Xesus Yehtoponho Rukas Nmewretho
Rukas
Xesus Yehtoponho Tan Mewresî, Kacho
1
Taa,
on okaritan an̂enîrî,
Teopiru amoro.
Pahxa rma anarî komo mewretken̂e Xesus yehtoponho,
ponaro kehtopo komo xa.
Yaaro xa ham,
kacho mîn kîwya so.
Tatke mewretken̂e ehtoponhîrî yaw roro.
2 Noro yenîn̂enho komo mtapotarî rma mîn cencetken̂e,
Kaanî mtapotarî yekatîmn̂e komo mtapotarî ha.
Yîmtapotarî komo mewretken̂e anarî komo kn̂enîrî komo me.
3 Ero ke on wara wîhtînoyasî,
pahxa rma ween̂akn̂e yînmewrethîrî komo,
Xesus yehtoponho yaw rorono xa.
Ero ke ow makîrha tak mewresî Noro yehtoponho xa hara an̂enîrî.
Tatke xa marha mewresî,
wîîkesî.
4 Yaarono xa mîn wencekn̂e ham Xesus yehtoponho,
kachome tak awya so mewres ow hara an̂enîrî.
Ero wa kachome awya mewresî.
Lucas 1:1-25
Sakarias Xîkrî Yekatîmtoponho Ancu Ya
5 Taa,
pahxa tî xakn̂e Kaan ya tîmsom pokono.
Sakariasî tî mîk xakn̂e noro yosotî.
Eroces tî xakn̂e Xuteia pono komo kayaritomon,
ero yimaw tî xakn̂e Sakarias.
Abias yepamtho tî mîk xakn̂e.
Isabew tî xakn̂e noro pici yosotî.
Araw pen yepamtho rma tî mîk xakn̂e yipici.
6 Kir̂wan me tî n̂examro n̂een̂akn̂e Kaan.
Kporin komo mtapotarî tî n̂ewetîtîketken̂e tpanatanmecho kom ha.
Kicicme naxe kica,
kacho mera ro makî tî xatken̂e n̂examro okre.
7 Yîmxîkîra makî tko tî xatken̂e okwe.
Yîmxîtanî ro thakwa tî mîk xakn̂e Isabew.
Nocwakomotho me thakwa tî xakn̂e okwe.
Poritomotho me marha tî xakn̂e iin̂o hara.
Ero wa tî xatken̂e n̂examro.
8 Taa,
ero yimaw tak Abias yepamtho komo makîrha takî tî xatken̂e Kaan ya tîmsom pokono me hara.
9 Ero ke Sakarias takî tî xakn̂e tîmsom pokono me noro yipu komo yehtopo yaw roro.
Ero wa exitaw noro pona takî tî xakn̂e kotoporem yakn̂itopo.
Ero ke Kaan mîn yaka takî tî n̂ewomyakn̂e kotoporem yakn̂itome.
10 Ero yimaw Kaan mînî mkai takî tî xatken̂e tooto komo mer̂pono pîn kotoporem yakn̂itopo me exirî ke.
Kaan yakro tî ka nîmtapowatken̂e iito.
11 Taa,
kotoporem yakn̂iyataw rma Sakarias ya Kporin komo yancun takî tî n̂esenpekn̂e yîwya.
Cececetoso tî xakn̂e iito kotoporem yakn̂itopo mîtwo,
kaari n̂ixa.
12 Ancu yenîche tak n̂eserepokekn̂e xa takî tî Sakarias.
N̂eraswakn̂e marha tî.
13 On wara tî kekn̂e ancu yîwya,
Ai Sakarias,
erasîra esko.
Amtapotarî rma tî n̂encekn̂e Kaan.
Ero ke takî tî apici n̂ewruya amn̂e Isabew.
Amumuru tî mîk n̂ewruya.
Ewruche Xuaw me takî tî osohtoko.
14 Tawake xa takî tî mai amn̂e noro yewrurî ke.
Anarî komo marha tî natu tawake noro yewrurî ke,
mer̂pono pîn komo.
15 Amn̂e tak por̂mamtîkache anarî komo yopono me takî tî n̂eena Kporin komo.
Uupa yukun yeen̂e pîn me tî nai amn̂e,
kawaxiyem yeen̂e pîn me marha tî.
Kir̂wanî ro Yekatî ken̂e xa tî nai.
Ero wa tî nai mehxa ro ewrutoponhîrî n̂ixa ro.
16 Ixaw Yana komo yaknaman̂e me tî nai amn̂e.
Mer̂pono pîn tî naknametu Tporin komo ponaro tak ehtome so.
17 Yîchere so tî nîîce Kporin komo yesamaka.
Erias pen wara rma tî panatanmeno n̂iir̂a.
Kaan Yekatî ken̂e xa nasî,
Erias pen xakn̂e ero wa xa marha.
Noro pen wara marha tî nîmtapowa hara,
cewetîsom me xa.
Yîîm komo tî panatanmekya.
Amxîkrî komo ponaro n̂he tak ehcoko,
nîîke tî yîwya so.
Kaan yanwekn̂enho komo marha tî panatanmekya hara.
Kir̂wanî ro Mîk Kaan.
Ero ke yîmtapotarî ewetîcoko,
nîîke marha tî yîwya so.
Ero wa tî panatanmekno n̂iir̂a Kporin komo yesamaka Noro ponaro tak ehtome so mokyataw.
Ero wa tî nai amumuru amn̂e,
kekn̂e tî.
Ero wa tî kekn̂e ancu Sakarias ya.
18 Taa,
on wara takî tî Sakarias kekn̂e hara ancu ya,
Nnn,
ahce warai xa menpe amna ya,
Yaaro ham,
kachome amna ya?
kekn̂e tî yîwya.
Poritomotho thakwa ow ha.
Nocwakomotho marha thakwa mîk opic hara,
kekn̂e tî Sakarias ancu ya.
19 On wara tî kekn̂e ancu Sakarias ya hara,
Kabrew ow ha.
Kaan mîtwono xa ow ha.
Noro rma Mîk oyen̂epew amxîkrî komo yewrutopo yekatîmso awahwotachome so tak okre.
20 Yîmtapotan me tko ka masî.
Tîî wara makî ka masî omtapotarî yanwekrî ke awya.
Amn̂e mak mîmtapowas hara omtapotachonho yaw roro exiche mak tak.
Yaarono xa mîn wekatmo awya amxîtacho.
Enko xe amn̂e,
kekn̂e tî ancu Sakarias ya.
Ero wa tî kekn̂e.
21 Taa,
iito rma tî xatken̂e esenmexapu komo Kaan mînî mkai rma.
Sakariasî tî momokyatken̂e iito.
N̂eserepoketken̂e takî tî pahkî exirî poko Kaan mîn yaw.
22 Amn̂e takî tî Sakariasî n̂epatakekn̂e Kaan mîn yai.
Yîmtapotan me thakwa tî xakn̂e okwe.
Ahce wa noro n̂ex hara?
ketken̂e takî tî iitono komo.
Kaan n̂enpotho tko na n̂enwo Kaan mîn yaw,
ketken̂e tî.
Ero wa thakwa tî xakn̂e Sakarias okwe yîmtapotara tî xakn̂e.
Pokupoku kekn̂e makî tî.
23 Taa,
amn̂e tak cemyarîrî yîtîhkache tak tîmîn yaka takî tî cekn̂e hara Sakarias.
24 Ero yinhîrî takî tî yipici n̂etahsîyakn̂e Isabew.
Ero ke mîîmo yaw makî tî ka xakn̂e epatakara.
5 nuun̂i tî ero wa xakn̂e.
25 On wara takî tî kekn̂e noro,
Owakre tak ham Kporin kom okre.
Oponaro tak nai ham.
Owîrîyaketken̂e opoyino komo.
Noro tko owakresî yîwîrîyakan me tak oyehtome,
kekn̂e tî.
Ero wa tî kekn̂e Isabew.
Xesus Yewrutopo Yekatîmtoponho
26 Taa,
ero yinhîrî takî 6 nuun̂i takî tî xakn̂e Isabew yetahsîtoponho.
Ero yimaw tak ancu takî tî n̂en̂epekn̂e xa hara Kaan Kabrew xa hara.
Nasare pona tî n̂en̂epekn̂e.
Karireia rowon pono rma mîn Nasare,
ewto ha.
Um anjo anuncia o nascimento de Jesus
Lucas 1:26-80
27 Iitono yaka makîrha tî n̂en̂epekn̂e hara,
Maria yaka takî.
Kîîrî pokono pînî ro makî tî mîk xakn̂e Maria.
Xose pici me rma tko tî noro xakn̂e,
mooxe makî tî ka.
Tapi pen yepamtho rma tî mîk xakn̂e Xose.
28 Ero ke Maria yaka takî tî cekn̂e ancu.
Ai okopuci,
kekn̂e tî,
ahwotakî xa,
awakro xa tî nai Kporin komo okre.
Anarî komo rma re Kaan nakronomesî,
wooxam komo.
Amoro xa tko masî yînakronomarî me xa tak ha.
Kaan tî awakronome amn̂e.
Awakro xa tî nai Kporin Kom ha,
kekn̂e tî.
29 Kopi,
kekn̂e takî tî Maria.
Ahce kacho ero wa mîîke kopi owya,
kekn̂e tî.
N̂eserepokekn̂e ro makî tî ancu yenîrî ke.
30 Erasîra ro mak esko okopuci,
kekn̂e takî tî ancu yîwya.
Kaan nwakrerî me xa masî kir̂wanhe awenîrî ke yîwya.
31 Metahsîya takî tî amn̂e.
N̂ewruya takî tî amrerî ciki.
Xesus Moso yosotî,
kasko ewruche.
32 Kyopono me xa takî tî nai amn̂e Noro.
Kyopono ro Mumuru Mîk Noro ha,
kacho me marha tî nai amn̂e.
Ixaw Yana komo kayaritomon me takî tî Noro n̂iir̂a amn̂e Kporin komo Kaan.
Tporin pen retawno me rma tî n̂iir̂a,
Tapi pen retawno me ha.
Ero wa tî nai amn̂e.
33 Miya roro tî nai Xako pen yepamtho komo kayaritomon me.
N̂eexi tak kayaritomo me noro yehtopo,
kacho mera ro mak nasî,
kekn̂e tî ancu Maria ya.
34 On wara takî tî kekn̂e Maria ancu ya.
Ahce wa thakwa re kewruya?
Oyin̂o exihra ro mak nas okwe,
kekn̂e tî.
35 On wara tî ancu n̂eyukyakn̂e,
Kir̂wanî ro Yekatî takî tî mokya aropotaka.
Karitî ro tî Mîk mokya,
Kyopono ro Yekat ha.
Noro yanme takî tî metahsîya amn̂e.
Ero ke Kaan Mumuru Mîkî,
kacho me takî tî nai Noro.
Kir̂wanî ro tî Mîk n̂ewruya amn̂e amrerî rma.
36 Ero wa xa marha nasî ayanan hara Isabew,
tarke marha nasî.
Pahxa rma noro n̂etahsîyakn̂e.
6 nuun̂i tak nasî etahsîtoponhîrî.
Kîîrî marha tî mîk yîropotawno.
Nocwakomotho me rma n̂etahsîyakn̂e.
Yîmxîtanî ro mak mîk okwe,
kachonho rma n̂etahsîyakn̂e.
37 Kaanî rma ero wa noro n̂iire.
Ehn̂anî ro mak Mîk Noro cirihnî ciitopo poko rma,
kekn̂e tî Maria ya.
Ero wa tî kekn̂e ancu yîwya.
38 Taa,
ero wa wai ham amn̂e amtapotachonhîrî yaw roro rma,
kekn̂e takî tî Maria ancu ya.
Kporin komo yanton mak ow ha,
kekn̂e tî.
Ero wa tî kekn̂e Maria ancu ya.
Ero yinhîrî takî tî ancu cekn̂e hara.
Ero wa tî xakn̂e.
Isabew Yaka Cesî Maria
39 Taa,
ero yinhîrî takî tî Maria cekn̂e hara Xuta pona Isabew yaka.
Îîpî chewno tî mîkyam xatken̂e Sakarias komo.
N̂examro yewton pona tî cekn̂e Maria kar̂pe.
40 Sakarias mîn yaka tî cekn̂e.
Cewomche rma tak Isabew yakro tî nîmtapowakn̂e Maria.
Tan mai yeme,
kekn̂e tî Maria yîwya.
41 Taa,
Maria mtapotarî yentache rma takî tî cikihciki kekn̂e Isabew ropotawno rikomo.
Ero yimaw marha tî yîson xakn̂e Kaan Yekatî ken̂e xa.
42 Ero ke Maria ya takî tî n̂ekatîmyakn̂e Kaanî mtapotarî.
Kar̂pe ro makî tî nîmtapowakn̂e.
Kaan nakronomarî xa amoro ham okopuci.
Anarî komo rma re Kaan nakronomesî wooxam komo.
Amoro xa tko masî yînakronomarî me xa marha takî.
43 Oporin yon amoro.
Ohyaka rma tko mîmoko ero warai pîn yaka rma.
44 Amtapotarî yentache rma tak owya cikihciki nîîka rikomo oropotawno.
Tawake ciki n̂eexi.
45 Kporin komo mtapotarî mewehce ham.
Taa,
ero wa wai ham,
mîîkai.
Tîmtapotachonhîrî yaw roro rma awakronomesî,
amrerî marha nakronomesî,
kekn̂e tî.
Ero wa tî kekn̂e Isabew Maria ya.
Maria Nîmtapowasî Tahwore Kaan Poko
46 Taa,
ero yinhîrî Maria makîrha takî tî nîmtapowakn̂e hara Kaan poko.
On wara tî kekn̂e,
Kir̂wan̂he ro mak Kaan nai ham okre,
wîîkesî tak.
Ero wara xa Noro wîhtînoyasî oropotaw xa.
47 Kaan poko tak kahwowasî oyekatî ke okurunpen̂e me exirî ke.
48 Kaan yanton mak ow ha,
anarî komo xawyakan mak.
Kaan nakronomatho xa mîk xakn̂e ham,
kexe tak amn̂e opoko miya roro ehretawnomaxapu komo.
49 Karitî ro mak Mîkî Kaan,
keserepokacho yenpon̂e.
Ero wa cehtopo n̂enpoi owya owakrerî ke.
Kir̂wanî ro xa Mîk ha,
kacho Mîk Noro.
50 Kîpînîn yaw so marha nai ham Kaan okre,
tponarono komo pînîn yaw.
Ero wa xa marha nasî Kaan amn̂e kepamthîrî komo poko hara,
yîpînîn yaw so marha nasî miya roro ehretawnomaxapu komo poko yîtîhkan me ro mak,
kekn̂e tî Maria.
51 Tapokaritî xa Mîk Noro.
Ero ke ero wa cehtopo n̂enpekn̂e kîwya so.
Cehcoyoponkaxmu komo tî nakpayakn̂e.
Ow xa anarî komo yopono,
karî ke nar̂mekn̂e.
52 Yukurumîknonhîrî pen komo tak nar̂mekn̂e Kaan,
kayaritomonhîrî pen kom ha.
Kyopono pînînho komo makîrha tak n̂iir̂akn̂e kayaritomo me hara.
53 Tîroman̂emînhîrî komo marha tak nînahmesî tpoxwem ke okre.
Tmaxmitaxi ro nînahmes okre.
Tupurantayemînhîrî komo tak n̂en̂epesî yînapumra rma.
Ero wa tak ciino n̂iir̂asî Kaan.
54-55 Tanton komo tak nakronomesî Noro Ixaw Yana kom ha.
Yîpînîn yaw so nai ham tîmtapotachonhîrî yaw roro rma.
Pahxa rma tî kekn̂e kporin pen komo ya,
Abraaw pen ya,
Kakronomesî amn̂e Abraaw,
awepamthîrî komo meero wakronomesî miya rorono kom ha,
kekn̂e tî yîwya.
Ero wa kachonho yaw roro rma tak kakronomexe so Kaan oroto,
kekn̂e tî Maria.
Ero wa tî kekn̂e.
56 Ero yinhîrî tak Isabew yaw rma tî ka n̂enmayakn̂e Maria.
3 nuun̂i tî xakn̂e iito.
Ero yinhîrî takî tî cekn̂e hara Maria tîmîn yaka hara.
Ero wa tî xakn̂e.
Xuaw Yewrutoponho
57 Taa,
ero yinhîrî tak Isabew yewrutopo me takî tî xakn̂e.
Ero ke n̂ewruyakn̂e takî tî kîîrî ciki.
58 Amn̂e tak n̂examro yenmayipu komo takî tî n̂encetken̂e ewrutoponhîrî.
Iyanan komo marha tî n̂encetken̂e.
Isabew pînîn yaw xa xakn̂e ham Kporin komo.
Yîmxîkrî tak nîîm okre,
kacho tî n̂encetken̂e.
Ero ke Isabew yakro rma takî tî nahwowatken̂e.
59 Taa,
ero yinhîrî tak,
8 kaamo exiche tak ewrutoponhîrî,
rikomo yanpikan̂e komo takî tî mokyatken̂e.
Anpikache tak Sakarias me tî osohto xe xatken̂e,
yîîm yosohcaro rma.
60 Pîra,
Xuaw xa tî mîkro,
kekn̂e tko tî yîson.
61 Xuaw kacho exihra ro mak nasî ayanan komo,
ketken̂e tko tî anarî komo yîwya.
62 Ero ke yîîm ya takî tî ketken̂e.
Pokupoku ketken̂e makî tî.
Ahce warai me osohto xe mai ha amoro?
kacho tî mîn pokupoku ketken̂e yîwya.
63 Ero ke,
Karita ek ha,
kekn̂e yîîm.
Ekîche tak,
Xuaw tî mîkro ha,
kacho takî tî mewrekn̂e.
Ero ke n̂eserepoketken̂e xa takî tî mohxapu komo.
64 Taa,
ero yimaw rma tak kir̂wan̂he takî tî xakn̂e hara Sakariasî mtarî.
Yun̂uru tî xakn̂e yîmhokaxapu wara.
Ero ke nîmtapowakn̂e tak hara tî.
Kir̂wan̂he Kaan yehtopo poko tî nîmtapowakn̂e.
65 Ero wa exiche tak tî n̂eserepoketken̂e enmapuyem komo ahnoro.
Miyan komo rma tî nîmtapowatken̂e ehtoponhîrî komo poko,
Xuteia pono komo tî mîkyam xatken̂e,
îh ken̂arî pono kom ha.
Xuaw yewrutoponho poko tî nîmtapowatken̂e,
yîîm yehtoponho poko marha.
66 Entan̂enhîrî komo takî tî xatken̂e Xuaw ponaro ciki.
Ahce wara tpor̂mamsom na mîk ha rikomo?
ketken̂e tî tîropotaw so.
Taa,
noro ciki tî nakronomekn̂e Kporin komo.
Ero wa tî xakn̂e.
Sakariasî Nîmtapowasî Kir̂wan̂he Kaan Yehtopo Poko
67 Ero yimaw takî tî yîîm xakn̂e Kir̂wanî ro Yekatî ken̂e xa.
Ero ke weronomano takî tî n̂iir̂akn̂e Kaan poko.
68 On wara tî kekn̂e,
Kir̂wan̂he xa nai ham okre Kporin komo,
ponaro Ixaw Yana komo yehtopo ha.
Tîyanan komo yowso tak mokye ham.
69 Kukurunpen̂e tak n̂enpoi ham karit ha.
Tapi pen yepamtho rma Mîk yîn̂enpothîrî.
70 Tîmtapotachonhîrî yaw roro rma n̂enpoi.
Pahxa rma Noro mohtopo n̂ekatîmyakn̂e Kaan weronoman̂e komo mtari,
ero yaw roro tak n̂enpes oroto.
71 On wara tî ketken̂e kweronoman̂e pen komo ya,
Akurunpen̂e komo tak wenpes amn̂e awya so,
aaxatî pîn komo yar̂man̂e.
72 Apînîn yaw so was amn̂e.
Yaaro tan wîîkesî,
kekn̂e tî Kaan yîwya so.
Ero ke tîmtapotachonhîrî yaw roro rma tak kukurunpen̂e komo n̂enpesî Noro kîwya so.
73 Ero wa xa marha tî kekn̂e Kaan kporin pen ya,
Abraaw pen ya.
Yaaro xa tan wîîkesî esemîknopîn me ro mak,
kekn̂e tî.
Tîmtapotachonhîrî yewetîmexpotopo meero tî n̂etahcakn̂e ero wa ketaw.
74 On wara tî kekn̂e yîwya,
kukurunpexe so amn̂e.
Aaxatî pîn komo tak war̂mesî oyanton me tak awehtome so.
Erasîn me tak metantomepexe owya ero yimaw.
75 Oponarono me xa tak kiir̂axe so,
kir̂wan me marha.
Miya roro ero wa kiir̂axe so awaihtopo komo pona roro.
Ero wa awitome so akurunpen̂e komo tak wenpes amn̂e awya so,
kekn̂e tî Kaan pahxa Abraaw pen ya,
kekn̂e tî Sakarias.
76 Ero yinhîrî rikomo ya makîrha takî tî kekn̂e hara yîîm.
Taa,
awya makîrha tak wîîkes okopuci.
Kyopono ro poko kweronoman̂e mîkro,
kacho me tak tî mai amn̂e.
Kporin komo ywapu tî mîîce amn̂e Noro yesamarî yakir̂wamaxi.
77 Kaan yanan komo yakir̂waman̂e yekaiporen̂e me mas amn̂e,
kicicme ehtoponhîrî komo yîhcamnon̂e yekaiporen̂e ha.
78 Noro tak n̂enpesî Kaan kîwya so kîpînîn yaw so cexirî ke mak.
Kah yai mohxapu Mîk yîn̂enporî,
kîkatparen̂e xa.
79 Enmaxapu wara n̂axe ero yimaw okre awarpanawnonhîrî komo,
kwaihtopo komo yawarpan yawno kom ha.
Kîkatparen̂e komo tak n̂enpesî kîwya so kerepotacho yesamarî yenpon̂e wara rma.
Ero wa nasî Noro okre tmokuche tak,
kekn̂e tî.
Ero wa tî kekn̂e Sakarias.
80 Taa,
ero yinhîrî takî tî por̂mamyakn̂e yîmxîkrî.
Ahwokan me ro makî tî n̂ehtîkekn̂e.
Cetîtîkache tak pohnîntaw makî tî xakn̂e cesenpotopo pona roro.
Ero yimaw takî tî Ixaw Yana komo ya takî tî n̂esenpekn̂e weronoman̂e me.
Ero wa tî xakn̂e Xuaw.