Ero yinhîrî tak anarî pokono warai tî n̂ekatîmyakn̂e hara Xesus yîwya so.

On wara tî kekn̂e yîwya so,

Pahxa xakn̂e mararî yosom.

Tînatîrî tak n̂iir̂akn̂e mararî pona uupa yatî mer̂pono pîn.

Ero yipu tak wacancekn̂e.

Eperîrî yewkukacho marha nahcekn̂e.

Mîîmo marha n̂iir̂akn̂e iina,

kawno.

Ero wa ciriche iitono komo tak nantomekn̂e tînatîrî yenîrî poko.

On wara kekn̂e yîwya so,

Eperîrî raconho tîmcoko owya amn̂e epetache roro,

kekn̂e.

Ero wa kache miya tak cekn̂e mooxeno pona.

Ero wa xakn̂e mararî yosom.

2 Amn̂e epetarî yimaw tmaywen tak n̂en̂epekn̂e naatî yenîn̂e komo yaka.

Eperîrî raconho wece cma re n̂en̂epekn̂e.

3 Tîhyaka so mokuche tak noro pen tak nahsîyatken̂e enîn̂e komo.

Nîhyokyatken̂e marha oco.

Emyarîra ro mak tak n̂en̂epetken̂e hara kica.

4 Ero ke anarî n̂en̂epekn̂e tmaywen hara eperîrî ka hara.

Noro pen makîrha tak kanakatapetken̂e toh ke oko.

Nîwîrîyaketken̂e marha kica.

Ero wa noro pen n̂iir̂atken̂e hara.

5 Ero yinhîrî anarî xa hara n̂en̂epekn̂e tmaywen hara.

Noro pen tak n̂etapetken̂e twaihkaxi ro okwe.

Ero wa roro n̂en̂epekn̂e tmaywen komo yîhyaka so,

naatî yenîn̂e komo yaka.

Ero wa roro marha yîn̂en̂epethîrî komo pen n̂emetanmekyatken̂e.

Anarî pen komo nîhyokyatken̂e.

Anarî pen komo waihketken̂e hara.

Ero wara roro n̂iir̂atken̂e okwe.

6 Taa,

cewn̂e mak xakn̂e naatî yosom mumuru.

Tîpîn̂em xa Mîk xakn̂e Yîîm ya.

Noro rma tak n̂en̂epekn̂e okomn̂i naatî yenîn̂e komo yaka.

Moso xa tak wen̂epesî omumuru.

Noro n̂he tak na n̂een̂atu cewetîsom me,

kekn̂e cma ha re.

Ero ke tak tumumuru n̂en̂epekn̂e.

7 Noro yenîche taki tko on wara ketken̂e naatî yenîn̂e komo,

Yumumuru xa tak Mîkro.

Yîîm waipuche amn̂e noro tak tîîm natîtho yahsîn̂e me nasî.

Ero ke cetapacerî kr̂a yînatîthîrî yahsîtome tak kîwya so hara,

ketken̂e kica.

8 Ero ke tîhyaka so mokuche nahsîyatken̂e.

N̂etapetken̂e marha twaihkaxi ro okwe.

Okoputhîrî tak nar̂metken̂e peen cheka.

Ero wa xatken̂e okwe naatî yenîn̂e komo,

kekn̂e tî Xesus yîwya so.

9 Taa,

ahce wa tak nai noro,

naatî yosom awya so?

Ahce wa tak tînatîrî yenîn̂enho komo n̂iir̂a awya so?

Mokyasî men wa ha n̂examro pen yar̂maxi.

Ar̂mache anarî komo makîrha tak nantomes hara tînatîrî yenîrî poko hara,

kekn̂e tî.

Ero warai tî n̂ekatîmyakn̂e Xesus yîwya so.

10 On wara marha tî kekn̂e yîwya so,

On wara kacho enîhra ma mat ke Kaan Karitan,

Toopu xakn̂e mîîmo me ciisomu cma ha re.

Kicicme tko n̂een̂atken̂e mîîmo ciin̂e komo,

mîîmo me cirihnî me.

Ero yipu rma tko n̂ecir̂akn̂e mîîmo peyecepu me,

censom me xa.

11 Kporin komo rma ero wa n̂iir̂akn̂e.

Ceserepokexe xa tak ero wa ciitopo poko,

kacho yenîhra ma mat ke,

kekn̂e tî Xesus yîwya so.

12 Taa,

ero wa kacho yentache takî Xesus yahsî xe takî tî xatken̂e.

Tpokono komo me rma tî n̂encetken̂e yîmtapotarî,

naatî yenîn̂e komo yehtoponho ha.

Ahsîra rma tko tî xatken̂e.

Nukurunanîyatken̂e makî tî tooto komo pona.

Ero ke Xesus yai mak takî tî cetken̂e.

Ero wa tî xatken̂e tîmsom pokono yenîn̂e komo,

kpanatanmetopo mewren̂e komo marha,

poritomo komo marha.

13 Ero yinhîrî takî tî on wara xatken̂e hara n̂examro,

Parisew komo tî n̂en̂epetken̂e Xesus yaka.

Eroces ponarono komo yakro rma tî n̂en̂epetken̂e.

Xesus yewkukma xe makî tî xatken̂e.

Kayaritomo yanwekn̂e wara yîmtapotacho yenta xe tî xatken̂e kayaritomo ya en̂ekapotome tak.

14 Ero ke Xesus yaka takî tî cetken̂e yîn̂en̂epethîrî komo.

On wara tî ketken̂e yîwya,

Ai Apa,

yaarono yekatîmn̂e me xa ahtînoyas amna.

Tooto pona yukurunanîn̂e pînî ro mak Amoro.

Amna mîpanatanmekyasî yaarono poko xa,

Kaan yanme xa amna yehtopo poko okre.

Ero ke on wara kes amna awya,

ahce wa amna nai Sesa purantan poko?

Tîmpore rma katî nai awya?

Tîmîhra cexpore katî nai awya?

ketken̂e tî Xesus ya.

15 Cewkukmacho me rma tko tî Xesus nîhtînoyakn̂e yîmtapotarî komo.

Ero ke on wara kekn̂e yîwya so,

Ahce kacho oyewkukma xe mat hara kica?

Exepeyu ka ehcoko xiya on̂enîrî,

kekn̂e tî Xesus yîwya so.

16 Ero ke exepeyu takî tî n̂ekyatken̂e yîhyaka.

Enîche on wara tî kekn̂e yîwya so,

Onoke kuknon cik on exepeyu pokono?

Onok yosot hara tan exepeyu poko mewrexapu ha?

kekn̂e tî yîwya so.

Sesa kuknon ciki tî mîn ha.

Noro yosotî marha mîn mewrexapu ero poko,

ketken̂e tî Xesus ya.

17 Ero ke tî on wara kekn̂e Xesus yîwya so,

Sesa ya rma tîmcoko yin̂ir̂pothîrî.

Kaan n̂iritho marha tak tîmcoko Kaan ya hara,

kekn̂e tî.

Ero wa tî kekn̂e Xesus cewkukma xatî komo ya.

Ero ke n̂eserepoketken̂e takî tî Xesus mtapotarî poko.

Ero wa tî xatken̂e.

18 Taa,

ero yinhîrî takî tî Satusew komo makîrha mokyatken̂e hara Xesus yaka.

Pakahra ro mak tasî kwaipuche,

kan̂e komo mîkyam Satusew komo.

N̂examro makîrha takî tî n̂esencetken̂e Xesus yakro.

19 On wara tî ketken̂e yîwya,

Ai Apa,

on wara kacho tî Moises pen mewrekn̂e amna panatanmetopo,

Anarimaw apoyino komo na waihya kîîrî pen.

Yîmxîkîra rma na waihya.

Ero wa exitaw yihcinhîrî tak nahsîpe hara waixa pen yaknonho hara.

Cipici me tak nahsîpe taknonhîrî xîkrî me yîmxîtachome hara,

kacho tî mewrekn̂e Moises pen.

20 Taa,

pahxa xatken̂e amna poyino pen komo.

7 xatken̂e kîrkomo,

etakno re rma.

Taa,

potuthîrî komo tak n̂ipiwakn̂e.

Ero yinhîrî tak waihyakn̂e noro pen okwe yîmxîkîra rma.

21 Ero ke yihcinhîrî takî tî nahsîyakn̂e aknonhîrî hara ponanînhîrî rma.

Amn̂e noro pen makîrha tî waihyakn̂e yîmxîkîra hara okwe.

Ero wa xa marha tî xakn̂e hara ponanînhîrî pen xa hara okwe,

3-înhîrî pen.

22 Ero wa roro tî xatken̂e 7 pen komo cirihtîkaxi ro okwe.

Yîmxîkîra rma tî waihyatken̂e ahnoro rma okwe.

Mahyaka so tak yihcinhîrî pen komo tak waihyakn̂e hara okwe.

23 Taa,

amn̂e waihxapunhîrî komo pakache hara onok warai pici me wa nai noro wooxam awya?

Ahnoro rma noro nahsîyatken̂e cipici me so,

7 rma,

ketken̂e tî Xesus ya.

24 Ai ha,

kekn̂e tî Xesus yîwya so.

On wara wîîkes awya so,

Kaan Karitan yîhtînopîra maxe okwe,

kar̂pe xa Kaan yehtopo marha yîhtînopîra maxe.

Ero ke camkî xa maxe okwe.

25 Anarme makî reha tak naxe amn̂e waixapunhîrî komo tpakache so hara amn̂e.

Cipici komo yahsîra tak naxe ero yimaw.

Ciin̂o yahsîra marha naxe wooxam kom hara.

Ancu komo wara tak naxe,

kah yawno komo wara.

26 On wara marha wîîkes awya so waixapunhîrî komo pakacho poko,

Moises pen nmewretho yenîhra ma mat okwe?

On wara tî Kaan nîmtapowakn̂e noro pen yakro,

wehto tî n̂etahsîyakn̂e peen poko.

Ero yipu yarihtai tî n̂îmtapowakn̂e.

Ai Moises,

kekn̂e tî yîwya,

Abraaw Porin Ow ha,

Isake Porin marha Ow.

Xako Porin marha Ow,

kekn̂e tî.

Ero wa tî Kaan kekn̂e yîwya.

27 Taa,

ponaro waixa pen komo yehtopo pîn Mîk Kaan.

Ponaro waipîn komo yehtopo makî reha Mîk ha.

Ero ke camkî ro mak maxe okwe,

kekn̂e tî Xesus yîwya so.

Ero wa tî kekn̂e Satusew komo ya.

28 Taa,

ero yimaw anarî takî tî mokyakn̂e hara Xesus yaka Xutew panatanmetopo mewren̂e.

Mokuche esentarî komo ka n̂encekn̂e.

Xesus mtapotarî yentache on wara tî kekn̂e tîhnaw,

Takîhso xa Satusew komo n̂eiku ham okre Xesus,

kekn̂e tî tîhnaw.

Ero ke noro makîrha takî tî kekn̂e hara Xesus ya.

Ai Apa,

yaake nasî Moises pen nmewretho amna panatanmetopo.

Ahce wa kacho xa mîn amna panatanmetopo anarî yopono?

kekn̂e tî yîwya.

29 On wara tî kekn̂e Xesus yîwya,

On warai kacho mîn apanatanmetopo komo xa tak anarî yopono,

Entacoko men ka amyamro Ixaw Yana komo.

On yipu Mîk Kporin komo,

ponaro kehtopo kom ha,

Kporin komo xa Mîk ha.

Cewn̂an mak Mîk ha.

30 Ero ke Noro xe ehcoko Kporin komo xe.

Yaaro xa yiixe ehcoko.

Tîpîn̂e marha encoko,

ponaro xa ehcoko marha,

anarî ponarora.

Cekaritosom wara ro mak ehcoko Noro xe awehtopo komo poko.

Ero wa ehcoko Kporin komo poko,

kacho xa mîn apanatanmetopo komo xa tak.

Ero wa kacho ponaro xa tak ehcoko.

31 2-inhîrî nas hara apanatanmetopo komo marha,

Apoyino komo xe ehcoko etîxe rma maxe ero wa xa marha,

kacho ha.

Asakî wekatmo awya so,

ero wa kacho mko yopono exihra ro mak nasî apanatanmetopo komo,

kekn̂e tî Xesus yîwya.

32 Ai ha Apa,

kekn̂e tî Xutew panatanmetopo mewren̂e.

Yaaro xa mîîka.

Cewn̂an mak Mîk Kaan.

Anarî exihra ro mak nasî.

33 Ero ke Noro xe xa cexpore nasî.

Noro poko xa cesehtînopore marha nasî.

Noro poko ceserepokapore nasî marha,

Noro yanme marha cekaritosom wara marha cexpore nasî yiixe kehtopo komo poko.

Taa,

kpoyino komo xe marha cexpore nasî etîxe rma taxe ero wa xa marha.

Ero wa kexitaw so kir̂wan̂he taxe Kaan ya.

Pîra n̂hema taxe kokuthîrî komo pun yakn̂iyataw mak Kaan ya tîmsom me,

ahce na tîmyataw marha kîwya so Kaan ya,

kekn̂e tî Xesus ya.

34 Ero wa kacho yentache tak Xesus ya,

Nnn,

takîhso moso oyeiku ham okre,

kekn̂e tak tîhnaw.

Ero ke on wara tî kekn̂e yîwya,

Kaan maywen me exporo mai ham,

kekn̂e yîwya.

Ero wa tî kekn̂e Xesus.

Ero yinhîrî esentara ro mak takî tî xatken̂e tooto komo Xesus yakro.

Nukurunanîyatken̂e mak.

Ero wa tî xatken̂e.

35 Taa,

ero yinhîrî tak Kaan mîn yaw takî tî xakn̂e hara Xesus.

Iitono komo tî panatanmekyakn̂e.

On wara tî kekn̂e yîwya so,

On wara kexe apanatanmetopo mewren̂e komo,

Tapi pen yepamtho Mîk Kristu,

kexe.

Ahce kacho ero wa ket ha?

kekn̂e tî Xesus yîwya so.

36 On wara tko kekn̂e Tapi penî rma,

On wara kekn̂e Kporin komo Oporin ya,

Opanaka erematamko kaari n̂ixa.

Aaxatî pîn komo ka war̂mesî.

Anapikrî me ka wiir̂asî,

kekn̂e Oporin ya,

kekn̂e Tapi pen.

Kir̂wanî ro Yekatî yanme rma ero wa kekn̂e.

37 Ero ke Tporin me rma Kristu n̂etahcakn̂e Tapi pen.

Ahce wa exirî ke cepamthîrî rma ero wa n̂etahca hara?

kekn̂e tî Xesus yîwya so.

Iina esenmexapu komo tî tawake xatken̂e Xesusu mtapotarî poko,

enîno rin̂e pîn komo.

Ero wa tî xatken̂e.

38 On wara marha tî kekn̂e Xesus panatanmekno riyataw,

Apanatanmetopo mewren̂e komo warahra ro mak men ehcoko.

On wara naxe n̂examro,

Kawno namruyaxe tponon komo.

Tpoxwe xa nasî yîwya ero yipu yaw cesenpotopo komo.

Tan mai kpanatanmekn̂e,

kexe marha anarî komo yîwya so kwarawantacho yaw so,

yakentaw ha.

Tpoxwe marha ero wa kacho n̂encexe.

39 Xutew yesenmetopo yaw cexitaw so enmekno rin̂e komo yapon pona mak cerema xe so naxe.

Poturme cehsom komo yapon pona cerema xe so marha naxe aweseresmacho komo me exitaw.

40 On wara marha naxe kica,

iin̂o waixapu pen komo nîmînkexe okwe.

Yîmînthîrî kr̂a tahsîcerî,

kexe ro mak okwe.

Ero yinhîrî Kaan yakro tak nîmtapowaxe yakentaw.

Pahkî nîmtapowaxe kir̂wan wara cesenpotome so mak kica.

Ero ke kicicme cehtoponhîrî komo yepetho tak men nahsîyaxe okwe anarî komo yopo ro mak,

kekn̂e tî.

Ero wa tî kekn̂e Xesus Kaan mîn yawno komo ya.

41 Ero yinhîrî tak Kaan purantan yen yecen̂e takî tî n̂eremekn̂e Xesus.

Puranta yenkarî tî n̂een̂akn̂e Kaan mîn yaka mohxapu komo ya.

Tupurantayem komo tî mokyatken̂e mer̂pono pîn.

Mer̂pora so tî n̂enkayatken̂e puranta n̂examro reha.

42 Amn̂e takî tî wooxam mokyakn̂e hara iin̂o waixapu ha tî.

Yupurantamnî tî mîk xakn̂e okwe.

2 exepeyu tî n̂enkayakn̂e noro,

epethîmnî cik mak.

43 Ero ke tînpanatanmekrî komo takî tî nan̂ikyakn̂e Xesus.

On wara tî kekn̂e yîwya so,

Iin̂o waixapu mîkro yupurantamnî ro mak okwe.

Noro yipu rma tko n̂enkapu puranta.

Yaaro tan wîîkes awya so,

anarî komo n̂enkaputho yopo ro mak nasî noro n̂enaputho ciki.

44 Mer̂pora nasî n̂examro purantanî reha.

Ero poi so wahra cik mak n̂enkayaxe.

Noro reha exihnînhîrî rma n̂enkapu hara.

Tupurantanthîrî n̂enkatîka ro mak,

ahce na xe cehtopo yepethonhîrî rma ahnoro,

kekn̂e tî.

Ero wa tî kekn̂e Xesus tînpanatanmekrî komo ya.