Taa,

ero yinhîrî on wara takî tî xakn̂e Xesus,

Xotaw yecihtai tî mokyakn̂e hara.

Kir̂wanî ro Yekatî ken̂e xa tî xakn̂e ero yimaw.

Noro yanme takî tî cekn̂e pohnîntaka hara.

2 Iito takî tî xakn̂e pahkî,

40 ro tî n̂enmayakn̂e.

Ero yimaw tî emapona Noro nukukmekn̂e Ciabu kicicitho poko.

Iito cexitaw eseresmara ro makî tî xakn̂e Xesus.

Ero ke takî tî nîromanakn̂e thakwa.

3 Ero yimaw tî on wara kekn̂e Ciabu Xesus ya,

Kaan mumuru Ow ha,

mîîkesî re.

Noro me xa awexitaw onî ika cirko awru me toopunhîrî.

Amtapotarî ke mak cirko ha,

kekn̂e tî yîwya.

4 On wara tî kekn̂e Xesus yîmtaka,

On wara tko kesî Kaan Karitan,

Kecehton̂e rma re mîn kuuru,

ero mak pîn ha tko.

Kecehton̂e me marha nasî Kaanî mtapotarî hara ahnoro,

kesî Kaan Karitan,

kekn̂e tî Xesus Ciabu ya.

Ero wa tî kekn̂e.

5 Ero yinhîrî tak Xesus takî tî naar̂akn̂e Ciabu îh pona hara kawno pona.

En̂exa takî tî ahnoro kayaritomo komo n̂enpekn̂e Xesus ya.

Yîmîn komo marha tî n̂enpekn̂e,

maywen komo marha tî.

Yohno rma tî ero yipu n̂enpekn̂e,

roowo poko hakno komo rma.

6 On wara takî tî kekn̂e Ciabu yîwya,

N̂examro enko,

omaywen komo mîkyam kayaritomo komo ahnoro.

Omaywen komo marha mîkyam n̂examro maywen komo.

N̂etîmyatken̂e mak ha owya.

Ero ke oyanme ro mak kayaritomo me cehsom wîhtînoyasî,

wiir̂asî marha kayaritomo me.

7 Ero ke on wara mak kasko owya,

Oporin xa amoro on̂ewetîrî,

kasko mak owya.

Ero wa oyakro amtapotache miyan komo kayaritomon me tak kiir̂as ha,

kekn̂e tî Ciabu yîwya.

8 On wara tî Xesus n̂eyukyakn̂e hara,

Omkai kr̂a etoko Satanas,

On wara kesî Kaan Karitan hara,

Aporin komo Kaan mamakan me mak atupentacoko.

Noro mak ewetîcoko,

kesî Kaan Karitan,

kekn̂e tî Xesus yîwya.

Ero wa tî kekn̂e Ciabu ya.

9 Ero yinhîrî takî tî Xesus naar̂akn̂e hara Ciabu.

Xerusaren pona makîrha takî tî naar̂akn̂e.

Kaan mîn meretkoso tî naar̂akn̂e.

Miya xa takî tî naar̂akn̂e potucicinthîrî pona xa.

Iito exitaw so on wara tî kekn̂e Ciabu Xesus ya,

Kaan Mumuru Ow ha,

mîîkesî re.

Noro me awexitaw ahromko ika xehxa.

10 On wara kesî Kaan Karitan,

Tancun komo tak nantomesî Kaan akurunperî poko,

kesî.

11 Ero ke n̂examro tak awahsîyaxe ehtakapara awehtome toh pona,

kesî marha Kaan Karitan,

kekn̂e tî Ciabu yîwya.

12 On wara tî Xesus n̂eyukyakn̂e hara,

On wara kacho marha nasî tmewreso,

Kakronoman̂e ma re Mîkî Kaan,

kahra ro mak ehcoko,

kesî,

kekn̂e tî Xesus yîwya.

Ero wa tî kekn̂e Xesus Ciabu ya.

13 Ero wa tî Xesus nukukmekn̂e Ciabu.

Anarmerpan poko tî nukukmekn̂e.

Ero yinhîrî takî tî cekn̂e hara Ciabu.

Amn̂e xa Xesus wukukmesî xa hara,

kekn̂e makî tî noro kica.

Ero wa tî kekn̂e.

14 Taa,

ero yinhîrî takî tî Karireia pona cekn̂e hara Xesus.

Kaan Yekatî ken̂e xa tî xakn̂e ero yimaw,

karihton̂e me tî xakn̂e Noro.

Iito exitaw tak Noro yekaci takî tî n̂encetken̂e miyan komo rma Karireia rowon pono komo.

15 Ewto pore so tî cekn̂e,

mîn hak pore.

Ahtono po cexitaw na iitono komo yesenmetopo yaw tî panatanmekno n̂iir̂akn̂e.

Takîhso xa nîmtapowasî Noro okre,

ketken̂e tî Noro yentan̂e komo ahnoro.

Ero wa tî ketken̂e.

16 Ero yimaw tak Nasare pona takî tî cekn̂e hara Xesus,

tpor̂mamtoponhîrî pona hara.

Iito cexitaw marha takî tî Xutew yesenmetopo yaka cekn̂e sabatu po.

Sabatu po roro tîtosom me xakn̂e.

Ero ke iina cekn̂e hara.

Iito cexitaw takî tî piiri nawomyakn̂e Kaan Karitan yîmtapotarechome.

17 Ero ke Kaan Karitan takî tî nîmyatken̂e enîn̂e komo yîwya yînîmtapotarerî.

Isaias pen nmewretho tî mîn nîmyatken̂e yîwya,

kweronoman̂enhîrî pen nmewretho ha.

Ero ke takî tî namomhokekn̂e Xesus rakataka n̂he ha re.

18 On wara kacho tî nîmtapotarekn̂e,

Kaan Yekatî ken̂e xa wasî.

Noro rma ohkapekn̂e Kaanî mtapotarî yekatîmn̂e ro me,

awakir̂wamexe so tak Kaan okre,

kacho yekatîmn̂e me.

Yupurantamnî komo ya ekatîmn̂e me oriyakn̂e.

Ahwokatîkaxapu komo yahworen̂e me marha oyen̂epekn̂e.

On warai yekatîmn̂e me marha oyen̂epekn̂e,

Ahruxa pen komo yahrunkacho,

ewuhnî komo yewtanîretopo,

emetanmexapu komo kurunpetopo,

ero warai yekatîmn̂e me.

19 On wara kacho yekatîmn̂e me marha oriyakn̂e,

Kporin komo ya awahsîtopo me nasî oroto ka,

kacho.

Ero wa kacho tî nîmtapotarekn̂e Xesus.

20 Ero yipu yîmtapotareche Kaan Karitan tî namomiyakn̂e hara Xesus.

En̂ekno rin̂e ya tî nîmyakn̂e hara.

N̂eremekn̂e takî tî iina esenmexapu komo yeepatai rma.

Noro wece takî tî n̂een̂atken̂e iitono komo ahnoro.

21 Ero ke n̂examro takî tî panatanmekyakn̂e Xesus.

On wara tî kekn̂e yîwya so,

Oroto tak Kaan Karitan yaw rorono me cehsom nasî tan achew so,

wîmtapotarew ero yaw roro rma ha,

kekn̂e tî Xesus yîwya so.

Ero wa tî kekn̂e.

22 Xesus mtapotarî yencetaw on wara takî tî ketken̂e Kaan mîn yawno komo,

Kir̂wan̂he xa Moso nîmtapowas okre,

ketken̂e tî.

N̂eserepoketken̂e tî kir̂wan̂he xa yîmtapotarî ke.

Onoke xa Moso,

Xose mumuru pîn katî?

ketken̂e.

Ero wa tî ketken̂e.

23 Ero yinhîrî on wara tî kekn̂e hara Xesus yîwya so,

On wara kacho na mencetu pahxan pen komo mtapotachonho,

Kehceman̂e amoro,

ero ke esehcemakî amoro rma,

kacho.

Ero ke ero wa xa marha na mîîketu owya hara,

kekn̂e tî Xesus.

Kapanaun po awexitaw,

Kar̂pen komo tî karihce Noro,

kacho amna n̂encekn̂e.

Ero ke ero wa xa marha ciino cirko tan hara awewtonî ro po,

mîîket ha na owya.

24 Yaaro tan wîîkes awya so,

On wara naxe kweronoman̂e ro komo,

cewtonî ro po cexitaw so yîmtapotarî yentan̂e pîn me naxe iitono komo okwe.

25 Taa,

on poko marha kîmtapowasî,

ahce wa xakn̂e Erias pen awya so?

Noro pen exitaw kaapu takî tî xakn̂e tahruso tuuna mokuhra tak ehtome.

3 cimn̂ipu mokuhra xakn̂e tuuna okwe,

6 nuun̂i xa hara mokuhra.

Rooma poko xa tak xatken̂e Ixaw Yana rowon pono komo,

ahnoro okwe.

Ero yimaw tî mer̂pora xatken̂e iin̂o waixapu komo iito,

Ixaw Yana komo wosîn kom ha.

26 Iitono pen cinho yaka tko Erias yen̂epera xakn̂e Kaan.

Anarî ro cinho yaka mak n̂en̂epekn̂e Sarehta pono yaka.

Siron rowon mîn Sarehta.

Iitono yaka xa Erias n̂en̂epekn̂e Kaan.

27 Amn̂e tak Erisew makîrha takî tî xakn̂e kweronoman̂e me hara.

Ero yimaw repra yaw xatken̂e Ixaw Yana komo mer̂pono pîn komo.

N̂examro yakir̂wamara rma tko tî xakn̂e Erisew.

Siria pono makî reha nakir̂wamekn̂e,

Naaman mak ha,

kekn̂e tî.

Ero wa tî kekn̂e Xesus Kaan mîn yawno komo ya.

28 Ero wa kacho yentache tak esenmetopo yawno komo takî tî nîrwonîmtîketken̂e ahnoro.

29 Ero ke Xesus takî tî nahsîyatken̂e,

chow.

Miya takî tî naar̂atken̂e ewto panaka.

Îh po ciixapu mîn xakn̂e ewto.

Ero ke îîpî meretkoso takî tî Xesus naar̂atken̂e.

En̂exa tak tî ar̂ma xe xatken̂e.

30 Yîchere so rma tko tî cekn̂e Xesus.

Anana makî tî cekn̂e tanmero.

Ero wa tî cekn̂e.

31 Taa,

ero yinhîrî Kapanaun pona takî tî cekn̂e hara Xesus.

Karireia rowonî rma mîn Kapanaun.

Ero po cexitaw tak iitono komo takî tî panatanmekyakn̂e sabatu po roro.

32 N̂eserepoketken̂e xa takî tî entan̂e komo.

Okyo,

ketken̂e tî,

anarî me ro mak Moso kpanatanmekyaxe so.

Anwekîn me ro mak kesî,

ketken̂e tî Xesus poko.

33 Taa,

ero wa panatanmekno riyataw esenmetopo komo yaw xakn̂e worokyam ken̂arî,

kîîrî ha.

Kicicitho tî mîk xakn̂e worokyam yîropotaw.

Noro takî tî nîmtapowakn̂e Xesus yakro kar̂pe ro mak.

34 On wara tî kekn̂e yîwya,

Ai,

Xesus,

Nasare pono Amoro,

Amna pokohra ro mak esko kica.

Ahce wece mîmoko amna yaka ha ke?

Amna yîhcamnoso katî mîmoko?

Kîhtînoyasî wa ha.

Kaan Mumuru rma Mîk kir̂wanî ro,

wîîkesî rma apoko,

kekn̂e tî worokyam Xesus ya.

35 Tîtken̂e mak esko,

kekn̂e tî Xesus yîmtaka.

Epatakakî tak yîropotai,

kekn̂e marha tî yîwya.

Ero yentache tak ceenhîrî pen takî tî nar̂mekn̂e worokyam roowo pona,

iitono komo cheka rma.

Ar̂mache n̂etowyakn̂e takî tî yîropotai,

kicicme cirihra rma.

Ero wa tî worokyam n̂etowyakn̂e.

36 Ero wa etowrî yenîrî ke tak n̂eserepoketken̂e ro makî tî Kaan mîn yawno komo.

On wara tî ketken̂e Xesus poko,

Ahce wara tîmtapotaxmu Moso kopi?

Etanwekpon me ro mak n̂en̂epe ham okyo worokyam,

kicicitho kom ha.

Karitî ro me xa nîmtapowa ham.

Enko xe kapu,

worokyam n̂epatakesî yîmtapotarî yanme rma okyo,

ketken̂e tî Xesus poko.

37 Ero yinhîrî tak Xesus yekaci takî tî n̂encetken̂e miyan komo rma Karireia rowon pono komo ahnoro.

Ero wa tî n̂encetken̂e.

38 Taa,

ero yinhîrî tak Xutew komo yesenmetopo yai takî tî cekn̂e hara Xesus.

Simaw mîn yaka tî cekn̂e.

Iito tî xakn̂e Simaw pici yon.

Namotoyakn̂e tî okwe,

ocoro xa tî xakn̂e.

Ero ke Xesus ya tî ketken̂e iitono komo.

Caaca cma re makir̂wamesî,

ketken̂e tî yîwya.

39 Ero ke takî tî noro yepona tî n̂ecececekn̂e.

Eperan tî n̂eiyakn̂e.

Ero wa kache,

krei,

n̂etowyakn̂e takî tî.

Ero ke takî tî nawomyakn̂e.

Xesus komo nahrî takî tî n̂etakekn̂e.

Ero wa tî xakn̂e.

40 Taa,

ero yinhîrî kokmamyataw tak okoh komo takî tî n̂ekyatken̂e iyanan komo Xesus yaka.

Anarmerpan yanme tamotosom komo n̂ekyatken̂e ahnoro.

Ero ke tamotosom komo takî tî napeyakn̂e Xesus.

Apeche rma kir̂wan̂he takî tî xatken̂e hara ahnoro.

41 Worokyam ken̂arî komo marha tî n̂ekyatken̂e yîhyaka yaake.

Noro yipu komo ropotai so n̂etowyatken̂e takî tî worokyam komo.

Cetowyataw roro so Xesus yakro takî tî nîmtapowatken̂e.

Kristu xa Amoro,

Kaan Mumuru ro xa,

ketken̂e tî yîwya.

Kristu me exirî rma tî nîhtînoyatken̂e.

N̂examro tko tî n̂eiyakn̂e Xesus.

Tîtken̂e mak ehcoko,

kekn̂e tî yîwya so.

Ero wa tî kekn̂e.

42 Taa,

enmapuche xa hara ewto poi takî tî cekn̂e Xesus pohnîntaka.

Noro yeposo tko tî cetken̂e iitono komo.

Enîche takî tî on wara ketken̂e yîwya,

Tan amna chew makî cma re masî.

Anarî komo cheka tohra ro makî cma re masî,

ketken̂e takî tî yîwya.

43 Anarî me tko tî Xesus n̂eyukyakn̂e.

Kîwcesî rma wa.

Anarî komo ya marha wekatîmyasî Kaan maywen me ehtopo komo.

Mîk hakî cheka tîtosom me en̂epexapu Ow,

kekn̂e tî yîwya so.

44 Ero ke Xutwe yesenmetopo yaw so tî panatanmekno n̂iir̂akn̂e roro,

Karireia pono komo yaw.

Ero wa tî xakn̂e.