Taa,

ero yinhîrî on wara takî tî xatken̂e wooxam komo kepokaretopo yenatîche.

Katî tî naponukyatken̂e kotoporem.

Xesus yokoputho kapeso totohme so tî naponukyatken̂e.

On wara tî xakn̂e wooxam komo yosotî,

Maria Matarena,

anarî hara Maria,

Ciaku yon ha,

Saromi takî,

ero wara.

2 Yihcirî kaamo po takî tî n̂examro cetken̂e Xesus yokoputho yenso.

Pahxaxa ro rma tî cetken̂e kaamo yepatakache rma.

3 On wara tî ketken̂e,

Onoke ma re toopu nîhmame okwe ahrutoponhîrî potai?

Nawsînasî thakwa,

ketken̂e tî.

4 Ero wa kache ahrutoponhîrî wece takî tî n̂een̂atken̂e.

Tîhmamaxi rma tî n̂een̂atken̂e toopu.

Porinî ro mak mîn xakn̂e toopu.

5 Ero ke takî tî iina n̂ewomyatken̂e wooxam komo.

Kar̂pamxan warai tî n̂een̂atken̂e iito,

kaari n̂ixa ceremaxi.

Kaw tî xakn̂e noro ponon,

tumutwem.

Noro yenîche n̂esekatketken̂e takî tî wooxam komo.

6 On wara tî kekn̂e noro yîwya so,

Esekatkara ehcoko.

Xesus mepor̂at ham amowoxapunhîrî.

Paka tak ha wa ha.

Exihra tak wa tan nasî.

Yîrapotoponhîrî xe ka encoko.

7 Ero ke etocoko tak ha pakachonhîrî yekatîmso yînpanatanmekîthîrî komo ya.

Petru ya meero ekatîmcoko.

On wara marha kacoko yîwya so,

Aywapu so ka cesî oroto Xesus Karireia pona.

Iito tak Noro meen̂axe amn̂e tîmtapotachonhîrî yaw roro rma,

kekn̂e tî.

Ero wa tî kekn̂e kar̂pamxan warai.

8 Yîmtapotarî yentache tak ahtoxapu yai takî tî n̂epataketken̂e wooxam komo.

Tatanatken̂e makî ti ceserepokarî komo ke.

Ero ke n̂emahciyatken̂e ro makî tî cerahtîmrî ke so.

Tooto komo yîmtapotarera ro makî tî xatken̂e tîcetaw so.

Ero wa tî cetken̂e.

9 Taa,

on wara tî xakn̂e Xesus,

yihcirî kaamo po tî pakekn̂e.

Pahxaxa ro rma tî pakekn̂e.

Pakache takî Maria Matarena ya takî tî n̂esenpekn̂e.

Pahxa tî worokyam komo xatken̂e noro ropotaw.

Yaake tî xatken̂e,

7.

Ero wicakî rma tî Xesus n̂en̂epekn̂e yîropotawnonhîrî.

Noro yipunhîrî ya tî ka Xesus n̂esenpekn̂e yihcirî me ka.

10 Xesus yenîche Maria takî tî cekn̂e Xesus yakrononho komo yaka.

N̂examro tî nîwracetken̂e Xesus pînîn yaw.

Okwe okwe okwe,

ketken̂e tî.

11 On wara tî kekn̂e Maria n̂examro ya,

Paka tak hara mî Xesus.

Wenwo wa ha,

kekn̂e tî.

Okre,

ketken̂e tî yîwya,

Maria tî nanwekyatken̂e okwe.

12 Ero yinhîrî takî tî on wara xatken̂e Xesus yakrononho komo,

2.

Esama yaw tî cetken̂e woskara pore.

N̂examro ya takî tî Xesus n̂esenpekn̂e.

Anarî wara makî tî n̂esenpekn̂e.

13 Amn̂e takî tko tî,

Kuu,

Xesus Mîk ham,

ketken̂e.

Ero ke Xerusaren pona takî tî n̂etîrametken̂e hara.

Takrono komo ya tî n̂ekatîmyatken̂e.

Xesus amna n̂enwo,

ketken̂e tî.

N̂examro meero tî nanwekyatken̂e okwe.

Ero wa tî xatken̂e okwe.

14 Ero yinhîrî takî tî 11 komo yeseresmetaw yîwya so n̂esenpekn̂e hara Xesus.

N̂examro yein̂e wara takî tî nîmtapowakn̂e akro so.

Ahce kacho cetanwesom me mak mat hara kica?

kekn̂e tî yîwya so.

Ceipuru wara nasî okwe aropotarî komo.

Oyencow awakrono komo rma oroto.

Pakaxapu me oyencow,

awya so marha n̂ekatîmcow.

Manwecow tko okwe,

kekn̂e tî Xesus yîwya so.

15 On wara marha tî kekn̂e Xesus yîwya so,

Tanhamya tak etocoko roowo poko hakî.

Awakir̂waman̂e Mîk Xesus,

kacho ekatîmtatko miyan komo ya rma.

16 Amtapotarî komo n̂ewehcaxe anarî komo,

n̂emihcaxe marha.

Ero wa exitaw so Kaan tak nakir̂wamesî.

Amtapotarî komo yewetîra exitaw so twaihsom me naxe okwe.

17 On wara marha naxe amn̂e amtapotarî yewetîn̂e komo,

oyanme rma worokyam n̂en̂epexe.

Anarî komo mtapotarî yaro marha nîmtapowaxe.

18 Anarimaw so okoyi nahsîyaxe eseskara so rma.

Kmasmacho komo meero n̂eer̂axe waipîn me rma.

Tamotosom komo tîpîrî marha nahsîyaxe akir̂wamachome so.

Ero wa tak naxe amn̂e amtapotarî yewetîn̂e komo,

kekn̂e tî Xesus 11 komo ya.

19 Taa,

ero wa kache rma Xesus takî tî n̂etanîmyakn̂e kah yaka.

Iito takî tî n̂eremekn̂e Kaan panaka kaari n̂ixa.

20 Ero yinhîrî Noro npanatanmekîtho komo takî tî cetken̂e tanhamya yîmtapotarî yekatîmso.

Cirihnî marha n̂irpekn̂e Kporin komo yîwya so emapona roro.

Kaanî mtapotarî xa mîn yîn̂ekatîmrî kom ham,

kachome takî tî enîn̂e komo ya ero yipu n̂irpekn̂e yîwya so.

Ero wa tî n̂irpekn̂e.

Amen.