Taa,

ero yinhîrî takî Xerusaren pahnoke xatken̂e Xesus komo.

Oripera yîpîn yexenaw tî xatken̂e.

Mehxa ciki xakn̂e ewto hara,

Becpaxe ha.

Xehxa xakn̂e ewto hara anarî hara,

Betania ha.

Iito cexitaw tak tînpanatanmekrî komo takî tî n̂en̂epekn̂e Xesus asakî.

2 On wara tî kekn̂e yîwya so,

Mîn pona etocoko ewto pona,

awepataw rorono komo pona.

Ero pona awepatakache so rma buhu xîkrî tak meen̂axe.

Yîmkaw tooto totopo pîn ka mîk meen̂axe.

Noro tak yîmhokacoko.

Xiya tak ehcoko.

3 Ahce kacho mîmhoketu?

ketaw iitono awya so,

Yiixe tî nai Kporin komo,

kacoko tak yîwya.

Ero wa kacho yentache rma tak oona n̂ekpes awya so,

kekn̂e tî Xesus yîwya so.

4 Ero ke ewto pona takî tî cetken̂e.

Buhu xîkrî tî n̂een̂atken̂e.

Cimiso tî xakn̂e mîîmo potaw esama yaw rma ha re.

Ero ke takî tî nîmhoketken̂e.

5 Iito marha tî xatken̂e tooto komo cececetoso.

Ahce kacho buhu xîkrî mîmhoketu?

ketken̂e n̂examro.

6 Ero ke Xesus mtapotachonho yaw roro tî n̂eyukyatken̂e.

Yiixe tî nai Kporin komo,

ketken̂e tî yîwya.

Taa,

aacoko ha,

ketken̂e tî.

7 Ero ke buhu xîkrî takî tî naar̂atken̂e Xesus yaka.

Tpononthîrî komo ke tak nîmkayamcetken̂e Xesus totohme yîmkaw.

Ero yipu pona takî tî n̂eremekn̂e Xesus.

8 Ero yimaw tî iitono komo cetken̂e Xesus wenari mer̂pono pîn̂.

N̂examro marha tî n̂iir̂atken̂e tpononthîrî esama yaka.

Anarî komo tî wah yarî warai nîhkocetken̂e.

Ero yipu marha takî tî n̂iir̂atken̂e Xesus yesamarî yaka.

9 Ero yimaw takî tî Xesus yakro rma cetken̂e tooto komo.

Tîcetaw so on wara ti ketken̂e Xesus poko,

poturme tîtosom komo tî ketken̂e,

wenari tmohsom komo marha tî ketken̂e.

On wara tî ketken̂e,

Osana,

kir̂wanî ro xa Moso okre.

Kporin komo yanme mohxapu Moso ham okre,

ketken̂e tî.

Kar̂pe ro makî tî ketken̂e.

10 Kir̂wanî ro Moso ha,

Kayaritomo me tmohsom.

Tapi retawno me tmohsom Moso ha,

Kporin komo yanme mohxapu.

Osana,

kyopono ro xa Moso okre,

ketken̂e tî.

11 Ero wa ketaw so rma Xerusaren pona takî tî n̂epatakekn̂e Xesus.

Cepatakache takî tî Kaan mîn yaka cekn̂e.

Iito cexitaw iitono mko takî tî n̂een̂akn̂e ahnoro Kaan mîn yawno mko ha.

Ero yinhîri takî tî Xerusaren poi cekn̂e hara Xesus kawra exirî ke kaamo.

Betania pona tî cekn̂e 12 komo yakro rma.

Ero wa tî cetken̂e.

12 Taa,

enmapuche tak Betania poi takî tî cetken̂e hara Xesus komo.

Ero yimaw takî tî Xesus nîromanakn̂e.

13 Mooxe n̂he tî n̂een̂akn̂e piiku yepu taakem.

Ero ke enso takî tî cekn̂e,

eperîrî yenso cma ha re.

Yaarî makî tî n̂een̂akn̂e okwe,

eperîrî exihra tî xakn̂e.

Epetatopo mera ka xakn̂e ero yimaw.

14 Ero ke on wara tî kekn̂e Xesus piiku yepu ya rma,

Aweperîrî apuhra ro mak n̂ehcowpe tooto komo miya roro ha,

kekn̂e tî.

Tînpanatanmekrî komo n̂entarî me rma tî kekn̂e.

Ero wa tî kekn̂e.

15 Ero yinhîrî takî tî Xerusaren pona cetken̂e hara Xesus komo.

Kaan mîn yaka takî tî n̂ewomyakn̂e hara Xesus.

Iito tî n̂een̂akn̂e twarawantaxmu komo Kaan mîn yaw rma.

Ero ke tî n̂examro n̂en̂epekn̂e.

Iito marha tî xatken̂e puranta yemtakaiman̂e komo.

N̂examro purantan yapon takî tî macakekn̂e.

Potkuku warai poko twarawantaxmu komo marha tî iito xatken̂e.

Noro yipu komo yapon marha tî macakekn̂e.

16 Ero wa tî Kaan mîn n̂ewyomekn̂e Xesus.

On wara tî kekn̂e iitono komo ya,

On yari ekîhra ro mak tak ehcoko warawa Kaan mîn yari,

kekn̂e tî.

17 Twarawantaxmu komo marha tî panatanmekyakn̂e Xesus Kaan Karitan poko.

On wara tî kekn̂e yîwya so,

On wara kacho nasî tmewreso Kaan Karitan,

Kaan yakro kîmtapotacho komo,

kacho me xa nas omîn amn̂e,

mîk hak rowon pono komo mtapotacho me rma,

kacho nasî tmewreso.

Cen̂epan̂em yeken me mak miir̂axe kica amyamro reha,

kekn̂e tî yîwya so.

18 Xesus mtapotarî tî n̂encetken̂e tîmsom pokono yenîn̂e komo,

Xutew panatanmetopo mewren̂e komo marha.

Ero ke Noro yahsîtopo poko takî tî n̂esencetken̂e.

Ahce wa Xesus tahsîyatu waihkachome kr̂a tak,

ketken̂e tî.

Ero poko tî n̂esencetken̂e.

Kir̂wantaw rma ahsî xera tî xatken̂e cerahtîmrî ke so Xesus pona.

Yîmtapotarî poko tî n̂eserepoketken̂e tooto komo.

Ero ke tî n̂eraswatken̂e.

Ero wa tî xatken̂e.

19 Taa,

kokmamyataw tak ewto poi takî tî cekn̂e hara Xesus.

20 Enmapuche hara cetken̂e cesamathîrî komo yaw xa marha.

Tîcetaw so piiku yepu takî tî n̂een̂atken̂e xa hara,

Xesus n̂eitho ha.

Twaihso thakwa tî xakn̂e yimicinthîrî meero okwe.

21 Enko xe Apa,

kekn̂e tî Petru Xesus ya,

taawaiso thakwa nas okwe an̂eithîrî piiku yepu,

kekn̂e tî Petru yîwya.

22 On wara kekn̂e Xesus yîwya so,

Kaan pona xa enîn̂e me xa ehcoko ha.

23 Yaaro tan wîîkes awya so,

Kaan pona een̂ataw xa awya so,

on ya rma mîîkexe îîpî ya,

Miya etok ha îîpî,

tuuna imo kwaka tak epîrkata,

mîîkexe.

Apohana,

nîîce ha ma re mîn îîpî,

kahra ro mak cexpore nas aropotaw so.

Cesî wa ha omtapotacho yaw roro rma,

kapore mak xa nasî.

Ero wa ketaw awya so amtapotachonhîrî komo yaw roro rma tak nasî,

kekn̂e tî Xesus yîwya so.

24 Ero ke ero wara ehcoko roro Kaan yakro amtapowataw so,

ahce na yetahcataw awya so yiixe awehtopo komo,

Wahsîyasî tak ha wa amn̂e,

kacoko tak.

Ero wa ketaw awya so an̂etacithîrî komo rma tak mahsîyaxe okre,

kekn̂e tî yîwya so.

25 On wara marha wîîkes awya so,

Kaan yakro amtapowataw so on wara na matu anarimaw,

merewcet ha na kicicme apoyino komo yehtoponho apoko,

ahce wa na ehtoponhîrî.

Ero wa awexitaw so yohno rma tak yîhcamnoko kicicme ehtoponhîrî.

Ero wa ehcoko tpoko kicicme awehtoponhîrî yîhcamnotome Aamo kom hara,

kah yawno.

26 Apoko so kicicme apoyino komo yehtoponho yîhcamnopîra awexitaw so tko,

ero wa xa marha nasî Aamo kom hara kah yawno.

Tpoko kicicme awehtoponhîrî komo yîhcamnopîra xa marha nasî Noro hara okwe,

kekn̂e tî.

Ero wa tî kekn̂e Xesus yîwya so.

27 Taa,

ero yinhîrî tak Xerusaren pona takî tî cetken̂e xa hara Xesus komo.

Iito exitaw so Kaan mîn yaw tî n̂etar̂akn̂e Xesus.

Iito exitaw tîmsom pokono yenîn̂e komo takî tî cetken̂e yîhyaka.

Xutew panatanmetopo mewren̂e komo marha tî cetken̂e,

poritomo komo marha.

28 On wara tî ketken̂e n̂examro Xesus ya,

Onoke yanme xa ero wara ciino mîîr̂a ha ke?

Onoke xa,

Ero wa men ciino cirko,

kekn̂e awya?

ketken̂e tî yîwya.

29 On wara tko tî Xesus n̂eyukyakn̂e yîmtaka so,

Amtapotarî komo xa matko ka wences Ow hara.

Cewn̂e ro mak wencesî.

Ow men ka eyuhcoko cokorî.

Ero yinhîrî Ow makîrha tak keyukyaxe so.

Noro xa oyantomekn̂e ero yipu poko,

wîîkesî tak awya so.

30 Onoke yanme xa wa emicinono n̂iir̂akn̂e Xuaw pen awya so?

Kah yawno yanme emcinono n̂iir̂akn̂e,

tooto yanme mak katî n̂iir̂akn̂e awya so?

Ow ka eyuhcoko cokorî Xuaw pen yantoman̂enho poko,

kekn̂e tî Xesus yîwya so.

31 Ero ke ero poko takî tî n̂esencetken̂e n̂examro re rma.

Ahce wa ceyukyat ha?

ketken̂e.

Kah yawno yanme emicinono n̂iir̂akn̂e Xuaw pen,

ketaw kîwya so,

Ahce kacho yîmtapotachonhîrî yewetîra mîxatken̂e hara kica?

nîîke ha men kîwya so,

ketken̂e tî.

32 Tooto yanme kyam mak emicinono n̂iir̂akn̂e Xuaw pen,

ketaw reha kîwya so,

Noro yentan̂enho komo men nîrwonatu kpoko so kopi,

ketken̂e tî.

Kweronoman̂e xa mîk xakn̂e Xuaw pen,

ketken̂e tî iitono komo ahnoro.

Ero ke tî n̂eraswatken̂e.

33 Ero ke takî tî ketken̂e Xesus ya,

Apohana.

Onoke yanme na emicinono n̂iir̂akn̂e Xuaw pen?

Yîhtînopîra nas amna,

ketken̂e tî yîwya.

Ai ha,

kekn̂e tî Xesus yîwya so.

Ero ke ero wa xa marha was Ow hara.

Ero yipu poko oyantoman̂enho yekatîmra was awya so hara,

kekn̂e tî Xesus yîwya so.

Ero wa tî kekn̂e.