Taa,

ero yinhîrî tak iitono komo panatanmetîkache ewto pona takî tî cekn̂e hara Xesus,

Kapanaun pona.

2 Iito tî xakn̂e sowtatu yantoman̂e.

Noro yanton tî xakn̂e hara yîpînîmîkno xa.

Noro tî namotoyakn̂e okwe.

Waiporo tî xakn̂e okwe.

3 Ero wa exitaw Xesus yekaci takî tî n̂encekn̂e sowtatu yantoman̂e.

Ero ke Xutew poritomon komo takî tî nan̂ikyakn̂e.

On wara tî kekn̂e yîwya so,

Xesus yan̂ihso cma re mîîcexe.

On wara cma re mîîkexe yîwya,

Mînto nai sowtatu yantoman̂e.

Noro yanton tî namotoya okwe.

Mîmokyasî cma akir̂wamaxi,

mîîkexe cma re Xesus ya,

kekn̂e tî yîwya so.

4 Ero ke Xesus yaka takî tî cetken̂e poritomo komo.

Sowtatu yantoman̂e mtapotachonho tî n̂ekatîmyatken̂e yîwya.

Cerewre tî ketken̂e yîwya.

On wara tî ketken̂e,

Kir̂wan mîk sowtatu yantoman̂e.

5 Amna xatî mîk okre,

Ixaw Yana komo xatî.

Amna wakren̂e marha mîk,

amna yesenmetopo n̂iire okre.

Ero ke cma re mîmokyasî noro yanton yakir̂wamaxi,

ketken̂e Xutew poritomon komo Xesus ya.

6 Ero ke akro so takî tî cekn̂e Xesus.

Sowtatu yantoman̂e mîn pahnoke exitaw so tîmtapotarî yekatîmn̂e komo xa hara tî n̂en̂epekn̂e sowtatu yantoman̂e Xesus yaka.

On wara tî ketken̂e n̂examro Xesus ya,

On wara tî nîîke hara sowtatu yantoman̂e awya Apa,

Awewrucpe xera ro mak wasî.

Oyopono ro mak Amoro Apa.

Ero ke omîn yaka mokuhra rma na mai.

7 Ahyaka tohra marha weexi ow.

Kîhyapam mak oyopono me awexirî ke.

Mîmtapowa mak na akir̂wamacho poko.

Amtapotarî yanme rma tak oyanton nasî kar̂pe hara,

nîîke tî awya.

8 Oyantoman̂e marha nasî.

Noro mtapotarî wewehcasî.

Onantomarî komo marha naxe sowtatu kom hara.

Miya etok ha,

wîîkes anarî ya.

Ero ke cesî omtapotarî yanme.

Amok ha xiya,

wîîkes anarî ya hara.

Ero ke mokyasî.

On poko esko,

wîîkes anarî ya hara.

Ero ke ero poko tak nasî,

nîîke ha tî awya Apa,

ketken̂e tî Xesus yaka en̂epexapu komo.

9 Yîmtapotarî yentache n̂eserepokekn̂e xa takî tî Xesus sowtatu yantoman̂e poko.

Kir̂wan̂he xa tî n̂encekn̂e yîmtapotarî.

Ero ke takî tî n̂esewkor̂mekn̂e Xesus twenari mohxapu komo wece.

On wara tî kekn̂e yîwya so,

Yaaro tan wîîkes awya so,

opona xa n̂een̂a ham moso okre sowtatu yantoman̂e.

Ixaw Yana komo yenîhra ro mak wasî moso warai opona enîn̂e xa,

kekn̂e tî Xesus yîwya so.

10 Ero yinhîrî tak Xesus yaka en̂epexapunhîrî komo takî tî cetken̂e hara.

Mîîmo yaw takî tî n̂een̂atken̂e sowtatu yantoman̂e yanton.

Kir̂wan̂he takî tî xakn̂e hara okre.

Ero wa tî xakn̂e.

11 Taa,

ero yinhîrî tak enmapuche hara anarî ewto pona takî tî cekn̂e Xesus Nain pona.

Noro yakro tî cetken̂e yînpanatanmekrî kom hara.

Tooto komo marha tî cetken̂e Xesus yakro mer̂pono pîn komo.

12 Ewto wacan metatan pahnoke exitaw so en̂exa cepatakaxmu komo takî tî n̂een̂atken̂e hara.

Okoputhîrî tî naar̂atken̂e,

kar̂pamxan pen yokoputho.

Noro pen makî tî xakn̂e yîsonînhîrî xîkîtho.

Iin̂o waixapu tî mîk xakn̂e okwe yîsonînhîrî.

Yîsonînhîrî yakro tî cetken̂e ewto pono komo mer̂pono pîn.

13 Yîsonînhîrî yenîche tak Kporin komo ya yîpînîn yaw xa tî xakn̂e.

Okopuci,

yîwratara tak esko,

kekn̂e tî yîwya.

14 Okoputhîrî yepona takî tî cekn̂e Xesus.

Okopu yen tî nahsîyakn̂e.

Ero ke n̂ecececetken̂e takî tî aan̂e komo.

Okoputhîrî ya takî tî kekn̂e Xesus,

Okopuci,

on wara wîîkes awya,

awomko tak ha,

kekn̂e tî yîwya.

15 Ero wa kache tîhkaw takî tî nawomyakn̂e waixapunhîrî.

Nîmtapowakn̂e marha takî tî okre.

Moso ha amrerî,

kekn̂e tî Xesus yîson ya.

16 Ero yipu yenîche n̂eraswatken̂e ro makî takî tî iitono komo ahnoro ro mak.

Kponaro so rma nai Kaan ham okre,

ketken̂e takî tî.

Kweronoman̂e xa tak n̂enpoi ham Kaan okre kîwya so.

Tîyanan komo tak Kaan nakronome ham okre,

ketken̂e tî.

Ero wa tî ketken̂e iitono komo Xesus poko.

17 Ero yinhîrî tak okopu yenpakachonho takî tî n̂ekatîmyatken̂e miyan komo ya rma.

Xuteia pono komo ya tî n̂ekatîmyatken̂e,

yîmîtwono komo ya meero tî.

Ero wa tî n̂ekatîmyatken̂e.

18 Taa,

ero yimaw tak kahrutopo yaw rma thakwa tî xakn̂e Xuaw.

Iito rma tî Xesus yekaci n̂encekn̂e.

Waixapunhîrî komo yenpakachonho tî n̂encekn̂e,

yîmtapotachonhîrî marha tî.

Xesus yehtopo tî n̂encekn̂e ahnoro.

Yînpanatanmekrî komo tî n̂ekatîmyatken̂e yîwya.

19 Ero ke tînpanatanmekrî komo takî tî nan̂ikyakn̂e Xuaw asakî.

N̂examro takî tî n̂en̂epekn̂e Xesus yaka.

On wara tî kekn̂e yîwya so,

On wara kaxi cma re mîîcexe Xesus yaka,

Onoke xa Amoro?

Kweronoman̂e xa tak mokyas amn̂e,

kachonho katî Amoro?

Anarî katî mokya amn̂e kweronoman̂e xa tak?

kaxi cma re mîîcexe Xesus yaka,

kacoko yîwya,

kekn̂e tî Xuaw yîwya so.

20 Ero ke Xesus yaka takî tî cetken̂e Xuaw npanatanmekrî komo.

On wara tî ketken̂e yîwya,

Ai Apa,

ahyaka amna moko Xuaw yanme.

On wara kaxi amna moko,

Onoke xa Amoro ha?

Kweronoman̂e xa tak mokyas amn̂e,

kachonho katî Amoro?

Anarî katî mokya amn̂e kweronoman̂e xa tak?

kaxi amna moko ahyaka Xuaw yanme,

ketken̂e tî Xesus ya.

21 Ero yimaw rma tko tî akir̂wamano n̂iir̂akn̂e Xesus.

Mer̂pono pîn komo tî nakir̂wamekn̂e.

Tamotosom komo tî nakir̂wamekn̂e,

kar̂pen komo marha tî,

worokyam kenarî komo marha tî.

Ewuhnî komo marha tî n̂ewtanîrekn̂e mer̂pono pîn kom ha.

Ero wa tî akir̂wamano n̂iir̂akn̂e Xesus Xuaw npanatanmekrî komo wero ro.

22 Ero yinhîrî on wara takî tî kekn̂e Xesus yîwya so,

Taa,

etocoko hara Xuaw yaka.

An̂enîthîrî komo tak ekatîmtatko yîwya,

an̂entathîrî komo marha.

On wara kacoko,

Ewuhnînhîrî komo tak n̂een̂axe,

yîhrepunînhîrî komo marha tak n̂etar̂axe,

repra ken̂arînhîrî komo tak tupunpore naxe,

panahnînhîrî komo tak n̂encexe,

waixapunhîrî pen komo marha tak pakexe.

Kaanî mtapotarî marha n̂encexe yupurantamnî komo,

Awakir̂wamexe so tak Kaan okre,

kacho n̂encexe,

kacoko Xuaw ya.

23 On wara marha kacoko yîwya,

On wara kahra ro mak cexpore nasî,

Apohana,

Kristu pînî rma tko na Mîk Xesus,

kahra tî cexpore nai.

Tawake xa tî matu ahwokanî me ro mak awexitaw so opoko,

kacoko yîwya.

Ero wa kacoko Xuaw ya amn̂e,

kekn̂e tî.

Ero wa tî kekn̂e Xesus Xuaw n̂en̂epetho komo ya.

24 Ero yinhîrî takî tî cetken̂e hara Xuaw yanme mohxapu komo.

Toche so tak Xuaw poko takî tî nîmtapowakn̂e Xesus tooto komo yakro,

mer̂pono pîn komo yakro.

On wara tî kekn̂e yîwya so,

Pahxa mîîcetken̂e miya pohnîntaka Xuaw yenso.

Onoke warai yenso mîîcetken̂e?

Tuuwa warai yenso katî mîîcetken̂e,

ocowo ke cewananîsom warai ha?

25 Onoke warai yenso xa mîîcetken̂e?

Cepethîkem ke tponoyem yenso katî mîîcetken̂e?

Kayaritomo mîn yaw so makî reha naxe cepethîkem ke tponoyem komo,

cepethîkem ke tînahkem komo marha.

26 Onoke warai yenso xa mîîcetken̂e?

Aweronoman̂e yenso katî?

Yaaro,

noro yipu rma mîk Xuaw.

Anarî komo yopono rma tko mîk ha aweronoman̂e komo yopono.

27 Noro poko rma kesî Kaan Karitan.

On wara kesî,

Yarî tak wen̂epes amn̂e oyekaiporen̂e aywapu.

Noro tak nakir̂wamesî awesamarî iina awtotome,

kesî Kaan Karitan.

Xuaw poko rma ero wa kesî.

28 On wara marha wîîkesî Xuaw poko,

Mer̂pora naxe wooxam ropotainonho komo.

Aweronoman̂e komo me rma re naxe anarî komo.

Xuaw xa yo nasî iyopo so,

aweronoman̂e komo me xa tak ha.

Xuaw yopono me rma tko naxe Kaan maywen me cehsom komo ahnoro,

mapitawno warai komo meero,

kekn̂e tî.

Ero wa tî kekn̂e Xesus Xuaw poko.

29 Taa,

ero yipu yentache tak tawake tî xatken̂e entan̂e komo.

Kayaritomo purantan yahsîn̂e komo meero tî xatken̂e tawake.

Kaan yanme xa xakn̂e Xuaw kweronoman̂e me okre,

ketken̂e tî.

Ero wa tî ketken̂e n̂examro Xuaw n̂emicinoputho me cexirî ke so.

30 Ero warahra ro makî tî xatken̂e Parisew komo reha,

Moises pen nmewretho pokono komo marha.

Poxumra ro makî tî n̂encetken̂e n̂examro Kaan ya kpanatanmetopo komo.

Ero wa tî xatken̂e n̂examro reha Xuaw n̂emicinoputho pîn me cexirî ke so.

31 Ero ke on wara takî tî kekn̂e Xesus yîwya so,

onoke warai komo xa amyamro Parisew komo,

kpanatanmetopo pokono komo marha?

Anarî pokono wara tak wekatîmyasî awehtopo komo oroto,

kekn̂e tî yîwya so.

32 Rikomo komo wara mak maxe okwe kwarawantacho roron pono wara.

On wara kexe rikomo ceseman̂iyem komo ya anarimaw,

Ahce kacho amna yeikura ro mak matu kica?

Raatî amna n̂eceu an̂entarî komo.

Manîmra tko mehcow okwe ero poko.

Amna marha thakwa re nîwrata an̂entarî komo.

Yîwratara tko mehcow amna yakro ro okwe.

Ahce kacho ero wa matu kica,

kexe rikomo komo anarimaw ceseman̂iyem komo ya.

Ero wa xa marha maxe amyamro hara okwe.

33 Pahxa ka Xuaw Bacista xakn̂e achew so.

Cuure tokuhra reha xakn̂e noro.

Uupa yukun yerîhra marha xakn̂e.

Noro yipu mîwîrîyaketken̂e kica.

Worokyam ken̂arî mîkro kica,

mîîketken̂e okwe noro poko.

34 Taa,

noro warahra reha kmokye Ow hara,

Tooto me Ewruxapu.

Owî reha keseresmesî roro,

cuure wokyasî,

uupa yukun marha weer̂asî.

Ow marha mîwîrîyakexe hara okwe.

On wara mîîkexe opoko,

Tîyopo ceseresmaxmu Mîkro kica,

kawaxiyem yeen̂e ro marha tîyopo kica.

Kayaritomo purantan yahsîn̂e komo yakrono Mîkro kica,

kicicitho komo yakrono marha kica,

mîîkexe marha.

Ero wa so mîîkexe opoko hara okwe.

35 On wara tko naxe takîhsom xîkrî komo reha ahnoro,

Yaarono yekatîmn̂e mîkro,

kexe takîhso tîmtapotaxmu poko,

kekn̂e Xesus.

36 Ero yinhîrî takî tî on wara kekn̂e iitono Xesus ya,

Ai Apa,

mîmokyasî cma re eseresmaxi ohyaka,

kekn̂e tî yîwya.

Parisew tî mîk kekn̂e yîwya.

Ero ke tî eseresmaxi cekn̂e Xesus yîhyaka.

37 Eseresmetaw so rma wooxam takî tî mokyakn̂e Xesus yaka.

Iitono rma tî mîk xakn̂e wooxam.

Cikicicintaxmu ro tko tî mîk xakn̂e.

Xesus yekacî tî n̂encekn̂e,

Mînto tî Xesus n̂eseresme Parisew mîn yaw,

kacho ha.

Ero ke tî mokyakn̂e yîhyaka.

Katî tî n̂ekyakn̂e kotoporem.

Kirwan yaw tî n̂ekyakn̂e,

ero yipu tî n̂ekyakn̂e wooxam.

38 Xesusu mkai takî tî n̂ecececekn̂e noro yîhtarî yecen̂e.

Iito takî tî nîwracekn̂e.

Cewyokrî ke rma takî tî Xesus tarî korokekn̂e.

N̂ickekn̂e tak tîhpoci ke rma.

Ero yinhîrî takî tî yîhtarî n̂ewcokekn̂e.

Katî marha tî nukmamyakn̂e yîhtarî pore,

kotoporem.

Ero wa tî xakn̂e wooxam.

39 Taa,

Xesus tarî korokarî tî n̂een̂akn̂e Parisew Xesus yerewusman̂e,

kaperî marha tî n̂een̂akn̂e.

Ero ke on wara tî kekn̂e tîhnaw,

Kweronoman̂e pîn mexe Moso Xesus.

Kweronoman̂e ro me cexitaw ketaw re noro yehtopo nîhtînorî ha re.

Kicicitho moso kica wooxam karî ha re,

kekn̂e tî Parisew tîhnaw.

40 Ero yinhîrî on wara tî kekn̂e Xesus cerewusman̂e ya,

Simaw,

kîmtapowasî cma re awakro,

kekn̂e tî yîwya.

Taa,

kasko ha Apa,

kekn̂e tî noro Xesus ya.

41 On warai takî tî n̂ekatîmyakn̂e Xesus yîwya,

Pahxa xakn̂e tupurantayem.

Noro yakro tî nîmtapowatken̂e poyino komo asakî,

puranta xe cehtopo komo poko nîmtapowatken̂e.

Tîramansom me makî tî ahsî xe xatken̂e.

Ero ke nîmyakn̂e yîwya so.

Anarî ya tî nîmyakn̂e mer̂pono pîn,

500 exepeyu.

Anarî ya tî nîmyakn̂e asakî mak.

50 exepeyu makî tî nîmyakn̂e noro ya hara.

Yîramancoko hara men owya amn̂e,

kekn̂e yîwya so.

42 Pahkî exiche tak yîramanpîra rma tî xatken̂e puranta exihtorî ke thakwa yîhyaw so.

Ero ke on wara takî tî kekn̂e puranta tîmn̂enho yîwya so,

Taa,

n̂expe mak.

Opurantantho yîramantopo ponarora tak wasî,

kekn̂e tî yîwya so,

asakno rorono ya rma.

Ero ke on wara tak wîîkes awya Simaw,

twakren̂enhîrî komo xe nat ham puranta yahsîn̂enho komo.

Opurantantho tîmcoko xa hara men owya,

kahra exirî ke yiixe nat ham.

Onoke warai xa katî twakren̂enhîrî xe xa nai anarî yopo awya?

kekn̂e tî Xesus yîwya.

43 Nnn,

kekn̂e takî tî Simaw.

Mer̂pono pîn yepethîkan̂enho ha na.

Noro xa twakren̂enhîrî xe xa nas owya mer̂pono pîn yîhcamnorî ke cepethîkachonhîrî,

kekn̂e tî Simaw.

Nhnk,

kekn̂e takî tî Xesus yîwya,

yaaro mîhtînopu ham,

kekn̂e tî yîwya.

44 Ero yinhîrî wooxam wece takî tî n̂een̂akn̂e hara Xesus.

Simaw yakro rma tko tî nîmtapowakn̂e noro poko.

On wara wîîkes awya Simaw,

kekn̂e tî,

amîn yaka oyewomyataw,

tuuna yenpora meexi ohtarî korokacho.

Moso reha ohtarî koroka cewyokrî ke rma okre,

tîhpoci ke rma tak nuturpamnoyakn̂e.

45 Ow ewcokara ro mak meexi amoro.

Moso reha ohtarî n̂ewcokesî emapona yîtîtmamra.

Amîn yaka oyewomuche rma kesî.

46 Ohkapera ro mak meexi amoro.

Moso reha ohtarî kapew kotoporem ke okre.

47 Ero ke on wara wîîkes awya Simaw,

mer̂pora rma re nasî kicicme moso yehtoponho.

Wîhcamnopu tko ero wa ehtoponhîrî ooxe ro mak exirî ke.

On wara tko naxe anarî komo,

asakî mak nai kicicme ehtoponhîrî komo tîhcamnosom.

Noro yipu komo yehtoponho rma wîhcamnoyasî.

Ero ke ooxatî me xa tko exihra naxe,

kekn̂e tî Xesus Simaw ya.

48 Ero yinhîrî tak wooxam ya makîrha takî tî kekn̂e hara Xesus.

Okopuci,

kicicme awehtoponhîrî tak wîhcamnoyasî,

kekn̂e tî yîwya.

49 Ero wa kacho yentache takî n̂eserepoketken̂e takî tî eseresmayem komo.

Onoke Moso hara kopi kehtoponhîrî komo yîhcamnon̂e ha tî re tîwya,

ketken̂e tî n̂examro re mak.

50 Ero yinhîrî wooxam ya takî tî kekn̂e hara Xesus.

Takir̂wamaxi tak mas okre.

Opona enîrî ke mak awya takir̂wamaxi tak mas ha.

Ero ke cerepore tak etok hara,

kekn̂e tî.

Ero wa tî kekn̂e Xesus wooxam ya.