Taa,

ero yinhîrî tak on wara tî xakn̂e Xuaw,

Sakarias pen mumutho.

Pohnîntaw ka exitaw Kaan takî tî tîmtapotarî n̂ekatîmyakn̂e yîwya.

Cimer̂u Sesa exitaw kayaritomo me ero wa xakn̂e.

15 cimn̂ipu ka xakn̂e noro kayaritomo me.

Ero yimaw Poncu Piratus xakn̂e Xuteia pono komo kopenaton me.

Ero yimaw marha Eroces xakn̂e Karireia pono komo kopenaton me hara.

Ero yimaw marha Piripe xakn̂e Itureia pono komo kopenaton me,

Tîrakon̂ices pono komo kopenaton me marha.

Eroces yakno tî mîk xakn̂e Piripe.

Ero yimaw marha Risan̂as xakn̂e Abiren̂e pono komo kopenaton me hara.

2 Anas komo tî xatken̂e Kaan yaka cewomsom me,

Kaipas kom ha.

Ero yimaw tî tîmtapotarî n̂ekatîmyakn̂e Kaan Xuaw ya.

3 Ero yipu yentache Xotaw yecihtari takî tî cekn̂e Xuaw,

Iitono komo chere ro tî cekn̂e Kaanî mtapotarî yekatîmso.

On wara tî kekn̂e yîwya so,

Kicicme awehtoponhîrî komo tak poxunkacoko.

Emicicoko marha.

Ero wa awexitaw so Kaan tak nîhcamnoyasî kicicme awehtoponhîrî komo,

kekn̂e tî yîwya so.

Ero wa tî kekn̂e Xuaw.

4 Noro poko rma wa mewrekn̂e Isaias pen pahxa,

kweronoman̂enhîrî pen ha.

On wara kacho tî mewrekn̂e,

Amn̂e tak tooto nai pohnîntaw.

Yîmtapotarî n̂esencesî iito,

kar̂pe xa nîmtapowasî.

On wara kesî iina mohxapu komo n̂entarî me,

Kporin komo tak mokyas amn̂e.

Ero ke pataw ciicoko Noro yesamarî kir̂wan̂he tak mohtome,

kesî yîwya so.

5 On wara takî tî Kaan n̂iir̂a esama amn̂e Kporin komo mokyataw,

tarenakemînhîrî tî n̂iir̂a capape hara.

Îîpînhîrî mko marha tî n̂iir̂a capape,

yîtîwînînhîrî mko marha tî.

Cekumxemunhîrî marha tî pexunke hara,

kwexixinonhîrî marha tî.

Cewtakem marha tî memehsere hara.

Ero wa tî Kaan n̂iir̂a amn̂e.

6 Kakir̂waman̂e komo tak n̂een̂axe roowo poko hakno komo.

Kaan yanme mohxapu Mîk n̂een̂axe,

kes amn̂e aweronoman̂e komo,

kacho tî mewrekn̂e Isaias pen.

Ero wa tî mewrekn̂e.

7 Ero ke tooto komo takî tî mokyatken̂e Xuaw yaka mer̂pono pîn komo.

Emicinoposo so tî wa mokyatken̂e yîhyaka.

On wara tko tî kekn̂e Xuaw yîwya so,

Okoyi warai mak amyamro.

Onoke xa aweronometken̂e so Kaanî rwonîmtopo poko?

Etakir̂wamacoko men ka yîrwomra tak ehtome Noro apoko so,

kekn̂e onoke ha awya so?

kekn̂e tî Xuaw yîwya so.

8 Kir̂wan̂he tak ehcoko ha,

Yaaro ham,

cehtoponhîrî komo poxunkace ham,

kachome apoyino apoko so.

Kir̂wan̂he rma nas amna Abraaw pen yepamtho kaxi,

kahra ehcoko ha.

Yiixe exitaw,

anarî komo rma Kaan nakîhce hara Abraaw yepamtho me hara.

Ehn̂ara nasî ero yipu poko.

On toopunhîrî mko rma Noro nakîhce Abraaw yepamtho me.

9 Oroto tak weewe komo yamacho me nasî yawaka ke.

Ero ke kir̂wan me epetara exitaw weewe yepu namesî,

wehto ywaka nar̂mesî marha okwe,

kekn̂e tî Xuaw yîwya so.

Ero wa tî kekn̂e.

10 Ero wa kacho yentache on wara takî tî ketken̂e Xuaw yentan̂e komo yîwya,

Ahce kopi.

Ahce wa tak amna nai kir̂wan̂he tak amna yentome Kaan ya?

ketken̂e tî yîwya.

11 On wara tak ehcoko,

kekn̂e takî tî Xuaw yîwya so,

Asak exitaw aponon komo aknonhîrî tîmcoko ponomnî komo ya.

Erewsî exitaw ahyaw so ero marha tîmcoko rooma pokono komo ya,

kekn̂e tî yîwya so.

Ero wa tî kekn̂e Xuaw centan̂e komo ya.

12 Ero yimaw marha tî kayaritomo purantan yahsîn̂e komo mokyatken̂e Xuaw yaka.

N̂examro meero tî ketken̂e yîwya.

Apa,

ahce wa tak amna nai hara?

ketken̂e marha tî yîwya.

13 On wara tî kekn̂e Xuaw yîwya so hara,

Kayaritomo nukuknomatho wicakî mak ahsîcoko puranta.

Mer̂pora n̂he men tîmcoko,

kahra ro mak tak ehcoko,

kekn̂e tî Xuaw yîwya so.

14 Sowtatu komo marha tî ketken̂e Xuaw ya,

Amna hara,

ahce wa tak amna nai hara?

ketken̂e tî yîwya.

Taa,

kekn̂e takî tî Xuaw yîwya so,

eraspeno cirihra ro mak ehcoko yupurantanthîrî komo tîmtome awya so.

Kicicme n̂eexi moso kica,

kahra marha ehcoko en̂ekano rin̂e komo ya kicicme exihnî komo poko.

Cerepore marha ehcoko awepethîrî komo poko,

kekn̂e tî yîwya so.

Ero wa tî kekn̂e Xuaw tîhyaka mohxapu komo ya.

15 Taa,

n̂eserepoketken̂e tî Xuaw yentan̂e komo.

Kristu rma tko na mîkro.

Noro pîn katî?

ketken̂e tî ahnoro Xuaw poko.

16 Pîra,

Noro pîn ow ha,

kekn̂e tko tî Xuaw yîwya so.

Tuuna kwaka awemicinon̂e komo makî reha ow ha.

Anarî takî tî mokya amn̂e karitî xa tak oyopono xa.

Noro tarî mici meero yîmhokara was ow yîxawyakanî me ro mak oyexirî ke.

Noro yipu Mîk mokyas amn̂e.

Anarî ke tak awemicinoyaxe so Noro,

Kirwanî ro Yekatî ke,

wehto ke marha.

Ero wa awemicinoyaxe so Noro amn̂e,

kekn̂e tî Xuaw yîwya so.

17 Noro mokyataw amn̂e caarapa n̂ekyasî cemyaw puruma pîpîtho yar̂macho.

Tînatîrî pîpîtîkacho yawnonho tak men naatîkes amn̂e.

Puruma yeperîrî re n̂enmekyasî tîmîn yaka.

Yîpîpîtîthîrî reha nakn̂iyasî wehto ke oco eseikanî ro ke,

kekn̂e tî Xuaw yîwya so.

18 Miyan poko rma tî wa panatanmekno n̂iir̂akn̂e Xuaw.

Ero wa tî xakn̂e noro.

19-20 Ero yinhîrî takî kicicme takî tî xakn̂e kayaritomo Eroces.

Xuaw pen takî tî nahruyakn̂e okwe kahrutopo yaka.

Pahxa rma noro nîtwermekn̂e Xuaw yipici me Erocias yahsîtopo poko.

Noro yakno pici rma mîk xakn̂e Erocias.

Kicicme masî awakno pici towrî ke awya,

kekn̂e tî yîwya.

Miyan poko rma tî Eroces nîtwermekn̂e kicicme ehtopo poko.

Kicicme cehtoponhîrî nîhremekn̂e xa hara tko Xuaw pen yahrutopo ke hara okwe.

Ero wa tî xakn̂e Eroces okwe.

21 Ero yimaw takî tî emicinono n̂iir̂akn̂e Xuaw.

Mer̂pono pîn komo tî n̂emicinoyakn̂e.

Xesus meero tî n̂emicinoyakn̂e.

Cemiciche tak Kaan yakro tî nîmtapowakn̂e Xesus.

Yîmtapowataw rma n̂etahruyakn̂e takî tî kaapu.

22 Kir̂wanî ro Yekatî tak nîhcekn̂e potkuku me.

Xesus pona tî n̂etahsîyakn̂e.

Kaanî mtapotarî marha tî n̂esencekn̂e kah yawno.

On wara tî kekn̂e,

Omumuru ro cik Amoro okwe.

Tawake ro mak wasî apoko,

kekn̂e tî.

Ero wa tî kekn̂e Xesus ya.

23 Taa,

on wara takî tî xakn̂e Xesus,

30 cimn̂ipu exiche takî tî ewrutoponhîrî Kaanî mtapotarî takî tî n̂ekatîmyakn̂e.

Taa,

on wara tî xatken̂e Xesus porin pen komo,

osotî tan wetahcasî.

Xose tî xakn̂e Xesus yîîm iitono komo ya mak.

Taa,

Eri pen tî xakn̂e Xose yîîm pen hara.

24 Matan pen tî xakn̂e Eri yîîm pen hara.

Repi pen tî xakn̂e Matan yîîm pen hara.

Merki pen tî xakn̂e Repi yîîm pen hara.

Canai pen tî xakn̂e Merki yîîm pen hara.

Xose pen tî xakn̂e Canai yîîm pen hara.

25 Matacias pen tî xakn̂e Xose yîîm pen hara.

Amos pen tî xakn̂e Matacias yîîm pen hara.

Naun pen tî xakn̂e Amos yîîm pen hara.

Esîri pen tî xakn̂e Naun yîîm pen hara.

Nakai pen tî xakn̂e Esîri yîîm pen hara.

26 Maace pen tî xakn̂e Naakai yîîm pen hara.

Matacias pen tî xakn̂e Maace yîîm pen hara.

Semei pen tî xakn̂e Matacias yîîm pen hara.

Xose pen tî xakn̂e Semei yîîm pen hara.

27 Xota pen tî xakn̂e Xose yîîm pen hara.

Xoanan pen tî xakn̂e Xota yîîm pen hara.

Hesa pen tî xakn̂e Xoanan yîîm pen hara.

Sorobabew pen tî xakn̂e Hesa yîîm pen hara.

Saraciew pen tî xakn̂e Sorobabew yîîm pen hara.

Neri pen tî xakn̂e Saraciew yîîm pen hara.

28 Mewki pen tî xakn̂e Neri yîîm pen hara.

Aaci pen tî xakn̂e Mewki yîîm pen hara.

Kosan pen tî xakn̂e Aci yîîm pen hara.

Ermatan pen tî xakn̂e Kosan yîîm pen hara.

Eeh pen tî xakn̂e Ermatan yîîm pen hara.

29 Xoswe pen tî xakn̂e Eeh yîîm pen hara.

Eriese pen tî xakn̂e Xoswe yîîm pen hara.

Xorim pen tî xakn̂e Eriese yîîm pen hara.

Matan pen tî xakn̂e Xorim yîîm pen hara.

Repi tî xakn̂e Matan yîîm pen hara.

30 Simeaw pen tî xakn̂e Repi yîîm pen hara.

Xuta pen tî xakn̂e Simeaw yîîm pen hara.

Xose pen tî xakn̂e Xuta yîîm pen hara.

Xonan pen tî xakn̂e Xose yîîm pen hara.

Eriakin pen tî xakn̂e Xonan yîîm pen hara.

31 Merea pen tî xakn̂e Eriakin yîîm pen hara.

Menan pen tî xakn̂e Merea yîîm pen hara.

Matatan pen tî xakn̂e Menan yîîm pen hara.

Natan pen tî xakn̂e Matatan yîîm pen hara.

Tapi pen tî xakn̂e Natan yîîm pen hara.

32 Xese pen tî xakn̂e Tapi yîîm pen hara.

Obece pen tî xakn̂e Xese yîîm pen hara.

Boas pen tî xakn̂e Obece yîîm pen hara.

Sara pen tî xakn̂e Boas yîîm pen hara.

Nahson pen tî xakn̂e Sara yîîm pen hara.

33 Aminatabe pen tî xakn̂e Nahson yîîm pen hara.

Araw pen tî xakn̂e Aminatabe yîîm pen hara.

Esîron pen tî xakn̂e Araw yîîm pen hara.

Peres pen tî xakn̂e Esîron yîîm pen hara.

Xuta pen tî xakn̂e Peres yîîm pen hara.

34 Xako pen tî xakn̂e Xuta yîîm pen hara.

Isake pen tî xakn̂e Xako yîîm pen hara.

Abraaw pen tî xakn̂e Isake yîîm pen hara.

Tera pen tî xakn̂e Abraaw yîîm pen hara.

Nako pen tî xakn̂e Tera yîîm pen hara.

35 Seruke pen tî xakn̂e Nako yîîm pen hara.

Hakau pen tî xakn̂e Seruke yîîm pen hara.

Pareke pen tî xakn̂e Hakau yîîm pen hara.

Ebe pen tî xakn̂e Pareke yîîm pen hara.

Sara pen tî xakn̂e Ebe yîîm pen hara.

36 Kainan pen tî xakn̂e Sara yîîm pen hara.

Ahpasace pen tî xakn̂e Kainan yîîm pen hara.

Seem pen tî xakn̂e Ahpasace yîîm pen hara.

Noe pen tî xakn̂e Seem yîîm pen hara.

Rameke pen tî xakn̂e Noe yîîm pen hara.

37 Metusaren pen tî xakn̂e Rameke yîîm pen hara.

Enoke pen tî xakn̂e Metusaren yîîm pen hara.

Xarece pen tî xakn̂e Enoke yîîm pen hara.

Marerew pen tî xakn̂e Xarece yîîm pen hara.

Kainan pen tî xakn̂e Marerew yîîm pen hara.

38 Enos pen tî xakn̂e Kainan yîîm pen hara.

Sece pen tî xakn̂e Enos yîîm pen hara.

Ataw pen tî xakn̂e Sece yîîm pen hara.

Kaan takî tî xakn̂e Ataw pen yîîm hara.

Ero wa tî xatken̂e Xesus porin pen kom yosot ha.