Taa,

ero yinhîrî takî 12 komo takî tî nan̂ikyakn̂e Xesus tînpanatanmekrî komo.

On wara tî kekn̂e yîwya so,

yukurumîkno me tak kiir̂axe so worokyam yopono me.

Tamotosom komo yakir̂waman̂e me marha tak kiir̂axe so.

2 Mîk hakî chere ro etocoko.

On wara kacoko yîwya so,

Pahnoke tak men nasî kayaritomo me xa Kaan yesenpotopo ha,

kacoko.

Okoh komo marha akirwamacoko,

kekn̂e tî yîwya so.

3 On wara marha kekn̂e yîwya so,

Awcetaw so tak awemyawno komo arîhra ehcoko.

Awamoyin komo marha arîhra ehcoko,

akumixin komo marha,

awru komo marha,

apurantan komo marha,

ero warai komo arîhra ehcoko.

Aponon komo rma aacoko cewn̂e mak ha tko.

Asakî arîhra ehcoko.

4 On wara ehcoko ewto pona awepatakache so,

iitono komo awetarî komo yenpetaw noro yaw makî ka enmacoko.

En̂exa tak etocoko hara ewto poi awcetaw so hara.

5 Anarî ewto pona awtoche so hara awetarî komo yenpora na natu okwe.

Ero wa exitaw so tak etocoko hara n̂examro yewton poi hara.

Awcetaw so tak ehtapupunkacoko iitono komo wece.

Kicicme men maxe okwe,

kacho me rma ero wa mehtapupunkexe,

kekn̂e tî.

Ero wa tî kekn̂e Xesus 12 komo ya.

6 Ero ke cetken̂e takî tî 12 komo ewto pore so,

mîn hak pore.

Iitono komo ya tî Kaanî mtapotarî n̂ekatîmyatken̂e roro,

Noro ya kakir̂wamacho kom ha.

Okoh komo marha tî nakir̂wametken̂e.

Ero wa tî xatken̂e 12 komo.

7 Taa,

ero yimaw tak kayaritomo takî tî n̂encekn̂e Xesus yekaci,

Eroces ha.

Mîn hak poko Xesus yehtoponho tî n̂encekn̂e.

Ero ke tî n̂eserepokekn̂e.

Onok mîk hara ero wa ciino rin̂e ha?

kekn̂e tî.

On wara kacho marha tî n̂encekn̂e,

Xuaw mîk ham,

pakai haram kopi,

kacho tî n̂encekn̂e anarî komo mtapotarî.

8 Anarî me tî nîhtînoyatken̂e anarî komo reha.

Erias xa tko mîk owya,

noro n̂esenpo hara mî,

ketken̂e tî n̂examro reha.

Anarî komo xa hara tî ketken̂e anarme hara.

Kweronoman̂e penî tko Mîk owya.

Pakai hara owya,

ketken̂e tî n̂examro reha.

Ero ke yîmtapotarî komo yentarî ke n̂eserepokekn̂e tî Eroces.

9 Apohana,

kekn̂e tî Eroces.

Xuaw pen wîpîmkotopoi Onoke xa Mîk hara?

Oyeserepokacho me wencesî Noro yehtopo,

kekn̂e tî.

Ero ke Xesus yenî xe takî tî xakn̂e.

Ero wa tî xakn̂e Eroces.

10 Taa,

ero yinhîrî Xesus yaka takî tî n̂etîrametken̂e hara yînantomathîrî komo.

Tîtotoponhîrî komo tî n̂ekatîmyatken̂e yîwya.

Esekatîmtoponhîrî komo yentache tak 12 komo takî tî naar̂akn̂e Xesus miya pohnîntaka.

Becsaita mkai tî xakn̂e woskara.

Iina tî naar̂akn̂e,

tootonaka cma re.

11 Totopo komo rma tko tî n̂encetken̂e iitono komo.

Ero ke mer̂pono pîn komo takî tî cetken̂e wenari so.

N̂examro yenîche,

tawake rma tî xakn̂e Xesus poko so.

Taa,

amohcoko ha,

kekn̂e rma tî yîwya so.

Mokuche so Kaan maywen me kehtopo poko panatanmekno n̂iir̂akn̂e hara.

Tamotosom komo marha tî nakir̂wamekn̂e.

12 Taa,

kokon̂i xa tak Xesus yaka tî cetken̂e 12 komo.

On wara tî ketken̂e yîwya,

Apa,

en̂epeno tak cirko ewto pona totohme so hara,

cewyarono komo yaka marha totohme so.

Cetakritopo yeporî xe tak na natu,

tînahrî komo marha.

Pohnîntaw xa thakwa taxe tan okwe,

ketken̂e tî Xesus ya.

13 Anarî me tko tî kekn̂e Xesus yîwya so.

Amyamro rma yînahmacoko,

kekn̂e tî.

Okyo,

ketken̂e tî 12 komo yîwya.

5 mak nas amna yaw okwe cuure.

2 mak nasî ot hara.

Ero wicakî mak nasî erewsî amna yaw okwe.

Amna katî cee moxam nahrî yaponso ha?

ketken̂e yîwya.

14 Mer̂pono pînî ro makî tî mîkyam xatken̂e Xesus yenso mohxapu komo.

5.000 tî xakn̂e kîrkomo kuknomacho mak.

On wara makî tî n̂examro n̂eyukyakn̂e Xesus,

Eremanmekno tak ciicoko ha.

50 tan,

50 xa hara mînto,

ero wa so tak eremanmekno ciicoko,

kekn̂e tî yîwya so.

15 Ero ke ero wa takî tî eremanmekno n̂iir̂atken̂e.

16 Eremache so tak tî cuure tî nanîmyakn̂e Xesus,

5.

Ootî marha tî nanîmyakn̂e hara 2.

Kahsî tî n̂een̂akn̂e.

Kaan yakro tî ka nîmtapowakn̂e.

Kir̂wan tan on erewsî anmîthîrî ha Apa,

kekn̂e tî ka Kaan ya.

Ero wa kache poikekn̂e takî tî.

Ootî marha tî nukwaikekn̂e.

Tînpanatanmekrî komo ya takî tî nîmyakn̂e.

Ehe,

on tak ekamcoko,

kekn̂e tî yîwya so.

17 Ero ke takî tî n̂eseresmetken̂e iitono komo ahnoro tmaxmitaxi ro okre.

N̂etîmcekn̂e rma ha tî cuure mîtîtho,

ootî yukwaikaxaputho marha.

Ero ke takî tî kahxapu komo yaka namekyatken̂e yînpanatanmekrî komo.

12 tî xakn̂e etîmtoxapu yen.

Ero wa tî xatken̂e.

18 Taa,

morona takî tî Xesus cekn̂e,

cewyaro tî Kaan yakro nîmtapowakn̂e.

Yînpanatanmekrî komo tko tî mokyatken̂e yîhyaka.

Ero ke n̂examro yakro takî tî n̂esencekn̂e Xesus.

Onoke tî Ow tooto komo ya?

kekn̂e tî yîwya so.

19 On wara tî n̂eyukyatken̂e,

Xuaw Bacista Mîk ha owya,

kexe anarî komo apoko.

Eriasî tko na Mîk owya,

kexe reha anarî kom hara.

Kweronoman̂e pen tko na Mîk owya.

Pakai haram,

kexe reha anarî komo xa hara.

Ero wa so kexe apoko,

ketken̂e tî Xesus ya.

20 Taa,

amyamro hara,

kekn̂e takî tî Xesus yîwya so.

Onoke me reha Ow meen̂at ha?

kekn̂e tî yîwya so.

On wara tî Petru n̂eyukyakn̂e,

Kristu xa Amoro ha,

Kaan yanme mohxapu xa,

kekn̂e tî yîwya.

21 Taa,

kekn̂e takî tî Xesus yîwya so,

ero wa oyehtopo ekatîmra ro mak men ehcoko.

Pîra ro mak ha men.

22 Ero yinhîrî tak on wara kekn̂e hara yîwya so,

Amn̂e Tooto me Ewruxapu n̂esemetanmekyasî emapona.

Yiixera ro mak tak n̂ehtîkexe Xutew poritomon komo,

tîmsom pokono yenîn̂e komo marha,

Xutew panatanmetopo mewren̂e komo marha.

Ero ke tak Noro pen waihkexe.

Amn̂e tko pakes hara osorwaw ro enmapuche mak,

kekn̂e tî Xesus yîwya so.

Ero wa tî kekn̂e.

23 Ero yinhîrî takî tî on wara kekn̂e Xesus iitono komo ya ahnoro.

Owenari roro amoku xe awexitaw so yiixe awehtoponhîrî komo tak yîpînînkacoko.

Tpanaxkem marha tak anîmcoko anarîrî ro komo.

Enmar̂atîxera anîmcoko.

Ero wa awexitaw so tak oyakro amohcoko.

24 Yiixe awehtopo komo pînîn yaw mak awexitaw so mahsîpînkexe thakwa amn̂e okwe.

Yîpînînketaw reha awya so opînîn yaw awexirî ke so mak,

ahyaw so rma tak nas hara anpînînkathîrî komo rma okre.

25 Ahce wa nai tooto awya so roowo pono yahsîtîketaw ahnoro?

Tawake ma re nai noro yipu cehcamnosom me mak exitaw ekat ha?

Pîra ro mak,

tawake exihra thakwa nas okwe.

26 On wara na matu anarimaw,

mîhyapamyatu na oyakrono me awesekatîm xera so.

Omtapotarî yekatîm xera marha na matu ahyapamrî ke so okwe.

Ero wa awexitaw so Tooto me Ewruxapu makîrha tak nîhyapamyas amn̂e,

takrono me awetaci xera so nasî Noro hara okwe.

Kir̂wanî ro me tak n̂esenpesî Noro tmokyataw hara amn̂e.

Apapa wara xa marha n̂esenpesî kir̂wan me xa tak.

Ancu komo warai me marha n̂esenpesî kir̂wanî ro me.

Ero yimaw tak nîhyapamyasî Noro takrono me awetaci xera so.

27 Yaaro tan wîîkes awya so,

kayaritomo me xa tak Kaan n̂esenpesî amn̂e.

Ero wa Noro yesenpotopo rma meenaxe tan ececetoxapu komo rma,

anarî komo mak.

Waipîra awexitaw so rma meen̂axe,

kekn̂e tî.

Ero wa tî kekn̂e Xesus yîwya so.

28 Taa,

ero wa exiche tak,

8 ro enmapuche tak tînpanatanmekrî komo takî tî naar̂akn̂e Xesus îh pona.

Kaan yakro yîmtapotaxi tî cekn̂e.

Taixa makî tî naar̂akn̂e iina,

Petru,

Xuaw,

Ciaku,

n̂examro makî tî naar̂akn̂e îh pona.

29 Kaan yakro yîmtapowataw tak anarme ro mak tak tî n̂ehtîkekn̂e Xesus yeepatarî.

Ero wa xa marha tî xakn̂e Noro ponon hara,

tîroromutwe ro mak xakn̂e oco.

30 Ero wa exitaw anarî komo takî tî n̂esenpetken̂e hara,

2 tî n̂esenpetken̂e,

Moises,

Erias,

ero wara.

Xesus yakro tî nîmtapowatken̂e.

31 Tîroromutwe marha tî xatken̂e n̂examro hara Moises kom hara.

Xesus yakro tî nîmtapowatken̂e Noro waihtopo poko.

Xerusaren po kwaihyas amn̂e,

kekn̂e tî Xesus yîwya so.

Ero poko tî nîmtapowatken̂e.

32 Wînîkno ken̂e ro makî tko tî ka xatken̂e Petru komo.

Amn̂e takî tî paketîketken̂e hara.

Ero yimaw takî tî tîroromutwe ro mak Xesus n̂een̂atken̂e oco.

Noro yakro tîmtapotaxmu komo marha tî n̂een̂atken̂e.

Ero wa tî n̂een̂atken̂e.

33 Amn̂e takî tî Moises komo cetken̂e Xesus yai.

Cetaw so on wara takî tî kekn̂e Petru Xesus ya,

Ai Apa,

keken mexe xa nasî tan okre.

Ero ke mîîmo cma re amna n̂iir̂as osorwaw.

Amîn,

Moises mîn,

Erias mîn,

ero wa cma re amna n̂iir̂asî amîn komo,

kekn̂e tî.

Camkî makî tî nîmtapowakn̂e Petru.

34 Ero wa ketaw rma kaweresî takî tî n̂etakîcekn̂e.

N̂examro takî tî nahruyakn̂e.

N̂eraswatken̂e takî tî Petru komo kaweresî ke tahru so cexitaw so.

35 Ero yimaw takî tî kaweresî chewno mtapotarî n̂esencekn̂e.

On wara tî kekn̂e,

Omumuru ro xa cik Moso okwe.

Entacoko men yîmtapotarî ha,

kekn̂e tî.

Ero wa kacho tî n̂esencekn̂e kaweresî chewno mtapotarî.

36 Yîtîtmamche tak Xesus mak takî tî xakn̂e iito cewn̂e.

Ero wa tî xakn̂e Xesus.

Ero wa tîn̂enthîrî komo yekatîmra ro makî tî ka xatken̂e Petru komo.

Ero wa tî xatken̂e.

37 Taa,

enmapuche tak îîpî takî tî n̂enîhcetken̂e Xesus komo.

Ero yimaw tak tooto komo xa hara tî mokyatken̂e Xesus yaka mer̂pono pîn komo xa hara.

38 Mokuche so on wara tî kekn̂e anarî,

yîchewno komo rma,

Apa,

omumuru cma re meen̂asî.

Noro cik mak moso omxîkrî,

anarî exihra.

39 Worokyam nahsîyas okwe.

Ahsîche tîhra rma tak n̂emtarakesî kopi.

Nîrohnonmekyasî meero okwe.

Ero ke tak nîmtawakronwasî marha.

Amn̂e tak n̂etowyasî,

cehnaxi mak ha tko.

Moso n̂erepes oko ero wa cetaw.

Ero wa omxîkîtho pen n̂iir̂as okwe worokyam.

40 Anpanatanmekrî komo ya re wîîka.

Worokyamu cma re men̂epexe omxîkrî ropotai,

wîîka cma re yîwya so.

Pîra ham okwe,

tohra n̂eexi anme so,

kekn̂e tî yîîm Xesus ya.

41 Ahce okwe,

kekn̂e takî tî Xesus.

Kaan pona enîn̂e pîn mak amyamro ham okwe,

Noro yewetîn̂e pîn mak.

Atî wicakî pahkî na wai tan ero wara awehtopo komo yînîmn̂e me?

kekn̂e tî Xesus.

Ero yinhîrî rikomo yîîm ya kekn̂e hara,

Ek ha ohyaka amumuru,

kekn̂e tî yîwya.

42 Ero ke tumumuru tî n̂ekyakn̂e.

Ekyataw rma rikomo takî tî nar̂mekn̂e xa hara worokyam roowo pona oko.

Nîrohnonmekyakn̂e xa hara tî.

Ero wa exiche takî tî worokyam n̂en̂epekn̂e Xesus,

kicicitho ha.

Rikomo takî tî nakir̂wamekn̂e.

Ehe,

moso tak ha amumuru,

kekn̂e tî yîîm ya.

Ero wa tî rikomo nakîrwamekn̂e Xesus.

43 Ero yimaw enîn̂enhîrî komo takî tî n̂eserepoketken̂e xa.

Kar̂pe xa ma nai Kaan ke okyo,

ketken̂e tî.

Ero wa tî ketken̂e.

44 Taa,

ero wa Xesus poko eserepoketaw so rma on wara takî tî kekn̂e hara Noro tînpanatanmekrî komo ya,

On wara men wîîkes awya so,

Tooto me Ewruxapu nahsîpexe kayaritomo komo ya.

Ero ke ero wa kacho yentan̂e me xa men ehcoko,

kekn̂e tî Xesus yîwya so.

45 Camkî makî tko tî n̂encetken̂e ero wa kacho.

Entan̂e pîn wara ro makî tî xatken̂e okwe.

Ahce warai poko kyam wa mîîka ha?

kahra tî xatken̂e yîwya.

Nukurunanîyatken̂e mak.

Ero wa tî xatken̂e.

46 Taa,

ero yinhîrî takî Xesusu npanatanmekrî komo takî tî n̂eseseyukyatken̂e.

Apoturme so xa tko was ow amn̂e,

kekn̂e tî anarî.

Pîra,

ow xa wasî apoturme so,

kekn̂e tî anarî hara.

Ero poko tî n̂eseseyukyatken̂e kica.

47 Yîropotaw so esehtînotopo komo rma tko tî nîhtînoyakn̂e Xesus.

Ero ke rikomo takî tî nan̂ikyakn̂e.

Tpanaka takî tî n̂eremanmekyakn̂e.

48 Ero yinhîrî on wara tî kekn̂e Xesus yîwya so,

Moso yipu ponaro cexpore nasî rikomo ponaro.

Oyanme mak ponaro cexpore nasî.

Ero wa awexitaw so oponaro xa marha wa maxe hara.

Taa,

oponaro awexitaw so oyantoman̂enho ponaro xa marha maxe hara.

Awakno komo xawyakan me mak cexpore nasî rikomo wara rma.

Onoke xa nai axawyakan komo me,

noro rma tak nas amn̂e apoturu komo me,

kekn̂e tî yîwya so.

Ero wa tî kekn̂e Xesus tînpanatanmekrî komo ya.

49 Taa,

ero yinhîrî tak on wara tî kekn̂e Xuaw Xesus ya,

Apa,

mînto amna n̂enwo worokyam yen̂epen̂e.

Awosotî yanme rma tî n̂en̂epekn̂e kica.

Ero ke noro nîtwermekn̂e amna.

Ero wa kahra ro mak esko kica.

Amna yakrono pînî reha amoro,

nîîka amna yîwya,

kekn̂e tî Xuaw.

50 Pîra,

kekn̂e takî tî Xesus yîwya,

kacowpe rma noro yipu komo.

Kanwekîra exitaw so kakrono me so rma wa naxe ha,

kekn̂e tî.

Ero wa tî kekn̂e Xesus Xuaw ya.

51 Taa,

ero yinhîrî tak pahnoke takî tî xakn̂e Xesus totopo kah yaka hara.

Ero ke Xerusaren pona tîtotopo takî tî nîhtînoyakn̂e.

Ero ponaro xa takî tî xakn̂e.

52 Ero ke cekaiporen̂e komo takî tî n̂en̂epekn̂e Xesus tîywapu.

N̂examro tî cetken̂e Samaritanu komo yewton pona.

Iitono komo yakro tî nîmtapowatken̂e Xesus komo yetarî poko iito enmachome.

53 Pîra,

ketken̂e tko tî yîwya so.

Xerusaren pona mak mîîcexe kica.

Ero ke tan etakrira ro mak ehcoko,

ketken̂e tî iitono komo yîwya so.

54 Ero wa kacho yentache yînpanatanmekrî komo ya on wara tak ketken̂e Ciaku,

Xuaw komo,

Apa,

ahce wa n̂examro cirpore nai awya?

Wehto katî amna nan̂ikpe Kaan ya n̂examro waihkacho ha?

Erias pen tî nan̂ikpekn̂e ero yipu xa marha katî amna nan̂ikpe hara?

ketken̂e tî.

Ero wa ketken̂e Xesus ya.

55 N̂examro wece takî tî n̂esewkor̂mekn̂e Xesus.

On wara tî kekn̂e yîwya so,

Ero wa kahra ro mak ehcoko kica.

Camkî mak maxe okwe aropotawno komo poko rma.

Kaan Yekatî yanme cesehtînoyaxe,

mîîkexe camkî mak okwe.

56 Waihkano rin̂e me mokuhnînhîrî Tooto me Ewruxapu.

Yukurunpeno rin̂e me xa matko mokyakn̂e,

kekn̂e tî Xesus.

Ero yinhîrî anarî ewto pona takî tî cetken̂e Xesus komo.

Ero wa tî cetken̂e.

57 Taa,

esama yaw cetaw so Xesus komo noro yaka takî tî mokyakn̂e iitono.

Apa,

kekn̂e tî Xesus ya,

awakro cma re kmokyasî.

Ahna so na awcetaw kmokyasî,

kekn̂e tî yîwya.

58 Ai ha,

kekn̂e tî Xesus yîwya.

Miyan komo rma naxe tîmîye so.

Ewtarî nai rokohci wîntopo me.

Torowo komo marha n̂iir̂asî tîmîn tîwîntopo me.

Yîmîmnî ro makî tko Mîk Tooto me Ewruxapu.

Noro yetakritopo ro exihra ro mak nasî,

kekn̂e tî yîwya.

59 Ero yinhîrî anarî ya takî tî kekn̂e hara Xesus.

Oyakro amok ha,

kekn̂e tî yîwya.

Apa,

kekn̂e takî tî noro Xesus ya,

apapa waihîrî mîtwo ka wasî cokorî.

Noro waipuche mak xa kmokyas awakro,

kekn̂e tî yîwya.

60 On wara tko kekn̂e Xesus yîwya,

Waixapu komo mak n̂ehcowpe tporin komo waihîrî mîtwo.

Amoro reha etok ha kayaritomo me Kaan yehtopo yekatîmso,

kekn̂e tî yîwya.

61 Ero yinhîrî anarî xa hara tî kekn̂e Xesus ya.

On wara tî kekn̂e,

Apa,

kmokyasî cma re awakro.

Oyewton pona makî ka kîwcesî esekatîmso cokorî oyanan komo ya.

Ero yinhîrî tak kmokyas awakro,

kekn̂e tî yîwya.

62 Ai ha,

kekn̂e tî Xesus yîwya,

On wara naxe anarî komo,

tmararîyem komo,

pataw ka naar̂axe pomotopo.

Ero yinhîrî tak tîmkai so n̂een̂axe hara okwe anarî ponaro cexirî ke so.

Ero wa cehsom komo naxe Kaan maywen mera ro mak okwe,

kekn̂e tî yîwya.

Ero wa tî panatanmekno n̂iir̂akn̂e Xesus.