On Wara Naxe Tooto Komo Amn̂e, Kesî Xesus
13
Taa,
ero yinhîrî tak Kaan mîn yai takî tî cekn̂e Xesus.
Epataketaw on wara tî kekn̂e anarî yînpanatanmekrî yîwya,
Apa,
on ka enko okre,
porinî ro mak on toopu mko mîîmo me ciixapu.
Kir̂wan tan Kaan mîn yîmîtwono mko marha.
2 On wara tko tî n̂eyukyakn̂e Xesus,
Onî mko meen̂atu porin komo mîîmo ahnoro?
On wara wîîkesî ero yipu poko rma,
amn̂e tak n̂exixketîkesî okwe onînhîrî rma mîîmo pen.
Etîmkaw so exihra ro mak tak nasî toopu tan okwe mîîmo me ciixapunhîrî.
Ahnoro mak nar̂metîkexe okwe waapa kom ha,
kekn̂e tî Xesus tînpanatanmekrî komo ya.
Ero wa tî kekn̂e.
3 Ero yinhîrî tak Oripera Yîpîn po takî tî n̂eremekn̂e hara Xesus.
Kaan mîn yecento tî xakn̂e.
Ero yimaw tî yînpanatanmekrî komo takî tî mokyatken̂e yîhyaka asak mak.
Petru,
Ciaku,
Xuaw,
Antre,
iituxa makî tî mokyatken̂e.
Xesus yakro tî nîmtapowatken̂e anarî komo n̂entatorî me makî.
4 Ai Apa,
ketken̂e tî yîwya,
ahcemaw xa wa ero wa tak nai Kaan mîn pen?
Ahce xa amna n̂een̂a amn̂e,
Pahnoke tak nai ham Kaan mîn yixkacho,
kachome tak amna ya ha?
ketken̂e tî yîwya.
5 On wara tî Xesus n̂eyukyakn̂e,
Awewkukman̂e komo mokyaxe amn̂e.
Noro yipu komo ya esewkukmapora ro mak men ehcoko.
6 Yaake men mokyaxe amn̂e oowara cesetacisom komo kica,
Kristu xa ow ha,
kan̂e komo.
Mer̂pono pîn komo n̂ewkukmexe ero wara karî ke kica.
7 On wara kacho tak mencexe tooto komo yehtopo ero yimaw,
N̂etwexe meyeno komo okwe,
kacho mencexe.
Cetwo xe tak natu anarî kom hara,
kacho marha mencexe emapona roro.
Ero yipu yentache awya so erasîra rma ehcoko.
Ero wa thakwa naxe tooto komo okwe.
Eromanhîrî pînî rma tko ka mîn awahwokacho kom ha.
8 Ero yimaw marha on wara naxe mîk hak rowon pono komo,
emapona cexe anarî komo yakro etar̂maxi.
Kayaritomo komo marha n̂etar̂mexe roro anarî komo kayaritomon yakro.
Roowo marha n̂esewsîyasî mînto mînto wa so.
Rooma poko marha naxe tooto komo,
N̂esemetanmekyaxe marha.
Awahwokacho komo yihcitopo makî tko mîn.
Wooxam n̂erewasî pahnoke exitaw ewrutopo,
ero wa rma ka nasî awahwokacho kom hara.
9 On wara marha maxe amn̂e ero yimaw,
awen̂ekapexe so enîno rin̂e komo ya okwe.
Cesenmetopo komo yaw so marha ahyokyaxe so oco.
Kayaritomo komo ya meero awen̂ekapexe so,
yîxawyakan komo ya marha.
Ooxe awexirî ke so rma ero wara awir̂axe so.
Kaan xatî xa mîkyam ham,
kachome marha apoko so ero wara awir̂axe so.
10 Mîk hak rowon pono komo ya n̂esekatîmyasî cokorî ka Kaan ya akir̂wamacho komo.
11 On wara marha maxe,
awahsîyaxe so aaxatî pîn komo,
awar̂axe so marha awen̂ekan̂e komo yaka.
Ero wara awir̂ataw so esewrucpera ehcoko awesekatîmtopo komo poko.
Ahce wa xa wîîke kopi?
kahra ro mak ehcoko.
Ero yimaw rma Kaan nîhtînomexpesî awya so amtapotarî komo awesekatîmtome so tak yîwya so.
Amyamro pînî rma mesekatîmyaxe yîwya so.
Kir̂wanî ro Yekatî xa Mîk n̂esekatîmyasî amtari so rma.
12 Ero yimaw tak etîxera ro mak tak naxe okwe noro re komo rma.
Takno komo rma n̂ekanîyaxe kayaritomo komo ya waihkapotome.
Ero wa xa marha naxe yîîm kom hara,
tîmxîkîthîrî komo rma waihkapexe kayaritomo komo ya okwe.
Ero wa xa marha naxe rikomo kom hara okwe.
Tîîmînhîrî pen komo waihkapexe,
tînocwanînhîrî pen komo marha okwe.
13 Amyamro pen marha aaxera so naxe okwe tooto komo ahnoro.
Oyosotî ponaro awexirî ke so mak aaxera so naxe.
Ero wa thakwa maxe amn̂e okwe.
Oxatîmnokan̂e pîn me rma awexitaw so miya roro akurunpexe so rma Apapa,
kekn̂e tî.
Ero wa tî kekn̂e Xesus Petru komo ya.
14 Taa,
on warai tak meen̂axe amn̂e,
kekn̂e tak hara tî Xesus yîwya so,
kicicitho ro xa tak meen̂axe amn̂e awîrîman̂e ro komo.
Kaan yosotî yeken onî,
kacho yaw rma meen̂axe.
Weronomano rin̂enho pen n̂ekatîmtho rma mîk noro kicicitho,
Taniew pen n̂ekatîmîtho.
Ero ke takîhso men yînmewrethîrî encoko.
Ero yipu yaw rorono yenîche awya so emahcicoko tak îh pona amyamro Xuteia pono komo.
15 Mîîmo meretwo na matu ero yimaw.
Iito awexitaw so mîîmo yaka ewomra ro mak ehcoko awemyawno komo ka.
16 Mararî po na matu anarî komo ero yimaw.
Iito awexitaw so amîn komo yaka tohra marha ehcoko aponon komo ka so.
N̂expe ro mak.
17 Wooxam komo xa tak n̂esemetanmekyaxe ero yimaw tarkem kom ha.
Ero wa xa marha naxe cenarkem kom hara okwe.
18 Ero yimawno poko Kaan yakro amtapotacoko awemacitopo komo poko.
On wara kacoko yîwya,
Cwotu yimaw cma re amna waparî yekmexpora mas Apa,
kacoko Kaan ya.
19 Ero yimaw tak tooto komo yesemetanmetopo komo me xa tak nasî.
Ero warai esemetanmetopo exihra ro makî ka xakn̂e mehxa ro.
Kaan ya akîhtono ritoponho n̂ixa ro.
Ero yipu xa hara exihra ro mak nas amn̂e.
20 Pahkîno pîn me n̂he tko Kaan nukuknomekn̂e emetanmekno ritopo.
Pahkîno me rma yukuknometaw ketaw ha re waihtîkexe re tooto komo ahnoro okwe.
Tînmen̂ekathîrî pînîn yaw tko tî xakn̂e Kaan.
Ero ke pahkîno pîn me n̂he tak nukuknomekn̂e emetanmekno ritopo,
kekn̂e tî Xesus yîwya so.
21 On wara marha tî kekn̂e Xesus,
Ero yimaw on wara tak kexe anarî komo amn̂e.
Moso xa Kristu,
enko xe,
kexe kica awya so.
Mîkro Kristu ha,
enko xe,
kexe anarî kom hara anarî poko.
Ero wa ketaw awya so yîmtapotarî komo ponarora ro mak ehcoko.
22 Yaake men naxe amn̂e,
Kristu ow ha,
kan̂e komo kica,
weronomano rin̂e ow ha,
kan̂e komo marha.
Tohnaw ro mak ero wa kexe kica.
Cirihnî komo rma tko n̂iir̂axe ewkukmano ritohme kica.
Kaan nmen̂ekatho komo yewkukma xe meero naxe.
Ewkukman me tko naxe n̂examro reha.
23 Taa,
kweronomacow so tak ha,
Ero wa nas amn̂e,
wîîka awya so.
Ero ke ero yipu ponaro men ehcoko,
kekn̂e tî Xesus.
Ero wa tî kekn̂e tînpanatanmekrî komo ya.
Xesus Mohtopo Pokono
24 On wara marha tî kekn̂e Xesus yîwya so,
Taa,
emetanmekno ritopo yîtîhkache tak kaamo pen n̂ewxîrîyasî,
nuun̂i pen marha kweipora nasî.
25 Xir̂ko pen marha tak n̂etowyasî.
Kah yawno yecehtotopo marha tak n̂esewsîyasî kopi.
26 Ero wa exiche tak Tooto me Ewruxapu mokyasî oona hara.
Tooto komo wero ro mokyasî kaapu smun chere.
Karitî me xa mokyasî,
kir̂wanî ro me marha.
27 Ero yimaw tancun komo tak n̂en̂epesî Kaan tînmen̂ekathîrî komo wece.
Mehxa mehxa wara n̂ekyaxe yînmen̂ekathîrî komo.
Meyenonho komo meero marha n̂ekyaxe roowo yenatîtopo pononho komo xa,
kaapu mapitawnonho komo marha.
Ero warai komo n̂ekpesî amn̂e ancu komo ya,
kekn̂e tî Xesus yîwya so.
28 On wara marha tî kekn̂e,
Taa,
anari pokono warai tak wekatîmyasî awya so apanatanmetopo komo rma,
piiku yepu yaatacho wara nasî omohtopo.
On wara nasî piiku yepu,
peremkirikirin n̂ehkuwasî,
yarkwetkîrî marha n̂etahkesî,
ero yipu yenîche awya so pahnoke tak nai ham katpan,
mîikexe tak.
29 Ero wa xa marha yîhtînocoko Tooto me Ewruxapu mohtopo hara.
On wara naxe amn̂e roowo pono komo,
wîîka awya so,
ero yipu yeen̂ataw awya so,
Pahnoke xa tak nai ham Noro mohtopo,
kacoko.
30 Yaaro tan wîîkes awya so,
waihtîkara ka exitaw awepamthîrî komo n̂een̂axe roowo pono komo yehtopo.
31 Kaapu pen tak n̂ehcamnoyas amn̂e,
roowo pen marha n̂ehcamnoyasî.
Pîra reha nas omtapotarî,
ehcamnopîn me ro mak nasî,
kekn̂e tî Xesus yîwya so.
32 On wara marha tî kekn̂e Noro yîwya so,
Omohtopo xa yîhtînopîra rma maxe.
Ero kaamo po tak mokyasî Kristu,
kahra thakwa maxe.
Mînto xa kaamo mokyasî,
kahra marha maxe.
Ancu komo meero yîhtînopîra naxe,
kah yawno komo rma.
Ow meero yîhtînopîra wasî Kaan Mumuru rma.
Apapa mak reha nîhtînoyasî oona omohtopo xa.
33 Ero ke omohtopo ponaro men ehcoko miya roro ha.
Kaan yakro marha amtapotacoko roro.
Ero wa ehcoko omohtopo xa yîhtînopîra awexirî ke so.
34 Ahce wa nai mîîmo yosom mooxe tîcetaw ha?
Tîmîn yai tîcetaw tmaywen komo tak nantomesî cemyawno poko.
On poko esko amoro,
kesî anarî ya.
Ero poko esko amoro hara,
kesî anarî ya hara.
Metata yenîn̂e ro marha nantomesî.
Kir̂wan komo mak n̂ewomcowpe,
kesî yîwya.
Ero wa xa marha takrono komo nantomesî Tooto me Ewruxapu.
35 Ero ke mîîmo yosom mohtopo ponaro xa ehcoko amyamro hara.
Ero yimaw xa mokyasî,
kahra ro mak maxe.
Kokon̂i na mokya,
rakatawro ha na,
kookara ketaw kapikara ha na,
enmapuche rma na mokya.
Mohtopo xa yîhtînopîra thakwa maxe.
Ero ke ponaro xa ehcoko.
36 Ponarora awexitaw so reha awekatketu so men okwe ponan̂e tmokrî ke.
Tîwînso mak awen̂atu so ero yimaw okwe.
37 Ero ke,
Noro mohtopo ponaro xa men ehcoko,
wîîkesî awya so,
kekn̂e tî.
Ero wa xa marha wîîkesî miyan komo ya rma.
Ero wa tî kekn̂e Xesus tînpanatanmekrî komo ya.