Taa,

ero yimaw kayaritomo tî xakn̂e.

Miyan komo kayaritomonî rma tî mîk xakn̂e.

Sesa Awkustu tî mîk xakn̂e noro yosotî.

Taa,

on wara takî tî xakn̂e noro,

tmaywen komo yukuknoma xe tî xakn̂e iyakenon.

Ero ke tîmtapotarî yekatîmn̂e komo takî tî n̂en̂epekn̂e roowo poko hakno komo yaka.

On wara kacoko,

kekn̂e,

Awosotî komo mewrepocoko mewren̂e komo ya,

kekn̂e.

Ero ke tî miyan komo ya rma ero wa kacho n̂ekatîmyatken̂e.

Ero wa yukuknomano n̂irpekn̂e Sesa.

2 Kirin̂u tî xakn̂e Siriu komo kopenaton me ero yimaw.

Ero yimaw tî yukuknomano ritopo n̂ihciyakn̂e.

3 Ero ke etkuknomaposo takî tî cetken̂e tooto komo ahnoro.

Cewtonthîrî komo pona so tî cetken̂e,

cewrutoponhîrî pona so.

4 Ero ke Xose marha tî cekn̂e.

Karireia rowon pono tî mîk xakn̂e Xose,

Nasare tî xakn̂e ewton yosotî.

Noro tî cekn̂e Tapi yewtontho pona,

Beren tî ewto yosotî.

Tapi pen yepamtho tî mîk xakn̂e Xose,

ero ke tî iina cekn̂e.

5 Cipici yakro rma tî cekn̂e Maria yakro.

Tarke tî xakn̂e Maria ero yimaw.

Ero wa tî xakn̂e.

6 Taa,

iito exitaw so tak Maria yewrutopo me takî tî xakn̂e.

7 Ero ke n̂ewruyakn̂e takî tî kîîrî ciki.

Emasîn yakanî rma tî Mîk n̂ewruyakn̂e.

Womcekn̂e ciki takî tî yîson poono ke.

Kawno mîn xakn̂e poono,

ewruxan komo womtotopo ro.

Ero yipu ke womcekn̂e ciki.

Ero yinhîrî takî tî okno nahrî yen yaka makî tî n̂iir̂akn̂e.

Eken ken̂ehra thakwa tî xakn̂e pawana mîn,

ero ke okno mîn yaw makî tî n̂enmayatken̂e.

Ero wa tî xatken̂e.

8 Taa,

iito marha tî xatken̂e oper̂a yosom komo,

ero po rma.

Woskara po makî tko tî xatken̂e,

ewto mîtwono po mak.

Kosope tî xatken̂e iito toh komo yenîrî poko.

9 N̂examro ya takî tî n̂esenpekn̂e Kporin komo yancun.

Kporin komo weyuru marha tî n̂esenpekn̂e.

Opera yosom komo tî weipekn̂e ro mak oco.

Ero yipu yenîche tak n̂eraswatken̂e ro mak.

10 Ero ke tak on wara tî kekn̂e ancu yîwya so,

Ai,

erasîra ehcoko,

entacoko ka ommtapotarî.

Centaporem xa tan wekatîmyas awya so awahworetopo kom ha.

Miyan komo rma n̂encexe amn̂e,

tooto komo ahnoro.

Noro yipu komo n̂entarî tan wekatîmyas awya so.

11 Tapi pen yewtontho po ciki tak n̂ewru oroto awown̂e komo.

Aporin komo rma Mîk ha,

Kristu rma.

12 On wara tak Noro meen̂axe amn̂e,

okno nahrî yen yaw tak rikomo cik meen̂axe.

Rikomo womtotopo ro ke twomke meen̂axe,

Noro yipu yenîche tak,

Noro Mîk ha,

kacoko tak,

kekn̂e tî.

Ero wa tî kekn̂e ancu yîwya so.

13 Ero wa kache tak,

tîtîk,

tîhra rma ancu yakrono komo takî tî n̂esenpetken̂e hara kah yawno kom ha.

Mer̂pono pîn komo tî mîkyam xatken̂e,

ancu komo.

Ero wa tî n̂esenpetken̂e.

Kir̂wanhe Kaan yehtopo poko takî tî nîmtapowatken̂e.

14 On wara tî ketken̂e,

Kir̂wan̂he xa mai ham Apa,

tîtkacerî tak Kaan ya.

Kah yawno Mîkî Kaan,

mehxan yawno ha,

Noro ya tîtkacerî ha.

Roowo pono komo wakresî Kaan ahwokan me ehtopo komo ke,

ketken̂e tî.

Ero wa tî ketken̂e ancu komo.

15 Taa,

ero wa kache tak ancu komo takî tî cetken̂e hara kah yaka.

Toche so on wara tî ketken̂e oper̂a yosom komo,

Kaikatko enso.

Kporin komo n̂ekatmo kîwya so,

Noro yenso ciki kaikatko Beren pona,

ketken̂e tî.

16 Ero ke takî tî cetken̂e karpe.

Iito takî tî Maria n̂een̂atken̂e,

Xose marha,

rikomo cik marha.

Okno nahrî yen yaw tî xakn̂e rikomo.

Ero wa tî n̂een̂atken̂e.

17 Noro yenîche takî tî cetken̂e hara oper̂a yosom komo.

Mîk hak ya takî tî n̂ekatîmyatken̂e ancu mtapotachonho.

Ero wa ketken̂e ancu komo kopi Noro poko rikomo poko,

ketken̂e tî yîwya so.

18 N̂eserepoketken̂e takî tî oper̂a yosom komo mtapotarî yentan̂e komo.

Ahce warai xa Mîk rikomo kopi?

ketken̂e tî.

19 Maria marha tî xakn̂e oper̂a yosom komo mtapotachonho ponaro.

Emapona roro tî nîhtînoyakn̂e.

20 Ero wa tî cetken̂e hara oper̂a yosom komo woskara pona hara.

Tîn̂enîthîrî komo poko tî nîmtapowatken̂e.

Ancu mtapotachonho poko marha tî nîmtapowatken̂e.

Kir̂wan̂he Kaan nai ham okre,

Kwakretken̂e xa ham,

ketken̂e tî emapona.

Ero wa tî ketken̂e.

21 Taa,

ero yinhîrî takî tî 8 ro enmapuche tak Xesusu mren ciki takî tî nanpikapetken̂e.

Ero po marha takî tî Xesus me nosohcetken̂e.

Ero wara rma tî kekn̂e ancu Maria ya pahxa rma etahsîra rma ka exitaw.

Xesus me osohtocoko amn̂e,

kekn̂e tî.

22 On wara marha tî xakn̂e Maria,

yaake kaamo tî n̂etakir̂wamekn̂e Moises pen nmewretho yaw roro rma.

Ero wa mîîre yon komo n̂etakir̂wamacowpe,

kachonho yaw roro tî n̂etakir̂wamekn̂e.

Etakir̂wamacho yenatîche tak Xerusaren pona takî tî cekn̂e Xose cipici yakro.

Kaan mîn yaka takî tî Xesusu mren naar̂atken̂e.

Awyanî ro me moso ahsîko apa,

ketken̂e tî iito Kaan ya.

23 Ero yipu poko rma kesî Kporin komo ya kpanatanmetopo kom ha.

Poturu me ewruxapu komo nahsîpe Kporin komo tîwyanî ro me,

kîîrî me ewruxapu komo,

kesî.

Ero ke ero wa kachonho yaw roro rma tî Xesusu mren naar̂atken̂e.

24 Ero yimaw marha Kaan ya tîmsom naar̂atken̂e takn̂isom,

Kporin komo ya kpanatanmetopo komo yaw roro xa marha.

On wara kacho mîn kpanatanmetopo komo,

kîîrî me ewruche poturu.

Torowo ehcoko Kaan ya tîmsom,

kesî.

Potkuku warai xa tîmcoko anarimaw,

kesî marha.

Ero ke ero yipu takî tî nîmyatken̂e Xose komo kpanatanmetopo komo yaw roro rma.

Ero wa tî xatken̂e.

25 Taa,

ero yimaw tî iito xakn̂e poritomo Xerusaren po.

Simeaw tî mîk xakn̂e noro yosotî.

Takîhsom xa tî mîk xakn̂e,

Kaan ponarono.

Ixaw Yana komo yukurunpen̂e ponarono marha tî mîk xakn̂e.

Kir̂wanî ro Yekatî marha tî xakn̂e yîropotaw.

Noro yipu tî mîk xakn̂e.

26 On wara tî ka kekn̂e Kir̂wanî ro Yekatî yîwya,

Kristu tak meen̂as amn̂e waipîra ka awexitaw.

Kayaritomo me Kporin komo n̂iritho rma Mîk meen̂asî,

kekn̂e tî ka yîwya pahxa n̂he.

27 Ero ke takî tî Kaan mîn yaka mokyakn̂e noro.

Kaan Yekatî yanme rma tî mokyakn̂e.

Ero yimaw xa marha tî Xose komo n̂ekyatken̂e Xesusu mren hara.

Kaan ya tîmsom marha tî n̂ekyatken̂e ero yimaw,

Kpanatanmetopo komo yaw rorono rma.

Ero wa tî xatken̂e.

28 Ero ke rikomo ciki takî tî nahsîyakn̂e Simeaw cenaka.

Kir̂wan̂he xa Kaan nai ham okre,

kekn̂e tî.

29 Ero yinhîrî Kaan yakro tî nîmtapowakn̂e.

On wara tî kekn̂e,

Apa,

amtapotachonhîrî yaw roro rma tak ow arko.

Cerepore tak kwaihyasî.

30 An̂enpothîrî rma Moso wenwo,

amna yakir̂waman̂e xa.

31 Miyan komo yakirwaman̂e rma Moso wenwo okre,

anarî yana komo yakir̂waman̂e meero.

32 Xenciu komo weyuru warai moso an̂enpothîrî.

N̂examro weipesî Kaan yehtopo yenpotome yîwya so.

On wara tak naxe Xutew kom hara,

ayanan kom ha.

Kir̂wan komo mîkyam okre,

kacho me tak naxe.

Yîhyaw so exirî ke Noro ero wa naxe,

kekn̂e tî Simeaw Xesus mren poko.

33 Noro mtapotarî yentache tî n̂eserepoketken̂e xa tak Xose,

Xesus yon marha.

Ero wa tî xatken̂e.

34 Ero yinhîrî tî Simeaw nîmtapowakn̂e xa hara.

On wara tî kekn̂e yîwya so,

Awakronoma xe so tak wasî Kaan ya amn̂e,

kekn̂e tî yîwya so.

Ero yinhîrî on wara tî kekn̂e yîson ya hara Maria ya,

Amn̂e tak on wara nasî Moso,

amrerî.

Noro yanme mer̂pono pîn komo n̂epîrkexe amn̂e,

Ixaw Yana komo.

Anarî komo reha nawomyaxe hara.

Ero wa naxe amn̂e Moso yanme.

Yîwîrîyakan̂e me marha naxe anarî kom hara okwe,

kicicme ehtopo komo yenpon̂e me exirî ke Moso.

35 Ero wa nasî Moso amn̂e,

miyan komo yesehtînotopo yenpon̂e me rma nasî.

Ero ke on wara wîîkes awya hara okopuci,

kacipara ke paraxkaxapu wara tak nasî aropotarî amn̂e,

kekn̂e tî.

Ero wa tî kekn̂e Simeaw Maria ya,

Xose ya marha.

36 Taa,

iito tî xakn̂e wooxam hara,

Ana tî osotî.

Kweronoman̂e tî mîk xakn̂e.

Panuew pen yemsîtho tî mîk xakn̂e,

Ase pen yepamtho ha.

Nocwakomotho me xa thakwa tî xakn̂e noro.

Ciin̂oyemînhîrî tî mîk xakn̂e.

7 cimn̂ipu makî tî ka xakn̂e ciin̂oi ha kapu.

37 Ero yinhîrî 84 me takî tî n̂icimn̂ipunwakn̂e xa hara in̂omra takî.

Kaan mîn yawno ro me makî tî xakn̂e noro anana tohnî me ro makî.

Kaan poko makî tî xakn̂e iito.

Emapona tî eseresmara xakn̂e pahkî Kaan yakro tîmtapotachome.

Kosope tî nîmtapowakn̂e,

katpanaw marha tî.

Ero wara roro tî xakn̂e.

38 Noro takî tî mokyakn̂e Xose komo yaka iito exitaw so rma.

Xesusu mren yeen̂ataw,

Kir̂wan̂he xa Kaan nai ham okre,

kekn̂e marha tî noro hara.

Amn̂e takî tî noro yehtopo cik n̂ekatîmyakn̂e iitono komo ya,

Xerusaren pono komo ya.

Takir̂waman̂e ponarono komo ya tî n̂ekatîmyakn̂e,

miyan komo ya rma.

Ero wa tî xakn̂e Ana.

39 Taa,

ero wa tî xatken̂e Xose komo.

Kaan ya kpanatanmetopo n̂ewetîtîketken̂e tîmxîkrî komo yakir̂wamacho poko.

Ero wa exiche so tak Karireia pona takî tî n̂etîrametken̂e hara,

Nasare pona hara.

40 Iito takî tî xatken̂e.

Ero yimaw takî tî Xesusu mren por̂mamyakn̂e.

Kar̂pe takî tî xakn̂e Noro yekatî.

Takîhso marha tî xakn̂e mîn hak poko.

Kaan nakronomarî me roro marha tî xakn̂e.

Ero wa tî xakn̂e.

41 Taa,

on wara tî xatken̂e Xose komo Xesus yon yakro,

yicimn̂ipuntaxera tî cetken̂e Xerusaren pona.

Eseresmaxi tî wa cetken̂e paskwa yimawno me.

42 Ero yinhîrî 12 cimn̂ipu me takî tî xakn̂e Xesus yewrutoponho.

Ero wa exitaw takî tî cetken̂e xa hara Xose komo Xerusaren pona,

Ixaw komo yehtopo ro yaw roro rma.

43 Ceseresmacho komo yîtîhkache takî tî on wara tî xakn̂e Xose,

Xesus yon marha,

n̂etîrametken̂e hara.

Twen̂ekarî tko tî xatken̂e Xesusu mrenî poko.

N̂etînomyakn̂e Noro Xerusaren po rma.

44 Yaake taxe iito re tîtosom komo.

Anarî komo yakro tko na mokya,

ketken̂e makî tî Xose komo Xesus poko.

Kokmamnoso ro tî cetken̂e yîhtînopîra rma okwe.

Kokmamyataw takî tî Xesus n̂epor̂atken̂e.

Tîyanan komo ya tî ketken̂e,

takrono komo ya marha tî.

Enîhra mehcow amna xîkrî?

ketken̂e tî yîwya so.

45 Enîhra rma thakwa tî xatken̂e okwe.

Ero ke yaw xa marha tî n̂etîrametken̂e hara Xerusaren pona hara Noro yeposo.

46 Iito takî tî n̂epor̂atken̂e osorwaw kaamo okwe.

Amn̂e takî tî n̂een̂atken̂e Kaan mîn yaw.

Ceremaxi tî xakn̂e iito,

panatanmekno rin̂e komo yakro rma.

N̂examro yakro tî n̂esencekn̂e.

47 N̂eserepoketken̂e ro makî tî panatanmekno rin̂e komo Xesus mtapotarî poko.

Ahce wa hara kopi,

yuhnari yîhtînon̂e me nai camkîra ro makî.

Takîhso ro mak keyukya,

ketken̂e tî Xesus poko.

48 Noro yenîche takî tî n̂eserepoketken̂e Xose komo.

Okopuci,

kekn̂e tî yîson yîwya,

ahce kacho amna mahwokamexpo mokuhra awehtopo ke?

Apapa yakro amna awepore ahwora okwe,

kekn̂e tî yîson yîwya.

49 Ahce kacho Ow mepor̂atken̂e hara?

kekn̂e makî tî Xesus yîwya so.

Tîîm nantomatho mîk,

ero ke Noro n̂ewehca ham,

kahra ma mehce opoko,

kekn̂e tî yîwya so.

50 Camkî makî tî ero wa kacho n̂encetken̂e yîîm,

yîson komo.

51 Ero yinhîrî Xesus takî tî cekn̂e akro so hara Nasare pona.

Iito exitaw so tak Xose tî n̂ewehcakn̂e Xesus,

Maria marha tî n̂ewehcakn̂e.

Yîmtapotachonhîrî ponaro rma tko tî xakn̂e yîson.

Panatanmekno rin̂e komo yakro esentachonhîrî ponaro marha tî xakn̂e.

52 Iito rma takî tî Xesus por̂mamyakn̂e.

Takîhso marha tî n̂ehtîkekn̂e mîn hak poko.

Kir̂wan̂he tî Kaan n̂een̂akn̂e Noro yehtopo okre.

Poyino komo marha tî kir̂wan̂he n̂een̂atken̂e.

Ero wa tî xakn̂e Xesus.