Taa,

ero yinhîrî tak anarî komo takî tî men̂ekekn̂e xa hara Kporin komo.

Yaake tî men̂ekekn̂e,

70.

N̂examro takî tî n̂en̂epekn̂e tîywapu.

Taknoi so tî n̂en̂epekn̂e.

On wara tî kekn̂e yîwya so,

Ewto mko pona tak kîwces amn̂e miyanî mko pona rma,

Ero ke ero mko pona ka etocoko amyamro oywapu.

2 Naatî yeperîrî wara naxe tooto komo.

Tpotpore nasî,

cenmekpore marha.

Mer̂pora ro mak naxe ero warai komo.

Asak makî tko naxe potun̂e komo okwe.

Ero ke amtapotacoko tak mararî yosom yakro.

Mer̂pora n̂he tak en̂epeko Apa,

naatî yeperîrî potun̂e komo amararîn pona,

kacoko yîwya,

kekn̂e tî Xesus yîwya so.

3 Taa,

etocoko tak amyamro.

Oper̂a xîkrî komo wara ken̂epexe so robu komo chekan wara rma oko.

4 Apurantan komo yen arîhra ehcoko.

Akumixin komo marha arîhra ehcoko.

Anarî arîhra marha ehcoko ahtarî komo.

Esama yaw awcetaw so tooto komo yîmtapotarera ehcoko.

5-6 Tooto mîn yaka awcetaw so yîwînso on wara kacoko ero yawno komo ya,

Esemetanmekîn me exi xe so wasî on yawno komo ahnoro,

kacoko.

Kaan pona ceserepotanmesom exitaw iito ero yawno komo rma Kaan n̂iir̂asî esemetanmekîn me amtapotachonhîrî komo yanme.

Kaan pona ceserepotanmesom exihra exitaw iito ahyaka so yîramancoko hara amtapotachonhîrî komo esemetanmekîn me ehtopo pokononho.

7 N̂examro yaw mak enmacoko ero po awexitaw so.

Mîk hak yaka tohra ehcoko yîwînso.

Anahrî komo yetaketaw yîwya so ero rma ahcoko.

Ero wa xa marha awokru komo yetaketaw yîwya so eecoko hara.

Awepethîrî komo cik mîn.

Kaanî mtapotarî poko mekaricexe.

Ero ke cepemapore rma nasî awekaritotoponhîrî komo.

8 Anarî ewto pona so awcetaw so awentan̂e komo me na natu iitono komo.

Anahrî komo marha na n̂etaketu.

Ero wa exitaw so yîn̂etakathîrî komo ahcoko.

Ero wa roro ehcoko ahna so na awcetaw so.

9 Tamotosom komo marha akir̂wamacoko iito.

On wara marha kacoko yîwya so,

Pahnoke tak nasî kayaritomo me Kaan yesenpotopo okre,

kacoko yîwya so.

10 Taa,

anarî ewto pona awcetaw so hara amtapotarî yentara na natu iitono komo.

Anahmara so marha na natu.

Awetarî komo marha na enpora nat okwe.

Ero wa exitaw so n̂examro roron pona tak etocoko.

11 On wara kacoko iitono komo ya,

Awewton komo pupuntho n̂ickes amna tîhtarî poko etahsîxapunhîrî.

An̂enîrî komo me amna n̂ickesî,

Kicicme xa maxe okwe,

kacho me.

On wara mak kacoko amn̂e amna toche,

Kayaritomo me Kaan yehtopo cma re n̂ekatîmce n̂examro,

Noro maywen me kehtopo kom ha re okwe,

kacoko amn̂e,

kacoko iitono komo ya.

12 Yaaro tan wîîkes awya so,

Sotoma pono pen komo poko rma re nîrwonasî Kaan.

Soroso xa tak awentan̂e pînînhîrî pen komo poko nîrwonasî ro mak amn̂e ero yimaw,

kekn̂e tî.

Ero wa tî kekn̂e Xesus 70 komo ya.

13 Taa,

ero yinhîrî tak mîn hak pono komo yar̂macho takî tî n̂ekatîmyakn̂e Xesus.

On wara tî kekn̂e,

Ai,

Korasini pono komo,

on wara wîîkes awya so,

metwîrîmexe ro mak okwe.

Ero wa xa marha maxe amyamro hara Becsaita pono kom hara,

metwîrîmexe amyamro marha.

Cirihnî cirirî owya meen̂atken̂e ha re,

kar̂pe xa Kaan yesenpotopo ha.

Ero yipu ciir̂ataw ketaw ha re Ciru pono komo n̂enîrî me,

Siton pono komo n̂enîrî me marha,

pahxa rma tak re kicicme cehtoponhîrî komo poxunkacerî.

Wemronho cheka mak n̂eremacerî.

Kicicitho takî re namrucerî poonotho kicicme cehtoponhîrî komo poxunkacho ha.

Ero wa n̂ehcerî ha re ero pono komo.

14 Siton pono pen komo nar̂mesî rma re Kaan amn̂e en̂ekano ritopo yimaw.

Ciru pono komo marha nar̂mes ha re.

Amyamro reha awîrîmexe so ro mak tak okwe.

Ero wa maxe amn̂e okwe Korasini pono pen komo,

Besaita pono pen komo marha.

15 Amyamro marha Kapanaun pono kom hara,

kaw xa tak ciri xe maxe amîn komo kah yaka rorono wara okyo.

Pîra men maxe okwe.

Wehto imo ywaka xa matko awar̂mexe so Kaan amn̂e oco,

kekn̂e tî Xesus.

Ero wa tî n̂ekatîmyakn̂e ewto pono komo yîwîrîmacho.

16 Taa,

on wara tî kekn̂e xa hara Xesus 70 komo ya,

Awencexe so rma anarî komo.

Taa,

oyentacho rma moro awentacho kom ha.

Awanwekyaxe so reha anarî kom hara.

Oyanwecho rma moro awanwetopo kom ha.

Taa,

oyantoman̂enho yanwetopo rma mîn oyanwetopo hara,

kekn̂e tî.

Ero wa tî kekn̂e Xesus 70 komo ya.

17 Ero yinhîrî takî tî mokyatken̂e hara 70 komo Xesus yaka.

Tahwore tî xatken̂e.

Apa,

ketken̂e takî tî yîwya,

worokyam meero amna n̂ewehcaxe awosotî yetacirî ke amna ya,

ketken̂e tî yîwya.

Tawake tî xatken̂e.

18 Ai ha,

kekn̂e takî tî Xesus yîwya so.

Satanas yepîrkarî ween̂akn̂e.

Kar̂pe n̂epîrkekn̂e kah yai pepe kan̂e wara rma.

19 On wara marha kiir̂axe so,

okoyi na mapikyatu amn̂e,

cikiri marha na.

Awerepera so ro mak tak nai aaxatî pîn komo.

20 On wara tko wîîkes awya so,

amna mtapotarî n̂ewehcaxe worokyam okre,

kacho poko ahwotara ehcoko.

On poko xa yo ahwotacoko,

Kosotî komo nasî tmewreso kah yaw,

kacho poko xa yo ahwotacoko,

kekn̂e tî Xesus.

Ero wa tî kekn̂e 70 komo ya.

21 Taa,

ero yimaw tak tahwore xa tî xakn̂e Xesus Kaan Yekatî yanme.

Tîîm yakro takî tî nîmtapowakn̂e.

On wara tî kekn̂e yîwya,

Kah yawno komo kayaritomon Amoro Apa.

Roowo pono komo kayaritomon marha Amoro.

Tawake wasî apoko,

awehtopo yentan̂e komo men̂ekarî ke awya.

Awehtopo yenpora mîxakn̂e kyopono me cehsom komo ya,

ehcamhokaxapu komo ya marha.

Rikomo warai me cehsom komo ya makî reha menpekn̂e awehtopo.

Yaaro xa,

kir̂wan̂he mîhtînoi ero wara ciino ritopo,

kekn̂e tî Xesus Tîîm ya.

22 Ero yinhîrî takî tî on wara kekn̂e hara Xesus.

Ahce na komo yosom me oriyakn̂e Apapa miyan komo yosom me rma.

Taa,

Kaan Mumuru xa Ow ha.

Oyehtopo yenîn̂e tko exihra ro mak nasî tooto.

Apapa makî reha oyehtopo n̂een̂asî.

Apapa yehtopo yenîn̂e exihra marha nasî.

Ow mak Noro yehtopo ween̂asî,

Yumumuru ha.

Anarî komo ya marha Apapa yehtopo wenpesî,

onmen̂ekatho komo ya mak,

kekn̂e tî Xesus.

Ero wa tî kekn̂e iitono komo ya.

23 Taa,

ero yinhîrî tak tînpanatanmekrî komo wece takî tî n̂esewkor̂mekn̂e Xesus.

N̂examro yakro mak takî tî nîmtapowakn̂e anarî komo n̂entatorî me.

Amyamro cma meen̂axe cirihnî cirirî.

Awya so makî cma Kaan n̂enpesî ero yipu.

Awakrexe so mak ero yipu ke.

24 On wara wîîkes awya so,

oroto meen̂axe ero yipu yenî xe xatken̂e pahxan pen komo mer̂pono pîn komo.

Kweronoman̂e pen komo,

kayaritomo pen komo marha,

noro yipu komo xatken̂e ero yipu yenî xe.

Enîhra rma tko xatken̂e okwe.

Oroto mencexe omtapotarî ero yenta xe marha xatken̂e.

Entara marha xatken̂e okwe,

kekn̂e tî.

Ero wa tî kekn̂e Xesus tînpanatanmekrî komo ya.

25 Taa,

ero yinhîrî takî tî iito xakn̂e Moises pen nmewretho pokono.

Noro takî tî nawomyakn̂e piiri.

Xesus yakro tî n̂esencekn̂e.

Nukukmekn̂e mak,

Ahce wa kyam oyeyukya?

kachome mak.

On wara tî kekn̂e yîwya,

Apa,

ahce wa xa wai waipîn me tak oyehtome?

kekn̂e tî Xesus ya.

26 On wara tî Xesus n̂eyukyakn̂e,

Ahce wa tko nîîke apanatanmetopo komo ero yipu poko?

Ero rma na meen̂a amoro,

kekn̂e tî Xesus yîwya.

27 On wara kesî,

kekn̂e tî noro,

Aporin komo Kaan xe ehcoko,

yaaro xa yiixe ehcoko.

Tîpîn̂e marha encoko.

Cekaritosom wara ro mak ehcoko Noro xe awehtopo komo poko.

Noro ponaro marha ehcoko,

anarî ponarora.

Taa,

apoyino komo xe marha ehcoko.

Etîxe rma maxe ero wa xa marha yiixe so ehcoko,

kacho ween̂asî,

kekn̂e tî Xesus ya.

28 Yaaro mîîke ham,

kekn̂e tî Xesus yîwya.

Ero ewetko waipîn me tak awehtome,

kekn̂e tî yîwya.

29 On wara tko tî xakn̂e kpanatanmetopo pokono ro,

kir̂wan me tî cesenpo xe xakn̂e.

Ero ke on wara tî kekn̂e hara Xesus ya,

Onoke warai komo xa natu opoyino me ha?

kekn̂e tî yîwya.

30 Ero ke on wara tî kekn̂e Xesus yîwya,

Pahxa Xerusaren pono cekn̂e esama yaw.

Xer̂ko pona tîto xe xakn̂e.

Esama yaw rma ka cetaw noro pen tak nahsîyatken̂e cen̂epan̂em komo.

Ahsîche pononthîrî mohketken̂e,

n̂etapetken̂e tak oko.

Etapache tak cetken̂e hara yîhyai.

Iito rma thakwa xakn̂e yîn̂etapathîrî komo waiporo okwe.

31 Amn̂e n̂he tak iituxa xa marha cekn̂e Kaan ya tîmsom pokono.

Etapaxapu pen tak n̂een̂akn̂e.

Yîtîtmamra tko tî xakn̂e,

mamrikyakn̂e mak okwe.

32 Amn̂e tak cekn̂e anarî hara.

Repita tî mîk xakn̂e.

Iituxari tîcetaw noro marha etapaxapu n̂een̂akn̂e.

Yîtîtmamra marha xakn̂e noro hara,

mamrikyakn̂e marha tî okwe.

33 Amn̂e n̂he tak cekn̂e anarî xa hara.

Samaritanu mîk xakn̂e.

Etapaxapu yecen̂e cexitaw tak n̂een̂akn̂e.

Okwe,

kekn̂e reha noro.

Yîpînîn yaw xa xakn̂e.

34 Yîhyaka tak cekn̂e.

Eper̂an n̂ehcemekn̂e katî ke,

uupa yukun ke marha.

Ehcemache eper̂an n̂imiyakn̂e.

Ero wa ciriche tak tooku mkahsî rma nakriyakn̂e.

Ero wa naar̂akn̂e mîîmo yaka,

esama yaw tîtosom komo yîwîntopo yaka.

Iina arîche kir̂wan̂he n̂iir̂akn̂e yukuywan,

kir̂wan̂he marha n̂iir̂akn̂e etarî cexpore n̂he ehtome.

Wokpekn̂e marha.

Ero wa etapaxapu pen nakronomekn̂e Samaritanu.

35 Enmapuche tak cekn̂e Samaritanu.

Tîtorî me tupurantan poi mohkekn̂e exepeyu asakî.

Mîîmo yosom ya takî nîmyakn̂e.

Ehe,

kekn̂e yîwya.

On ha puranta moso nahrî yepetho.

Moso cma re ka meen̂asî,

yiixe ehtopo cma re mîmyasî.

Onî yopo yirihtîkache awya puranta,

wîmyasî xa hara awya omokuche hara,

kekn̂e Samaritanu mîîmo yosom ya.

36 Taa,

3 xatken̂e cen̂epan̂em komo n̂etapatho yenîn̂enho komo.

Onoke warai xa katî mîhtînoya noro pen poyino me awya?

kekn̂e tî Xesus Moises pen nmewretho pokono ya.

37 Nnn,

yîpînîn yawnonhîrî xa xakn̂e poyino me ham,

kekn̂e tî noro Xesus ya.

Taa,

ahna so na awcetaw ero wa xa marha esko amoro hara,

kekn̂e tî Xesus yîwya.

Ero wa tî kekn̂e.

38 Taa,

ero yinhîrî tak Xesus komo takî tî cetken̂e xa hara esama yaw anarî ewto pona.

Iito tî xakn̂e wooxam,

Mahta tî xakn̂e noro yosotî.

Noro takî tî kekn̂e Xesus ya,

Omîn yaka cma re mîmokyasî,

kekn̂e tî.

Ero ke yîmîn yaka tî cekn̂e Xesus.

39 Mahta yakno marha tî xakn̂e iito,

Maria tî xakn̂e noro yosotî.

Noro takî tî n̂eremekn̂e Xesus yeepatai.

Xesus mtapotarî tî n̂encekn̂e iito.

40 Mahta reha tî xakn̂e yînahrî komo cirirî poko,

etakarî poko marha.

Yarpa ro makî tî xakn̂e okwe.

Ero ke Xesus yaka takî tî cekn̂e.

Apa,

kekn̂e tî yîwya,

oponarora ma mai okwe?

Oyakronomara nas oyakno okwe.

Cewn̂e thakwa mak was okwe knahrî komo poko.

Ero ke yîwya kasko,

Awakno akronomakî,

kasko yîwya,

kekn̂e tî Mahta Xesus ya.

41 Okopuci Mahta,

kekn̂e tî Xesus yîwya,

mîn hak poko mak meserepokesî,

mesewrucpesî marha okwe.

42 Cewn̂e mak nasî yiixe xa kehtopo komo.

Kir̂wanî ro nîhtînoyasî Maria yiixe xa cehtopo.

Ero ke,

Oyentara tak esko,

kahra ro mak wasî yîwya,

kekn̂e tî.

Ero wa tî kekn̂e Xesus Mahta ya.