Taa,

enmapuche tak tî n̂esencetken̂e xa hara tîmsom pokono yenîn̂e komo Xesus poko.

Xutew poritomon komo,

Xutew panatanmetopo mewren̂e komo,

Xutew yenîn̂e komo ahnoro,

ero warai komo yakro tî n̂esencetken̂e.

Esentache so Xesus takî tî n̂emeknumiyatken̂e.

Piratus yaka takî tî naar̂atken̂e.

2 Taa,

Xesus yenîche on wara takî tî kekn̂e Piratus yîwya,

Xutew komo kayaritomon xa ma Amoro?

kekn̂e tî yîwya.

Nhnk,

Noro rma Ow ha,

kekn̂e tî Xesus yîwya.

3 Iito marha tî xatken̂e tîmsom pokono yenîn̂e komo.

Kicicme nasî Moso kica,

ketken̂e tî n̂examro Xesus poko.

Mîn hak makî tî n̂etahcatken̂e kicicme Xesus yehtoponho tî re yîwya so.

Eikura ro makî tko tî xakn̂e Xesus.

4 Ero ke on wara takî tî kekn̂e Piratus Xesus ya,

N̂examro mtaka eikura ma mai?

Mer̂pora mexe re n̂etahcaxe kicicme awehtoponhîrî ha ta.

Entakî xe,

kekn̂e tî.

5 Eikura rma tî xakn̂e Xesus.

Ero ke n̂eserepokekn̂e xa takî tî Piratus Noro poko.

Ero wa tî xakn̂e.

6 Taa,

on wara xakn̂e roro Piratus Xutew komo yahwotacho yimaw,

kahrutopo yawnonho pen nahrunkekn̂e roro n̂examro poyino.

Cewn̂e mak,

n̂ahrunkekn̂e yîn̂etacithîrî komo rma.

7 Ero yimaw tak yaake xatken̂e Xutew komo kahrutopo yaw.

Homa pono komo waparî me toxapunhîrî komo tî mîkyam xatken̂e.

Tooto waihkan̂enho tî mîkyam xatken̂e okwe.

N̂examro yaan̂enho marha tî xakn̂e iito akro so.

Barabasî tî mîk xakn̂e aan̂enhîrî komo yosotî.

8 Mer̂pono pîn komo xatken̂e iito Piratus yaka esenmexapu komo.

Tpoyino komo yahrunkacho poko nîmtapowatken̂e Piratus yakro.

On wara tî ketken̂e yîwya,

Paskwa yimawno yukukmacho me tak nas hara oroto.

Ahruxapu penî cma re mahrunkesî on yimaw mahrunkesî roro ero wara rma,

ketken̂e.

9 Ai ha,

kekn̂e tak Piratus yîwya so.

Xutew kayaritomon ahsîpînka xe ma matu owya?

kekn̂e Piratus yîwya so.

10 On wara kekn̂e Piratus tîhnaw,

Moso xera nat ham tîmsom pokono yenîn̂e komo mer̂pora exirî ke ponarono komo.

Ero ke n̂en̂ekapexe owya,

kekn̂e.

11 On wara tko xatken̂e tîmsom pokono yenîn̂e komo,

esenmexapu komo panatanmekyatken̂e Barabas yahrunkacho poko.

Ero ke noro xa n̂etahcatken̂e tahrunkaxmu me.

12 Ai ha,

kekn̂e Piratus yîwya so.

Ixaw Yana kayaritomon,

kacho rma Moso ha ta awya so.

Ero ke ahce wa wiir̂a,

kekn̂e Piratus Xesus poko.

13 Tpanaxkem pona kr̂a amowopoko ha,

ketken̂e mak esenmexapu komo yîwya.

Cerewre ro makî ketken̂e yîwya.

14 Ahce wa exirî ke wamowope hara?

kekn̂e Piratus yîwya so.

Ahce wa ma nai awya so kicicme ehtoponhîrî?

kekn̂e.

Panahnî wara ro mak ketîketken̂e esenmexapu komo yîmtaka.

Tpanaxkem pona kr̂a amowopoko ha,

ketken̂e yîwya.

Ero wa ketken̂e Piratus ya.

15 Taa,

n̂examro yerepotanmekî xe tî xakn̂e Piratus.

Ero ke Barabasî takî tî nahrunkapekn̂e anme so.

Xesus reha nîhyokpekn̂e tmaywen komo ya.

Yîhyokuche tak tanton komo ya narpekn̂e amowopotome tak sowtatu komo ya.

Ero wa xakn̂e Piratus.

16 Ero ke Xesus pen takî tî naar̂atken̂e sowtatu komo kopenato mîn yaka.

Iito cexitaw so tak takrono komo tî nan̂ikyatken̂e ahnoro.

17 On wara takî tî Xesus pen n̂iir̂atken̂e,

poono namrupetken̂e yîwya tîswayem,

kayaritomo ponon warai.

Kpata yatî marha tî kahyatken̂e arokorî me.

Ero yipu takî tî n̂iir̂atken̂e yîhtîpîrî pona oko.

18 Xesus poko takî tî n̂etaporetken̂e n̂examro kica.

Ai,

tan mai Xutew komo kayaritomon?

ketken̂e tî yîwya.

19 Xaari warai ke takî tî kanakatapetken̂e oko.

N̂etakwatken̂e marha tî ewru pore kica.

Tosokmuru po so marha tî n̂eremetken̂e Xesus yamrinaka.

Oporinî ro amoro,

ketken̂e marha tî cetporerî me so mak kica.

20 Ero wara etaporeche so tak Xesus poko tîswayem takî tî mohketken̂e hara poono.

Pononthîrî rma takî tî namrupetken̂e hara yîwya.

Ero yinhîrî takî tî Xesus naar̂atken̂e amowotome okwe.

Ero wa tî xatken̂e sowtatu komo.

21 Ero wa aar̂ataw mehxa mohxapu takî tî n̂een̂atken̂e.

Simaw tî mîk xakn̂e Sirene pono ha.

Arexante komo yîîm tî mîk xakn̂e,

Hupu komo yîîm ha tî.

Iituxa tî noro mokyakn̂e ero yimaw.

Ero ke noro ya tak Xesus yamowotopo narpetken̂e thakwa,

weewe.

22 Ero wa tî Xesus pen naar̂atken̂e.

Korkota pona tî naar̂atken̂e.

Tooto pîtho,

kacho rma mîn,

Korkota,

kacho.

23 Iito cexitaw so Xesus takî tî wokpa xe xatken̂e kawawano ke.

Miiha ke ceskemu rma tî mîn xakn̂e wooku.

Ero yipu ke tî wokpa xe xatken̂e.

Erîhra rma tko tî xakn̂e.

24 Ero yinhîrî takî tî Xesus namowetken̂e tpanaxkem pona.

Amowoche tak Xesus ponontho takî tî nahsîyatken̂e sowtatu komo tponon me so.

Tînahsîrî komo men̂ekacho tî nar̂metken̂e,

On wahsîya ow ham,

kachome.

Ero wa tî Xesus ponontho nahsîyatken̂e.

25 9 to tî xakn̂e kaamo Xesus yamowetaw.

26 Karita mewrexapu marha tî xakn̂e Xesus yepoi twoso.

Kicicme ehtoponhîrî tî re mîn xakn̂e,

on wara kacho,

Xutew komo kayaritomon Moso ha,

kacho.

27 Ero yinhîrî cen̂epan̂em pen marha takî tî namowetken̂e hara Xesus panaka asakî.

Kaari n̂ixa anarî namowetken̂e,

poowa n̂ixa anarî hara.

Ero wa tî namowetken̂e.

28 Ero wa amoworî ke tak Kaan Karitan yaw roro rma takî tî xakn̂e Xesus,

Kicicitho komo yakrono me rma tî Noro n̂een̂atken̂e,

kacho yaw roro rma ha.

29 Taa,

iituxari rma tî cetken̂e esama yaw tîtosom komo.

Yîhyari tîcetaw so Xesus poko tî nîmtapowatken̂e kicicitho me kica.

N̂epanametken̂e makî tî Noro wece yîwîrîyakachome.

Ai,

ketken̂e tî Xesus ya,

Kaan mîn wixkesî.

Osorwaw ro mak kenmayasî ciitîkacho poko hara,

kan̂enho mexe re Amoro.

30 Ero ke etwaikapora rma esko ha ke.

Ahtoko ika tpanaxkem poi,

ketken̂e tî yîwya.

Ero wa tî ketken̂e Xesus ya.

31 Tîmsom pokono yenîn̂e komo marha tî n̂etaporetken̂e Xesus poko.

Xutew panatanmetopo mewren̂e komo yakro ro rma tî ketken̂e.

On wara tî ketken̂e,

Anarî komo waipîn me n̂iir̂akn̂e Moso.

Ero wara ecirira rma nai ham Noro rma hara.

32 Kristu tî re Moso,

Ixaw Yana komo kayaritomon.

Ero ke ahri ka nîhtope pona entome tak kîwya so,

ketken̂e kica.

Noro yawxaka amowoxapu komo marha tî Xesus pen nîwîrîyaketken̂e okwe.

33 Taa,

ero yinhîrî kamarakataw tak nawarpanwakn̂e,

sîpî,

kokmamrî wara rma xakn̂e kopi.

Awarpape takî tî xakn̂e roowo ahnoro.

Pahkî tî xakn̂e awarpape.

3 to makî taki tî n̂enmayakn̂e hara.

34 3 to exitaw tak on wara tî kekn̂e Xesus,

Eroi,

eroi,

rama sabaktan̂i,

kekn̂e tî.

Cerewre ro makî tî kekn̂e.

Apa,

Apa,

Ponaro oyehtopo Amoro okwe.

Ahce poyero wa Ow mahsîpînka okwe?

kacho rma tî mîn.

Ero wa tî kekn̂e Xesus.

35 Iito ececetoxapu komo tî on wara ketken̂e yîmtapotarî yentache.

Erias pen nan̂ikya ham.

Entakî xe,

ketken̂e tî.

36 Anarî takî tî cekn̂e yohno mawrî warai wece.

Ero yipu tî nukpekn̂e kawawano kwaka.

Arama potkoso tî n̂iir̂akn̂e.

Xesus mtaka tî nanîmyakn̂e yîn̂emerî me.

On wara tî kekn̂e,

N̂expe ha ka,

Erias mokrî ika cencerî Moso yenîhton̂e,

kekn̂e tî.

Ero wa tî kekn̂e.

37 Ero yinhîrî tak Xesus takî tî n̂emtarakekn̂e.

Kar̂pe ro makî tî kekn̂e.

Ero wa kache cekatîthîrî takî tî nahsîpînkekn̂e twaihtome tak.

Ero wa tî xakn̂e Xesus.

38 Ero yimaw marha Kaan mîn yawno takî tî n̂etahxaikekn̂e poono,

Kaan yamtakponî ro yahrutoponho pen.

Xahrararara kekn̂e makî tî.

Kairo tî n̂etahxaikekn̂e roowo pona roro.

39 Iito marha tî xakn̂e sowtatu yantoman̂e Xesus yokoputho mîtwo rma.

Noro tî n̂encekn̂e Xesus yemtarakarî,

cekatîthîrî yahsîpînkarî marha tî n̂encekn̂e.

Ero yipu yentache on wara tî kekn̂e,

Yaaro ham,

Kaan Mumuru rma Mîk n̂ex ham okwe,

kekn̂e tî.

Ero wa tî kekn̂e sowtatu yantoman̂e.

40 Iito marha tî xatken̂e wooxam kom hara.

Mooxe tî n̂een̂atken̂e Xesus yamoworî.

Yaake tî xatken̂e iito,

Maria Matarena pono.

Maria,

anarî hara.

Ciaku yon mîk xakn̂e,

kar̂pamxan yon,

Xose yon marha mîk xakn̂e noro Maria.

Saromi marha xakn̂e iito.

41 Xesus wenari toxapunhîrî komo tî mîkyam xatken̂e wooxam komo.

Xesus tî nakronometken̂e Karireia pore cetaw.

Anarî komo marha tî xatken̂e iito yaake wooxam komo.

Xesus mokyataw Xerusaren pona Noro yakro tî mokyatken̂e n̂examro.

Noro yipu komo tî xatken̂e iito wooxam komo.

42 Paskwa pahnoke tî xakn̂e ero yimaw.

Xutew komo yetakir̂wamacho tî mîn xakn̂e kaamo,

Paskwa yimaw epokaretopo ponan.

43 Ero po rma tî on wara xakn̂e Xose Ar̂mateia pono,

kokon̂i tî cekn̂e Piratus yaka.

Xutew yenîn̂e me cehsom tî mîk xakn̂e Xose,

takîhsom mîkro,

kacho.

Kayaritomo me Kaan yehtopo ponarono tî mîk xakn̂e.

Noro yipu tî cekn̂e Piratus yaka erasîra.

Xesus yokoputho yenîhto xe cma re wasî,

kekn̂e tî yîwya.

44 N̂eserepokekn̂e tî Piratus.

Waipo ha ma yohno?

kekn̂e tî yîwya.

Ero ke sowtatu yantoman̂e takî tî nan̂ikyakn̂e Xesus mîtwononho.

Waipo ha ma Xesus pen ha?

kekn̂e tî Piratus yîwya.

45 Nhnk,

waipo ha,

kekn̂e tî sowtatu yantoman̂e yîwya.

Ero ke tak Xesus yokoputho narpekn̂e yîwya.

46 Ero yinhîrî tak poono takî tî naponukyakn̂e Xose.

Kir̂wan tî mîn xakn̂e,

riin̂u kahxapu.

Ero yinhîrî takî tî Xesus yokoputho n̂enîhcekn̂e.

Poono ke rma tak karamiyakn̂e.

Ero yinhîrî takî tî n̂ermonoyakn̂e okoputho yahrutopo yaka.

Toopu yexenaka ahtoxapu tî mîn xakn̂e okopu yahrutopo.

Ero yipu yaka tî Xesus yokoputho n̂iir̂akn̂e Xose.

Ero yinhîrî takî tî toopu nîhmamekn̂e ewtarî potaka.

Ero wa tî Xesus yokoputho nahruyakn̂e Xose.

47 Iito tî xatken̂e wooxam kom hara.

Maria Matarena tî xakn̂e iito,

Maria marha tî,

Xose yon ha.

N̂examro tî n̂een̂atken̂e Xesus yokoputho yahruru.

Ero wa tî xatken̂e.