Xesus Waihkacho Poko N̂esencexe Yiixatî Pîn Komo
14
Taa,
ero yinhîrî tak Xutew yeseresmacho komo pahnoke takî tî xakn̂e,
Paskwa yimaw eseremacho komo,
Wahrututpamnî tohtopo marha.
2 kaamo makî ka xakn̂e ero yipu me eseresmacho komo.
Ero yimaw takî tî tîmsom pokono yenîn̂e komo n̂esencetken̂e Xesus waihkacho poko.
Xutew panatanmetopo mewren̂e komo yakro rma tî n̂esencetken̂e.
Tahsîcerî kr̂a waihkachome.
Ahce wa cewkukmetu ahsîtome tak,
ketken̂e tî.
2 On wara tî ketken̂e,
Eseresmacho komo yimaw ahsîra ro mak cexpore nasî.
Tooto komo men n̂epanîyaxe hara kopi,
ketken̂e tî.
Ero wa tî ketken̂e.
Xesus Nîhkapesî Wooxam
3 Taa,
ero yimaw Xesus takî tî xakn̂e Betania po.
Simaw mîn yaw tî xakn̂e,
repra ken̂arînho mîn yaw ha.
Iito tî n̂eseresmekn̂e.
Eseresmetaw rma wooxam takî tî mokyakn̂e yîhyaka.
Katî tî n̂ekyakn̂e kotoporem.
Nahtu katî tî mîn xakn̂e cepethîkem ha.
Kir̂wan yaw marha tî xakn̂e.
Toopu enporixapu tî mîn xakn̂e een.
Xesus yaka tmokuche een takî tî potkocekn̂e wooxam.
Kotoporem tî nukmamyakn̂e Xesus tîpîrî pore,
xoo,
kekn̂e tî.
4 Nîrwonatken̂e tî anarî komo ero yipu yukmamrî ke.
On wara tî ketken̂e n̂examro re mak,
Kica,
ahce kacho kotoporem nukuhrew hara kica?
5 Cepethîkem xa mîn n̂eexi kotoporem okwe.
Tîmpore cma re n̂eexi puranta pona.
Mer̂pono pîn takî re n̂ahsîrî epethîrî,
300 tenariw yopo.
Yupurantamnî komo ya tîmsom me takî re n̂eexirî,
ketken̂e tî.
Ero wa tî wooxam nîwîrîyaketken̂e kica.
6 Anarî me tko tî kekn̂e Xesus yîwya so.
Ahce kacho noro mîwîrîyaket hara?
Kir̂wan̂he oritopo rma on ohkapetopo yîwya.
7 Miya roro naxe yupurantamnî komo reha ahyaw so.
N̂examro mîwakrexe emapona roro yiixe awexitaw so.
Yohno makî reha was Ow ahyaw so.
Kîwces hara amn̂e.
8 Owakre xe n̂eexi moso wooxam.
On mak n̂eexi yîhyaw tîmsom.
Waipîra rma ka oyexitaw ohkapew kir̂wan̂he ehtome oyokoputho amn̂e oyetaruyataw.
9 Yaaro tan wîîkes awya so,
Kaan ya akir̂wamano ritopo tak n̂ekatîmyaxe oyakrono komo amn̂e.
Miyan komo ya rma n̂ekatîmyaxe poko hakno komo ya rma.
Ero wa ekatîmyataw tak moso yehtoponho meero n̂ekatîmyaxe,
ohkapetoponho yîwya.
Ero ke moso ponaro tak naxe miyan komo rma oritoponho yentarî ke,
kekn̂e tî.
Ero wa tî kekn̂e Xesus ceseresmayem komo ya.
Xesus Yekantopo Yepetho Poko Esentaxi Cesî Xutas
10 Taa,
ero yinhîrî tak on wara tî xakn̂e Xutas Iskar̂otes.
12 komo rma mîk xakn̂e Xutas.
Tîmsom pokono yenîn̂e komo yaka takî tî cekn̂e.
On wara tî kekn̂e yîwya so,
Xesusu kr̂a wekanîyasî ahsîtome awya so yiixe awexitaw so,
kekn̂e tî yîwya so.
11 Ero ke tawake takî tî xatken̂e tîmsom pokono yenîn̂e komo.
Noro yekanpuche awya puranta tak amna nîmyas awya ekantopo yepetho,
ketken̂e tî yîwya.
Ero ke Xesus n̂een̂akn̂e roro Xutas,
Oroto cekanpore nai ham,
kachome tîwya.
Ero wa tî kekn̂e Xutas.
Xesus N̂eseresmesî Tînpanatanmekrî Komo Yakro.
12 Taa,
ero yimaw tak pahnoke takî tî xakn̂e Paskwa yimawno me eseresmacho komo.
Wahrututpamnî Tohtopo rma tî mîn xakn̂e eseresmacho komo.
Yihcirî kaamo po oper̂a pen paraxketken̂e Paskwa yimaw tonosom.
Ero po takî tî,
on wara tî ketken̂e Xesus npanatanmekrî komo yîwya,
Apa,
ahna amna n̂etake Paskwa yimaw me aweseresmacho?
ketken̂e tî yîwya.
A Última Ceia
13 Ero ke asakî takî tî Xesus n̂en̂epekn̂e tînpanatanmekrî komo.
On wara tî kekn̂e yîwya so,
Ewto pona etocoko.
Iito awexitaw so tak awakro so n̂esepor̂asî tooto,
tuuna yaan̂e.
Noro wenari tak etocoko.
14 Mîîmo yaka n̂ewomyas amn̂e.
Ero ke mîîmo yosom yakro amtapotacoko.
On wara kacoko yîwya,
Oyakno,
on wara kesî kpanatanmekn̂e,
Paskwa yimawno me oyeseresma xe wasî,
onpanatanmekrî komo yakro ha,
Ero ke pawana yetarî cma re menpesî amna ya iito amna yeseresmachome,
kacoko yîwya.
15 Ero ke amtakpo tak n̂enpes awya so eporino,
porin ha.
Kir̂wan n̂enpes awya so,
tapoyem.
Iito tak etakacoko kotî kom ha,
kekn̂e tî Xesus yîwya so.
16 Ero ke cetken̂e takî tî yînpanatanmekrî komo ewto imo pona.
Iito cexitaw so Xesusu mtapotarî yaw roro rma tî n̂een̂atken̂e.
Ero ke iina takî tî naar̂atken̂e iyotî komo,
iyuru komo marha.
Kir̂wan̂he tî n̂iir̂atken̂e paskwa yimawno me ceseresmachome so amn̂e.
Ero wa tî n̂iir̂atken̂e.
17 Taa,
kokon̂i xa takî tî Xesus cekn̂e iina mîîmo yaka 12 komo yakro rma.
18 N̂eremetken̂e takî tî aapo pona ceseresmachome so.
Eseresmetaw so on wara tî kekn̂e Xesus yîwya so,
Yaaro tan wîîkes awya so,
awakro so tan keseresmesî.
Kakrono komo rma tak oyekanîyas amn̂e,
kekn̂e tî yîwya so.
19 Nahwoketken̂e ro makî tî n̂examro ero wa kacho yentache.
On wara takî tî ketken̂e Xesus ya,
Onoke xa Apa okwe?
Ow rma katî?
ketken̂e tî.
Ero wa so tî ketken̂e ahnoro rma.
20 On wara makî tî kekn̂e Xesus,
12 komo rma mîk oyekanîn̂e.
Oyakro ro tuuru nukpesî noro mîk ha oyekanîn̂e.
21 Tooto me Ewruxapu waihyasî Kaan Karitan yaw roro rma.
N̂etwîrîmesî ro makî tko oko Noro yekanîn̂enho amn̂e.
Ewrura ro mak exitaw ketaw ha re wara n̂he re n̂eexirî,
kekn̂e tî Xesus tînpanatanmekrî komo ya.
22 Taa,
eseresmetaw so rma ka on wara takî tî xakn̂e hara Xesus,
cuure tî nanîmyakn̂e.
Kaan yakro tî ka nîmtapowakn̂e,
Kir̂wan on amna yuru anmîthîrî Apa,
kekn̂e tî.
Ero wa kache poikekn̂e,
n̂ekamyakn̂e marha tî iyuru komo me.
Ehe,
on ha awru kom ha.
Opuntho rma tan ha,
kekn̂e tî yîwya so.
23 Ero yinhîrî wooku yen makîrha takî tî nanîmyakn̂e.
Ero poko marha tî ka nîmtapowakn̂e.
Kir̂wan on amna wokru anmîthîrî Apa,
kekn̂e xa hara tî ka Kaan ya.
Ero yinhîrî tî nîmyakn̂e yîwya so.
Ero poi takî tî n̂eer̂atken̂e n̂examro ahnoro.
24 On wara takî tî kekn̂e yîwya so,
Okamxukutho rma tan,
Akir̂wamano n̂iir̂asî Kaan amn̂e,
kacho ponaro awehtopo komo.
Mer̂pono pîn komo yanme tak cesî amn̂e kicicme ehtoponhîrî komo yîhcamnotome.
25 Yaaro tan wîîkes awya so,
on ceer̂axe uupa yukun,
ero yipu yerîhra tak was hara.
Amn̂e mak tak weer̂asî xa hara kayaritomo me Kaan yesenpoche tak,
kekn̂e tî.
Ero wa tî kekn̂e Xesus tînpanatanmekrî komo ya.
Oyakrono Pîn Wara Mîmtapowas Amn̂e Okwe, Kesî Xesus Petru Ya
26 Taa,
ero yinhîrî tak Kaan wanorî tî naar̂atken̂e.
Ero yinhîrî takî tî miya cetken̂e Oripera Yîpîn pona.
27 Iito exitaw so on wara takî tî kekn̂e Xesus yîwya so,
Oroto kosope cehrokaxmu me tak maxe oyahsîrî ke ooxatî pîn komo ya.
Kaan Karitan yaw roro rma wa ero wa maxe.
On wara kesî,
Oper̂a yosom tak wetapes amn̂e.
Ero ke tak miya so n̂etakpayaxe iyokuthîrî pen okwe,
kesî.
Ero wa kacho yaw roro rma maxe okwe.
28 Opakache hara tko Karireia pona tak kîwces aywapu so,
kekn̂e tî Xesus yîwya so.
29 On wara takî tî Petru kekn̂e hara,
Pîra reha was owî.
Cehrokaxmu me exitaw so anarî komo ahnoro ehrokan me ro mak was owî reha,
kekn̂e tî.
30 Yîmtaka tko tî n̂eyukyakn̂e Xesus.
Yaaro tan wîîkes awya,
oroto rma kosope,
Noro yîhtînopîra ro mak wasî,
mîîkes opoko okwe.
Osorwaw ro ero wa mîîkes okwe.
Asakî ro kohtîmra ka exitaw kapikara ero wa mîîkesî,
kekn̂e tî.
31 Pîra ro mak wasî,
kekn̂e tî Petru.
Cerewre tî kekn̂e.
On wara marha tî kekn̂e,
Awaiketaw aaxatî pîn komo ya awakro ro rma ketwaikapesî yîwya so.
Awakrono pîn wara yîmtapotara ro mak wasî,
kekn̂e tî Petru yîwya.
Ero wa xa marha tî ketken̂e ahnoro Noro yakrono komo.
Ero wa tî ketken̂e.
Tîîm Yakro Xesus Nîmtapowasî
32 Taa,
ero yinhîrî tak Kecsemani pona takî tî cetken̂e Xesus komo.
Iito cexitaw so takî tî on wara kekn̂e Xesus tînpanatanmekrî komo ya,
Oona ka eremacoko amyamro.
Mîîna n̂he ka kîwcesî yîmtapotaxi Kaan yakro,
kekn̂e tî.
Jesus é preso e interrogado
33 Ero wa kache takî tî cekn̂e.
Takrono komo rma re naar̂akn̂e 3 mak.
Petru,
Ciaku,
Xuaw,
n̂examro makî tî naar̂akn̂e.
Ero yimaw takî tî ahwora ro makî tî xakn̂e Xesus.
N̂eserepoketîkekn̂e ro makî tî.
34 On wara tî kekn̂e Petru komo ya,
Ahwora ro mak was okwe owairî yaro.
Tan ka ehcoko amyamro.
Cewke men ehcoko,
kekn̂e tî yîwya so.
35 Ero wa kache cekn̂e rma tî Xesus moro na mak.
Iito cexitaw roowo pona tî n̂epîrkekn̂e.
Kaan yakro tî nîmtapowakn̂e iito.
Ero yimawno me tî nîhtînoyakn̂e twaihtopo.
Wara rma owaipu xera cma re wasî,
kekn̂e tî.
36 On wara tî kekn̂e,
Apa,
owokru wara on wîhtînoyasî owaihtopo.
Ahce na poko ehn̂anî ro mak Amoro.
Ero ke erpora cma re masî owya.
Awanme makî tko oyexi xe wasî,
kekn̂e tî Xesus Tîîm ya.
37 Ero wa kache Petru komo yaka takî tî n̂etîramekn̂e hara.
Nîwînîkyatken̂e makî tî n̂examro okwe.
Mîwînîkyatu ma wa ke Simaw?
kekn̂e tî Xesus Petru ya.
Cewke exihra ma matu okwe cewn̂e ora makî?
38 Cewke tak men ehcoko ke.
Kaan yakro marha amtapotacoko kicicitho yewetîra ro mak awehtome so.
Kir̂wan̂he awexi xe so rma re maxe awekatî ke so mak.
Kar̂pera tko nas okwe apun komo,
kekn̂e tî Petru komo ya.
39 Ero wa kache cekn̂e xa hara tî Xesus Kaan yakro yîmtapotaxi xa hara.
Ero wa xa marha tî kekn̂e hara Tîîm ya.
40 Tîmtapotache takî tî Petru komo yaka n̂etîramekn̂e xa hara.
Nîwînîkyatken̂e xa hara tî okwe.
Tîwînîkî xe so ro makî tî xatken̂e okwe.
Ero ke nîtîtmamyatken̂e makî tî.
Xesus yeyuhtopo tî yîhtînopîra xatken̂e.
41 Ero yinhîrî cekn̂e xa hara tî Xesus Kaan yakro yîmtapotaxi xa hara.
Tîmtapotache tak n̂etîramekn̂e xa hara tî Petru komo yaka hara.
On wara takî tî kekn̂e ero yimaw yîwya so,
Mepokaretu rma?
Mîwînîkyatu rma ha?
N̂eexi tak wa ha awîntopo komo.
Tooto me Ewruxapu yahsîtopo me tak nasî.
Oroto kicicitho komo ya oyahsîpesi oyekanîn̂e.
42 Amohcoko tak ha.
Mîkro tak ha oyekanîn̂e,
encoko xe,
kekn̂e tî Xesus yîwya so.
Ero wa tî kekn̂e.
Xesus Nahsîyaxe
43 Taa,
ero wa ketaw rma tak Xutasî takî tî mokyakn̂e.
12 komo rma mîk xakn̂e Xutas.
Noro yakro tî mokyatken̂e mer̂pono pîn kom hara.
Tkaciparai so tî mokyatken̂e,
twatmai so marha tî.
Tîmsom pokono yenîn̂e komo yanme tî mokyatken̂e,
Xutew panatanmetopo mewren̂e komo yanme marha,
Xutew poritomon komo yanme marha tî.
Noro yipu komo tî mokyatken̂e.
44 Pahxa rma tî on wara kekn̂e Xesus yekanîn̂e,
Noro yahsî xatî komo ya,
On wara Noro wekanîyas amn̂e,
wewcokesî mak,
Noro ham knahsîrî komo,
kachome tak awya so.
Ahsîcoko tak ha men.
Kir̂wan̂he aacoko en̂epera ha,
kekn̂e tî ka yîwya so.
45 Ero ke tmokuche so tak yohno rma takî tî Xutas cekn̂e Xesus yaka.
Tan mai Apa,
kekn̂e tî yîwya.
N̂ewcokekn̂e takî tî kica.
46 Ero ke Xesus pen takî tî nahsîyatken̂e Xutas yakrono komo.
47 Ero yimaw anarî xakn̂e hara iito cececetoso.
Noro takî tî mohkekn̂e tkaciparan.
Kaan yaka tîtosom yanton yama xe xakn̂e.
Namekn̂e rma ha re,
panakekn̂e mak oko.
Ero wa xakn̂e.
48 Ero yinhîrî on wara tak kekn̂e Xesus tahsîn̂e komo ya,
Ahce kacho tkaciparai so mîmohcow hara,
twatmai so marha mîmohcow?
Cen̂epan̂em yahsîn̂e wa mîmohcow.
Ahce kacho ero wa mîmohcow oyahsîso ha?
49 Emapona wîxakn̂e Kaan mîn yaw iito awexitaw so.
Panatanmekno wiir̂akn̂e iito.
Oyahsîra ka mîxatken̂e ero yimaw.
Wara rma oroto tak Ow mahsîyaxe Kaan Karitan yaw roro rma oyehtome,
kekn̂e tî Xesus yîwya so.
50 Ero yimaw tak Xesus pen takî tî nînomyatken̂e ahnoro akrononhîrî komo okwe.
N̂emahciyatken̂e mak okwe.
51 Anarî xakn̂e iito hara Xesus wenari mohxapu kar̂pamxan.
Tponoye xakn̂e noro riin̂u ke.
Atpon makî tî mîn xakn̂e noro ponon.
Tkaramiso makî tî xakn̂e yupun pore.
Noro pen takî tî nahsîyatken̂e Xesus yakro rma.
52 Chow sumai,
tpononthîrî takî tî nînomyakn̂e.
Tahsîn̂e komo yai takî tî n̂emahciyakn̂e ponomra ro mak okwe.
Ero wa tî xakn̂e.
Xesus N̂esekatîmyasî Xutew Yenîn̂e Komo Ya
53 Taa,
ero yinhîrî tak Xesus pen takî tî naar̂atken̂e Kaan yaka cewomsom yaka.
Iito marha tî xatken̂e anarî komo cesenmeso.
Tîmsom pokono yenîn̂e komo,
Xutew poritomon komo,
Xutew panatanmetopo mewren̂e komo,
noro yipu tî xatken̂e iito.
54 Xesus yaar̂ataw iina Petru rma tî re cekn̂e Noro wenari mooxe n̂he mak ha tko.
Kaan yaka cewomsom roron pona tî cekn̂e.
Iito tî xatken̂e Kaan yaka cewomsom yanton komo.
N̂examro yakro takî tî n̂eremekn̂e.
Wehto pona tî n̂eson̂akn̂e iito.
Ero wa tî xakn̂e Petru.
55 Taa,
on wara takî tî xatken̂e tîmsom pokono yenîn̂e komo,
ahnoro Xutew yenîn̂e komo,
Kicicme xakn̂e Xesus oweroro ha,
kan̂e komo tî n̂epor̂atken̂e Noro pen waihkachome.
Enîhra rma tî xatken̂e ero wa kan̂e komo.
56 Yaake rma tî re ero wa ketken̂e.
Cemaro me makî tî ketken̂e.
Iito re ekatîmra marha tî xatken̂e.
57 Amn̂e tak anarî komo takî tî nawomyatken̂e piiri.
Kicicme Xesus yehtopo yekatîmn̂e marha tî mîkyam xatken̂e.
Tohnaw marha tî n̂examro n̂ekatîmyatken̂e.
On wara tî ketken̂e Xesus poko,
58 On wara kekn̂e noro okyo,
On wixkes amn̂e Kaan mîn,
tooto yamorî ke ciixapu.
Yixkache owya anarî tak wiir̂as hara Kaan mîn hara.
3 mak kenmayasî ciitîkacho poko hara.
Tooto yamorî ken̂ehra ro mak wiir̂asî,
kekn̂e.
Ero wa kekn̂e amna n̂entarî me,
ketken̂e tî.
59 Iito re kahra rma tko tî xatken̂e n̂examro meero.
Anarmerpa so makî tî Xesus yehtoponho n̂ekatîmyatken̂e.
60 Ero yinhîrî takî tî Kaan yaka cewomsom nawomyakn̂e piiri.
Esenmexapu komo yeepatai tî n̂ecececekn̂e.
On wara tî kekn̂e Xesus ya,
N̂examro yeikura ro mak ma mai ke kopi?
Ahce wa mence yîmtapotarî komo apoko?
kekn̂e tî Xesus ya.
61 Tîî,
kekn̂e makî tî Xesus.
Eikura ro makî tî xakn̂e.
Ero yimaw on wara takî tî kekn̂e hara yîwya,
Kristu xa Amoro,
Kir̂wanî ro Mumuru ha?
kekn̂e tî.
62 Noro rma Ow ha,
kekn̂e takî tî Xesus yîwya.
Amn̂e tak Tooto me Ewruxapu meen̂axe meye kah yaw.
Karitî imo panaw rma meen̂axe kaari n̂i xa.
Kaapu smun chew mokyataw marha meen̂axe,
kekn̂e tî Xesus yîwya.
63 Ero wa kacho yentache tak tpononthîrî rma tî nahxaikekn̂e Kaan yaka cewomsom ceserepokarî ke.
Kicicme Moso yehtoponho yekatîmn̂e eporîra cexpore tak nai ham,
kekn̂e tî.
64 Kicicitho me ro mak yîmtapotarî rma wa mentacow.
Ero ke ahce wa xa cirpore nai awya so?
kekn̂e tî esenmexapu komo ya.
Twaihkapore kr̂a nas ha,
ketken̂e takî tî n̂examro ahnoro.
65 Ero yinhîrî anarî komo takî tî n̂etakwatken̂e Xesus pore kica.
Xesus pen tî n̂ewyahruyatken̂e poono ke,
n̂etapetken̂e marha tî tamorî ke so.
Onoke mîk awetapa ha?
Etacko ka,
ketken̂e tî yîwya.
Iito marha tî xatken̂e porisia komo.
N̂examro meero tî Noro pen n̂etapetken̂e tamorî ke so.
Ero wa tî Xesus pen n̂iir̂atken̂e okwe.
Xesus Yakrono Pîn Wara Petru N̂esekatîmyasî
66 Taa,
ero yimaw iito rma tî xakn̂e Petru roro po rma.
Iina marha tî mokyakn̂e Kaan yaka cewomsom yanton,
emasî.
67 Petru takî tî n̂een̂akn̂e wehto pona esonîrî.
On wara tî kekn̂e yîwya,
Xesus yakrononho amoro,
Nasare pono yakrononho ha,
kekn̂e tî yîwya.
68 Nanwekyakn̂e tko tî Petru.
Ahce wai poko ma mîîke kopi?
Camkî ro mak wencesî amtapotarî,
kekn̂e tî Petru yîwya.
Ero wa kache waaca potaka takî tî cekn̂e Petru.
Ero yimaw takî tî kapikara kokwakn̂e.
69 Ero yimaw taki tî noro rma Petru n̂een̂akn̂e xa hara emasî,
Kaan yaka cewomsom yanton.
N̂examro yakrononho rma moso ha,
kekn̂e tî iitono komo ya hara.
70 Pîra ro mak,
kekn̂e xa hara tî Petru,
n̂examro yakrononho pînî ro mak ow ha,
kekn̂e tî yîwya so.
Amn̂e n̂he takî tî iito cececetosom komo tî ketken̂e xa hara yîwya,
Noro yakrononho rma mexe amoro.
Enko,
Karireia pono rma amoro.
Iitono wara mîmtapowasî,
ketken̂e tî.
71 On wara tî kekn̂e Petru yîwya so,
Onoke poko kyam na mîmtapowat ha?
Yîhtînopîra ro mak wasî.
Kaan n̂entarî me xa tan wîîkesî.
Ocemaronwataw owaikape rma Noro,
kekn̂e tî yîwya so.
Ero wa tî kekn̂e Petru.
72 Ero wa kache rma tak kookara,
kekn̂e xa hara tî kapikara.
2 me takî tî xakn̂e ero yimaw kohtîmtoponhîrî.
Entache Xesusu mtapotachonho takî tî nîhtînoyakn̂e hara Petru.
Kuu,
3-îro men mîmtapowas amn̂e oyakrono pîn wara asakî ro kohtîmra ka exitaw kapikara,
kekn̂e Xesus owya,
kekn̂e tî Petru.
Ero ke takî tî nîwracekn̂e.
Ero wa tî xakn̂e Petru.