Ero yinhîrî tak ecihtaka takî tî cekn̂e xa hara Xesus.

Iito cexitaw panatanmekno tî n̂iir̂akn̂e xa hara.

Tooto komo tî mokyatken̂e yîhyaka mer̂pono pîn komo xa hara.

Kanawa tî xakn̂e iito.

Ero ke ero yaka takî tî n̂esenkayakn̂e Xesus.

Ero yaw takî tî n̂eremekn̂e.

Ecihtaw rma tî xatken̂e tooto komo tuuna wece cewru.

2 N̂examro takî tî panatanmekyakn̂e Xesus mîn hak poko.

Anarî pokono wara makî tî n̂ekatîmyakn̂e yîwya so.

3 On wara tî kekn̂e,

Ai oyakno komo,

omtapotarî ka entacoko.

On wara xakn̂e mararî yosom,

tînatîrî yatho ciiso cekn̂e mararî pona.

Puh sarara me mak pahyakn̂e ciitome rma.

4 Ero wa pahyataw esama porero mak n̂epahyakn̂e yathîrî etpoi mak.

Amn̂e tak torowo mokyakn̂e ahso.

Iitononhîrî tak nahtîkekn̂e okwe esama porerononho.

5 Anarî mko n̂epahyakn̂e toh ken̂arî cheka hara.

Wahra mak xakn̂e roowo iito.

Yohno rma natîkwakn̂e yathîrî panape exirî ke roowo iito.

6 Kaamo yawomuche n̂etîyekn̂e tak oco.

Naawaiyakn̂e thakwa tak yimicimra cexirî ke.

7 Anarî mko n̂epahyakn̂e cekyekyem cheka hara.

Ero yinhîrî cekyekyem tak natîkwakn̂e naatî yopo.

Naatî pen n̂ipin̂oyakn̂e okwe.

Ero ke epetara thakwa xakn̂e iitono naatî.

8 Anarî mko n̂epahyakn̂e hara ewtî mexan pona.

Iitono tak natîkwakn̂e kir̂wan̂he okre,

n̂eperwakn̂e marha.

30 me n̂eperwakn̂e anarî mko.

60 me n̂eperwakn̂e anarî mko hara.

100 me n̂eperwakn̂e anarî mko hara.

Ero wa so n̂eperwakn̂e ewtî mexan pona epahxapu reha.

9 Ero wa kacho men entacoko entan̂e me awexitaw so ha,

kekn̂e tî Xesus.

Ero wa tî kekn̂e esenmexapu komo ya.

10 Ero yinhîrî tak esenmexapunhîrî komo takî tî cetken̂e hara.

Iito rma tî xakn̂e Xesus.

Iito marha tî xatken̂e 12 komo.

Anarî komo marha tî xatken̂e 12 komo yakro.

On wara tî ketken̂e n̂examro Xesus ya,

Ai Apa,

Ahce warai pokono xa mîn mekatmo yîwya so ha?

ketken̂e tî yîwya.

11 On wara tî n̂eyukyakn̂e Xesus,

camkîra maxe amyamro reha kah yawno maywen me awehtopo komo poko.

Kaanî cma ero yipu n̂entamexpesî awya so entanînhîrî rma.

Pîra reha nasî tmaywen pîn komo ya.

Ero ke anarî pokono wara makî reha wekatîmyasî yipu komo ya.

12 Ero wa mak wekatîmyasî Kaanî mtapotarî yîwya so ewuhnî wara mak ehtome so cewkemu rma ha re,

entara ehtome so marha entan̂e komo rma ha re.

Sara wara enta xera nat ham,

cetaknama xera ro mak naxe Kaan wece.

Ero ke thakwa kicicme ehtoponhîrî komo ehcamnopîra rma nas okwe,

kekn̂e tî Xesus yîwya so.

13 Ero yinhîrî tak on wara tî kekn̂e hara Xesus yîwya so,

Entara ma mehcow omtapotarî,

anarî pokono wa wekatmo ero ha?

Miya rma nasî Kaanî mtapotarî anarî pokono wa cekatîmsom.

Ahce wa thakwa ma re mencetu ero yipu xa hara amn̂e?

14 On pokono rma mîn,

wekatmo awya so ero,

tînatîrî ciin̂e wara nasî Kaanî mtapotarî yekatîmn̂e.

15 Esama porerono wara mak naxe yîmtapotarî yentan̂e komo,

anarî komo.

Entache rma yîwya so Satanas tak mokyasî yîn̂entathîrî komo yowso hara okwe yîropotaka so pahxapunhîrî.

16 Toh ken̂arî wara naxe anarî kom hara.

Kaanî mtapotarî marha n̂encexe noro yipu kom hara.

Entache rma ka ponaro naxe.

Tawake marha ka naxe tîn̂entathîrî komo poko.

17 Yimicimnî wara tko naxe okwe.

Ero ke yohno mak naxe Kaanî mtapotarî ponaro.

Amn̂e tak n̂esemetanmekyaxe hara okwe.

Kaanî mtapotarî yewetîrî ke mak yîwya so n̂emetanmekyaxe tooto kom okwe.

Ero ke yohno rma tak Kaan poko nahwokexe hara okwe.

18 Anarî komo naxe cekyekyem chewno wara hara.

Noro yipu komo marha n̂encexe Kaanî mtapotarî.

19 Ero yinhîrî cemyarîrî ponaro mak tak n̂ehtîkexe hara.

Tahworen̂e me cemyawno komo nîhtînoyaxe.

Tohnaw mak ero wara nîhtînoyaxe kica.

Mîn hak poko mak n̂epohketîkexe.

Ero ke yipin̂oxapu wara nas okwe Kaanî mtapotarî yîn̂entathîrî kom ha.

Ero wa exirî ke tak epetantho wara mak naxe okwe.

20 Taa,

ewtî mexan wara naxe anarî komo xa hara.

Kaanî mtapotarî marha n̂encexe noro yipu kom hara.

N̂ewehcaxe tak okre.

Cepetaxmu wara tak naxe noro yipu komo reha okre.

30 me n̂eperwaxe anarî komo,

60 me n̂eperwaxe anarî kom hara,

100 me n̂eperwaxe anarî komo xa hara.

Ero wa naxe ewtî mexan warai komo,

kekn̂e tî Xesus.

Ero wa tî kekn̂e tînpanatanmekrî komo ya.

21 Taa,

ero yinhîrî takî tî on wara kekn̂e hara Xesus yîwya so,

Ahna miir̂atu weeyu potuhtoche awya so?

Tahrem mamaka katî miir̂atu?

Kama mamaka xa katî miir̂atu?

Pîra ro mak.

Apon pona mak miir̂axe.

22 Ero wa xa marha nasî ahce wa na awehtoponhîrî komo amn̂e,

ekatîmnînhîrî rma.

Exihra ro mak tak nasî amn̂e ekatîmnî.

Eyamxapunhîrî marha n̂esenpetîkes amn̂e,

weixapu wara tak nas ahnoro.

23 Entacoko men omtapotarî entan̂e me awexitaw so,

kekn̂e tî Xesus yîwya so.

24 On wara marha tî kekn̂e Xesus yîwya so,

Kaanî mtapotarî yencetaw awya so takîhso men entacoko.

Atî wicakî na nai Kaanî mtapotarî ponaro awehtopo komo?

Ero wicakî xa marha n̂entamexpes hara Kaan awya so.

On wara marha nasî Noro,

takîhso encetaw tîmtapotarî awya so an̂entathîrî rma tak nîhremes hara Kaan.

25 Ero wa awin̂e komo me roro nasî Kaan.

Sara wara entan̂e me awexitaw so Kaanî mtapotarî poko,

an̂entarî komo rma nîhremes hara Noro.

Yîmtapotarî yentan̂e pîn me awexitaw so tko,

an̂entathîrî komo rma cik nowtîkes okwe,

kekn̂e tî Xesus.

Ero wa tî kekn̂e yîwya so.

26 Ero yinhîrî on wara tî kekn̂e xa hara Xesus yîwya so,

On wara marha nasî Kaan maywen me awehtopo komo,

naatî yatîhtacho wara rma nasî.

Ahce wa natîkwa naatî awya so?

Yihcirî me ka tînatîrî yatho pahyasî mararî yosom.

27 Ero yinhîrî nîwînîkyasî noro kosope,

pakes hara enmapuche.

Tanme ro rma natîkwasî.

Ahce wa xa natîkwa,

kesî mak ciin̂enhîrî,

yîhtînopîra ro mak nasî.

28 Tanmero mak tatîhtaxmu me nasî naatî ahnoro.

Yaarî makî ka n̂esenpesî cokorî.

Ero yinhîrî tak eperîrî n̂esenpes hara.

Ero yinhîrî tak eperîrî nakîhyas hara.

29 Akpîche tak ero yimaw rma nîhkocesî osom eperîrî yenmetopo me exirî ke,

kekn̂e tî Xesus.

Ero wa tî kekn̂e tînpanatanmekrî komo ya.

30 Ero yinhîrî tak on wara tî kekn̂e xa hara Xesus yîwya so,

Ahce wa xa tko nai Kaan maywen me awehtopo komo?

Ahce warai pokono wa kyam wekatîmya xa hara ero wara awehtopo komo awya so?

kekn̂e tî.

31 Mostata yatho wara xa nasî Noro maywen me awehtopo komo.

Wahrai ro mak mîn mostata yatho.

Ahnoro roowo pono yatho xawyakan xa mîn ha.

32 Ero yipu ciriche cik natîkwasî tak,

por̂mamyasî marha kaw xa.

Anarî komo yopo tak por̂mamya naatî komo yopo.

N̂eseknacesî marha peremru porin me.

Ero yipu yawarpanaka tak mokyaxe torowo komo tîmîn̂ ciiso,

kekn̂e tî Xesus yîwya so.

33 Ero wa so tî kekn̂e Xesus,

mîn hak pokono wara so tî n̂ekatîmyakn̂e Kaanî mtapotarî esenmexapu komo ya.

Entan̂e me ehtopo komo yecenarî makî tî n̂ekatîmyakn̂e yîwya so.

34 Anarî pokono wara makî tî n̂ekatîmyakn̂e yîwya so.

Tooto chewra cexitaw,

kir̂wantawno me tak n̂ekatîmyakn̂e ahnoro tînpanatanmekrî komo ya reha.

Ero wa tî xakn̂e Xesus.

35 Ero yinhîrî tak ero kaamo po rma kokon̂i exiche tak tî on wara kekn̂e Xesus tînpanatanmekrî komo ya,

Kaikatko tak eeco pona hara,

kekn̂e tî.

36 Ero ke takî tî esenmexapu komo nînomyatken̂e.

Kanawa yaw takî tî cetken̂e.

Tîyotaka so rma tî Xesus n̂enkayatken̂e.

Anarî komo marha tî cetken̂e n̂examro yakro tkanawarî yaw so tî cetken̂e.

37 Cetaw so rma takî tî nocowonakn̂e kar̂pe ro mak kopi.

N̂ekahximekn̂e ro mak takî tî tuuna.

Ero ke kanawa pen tî n̂etarîcekn̂e tak okwe.

38 Xesusu tko tî nîwînîkyakn̂e kanawa mapitaw.

Tîhtîyapoi tî nîwînîkyakn̂e.

N̂enpaketken̂e tak tî yînpanatanmekrî komo.

Apa,

ketken̂e tî yîwya,

tîtwaiyaxe okwe.

Ponarora ma mai ke kopî?

ketken̂e tî yîwya.

39 Ero ke takî tî nawomyakn̂e Xesus.

Ocowo yakro tî nîmtapowakn̂e cewetîsom me.

Tîî kasko,

atîtmamko tak ha,

kekn̂e tî tuuna ya.

Ero ke takî tî nîtîtmamyakn̂e.

Tîtpe ro mak takî tî xakn̂e okre.

40 Ero yinhîrî on wara tî kekn̂e Xesus tînpanatanmekrî komo ya,

Ahce kacho merahtîmcow hara?

Ahce kacho opona enîhra mat okwe?

kekn̂e tî yîwya so.

41 N̂eraswatken̂e ro makî tî yînpanatanmekrî komo.

Onoke xa Moso hara kopi?

ketken̂e takî tî.

Yîmtapotarî n̂ewehcasî ocowo kopi,

tuuna marha,

ketken̂e tî.

Ero wa tî ketken̂e.