poko n̂esencetken̂e Eroces ponarono komo yakro.

Ero wa tî xatken̂e.

7 Yihyai so tko tî cekn̂e Xesus.

Ecihtaka takî tî cekn̂e tînpanatanmekrî komo yakro.

N̂examro wenari rma tî cetken̂e xa hara tooto pen komo mer̂pono pîn,

Karireia pono komo tî,

Xuteia pono komo marha tî,

8 Xerusaren pono komo marha tî,

Itumeia pono komo marha tî,

Xotaw yeco pono komo marha tî,

Ciru mîtwono komo marha tî,

Siton mîtwono komo marha tî,

ero warai komo tî cetken̂e Xesus wenari.

Noro yehtopo tî n̂encetken̂e,

emapona cirihnî ciitopo yîwya.

Ero ke tî wenari cetken̂e.

9 Ero ke kanawa takî tî n̂ekpekn̂e Xesus tînpanatanmekrî komo ya.

Okanawarî ehcoko xiya tooto komo ya oyerewnukuchen,

kekn̂e tî.

10 Mer̂pono pîn komo tî nakir̂wamekn̂e Xesus.

Ero ke cikihciki ketken̂e mak Xesus poko ahce wa so na cehsom komo.

Teme ka xe makî tî xatken̂e Noro poko kir̂wan̂he cehtome so hara.

11 On wara tî xatken̂e kicicitho yekatî ken̂arî komo Noro yenîche,

n̂esewnapetken̂e roro Noro yamrinaka.

Kaan Mumuru ro xa Amoro ham,

ketken̂e tî yîwya.

12 Xesusu tko on wara roro kekn̂e yîwya so,

Ero wa oyehtopo ekatîmra ro mak men ehcoko,

kekn̂e.

Cerewre tî kekn̂e ero wa.

Ero wa tî xakn̂e.

13 Taa,

ero yinhîrî îh pona takî tî cekn̂e Xesus.

Iito cexitaw anarî komo takî tî nan̂ikyakn̂e tînîhtînoputhîrî komo mak ha.

14 12 takî tî men̂ekekn̂e takrono ro me.

Miya so tîtosom me tak n̂iir̂akn̂e,

Kaanî mtapotarî yekatîmrî pokono ro me.

15 Okoh komo yakir̂waman̂e me marha tî n̂examro n̂iir̂akn̂e,

worokyam yen̂epen̂e me marha tî.

Ero warai me tî n̂examro n̂iir̂akn̂e.

16 Osotî komo tak wekatîmyasî.

Simaw tî xakn̂e Xesus nosohtotho,

Petru amoro,

kekn̂e tî yîwya,

noro,

17 Ciaku takî tî xakn̂e,

Sebeteu mumuru ha,

Xuaw takî tî,

noro yakno rma.

N̂examro takî tî Xesus nosohcekn̂e.

Boaneces,

kekn̂e poko so.

Tarai mumuru komo,

kacho rma mîn,

Boaneces,

kacho.

18 Antre takî tî xakn̂e.

Piripe,

Bahtoromew,

Mateus,

Tome komo marha ti xatken̂e.

Ciaku takî tî xakn̂e hara.

Anarî tî mîk xakn̂e hara Ciaku,

Awpew mumuru tî.

Tatew,

takî tî xakn̂e,

Simaw marha takî tî anarî hara.

Seroce kacho tî mîk xakn̂e noro.

19 Xutas Iskar̂otes tak.

Xesus yekanîn̂e tî mîk xakn̂e noro.

Ero wa tî Xesus men̂ekekn̂e takrono ro komo.

20 Îîpî yenîhtoche takî tî iitono mîn yaka n̂ewomyatken̂e.

Iina takî tî mokyatken̂e tooto komo xa hara,

mer̂pono pîn xa hara.

Ero ke cemyarke ro makî tî xatken̂e ceseresmarî komo yarohra okwe.

21 Ero wa Xesus yehtopo takî tî n̂encetken̂e iyanan komo.

Ero ke on wara tî ketken̂e,

Nîmtawaimamyasî mak kica,

ketken̂e tî.

Ero ke Xesus yahsîso takî tî re mokyatken̂e.

Ero wa tî mokyatken̂e.

22 Iito marha tî xatken̂e Xutew panatanmetopo mewren̂e komo,

Xerusaren pono kom ha tî.

On wara tî ketken̂e n̂examro Xesus poko,

Bewsebu rma tko nasî yîropotaw kopi.

Worokyam kayaritomon yanme rma worokyam n̂en̂epesî kopi,

ketken̂e marha tî kica.

23 Ero ke ero wa kan̂e komo takî tî nan̂ikyakn̂e Xesus.

Mokuche so anarî pokono wara takî tî n̂esencekn̂e akro so.

On wara tî kekn̂e yîwya so,

Ahce wa thakwa re Satanas n̂en̂epe Satanasî rma?

Pîra ro thakwa mak.

24 Kayaritomo maywen komo yetar̂metaw etpoko rma ahce wa tak nai amn̂e noro,

kayaritomo pen awya so?

N̂emaywenketîkesî thakwa okwe,

kekn̂e tî Xesus.

25 Ahce wa natu ero re mîîmo yawno kom hara awya so?

Etîxera cexitaw so n̂examro re rma,

etpoko cetar̂metaw so marha?

N̂etahsîpînkexe mak tak okwe noro yipu komo.

26 Ero wa xa marha nasî Satanas hara tmaywen komo poko rma etar̂metaw n̂emaywenketîkesî makî tak noro pen.

Kayaritomo mera ro makî tak nasî.

27 Ahce wa nai cen̂epan̂em karitî yemyawno yarî xe cexitaw?

Ewomra nasî emyawno wece kar̂pe exirî ke osom.

Apomiche mak yîmîn yaka tak n̂ewomyasî.

Emyawnonhîrî tak naar̂asî,

kekn̂e tî Xesus yîwya so.

28 Ero yinhîrî on wara tî kekn̂e xa hara Xesus yîwya so,

Yaaro tan wîîkes awya so,

kicicme tooto komo yehtoponho nîhcamnoyasî Kaan ahnoro rma re.

Tpoko rma kicicme yîmtapowataw so na ero wa ehtoponhîrî komo meero nîhcamnoyasî.

29 Kir̂wanî ro Yekatî yîwîrîyaketaw reha yîwya so ero wa ehtoponhîrî komo tak nasî yîhcamnopîn me ro mak okwe.

Miya roro twaihsom mîkro,

kacho me thakwa naxe ero wa cehsom komo reha,

kekn̂e tî Xesusu yîwya so.

30 Ero wa tî kekn̂e Xesus Xutew panatanmetopo mewren̂e komo ya.

Kicicitho yekatî ken̂arî mîkro,

karî ke yîwya so tî ero wa kekn̂e.

31 Taa,

ero yinhîrî tak Xesus yon takî tî mokyakn̂e yîhyaka,

akno komo marha tî.

Mîîmo mkai makî tî n̂ecececetken̂e.

En̂exa takî tî Xesus nan̂ikpetken̂e.

32 Mîîmo yaw tî xakn̂e Xesus mer̂pono pîn komo yakro.

Ceremaxi tî xatken̂e tooto komo Xesus mamhoko.

Ai,

ketken̂e takî tî yîwya,

mînto tî nai anocwan,

awakno komo marha.

Mîîmo mkai tî natu.

Aaxe tî nat ha,

ketken̂e tî yîwya.

33 Yîmtaka so tko tî n̂eyukyakn̂e Xesus.

Onoke warai komo xa onocwan me so nat awya so?

Onoke warai komo marha natu oyakno komo me hara awya so?

kekn̂e tî yîwya so.

34 Mîîmo yawno komo porero takî tî n̂een̂akn̂e Xesus,

ahnoro porero rma.

On wara kekn̂e,

Moxamu rma moxam onocwan komo,

oyakno komo marha okwe.

35 Kaanî mtapotarî yewetîn̂e me awexitaw so oyakno me tak maxe,

oyepeka me marha maxe,

onocwan me marha maxe,

kekn̂e tî Xesus yîwya so.

Ero wa tî kekn̂e.