Taa,

ero yinhîrî tak mîn hak pona takî tî cekn̂e Xesus,

ewto mko pona.

Ewto imo pona so tî cekn̂e,

ewtoci pona so marha.

Ewto po so cexitaw panatanmekno tî n̂iir̂akn̂e roro.

Pahnoke tak nasî kayaritomo me xa Kaan yesenpotopo okre,

kekn̂e marha tî iitono komo ya.

Ero wa tî kekn̂e roro ewto po cexitaw.

12 komo marha tî cetken̂e Xesus yakro.

2 Wooxam komo marha tî cetken̂e Xesus wenari.

Worokyam ken̂arînhîrî,

ceper̂ayemînhîrî,

ero warainhîrî komo tî mîkyam xatken̂e wooxam komo.

Xesus nakir̂wamatho komo tî mîkyam.

Maria Matarena tî xakn̂e anarî yosotî.

7 worokyam ken̂arînho tî mîk xakn̂e.

3 Xoana tî xakn̂e anarî yosotî.

Kusa pici tî mîk xakn̂e.

Eroces yanton tî mîk xakn̂e Kusa.

Taa,

anarî tî xakn̂e hara wooxam,

Susana tî osotî.

Anarî komo marha tî cetken̂e Xesus yakro wooxam komo yaake ha.

Xesus komo nahrî tî naponukyatken̂e n̂examro tupurantan komo pona rma.

Ero wa tî xatken̂e wooxam komo Xesus yakro tîtosom komo.

4 Taa,

ero yimaw tak tooto komo takî tî mokyatken̂e Xesus yaka mer̂pono pîn.

Mîn hak pono komo tî mîkyam mokyatken̂e.

Esenmetîkache so tak n̂examro takî tî panatanmekyakn̂e Xesus.

Anarî pokono warai n̂ekatîmyakn̂e.

5 On wara tî kekn̂e yîwya so,

Pahxa tooto cekn̂e mararî pona tînatîrî ciiso.

Yathîrî makî tî pahyakn̂e,

puh sararara.

Ero wa tînatîrî n̂iir̂akn̂e.

Ero wa pahyataw anarî n̂epahyakn̂e esama porero.

Esama yakumyaw exirî ke n̂etapikyakn̂e okwe.

Torowo marha tak mokyakn̂e ahso okwe.

6 Toh pona tak n̂epahyakn̂e anarî hara yathîrî.

Ero yatîhtache tak yohno rma nawaiyakn̂e hara okwe turpe exirî ke thakwa iito.

7 Cekyekyem cheka tak n̂epahyakn̂e anarî hara yathîrî.

Ero tak natîkwakn̂e cik ha re cekyekyem chew mak okwe.

Naatî pen tak n̂ipin̂oyakn̂e cekyekyem okwe.

8 Ewtî mexan pona tak n̂epahyakn̂e anarî hara yathîrî.

Ero tak natîkwakn̂e kir̂wan̂he.

100 me n̂eperwakn̂e okre.

Ero men entacoko entan̂e me awexitaw so,

kekn̂e marha tî.

Ero wa tî kekn̂e Xesus mohxapu komo ya.

9 Ero yinhîrî on wara tî ketken̂e Xesus npanatanmekrî komo yîwya,

Apa,

ahce pokono mîn mînto mekatmo ero?

Ero poko cma re amna mîhcamhokesî,

ketken̂e tî yîwya.

10 Taa,

kekn̂e tî Xesus,

on warai pokono mîn,

Kaanî rma awakrexe so amyamro reha,

kayaritomo me cehtopo yîhtînomexpotopo ke awakrexe so.

Pîra reha nasî anarî komo ya.

N̂ekatîmyasî rma re yîwya so anarî pokono wara mak on wara ehtome so,

enîn̂e me rma re naxe enîn̂e pîn me rma ha tko.

Entan̂e me marha re naxe yuhnaw entan̂e pîn me mak okwe.

Ero wara ehtome so anarî pokono wara wekatîmyasî yîwya so.

11 On wara kacho mîn,

wekatmo awya so ero,

Kaanî mtapotarî pokono rma mîn,

naatî yatho,

kacho.

12 On wara naxe Kaanî mtapotarî yentan̂e anarî komo,

esama porerono wara naxe.

N̂encexe rma re noro yipu komo.

Entache rma yohno mokyasi Ciabu.

Yîropotai so tak nowyasî ewetîra ehtome so,

etakîr̂wamara marha ehtome so okwe.

Ero wa naxe noro yipu komo.

13 Toh ken̂arî pono wara tak naxe anarî kom hara.

Kaanî mtapotarî n̂encexe,

nahwowaxe rma ka ero poko okre.

Yicimnî wara tko naxe okwe.

Ero ke cesemetanmekyataw so tak Kaan pona enîhkan̂e me naxe hara okwe.

14 Anarî komo tak n̂encexe hara.

Cekyekyem cheka pahxapu wara reha nasî yîn̂entathîrî komo hara.

N̂encexe rma re Kaanî mtapotarî.

Amn̂e tak roowo po cehtopo ro poko mak naxe.

Cemyawno komo ponaro mak tak n̂ehtîkexe okwe.

Puranta xe marha n̂ehtîkexe.

Cesewakomacho komo ponaro marha n̂ehtîkexe okwe.

Ero ke tak yipin̂oxapu wara mak nasî okwe yîn̂entathîrî.

Cepetaxmu warai me ciki re nas ha re cemaxkunkaxmu warai me mak ha tko okwe.

Ero wa naxe noro yipu kom hara.

15 Anarî komo marha n̂encexe hara.

Ewtî mexan pona pahxapu wara tak nasî yîn̂entathîrî kom hara.

Kir̂wan̂he nasî noro yipu komo ropotarî,

kemîknon̂e pîn me mak naxe.

Entaxapu ponaro marha naxe miya roro ahwokan me.

Ero ke cepetaxmu wara tak naxe okre,

kekn̂e tî Xesus.

Ero wa tî kekn̂e tînpanatanmekrî komo ya.

16 Taa,

ero wa kache tak anarî pokono wa takî tî nîmtapowakn̂e xa hara Xesus yîn̂entarî komo me.

On wara tî kekn̂e,

Ahce wa matu weeyu potuhtoche awya so?

Tahrem ke katî mahruyat ha?

Pîra ro mak.

Kama makataka katî miir̂atu?

Pîra marha.

Aponî ro pona mak miir̂axe mîîmo yaka cewomsom komo weyuru me okre.

17 Ero wa xa marha nasî ahnoro awehtoponhîrî komo amn̂e.

Ekatîmnînhîrî tak n̂esekatîmtîkesî,

eyamxapunhîrî marha tak n̂esenpesî kir̂wantaw.

18 Ero ke takîhso men entacoko omtapotarî.

Ero wa entan̂e me awexitaw so n̂entamexpetîkesî n̂he tak Kaan awya so.

Takîhso entan̂e pîn me awexitaw so reha takîhso entan̂e pîn me xa tak awitîkexe so Kaan okwe,

kekn̂e tî Xesus.

Ero wa tî kekn̂e tînpanatanmekrî komo ya.

19 Taa,

ero yinhîrî tak Xesus yon takî tî mokyakn̂e Noro yenso.

Akno komo marha tî mokyatken̂e tîson komo yakro.

Xesus yaka xa tko tî tohra thakwa xatken̂e tooto pen chew exirî ke Noro mer̂pono pîn chew.

20 Ero ke Xesus ya takî tî kekn̂e iitono yîwya,

Mînto tî nai anocwan katpanaw.

Awakno komo marha tî natu iito.

Awenî xe tî natu,

kekn̂e tî yîwya.

21 Ai ha,

kekn̂e tî Xesus yîwya so.

On wara xa tko wîîkes awya so,

onocwan me rma maxe amyamro wooxam komo Kaanî mtapotarî yentan̂e me awexitaw so,

ewetîn̂e me awexitaw so marha.

Oyakno me marha maxe amyamro hara kîrkomo ero wa xa marha awexitaw so Kaanî mtapotarî poko,

kekn̂e tî.

Ero wa tî kekn̂e Xesus.

22 Taa,

ero yinhîrî anarî kaamo po tak Xesus n̂esenkayakn̂e kanawa yaka tînpanatanmekrî komo yakro.

Kaikatko eeco pona,

kekn̂e tî Xesus yîwya so.

Ero ke takî tî cetken̂e kanawa yaw.

23 Cetaw so takî tî Xesus nîwînîkyakn̂e.

Amn̂e takî tî nocowonakn̂e kar̂pe ro mak.

Tuuna pen taki tî n̂ekahximekn̂e ro mak.

Kanawa pen tî n̂etarîcekn̂e enorirî komo yaro okwe.

24 Ero ke Xesus takî tî n̂enpaketken̂e yînpanatanmekrî komo.

Apa,

Apa,

cenor̂as okwe,

ketken̂e tî yîwya.

Ero ke piiri takî tî nawomyakn̂e Xesus.

N̂eexi tak ha,

atîtmamko tak ha,

kekn̂e takî tî ocowo ya,

tuuna ya marha.

Ero ke tî nîtîtîn̂ekn̂e tak.

Tîtpe ro mak takî tî xakn̂e okre.

25 On wara takî tî kekn̂e Xesus tînpanatanmekrî komo ya.

Ahce kacho opona enîhra mat hara okwe?

kekn̂e tî.

Kopi,

ketken̂e takî tî yînpanatanmekrî komo.

Onoke xa Moso hara?

Ocowo nîtîtîresî tîmtapotarî ke mak kopi,

tuuna marha nîtîtîresî.

Yîmtapotarî n̂ewehca ham,

ketken̂e tî n̂examro.

N̂eserepoketken̂e xa takî tî Xesus poko.

Ero wa tî xatken̂e.

26 Ero yinhîrî tak eeco pona takî tî nawomyatken̂e.

Iito xatken̂e Katarenu komo.

Karireia rowon yemtacho me rma nasî n̂examro rowon.

Ero pona tî nawomyakn̂e Xesus.

27 Xesus yawomyataw rma ka worokyam ken̂arî takî tî mokyakn̂e yîhyaka,

ewto pono komo poyino ha.

Pahxa rma tî noro xakn̂e worokyam ken̂e.

Ero ke ponomra ro makî tî n̂etar̂akn̂e.

Mîîmo yawhra makî tî n̂enmayakn̂e.

Yocho yewtatho yaw makî tî n̂enmayakn̂e kopi.

Ero wa tî xakn̂e.

28 Xesus yeen̂ataw tak worokyam ken̂arî tî n̂emtarakekn̂e.

N̂esewnapekn̂e takî tî Xesus yamrinaka.

On wara tî kekn̂e Xesus ya,

Ahce kacho mîmoko ohyaka?

Xesus Amoro,

Kaan Mumuru xa,

Kyopono ro Mumuru.

Owî cma re emetanmekîra masî,

kekn̂e tî Xesus ya.

Kar̂pe tî kekn̂e.

29 Pahxa nhe tî ka on wara kekn̂e Xesus,

Kicicitho amoro worokyam,

epatakakî kr̂a tak yîropotai,

kekn̂e tî.

On wara tî xakn̂e yiiken̂arî pen,

emapona tî nahsîyakn̂e worokyam.

Kar̂pe ro mak noro n̂iir̂akn̂e.

Napomiyatken̂e cma tî re iitono komo emapona.

Kuripara ke n̂emeknumiyatken̂e marha tî,

nîhraknumiyatken̂e marha tî.

Porisia komo marha tî nantometken̂e noro yenîrî poko.

Pîra ro makî tî okwe.

Cimicithîrî makî tî nawocekn̂e okyo.

Anarimaw so tî noro pen naar̂akn̂e worokyam pohnîntaka ro mak okwe.

Ero wa tî xakn̂e worokyam ken̂arî.

30 On wara takî tî kekn̂e Xesus noro ya,

Onoke awosot ha?

kekn̂e tî yîwya.

Rexiaw ow ha,

kekn̂e tî.

Ero wa tî xakn̂e noro yosotî mer̂pora exirî ke worokyam yîropotaw.

31 Ero yinhîrî on wara takî tî ketken̂e worokyam komo Xesus ya.

Amna cma re en̂epera masî ewtarî imo yaka,

ketken̂e tî yîwya.

Ero wa tî ketken̂e.

32 Ero yimaw iito rma tî xatken̂e kuuxi komo îh po.

Tînahrî tî nahyakn̂e iito.

Amna cma re men̂epesî kuuxi ropotaka mak,

ketken̂e tî worokyam Xesus ya.

Taa,

iina etocoko,

kekn̂e tî Xesus yîwya so.

33 Ero ke tooto ropotai takî tî n̂epataketken̂e worokyam komo.

Kuuxi ropotaka takî tî n̂ewomyatken̂e hara.

Ero yimaw rma n̂emerketken̂e takî tî kuuxi pen okyo mer̂pono pîn.

Puhyaka tî cetken̂e kar̂pe ro mak.

Yukwaka roro tî cetken̂e kopi.

Komomomomomo ketken̂e tî,

n̂enor̂atken̂e thakwa tî kuuxi pen okwe.

34 Ero yipu yenîche tak kuuxi yenîn̂enho komo takî tî n̂emahciyatken̂e.

Tîn̂enîthîrî komo tî n̂ekatîmyatken̂e ewto pono komo ya,

yîmkaino pono komo ya marha.

35 Ero ke enso takî tî mokyatken̂e entan̂enhîrî komo.

Xesus yaka tî mokyatken̂e.

Iito takî tî n̂een̂atken̂e worokyam ken̂arînho.

Xesus yamrinaw tî xakn̂e ceremaxi.

Tponoye takî tî xakn̂e.

Takîhso marha tî nîmtapowakn̂e.

Noro yenîche tak n̂eraswatken̂e takî tî enso mohxapu komo.

36 Iito rma tî xatken̂e worokyam yen̂epetoponho yenîn̂enho komo.

N̂examro marha tî n̂ekatîmyatken̂e tîn̂enîthîrî komo mohxapu komo ya.

Ero wa noro nakir̂wama Xesus,

ketken̂e tî yîwya so.

37 Mer̂pono pîn tî mîkyam xatkn̂e Katarenu rowon pono komo.

N̂eraswatken̂e ro mak tî n̂examro.

Ero ke Xesus ya tî ketken̂e,

Amna yai cma re mîîcesî,

ketken̂e tî yîwya.

Ahnoro tî ero wa ketken̂e.

Ero ke kanawa yaka takî tî n̂esenkayakn̂e hara Xesus.

Eeco pona takî tî n̂etîramekn̂e hara.

38 Xesus yesenketaw takî tî worokyam ken̂arînho kekn̂e yîwya.

Awakro cma re kmokyasî,

kekn̂e tî.

Pîra,

awarî xera wasî,

kekn̂e tko tî Xesus yîwya.

39 On wara marha tî kekn̂e yîwya,

Ayanan komo yaka xa matko etok hara.

Awakir̂wamachonhîrî ekatîmko yîwya so.

Akir̂wamanînhîrî cma re ow.

Noro yipu rma oyakir̂wama Kaan okre,

kasko yîwya so,

kekn̂e tî Xesus yîwya.

Ero ke takî tî cekn̂e noro worokyam ken̂arînho.

Takir̂wamachonhîrî tî n̂ekatîmyakn̂e ewto pono komo ya ahnoro.

Akir̂wamanînhîrî cma re ow.

Noro yipu rma oyakir̂wamai Xesus,

kekn̂e tî yîwya so.

Ero wa tî xakn̂e noro.

40 Taa,

Karireia pono komo tî xatken̂e Xesus yetîramacho ponaro.

Ero ke momohso tî cetken̂e ecihtaka,

mer̂pono pîn komo.

Tawake takî tî xatken̂e tîcheka so mokrî ke hara.

41 Taa,

ero yimaw tak iitono takî tî mokyakn̂e Xesus yaka,

Xutew komo yenmekn̂e.

Xairu tî xakn̂e noro yosotî.

Xesus yaka tmokuche noro yamrinaka takî tî n̂esewnapekn̂e.

Xesus poko tî n̂ehsamekn̂e.

Omîn yaka cma re mîmokyasî,

kekn̂e tî yîwya.

42 Cewn̂e makî tî xakn̂e noro yemsîrî.

12 cimn̂ipu tî xakn̂e noro yewrutoponho ciki.

Namotoyakn̂e takî tî noro okwe.

Waiporo thakwa tî xakn̂e okwe.

Ero ke Xairu yakro takî tî cekn̂e Xesus.

Tooto pen marha tî cetken̂e Xesus yakro mer̂pono pîn.

Xesus makî tî wamcetken̂e.

Ero wa tî xatken̂e.

43 Taa,

ero wa cetaw so iito marha tî xakn̂e wooxam hara.

Kar̂pera tî xakn̂e noro hara.

Kamxukwakn̂e tî pahkî ro mak,

12 cimn̂ipu okwe.

N̂esehcemapekn̂e rma tî re kehceman̂e komo ya.

Tupurantanthîrî tî nîmtîkekn̂e kehceman̂e komo ya cehcemacho yepetho ha re.

N̂ehn̂etken̂e makî tko tî kehceman̂e komo noro yakir̂wamacho poko.

44 Noro takî tî mokyakn̂e Xesus mkai.

Noro ponon perî takî tî napeyakn̂e,

see kekn̂e tî.

Tîî,

nîtîtmamyakn̂e takî tî kamxutachonhîrî ero yimaw rma.

45 Ero ke Xesus takî tî kekn̂e.

Onoke oyapew ha?

kekn̂e tî.

Pîra,

ow pîn,

ketken̂e takî tî yîmîtwono komo ahnoro.

Ero ke on wara takî tî ketken̂e Petru komo,

Apa,

aapo mak mexe cexe tooto komo,

awerewnukyaxe ro makî.

Ahce kacho,

Onoke oyapew,

mîîke hara?

ketken̂e tî yîwya.

46 Pîra,

oyapew ha anarî mak achewno komo.

Tomo kar̂pe oyehtopo,

kekn̂e tî.

47 Iito rma xakn̂e wooxam.

On wara tî kekn̂e,

Ohtînopu ham kopi,

kekn̂e tî.

Ero ke takî tî mokyakn̂e Xesus yaka hara.

Tatan̂e tî mokyakn̂e.

Xesus yamrinaka takî tî n̂esewnapekn̂e.

Yîwya takî tî n̂esekatîmyakn̂e akro tîtosom komo n̂entarî me rma.

Apa,

oyakir̂waman̂e me kîhtînopu.

Ero ke aponon wapew.

Yohno rma tak kir̂wan̂he weexi aponon yapeche rma,

kekn̂e tî.

48 Taa,

kekn̂e takî tî Xesus,

tahwore rma esko okopuci.

Opona enîrî ke awya kir̂wan̂he tak masî.

Eserepokara rma etok hara,

kekn̂e tî.

Ero wa tî kekn̂e Xesus wooxam ya.

49 Taa,

ero wa ketaw rma Xutew yenmekn̂e yawno takî tî mokyakn̂e.

On wara tî kekn̂e Xairu ya,

Waipo tak okwe awemsîthîrî ha.

Ero ke Apapa ewrucpera tak esko amîn yaka mohtopo poko,

kekn̂e tî yîwya.

50 Yîmtapotarî tko tî n̂encekn̂e Xesus.

Ero ke Xairu ya tî kekn̂e on wara,

Esekatkara ro mak esko.

Opona xa rma enko awemsîrî yetakir̂wamachome rma ha,

kekn̂e tî yîwya.

51 Ero ke tî cekn̂e rma Xesus.

Xairu mîn yaka takî tî n̂ewomyakn̂e.

Taixa makî tî akro n̂ewomyatken̂e,

Petru,

Xuaw,

Ciaku,

rikomo yîîmînho,

yîsonînhîrî,

ero wa mak.

Anarî komo tî porohkekn̂e,

Ewomra ehcoko,

kekn̂e tî yîwya so.

52 Mîîmo yaw rma tî xatken̂e tîwrataxmu komo.

Waipo cik okwe,

waipo cik okwe,

ketken̂e tî.

On wara tko tî kekn̂e Xesus yîwya so,

Yîwratara tak ehcoko.

Waipîra rma cik nasî.

Nîwînîkyasî mak,

kekn̂e tî yîwya so.

53 Ero ke n̂ewretken̂e hara tî iitono komo Xesus poko.

Twaihso rma mexe nasî,

ketken̂e tîropotaw so.

54 N̂examro tko tî n̂en̂epekn̂e Xesus mîîmo yai.

Toche so waixa pen yamorî takî tî nahsîyakn̂e Xesus.

Okopuci,

awomko tak ha,

kekn̂e tî yîwya.

55 Ero ke noro yekatîtho takî tî n̂ewomyakn̂e hara yîropotaka.

Ero ke yohno rma takî tî nîhcekn̂e,

nawomyakn̂e marha piiri.

Taa,

moso tak yînahmacoko,

kekn̂e tî Xesus yîwya so.

56 Cemsîrî pakarî ke n̂eserepoketken̂e xa takî tî yîîm,

yîson kom ha.

On wara tko tî kekn̂e Xesus yîwya so,

Awemsîrî yenpakachonho ekatîmra ro mak men ehcoko,

kekn̂e tî yîwya so.

Ero wa tî kekn̂e Xesus yîwya so.