Taa,

ero yimaw takî Karireia po rma ka cexitaw Xesus takî tî cekn̂e tuuna yecihtaka,

Xenesare yecihtaka ha.

Iito takî tî Kaanî mtapotarî n̂ekatîmyakn̂e mer̂pono pîn komo ya,

tuuna yecihtaka mohxapu komo ya.

Cikihciki ketken̂e tî Xesus poko,

yîmtapotarî yenta xe tî xatken̂e.

2 Iito tî kanawa n̂een̂akn̂e Xesus ecihtaw,

asakî.

Ootî yanîmn̂e komo kanawarî tî mîn xakn̂e.

Yarîhra tî xakn̂e.

Ootî yanîmn̂enho komo tî xatken̂e ecihtaw tîmîyen komo korokarî poko.

3 Xesus takî tî n̂esenkayakn̂e kanawa yaka.

Simaw kanawarî tî mîn xakn̂e.

Ero ke Simaw ya takî tî kekn̂e,

Mîîna n̂he kaika wahra mak,

kekn̂e tî yîwya.

Ero ke Xesus takî tî naar̂akn̂e kanawa yaw moro na makî.

En̂exa takî tî panatanmekno n̂iir̂akn̂e.

Kanawa yaw rma tî xakn̂e ceremaxi.

4 N̂examro panatanmetopo yîtîhkache tak Simaw ya tî kekn̂e hara Xesus,

Taa,

miya n̂he kaika weyuntaka.

Iina tak amîyen komo ar̂macoko ootî yemcinotome,

kekn̂e tî yîwya.

5 On wara tko tî Simaw n̂eyukyakn̂e,

Apa,

mîîye yar̂marî poko amna n̂enmaka.

Emcinopîra ro mak amna n̂ex okwe.

Amtapotarî yanme rma tko war̂me xa haram,

kekn̂e tî Xesus ya.

6 Ero ke nar̂metken̂e tak.

Ar̂mache ootî takî tî n̂emciyakn̂e mer̂pora ro mak okyo.

Etawotoporo tî xakn̂e mîîye pen.

7 Ero ke takrono komo takî tî nan̂ikyatken̂e anarî yawno komo.

Pokupoku ketken̂e makî tî mohtome so akronomaxi.

Mokuche so takî tî.

Mîîye takî tî nanîmyatken̂e,

n̂enkayatken̂e takî tî kanawa yaka asakno roro yaka rma.

Ero ke tarke xa takî tî xakn̂e kanawa ootî pen ke.

Enor̂poro tî xakn̂e.

8 Ero yipu yenîche takî Simaw Petru takî tî nutupenwakn̂e Xesus yosokmuru mîtkoso.

Apa,

kekn̂e takî tî Xesus ya,

ohyai cma re mîîcesî.

Kicicitho ro mak ow okwe,

kekn̂e tî yîwya.

9 N̂eserepokekn̂e ro makî tî Petru ootî pen poko mer̂pora ro mak emcirî ke.

Ero wa xa marha tî n̂eserepoketken̂e akrono kom hara.

10 Ciaku marha tî n̂eserepokekn̂e,

Xuaw marha.

Sebetew mumuru komo tî mîkyam xatken̂e.

Simaw yakrono komo tî mîkyam xatken̂e.

On wara tko tî Xesus kekn̂e Simaw ya,

Erasîra ro mak ehcoko.

On poko ehxapunhîrî tooto komo yanîmn̂e me tak maxe hara.

Miya roro tak ero poko maxe,

kekn̂e tî yîwya.

11 Ero yinhîrî takî tî kanawa naar̂atken̂e ecihtaka hara.

Iito takî tî nînomyatken̂e ahnoro,

kanawa,

mîîye,

ahnoro makî tî.

Xesus yakro takî tî cetken̂e.

Ero wa tî cetken̂e.

12 Taa,

ero yinhîrî tak anarî pona takî tî cekn̂e hara Xesus.

Iito tî xakn̂e repra kenarî.

Kiirî tî mîk xakn̂e.

Xesus yenîche n̂esewnapekn̂e takî tî Noro yamrinaka.

Apa,

kekn̂e takî tî yîwya,

opunu cma re makir̂wamesî,

akir̂wama xe awexitaw mak ha tko,

kekn̂e tî yîwya.

13 Ero wa kacho yentache tak n̂etapoyankekn̂e takî tî Xesus.

Teme kekn̂e tî noro poko.

Awakirwama xe rma wasî,

kekn̂e tî Xesus yîwya.

Ero ke repra ken̂ehra tak esko,

kekn̂e tî yîwya.

Ero ke ero yimaw rma takî tî repra n̂ehcamnoyakn̂e yupun pokononho.

Kir̂wan̂he takî tî xakn̂e okre.

14 Ero yinhîrî on wara takî tî kekn̂e Xesus yîwya,

Awakir̂wamachonhîrî ekatîmra ro mak esko apoyino komo ya.

Kaan yaka cewomsom ya mak esenpota.

Tîmsom marha akn̂ipoko yîwya awakir̂wamarî ke Kaan ya.

Ero wa mak esko,

Repra ken̂ari komo nakir̂wame ham Xesus,

kachome tak n̂examro ya.

Ero yipu akn̂ipoko Moises pen nmewretho yaw roro rma,

kekn̂e tî yîwya.

Ero wa tî kekn̂e Xesus repra ken̂arînhîrî ya.

15 N̂ekaiwakn̂e rma tko tî Xesus miya xe xa tak.

Ero ke mer̂pono pîn komo takî tî mokyatken̂e xa hara yîmtapotarî yentaxi,

yîwya cetakir̂wamapotome so marha.

16 Cewyaro tko tî cekn̂e roro Xesus pohnîntaka mak.

Kaan yakro yîmtapotaxi tî cekn̂e.

Ero wa tî cekn̂e.

17 Taa,

ero yinhîrî tak panatanmekno tî n̂iir̂akn̂e xa hara Xesus.

Ero wa exitaw tî iito xatken̂e Parisew komo,

Xuteu panatanmekn̂e komo yakro ceremaxi.

Iina mohxapu komo tî mîkyam xatken̂e.

Karireia pono komo tî mokyatken̂e,

Xuteia pono komo marha tî,

Xerusaren pono komo marha tî.

Ahnoro ewto pono komo tî mokyatken̂e iina.

Iito marha tî xatken̂e kar̂pen komo.

Kar̂pe Kporin komo yehtopo tî n̂esenpekn̂e ero yimaw akir̂wamano ritohme Xesus ya.

18 Taa,

ero yimaw tak pokumnî takî tî n̂ekyatken̂e anarî komo.

Aam po rma tî n̂ekyatken̂e.

Mîîmo yaka roro cma tî re arî xe xatken̂e Xesus yaka xa tak.

19 Pîra ha tî okwe.

Tooto pen tî xatken̂e mîîmo yaw iina arîrî yarohra thakwa.

Ero ke mîîmo pore takî tî kainatken̂e.

Mîîmo nawketken̂e.

Ero yaro takî tî pokumnî n̂enîhcetken̂e Xesus yamrinaka xa tak.

Aam po rma tî n̂enîhcetken̂e,

sehrere sehrere tow.

20 Pokumnî yekn̂e komo yenîche tpona enîn̂e me xa takî tî n̂examro nîhtînoyakn̂e Xesus.

Ero ke on wara tî kekn̂e pokumnî ya,

Oyakno,

kicicme awehtoponhîrî tak wîhcamnopu oroto rma,

kekn̂e tî yîwya.

21 Ero yipu yentache tak Xesus takî tî nîwîrîyaketken̂e kica Parisew komo,

Xutew panatanmetopo mewren̂e komo marha.

Onoke tî Moso hara tîwya?

Kaan wara rma tîmtapotaxmu hara kopi Moso.

Onoke thakwa re nîhcamnoya kicicme kehtoponhîrî?

Pîra ro mak.

Kaan makî reha ero yipu nîhcamnoyasî,

ketken̂e tî n̂examro.

22 N̂examro yesehtînotopo rma tko tî nîhtînoyakn̂e Xesus.

Ero ke on wara tî kekn̂e yîwya so,

Ahce kacho meserepoketu?

23 Ahce wa xa katî apehceme wîîke awya so?

Kicicme awehtoponhîrî komo tak wîhcamnopu oroto rma,

wîîke katî?

Sai,

kasko,

etar̂ko tak ha,

wîîke xa katî?

24 Kicicme awehtoponhîrî komo yîhcamnon̂e rma Ow ha,

Tooto me Ewruxapu.

Ero warai me xa oriyakn̂e Kaan.

Ero ke ero warai me oyentome tak awya so on wara tak wîîkesî moso ya,

Oyakno,

sai kasko tak ha.

Awamhîrî tak arko.

Amîn yaka etok ha,

wîîkesî,

kekn̂e tî Xesus pokumnî ya.

25 Ero wa kache rma takî tî nawomyakn̂e noro iitono komo wero ro rma.

Taamhîrî takî tî nanîmyakn̂e.

Tîmîn yaka tî cekn̂e hara.

Kir̂wan̂he xa Kaan nai ham okre,

kekn̂e takî tî tîcetaw.

26 Ero ke n̂eserepoketken̂e xa takî tî iitono komo ahnoro.

Kir̂wan̂he xa Kaan n̂iirî ham okre,

ketken̂e tî.

Kopi,

kopi,

ketken̂e rma tko tî.

Keserepokacho komo ro mak cencow oroto kopi,

ketken̂e tî.

Ero wa tî ketken̂e.

27 Taa,

ero yinhîrî tak Xesus n̂etar̂akn̂e ewto po.

Tîcetaw kayaritomo purantan yahsîn̂e tî n̂een̂akn̂e.

Repi tî mîk xakn̂e noro yosotî.

Ceremaxi tî xakn̂e kayaritomo purantan yahsîtopo yaw.

On wara takî tî kekn̂e Xesus yîwya,

Ai oyakno,

owenari tak amok ha,

kekn̂e tî yîwya.

28 Ero ke ahnoro takî tî nahsîpînkekn̂e poko cehtoponhîrî.

Xesus poko roro takî tî cekn̂e.

29 Amn̂e takî tî erewsî n̂iir̂akn̂e noro tîmîn yaw,

Xesus yerewusmacho.

Mer̂pora tî n̂iir̂akn̂e.

Mer̂pono pîn komo takî tî nan̂ikyakn̂e eseresmachome so Xesus yakro.

Kayaritomo purantan yahsîn̂e komo tî nan̂ikyakn̂e,

anarî komo marha tî nan̂ikyakn̂e.

N̂examro mokuche n̂eremetken̂e tak ceseresmachome so.

30 Ero yipu takî tî n̂een̂atken̂e Parisew komo,

Xutew panatanmetopo mewren̂e komo marha.

Ero ke takî tî Xesusu npanatanmekrî komo nîwîrîyaketken̂e n̂examro.

On wara tî ketken̂e yîwya so,

Ahce kacho meseresmetu kayaritomo purantan yahsîn̂e komo yakro hara kica?

Kicicitho komo yakro marha meseremexe kica,

ketken̂e tî yîwya so.

31 On wara tko tî Xesus n̂eyukyakn̂e,

Kar̂pe kexitaw kehceman̂e xera reha tasî.

Kar̂pera kexitaw makî reha kehceman̂e xe tasî.

32 Kir̂wan komo panatanmeso mokuhra wîxakn̂e.

Kicicitho komo panatanmeso xa matko kmokye.

Kicicme awehtoponhîrî komo tak poxunkacoko,

wîîkesî yîwya so.

Ero wa tî kekn̂e Xesus yîwya so.

33 Taa,

ero yinhîrî tak on wara tî ketken̂e iitono komo Xesus ya,

Ahce kacho anarî me natu anpanatanmekrî komo Xuaw npanatanmekrî komo warahra?

Pahkî eseresmara tî natu Xuaw npanatanmekrî komo reha anarimaw so.

Emapona roro tî natu ero wara Kaan yakro tîmtapotachome so.

Ero wa xa marha naxe Parisew npanatanmekrî kom hara.

Anpanatanmekrî komo reha n̂eseresmexe roro,

ketken̂e tî yîwya.

34 On wara takî tî kekn̂e Xesus yîwya so,

Ahce wa mîîketu cipitaxmu yenso mohxapu komo ya?

Pahkî eseresmara ehcoko,

mîîket ha ma re yîwya so iito rma exitaw cipitaxmu?

kekn̂e tî yîwya so.

35 Amn̂e tko cipitaxmu ces hara yihyai so.

Ero yimaw tak pahkî eseresmara tak naxe onpanatanmekrî komo,

kekn̂e tî Xesus yîwya so.

Ero wa tî kekn̂e.

36 Taa,

ero yinhîrî tak anarî pokono wara tî n̂examro panatanmekyakn̂e Xesus.

On wara tî kekn̂e yîwya so,

Ahce wa miir̂atu poonotho etahxaikache?

Yaxan katî mawoce ero yeemitopo ha?

Pîra ro mak.

Yaxan ke rma eemiyataw awya so n̂etahxaiketîkesî mak okwe yaxan yanme exirî ke.

Etîme re esenpora marha nasî yaxan,

pahxantho yakro,

kekn̂e tî yîwya so.

37 Ero wa xa marha maxe uupa yukun yen poko hara.

Pahxantho yaka arkara maxe ciixan,

uupa yukun.

Pahxantho yaka rma arketaw enhîrî pen tak n̂etwîrîmesî uupa yukun tak ces okwe.

Enhîrî pen marha tak n̂etwîrîmes hara okwe.

38 Ero ke yaxan yaka mak markexe ciixan uupa yukun.

Ero yipu yaka arketaw reha awya so kir̂wan̂he tak nasî wooku,

kir̂wan̂he marha nas een hara.

39 On wara marha maxe uupa yukun yeer̂ataw awya so,

pahxantho yerîche ciixan xera tak maxe yohno rma.

Kir̂wan̂he xa nas okre pahxantho,

mîîkexe mak,

kekn̂e tî.

Ero wa tî kekn̂e Xesus iitono komo ya.