Taa,

ero yinhîrî anana takî tî cekn̂e Xesus tînpanatanmekrî komo yakro.

Kepokaretopo po tî cetken̂e.

Mararî pore rma tî cetken̂e.

Ero wa tîcetaw so puruma yeperîrî takî tî naxikwetken̂e yînpanatanmekrî komo.

Axikwoxapu takî tî nîpîpîtîketken̂e ahtome yîwya so.

Tamorî ke so makî tî sekeseke ketken̂e yîpîpîtîkachome yîwya so.

Ero wa tî xatken̂e Xesusu npanatanmekrî komo.

2 Ero yipu yenîche on wara tî ketken̂e Parisew komo yîwya so,

Ai,

ketken̂e tî,

ahce kacho kpanatanmetopo yewetîra matu kica?

Etapickara ro mak ehcoko kepokaretopo po,

kacho yewetîra maxe kica,

ketken̂e tî yîwya so.

3 On wara tko tî n̂eyukyakn̂e Xesus yîmtaka so,

Amyamro xa matko Kaan Karitan yenîhra ro mak mat ham ke,

Tapi pen yehtoponho ha.

On wara tî xakn̂e noro pen pahxa tîromanataw,

maywen komo marha tî nîromanatken̂e.

4 Ero ke Kaan mîn yaka takî tî n̂ewomyakn̂e Tapi.

Iitono tî nokyakn̂e cuure.

Tmaywen komo yuru marha tî nîmyakn̂e.

Kaan mîn yawno tî mîn xakn̂e,

Tîmsom pokono komo yuru mak on,

kachonho rma.

Ero yipu rma tî nokyatken̂e,

kekn̂e tî Xesus yîwya so.

5 On wara marha tî kekn̂e yîwya so,

Aporin komo rma Ow ha,

Tooto me Ewruxapu.

Ero wa ehcoko kepokaretopo po,

kan̂e rma Ow ha,

kekn̂e tî yîwya so.

Ero wa tî kekn̂e Xesus Parisew komo ya.

6 Taa,

ero yinhîrî tak kepokaretopo po xa hara tî cekn̂e Xesus iitono komo yesenmetopo yaka.

Iina esenmexapu komo tî panatanmekyakn̂e xa hara.

Iito tî xakn̂e amohnî Kaan mîn yaw.

Kaari n̂ixa tî xakn̂e amohra.

Kîîrî tî mîk xakn̂e noro.

7 Iito marha tî xatken̂e Xutew panatanmetopo mewren̂e komo,

Parisew komo marha tî.

On wara tî ketken̂e n̂examro Xesus poko,

Cencerî ika,

amohnî na nakir̂wame kepokaretopo po rma,

kachome kîwya so,

ketken̂e tî.

On po rma akir̂wamano riche yîwya cekanîyaxe kr̂a tak cen̂ekaxmu me,

ketken̂e tî kica.

8 Esehtînotopo komo rma tko tî nîhtînoyakn̂e Xesus.

Ero ke amohnî takî tî nan̂ikyakn̂e.

Amoko ka,

oona ececetotamko,

kekn̂e tî yîwya.

Ero ke takî tî Xesus panaka n̂ecececekn̂e noro.

9 On wara tî kekn̂e Xesus esenmexapu komo ya,

On wara wîîkes awya so.

Ow eyuhcoko.

Ahce wa xa cirpore nai kepokaretopo po awya so?

Wakreno katî cirpore nai,

emetanmekno xa katî cirpore nai awya so?

Karihtono katî cirpore nai,

waihkano katî cirpore nai awya so,

kekn̂e tî Xesus yîwya so.

10 Ero wa kache Xesus tak tî n̂esewyar̂akn̂e.

Kaan mîn yawno komo porero tî n̂entîkekn̂e.

Ero yinhîrî amohnî ya takî tî kekn̂e,

Etamoyankakî tak ha,

kekn̂e tî yîwya.

Ero ke n̂etamoyankekn̂e takî tî.

Kir̂wan̂he takî tî xakn̂e hara amorî eeco wara xa marha okre.

11 Ero yipu yenîche tak nîrwonatken̂e xa takî tî Parisew komo,

Xutew panatanmetopo mewren̂e komo marha tî.

Ero ke tak tî n̂esencetken̂e.

Ahce wa kr̂a Xesus cicir̂atu?

kacho poko tî n̂esencetken̂e.

Ero wa tî xatken̂e okwe.

12 Taa,

ero yinhîrî Xesus takî tî cekn̂e îh pona Kaan yakro yîmtapotaxi.

Pahkî tî nîmtapowakn̂e cenmakaxi ro.

13 Enmapuche takî tî tînpanatanmekrî komo nan̂ikyakn̂e Xesus.

Yaake tî xatken̂e yînpanatanmekrî komo.

12 makî tko tî men̂ekekn̂e tînantomarî me.

Onantomarî komo tak amyamro,

kekn̂e tî yîwya so,

12 komo ya.

14 Taixa tî xatken̂e n̂examro Xesus nmen̂ekatho komo,

Simaw,

Petru rma tî mîk xakn̂e,

Xesus nosohtotho.

Taa,

noro yakno rma tak Antre,

Ciaku tak,

Xuaw,

Piripe,

Bahtoromew,

15 Mateus,

Tome,

ero wara.

Taa,

Ciaku marha tî xakn̂e hara anarî hara,

Awpew mumuru.

Simaw marha tak xakn̂e,

anarî hara.

Xeroce kacho rma mîk noro ha.

16 Xutas marha tî xakn̂e,

Ciaku mumuru.

Xutas Iskar̂otes marha tî xakn̂e,

Xesus yekanîn̂e rma.

Ero wa tî xakn̂e osotî komo,

Xesus nmen̂ekatho komo yosotî.

17 Taa,

ero yinhîrî takî tî îîpî n̂enîhcetken̂e Xesus komo capahno pona.

Iito tî xatken̂e anarî kom hara yînpanatanmekrî kom hara mer̂pono pîn tak.

Mooxe mohxapu komo marha tî xatken̂e iito capahno po.

Mîn hak pono komo tî mîkyam xatken̂e,

Xuteia pono komo,

Xerusaren pono komo,

ecihtawno pono komo marha Ciru pono komo,

Siton pono komo marha.

Noro yipu komo tî mîkyam xatken̂e iito.

Xesusu mtapotarî yentaxi tî mokyatken̂e.

Etakir̂wamaposo marha tî mokyatken̂e tamotosom komo.

18 Worokyam ke yîwîrîmaxapu komo marha tî mokyatken̂e yîhyaka,

kicicitho ke yîwîrîmaxapu kom ha.

Kirwanhe takî tî Xesus n̂iir̂akn̂e noro yipu komo.

19 Mer̂pono pîn komo tî xatken̂e iina mohxapu komo.

Xesus yape xe tî xatken̂e n̂examro ahnoro.

Kar̂pe Xesus yehtopo tî n̂een̂atken̂e kar̂pen komo yakir̂wamacho.

Noro yipu komo tî nakir̂wamekn̂e ahnoro.

Ero wa ehtopo yenîrî ke yîwya so Noro yape xe xatken̂e.

20 Taa,

iito rma ka exitaw so tînpanatanmekrî komo wece takî tî n̂een̂akn̂e Xesus.

Mîn hak poko takî tî n̂examro panatanmekyakn̂e.

On wara tî kekn̂e yîwya so,

Ai oyakno komo,

on wara wîîkes awya so,

emyawnomra na matu anarimaw.

Ero wa awexitaw so tawake rma ehcoko.

Tmaywen me tak Kaan awir̂axe so okre.

21 Rooma poko marha na matu anarimaw hara.

Tawake rma ehcoko ero wa awexitaw so hara.

Amn̂e tak tînahke xa tak maxe okre.

Anarimaw mîwracet ha na kapu.

Ero wa awehtopo komo poko rma tko tawake rma ehcoko.

Amn̂e tak mewrexe hara okre.

22 On wara marha na matu amn̂e,

aaxatîmnoketu so tooto komo okwe,

amtapotarera so marha na natu,

awîrîyaketu so marha,

awosotî komo yenta xera marha natu.

Ero wa men natu amn̂e okwe apoko so Tooto me Ewruxapu xe awexirî ke so mak.

Ero wa exitaw so apoko so tawake rma ehcoko.

23 Ahwotacoko xa tak ero wa awitopo komo poko.

Ahromcoko mak awahwotarî ke so okre.

Kah yaw awexiche so amn̂e mer̂pora tak nasî awepethîrî komo,

ero ke ahwotacoko xa.

Awara xa marha xatken̂e kweronoman̂enhîrî pen komo.

N̂examro pen xera marha xatken̂e aaxatîmnokan̂e komo porin pen kom hara.

Ero ke n̂examro pen yehtoponho marha yîhtînocoko awahwotachome so rma,

kekn̂e tî Xesus.

Ero wa tî kekn̂e tînpanatanmekrî komo ya.

24 On wara tî kekn̂e hara yîwya so,

Ai,

tupurantayem komo,

awya so makîrha wîîkes hara,

mesemetanmekyaxe tak men amn̂e okwe.

Awerepotanmecho komo rma wa mahsîtîketken̂e amyamro okwe.

25 Yînahpen̂an komo,

awya so wîîkes hara.

Amyamro marha tak mahwokexe amn̂e okwe.

Rooma poko men maxe hara amn̂e okwe.

Cewresom komo,

awya so wîîkes hara,

amyamro marha tak mahwokexe amn̂e okwe.

Mewrexe rma re ka.

Mîwracexe tak hara men amn̂e,

Okwe okwe okwe,

mîîkexe.

26 On wara na matu anarî kom hara,

Kir̂wan komo mîkyam okre,

ketu na tooto komo ahnoro apoko so.

Ero wa ketaw apoko so mahwokexe tak men amyamro hara okwe.

Ero wara rma tî nîmtapowatken̂e kica aporin pen komo yaarono pîn poko weronomano rin̂enho pen komo poko hara,

kekn̂e tî Xesus.

Ero wa tî kekn̂e tînpanatanmekrî komo ya.

27 Taa,

on wara marha wîîkes awya so oyentan̂e komo,

kekn̂e xa hara tî Xesus yîwya so.

Aaxatî pîn komo xe rma ehcoko.

Noro yipu komo akronomacoko rma.

28 Anarî komo na aweremketu so,

noro yipu komo poko tawake rma ehcoko.

Awakronoma xe so rma wasî Kaan ya,

kacoko mak yîwya so.

Awîrîyaketu so na anarî kom hara.

Noro yipu komo poko amtapotacoko Kaan yakro.

On wara kacoko yîwya poko so,

N̂examro wakreko rma Apa,

kacoko mak.

29 Anarimaw awewkatapetu so na aaxatî pîn komo,

eeco poko mak.

Ero wa awewkatapetaw so eeconhîrî mak hara enpocoko yîn̂etaparî kom hara.

Anarimaw apononthîrî komo na naar̂atu apoyino komo.

Ero wa exitaw so,

On wara kacoko yîwya so,

Taa,

arko,

on meero arko yiixe awexitaw anarî hara oponontho,

kacoko.

30 Anarimaw awemyawnonhîrî yahsî xe na nat hara.

Ero wa exitaw so,

tîmcoko rma yîwya so.

Anarimaw awemyawnonhîrî komo na naar̂atu mak.

Ero wa exitaw so,

Ek hara men oyemyawnonho,

kahra ehcoko.

31 Ahce wa na apoyino komo exi xe so matu apoko so,

ero wa xa marha ehcoko amyamro n̂examro poko hara.

32 Onok warai komo xe matu?

Aaxatî komo xe mak awexitaw so kir̂wan̂he exihra rma maxe okwe.

Ero wa xa marha naxe kicicitho kom hara,

tîîxatî komo xe mak naxe okwe.

33 Onok warai komo makronomet hara?

Awakronoman̂enhîrî komo yakronometaw mak awya so kir̂wan̂he exihra marha maxe okwe.

Ero wa xa marha naxe kicicitho kom hara,

takronoman̂enhîrî komo makî reha nakronomexe n̂examro okwe.

34 Onok warai komo ya mîmyatu apurantan komo?

Tupurantayem komo ya mak na mîmyatu?

Ero wicakî xa marha nîmya hara owya amn̂e,

mîîketu na tîmyataw awya so.

Ero warai komo ya mak tîmyataw apurantan komo kir̂wan̂he exihra rma maxe okwe.

Ero wara xa marha naxe kicicitho komo meero,

kicicitho komo ya xa marha nîmyatu tupurantan komo ero wicakî xa marha ahsîtome hara amn̂e.

35 On wara xa ehcoko ha ke,

aaxatî pîn komo xe ehcoko.

Noro yipu komo wakrecoko.

Apurantanthîrî komo marha tîmcoko yîwya so,

emtakaimacho ponarora ro mak tîmcoko.

Ero wa awexitaw so mer̂pora xa tak awepethîrî komo mahsîyaxe amn̂e kah yaw,

Kyopono ro xîkrî me marha tak maxe.

Ahce warai Mîk ha Kaan?

Owî cma mîwakrew ham Apa okre,

kan̂e pîn komo wakren̂e rma Mîk Kaan.

Kicicitho komo wakren̂e marha Mîk ha.

Ero ke ero wa xa marha ehcoko amyamro hara.

36 Apînîn yaw so nasî Aamo komo kah yawno.

Ero ke etpînîn yaw xa marha ehcoko amyamro hara Noro wa xa marha,

kekn̂e tî Xesus yîwya so.

Ero wa tî kekn̂e.

37 On wara marha wîîkes awya so,

kekn̂e xa hara Xesus tînpanatanmekrî komo ya,

yîwîrîyakano cirihra ro mak ehcoko awîrîyakara so ehtome Kporin komo.

Kicicitho amoro kica,

kahra ehcoko apoyino komo ya,

ero wa xa marha kahra ehtome Kporin komo apoko so hara.

Awemetanmekyataw so na yîhcamnocoko mak awemetanmetoponhîrî komo yîwya so.

Ero wa awexitaw so Kaan marha tak nîhcamnoyasî kicicme awehtoponhîrî kom hara.

38 Wakreno rin̂e me mak ehcoko.

Ero wa awexitaw so anmîthîrî komo yopo ro mak tak mahsîyaxe hara.

On wara nasî awakrecho komo,

tamen̂em wara mak wakreno rin̂e me awexitaw so ero wa xa marha nasî awakrecho kom hara,

wahra mak mahsîyaxe hara okwe.

Amemra ro mak wakreno rin̂e me awexitaw so reha mer̂pora tak awakrecho komo mahsîyaxe hara.

Ero wa nasî awakrecho komo,

kekn̂e tî Xesus yîwya so.

39 Ero yinhîrî anarî pokono wara tî n̂examro panatanmekyakn̂e Xesus.

On wara tî kekn̂e yîwya so,

Ahce wa natu ewuhnî komo esama yaw cetaw so?

Ewuhnî xa marha katî naar̂a awya so?

Pîra ro mak.

Ewuhnî xa marha aar̂ataw asakno roro rma tak n̂epîrkexe ewtarî yaka okwe.

40 Tpanatanmekn̂e komo yopono me exihra ro mak naxe yînpanatanmekrî komo.

Tpanatanmekn̂e mtapotarî ponaro xa cexitaw so mîn hak poko tak takîhso naxe tpanatanmekn̂e komo wa xa marha.

41 On wara marha wîîkes awya so,

Ahce kacho awakno komo yesepatamcho cik meen̂atu amyamro awesepatamcho ken̂arî xa marha?

Porin yenîhra maxe okwe weewe awewru komo kwawno hara sahsamaxapu wicakno.

42 On wara na mîîketu awakno komo ya anarimaw,

Oyakno,

ek ha ka wowsî awesepatamcho cik ahce na pupuntho,

mîîketu na.

Ero wa kan̂e rma awewru kwawno komo yenîhra mat hara porin weewe.

Kir̂wan wara cesenposom mak amyamro kica.

Porin cokorî ka ar̂macoko awewru komo kwawnonho.

Ar̂mache tak kir̂wan̂he tak awakno komo yesepatamcho meen̂axe towtome tak awya so,

kekn̂e tî Xesus yîwya so.

43 On wara marha wîîkes awya so,

kekn̂e takî tî Xesus yîwya so,

ahce warai me xa katî n̂eperwa weewe mko hara awya so?

Apupnî me reha epetara thakwa nasî kir̂wan weewe yepu.

Tahsom me epetara marha nasî kicicitho hara.

44 On wara tasî weewe yepu mko poko.

On warai tan ham weewe,

tîtkexe weewe poko eperîrî yenîche kîwya so.

Piiku katî mîpohcatu cekyem poi?

Pîra ro mak.

Uupa katî mîpohcatu kpata poi?

Pîra marha.

45 Ero wa xa marha maxe amyamro hara tooto komo.

Kir̂wan me awexitaw so kir̂wan mak nasî aropotaw so hara.

Ero ke en̂exa rma n̂epatakesî kir̂wan̂he ciino ritopo.

Kicicitho me awexitaw so reha kicicitho marha nas aropotaw so hara.

Ero ke en̂exa rma n̂epatakesî kicicme ciino ritopo hara.

Ponaro xa awehtopo komo poko mîmtapowaxe,

kekn̂e tî Xesus yîwya so.

46 On wara marha wîîkes awya so,

kekn̂e hara tî Xesus yîwya so,

ahce kacho Apa,

Oporin Amoro,

mîîketu owya omtapotarî yewetîn̂e pîn komo rma okwe?

47 On wara naxe anarî komo,

ohyaka mokyaxe.

Omtapotarî tak n̂encexe,

n̂ewehcaxe marha.

Noro yipu komo yehtopo wekatîmyas awya so.

48 Mîîmo ciin̂e wa naxe noro yipu komo.

Pahxa tî tîmîn n̂iir̂akn̂e takîhsom.

Yuhnaka tî nahcekn̂e mapata yewtarî.

Toopu yaka roro tî nahcekn̂e.

Taa,

mapata tak nar̂mekn̂e.

Mîîmo tak n̂iitîkekn̂e.

Amn̂e tak tuuna nukmekn̂e iito.

Ciki kekn̂e takî tî yukmarî mîîmo poko.

Emacakara rma xakn̂e yîmîn yuhnaka ciixapu me exirî ke mapatan.

49 Anarî komo reha n̂encexe rma re omtapotarî.

Ewetîra tko naxe okwe.

Noro yipu komo yehtopo tak wekatîmyasî awya so hara,

Mîîmo ciin̂e wa marha naxe,

akpîra ciin̂e wara ha tko.

Pahxa tîmîn n̂iir̂akn̂e ha re akpîn.

Yuhnaka ahtora xakn̂e okwe mapata yewtarî.

Ciitîkache tak iina marha tuuna nukmekn̂e hara.

Ciki kekn̂e yukmarî yîmîn poko hara.

Ero ke yohno rma tak n̂emacakekn̂e noro mîntho pen okwe.

Okwe ro mak okwe,

kacho me mak xakn̂e yîmînthîrî okwe,

kekn̂e tî.

Ero wa tî kekn̂e Xesus tînpanatanmekrî komo ya.