Taa,

ero yinhîrî tak anana takî tî cekn̂e Xesus.

Iito cexitaw Kaan yakro tî nîmtapowakn̂e.

Yîtîhkache tak on wara tî ketken̂e yînpanatanmekrî komo yîwya,

Apa,

ahce wa xa tîmtapotapore nai Kaan yakro?

Ero poko cma re amna mîhcamhokesî.

Ero poko Xuaw nîhcamhokekn̂e tînpanatanmekrî kom ha,

ketken̂e tî Xesus ya.

2 Ero ke on wara tî kekn̂e Xesus yîwya so,

Kaan yakro amtapowataw so on wara kacoko,

Apa kah yawno,

amna yopono ro xa Amoro twerî cetacisom.

Ero wa ahtînon̂e me cirko miyan komo rma.

Yohno cma re kayaritomo me xa tak mesenpesî roowo pono komo ya.

Awewetîn̂e me tak n̂examro cirko.

Kah yawno komo naxe awewetîn̂e me,

ero warai me xa marha cirko roowo pono kom hara.

3 On wara marha wîîkes awya Apa,

kaamo po roro amna yuru yenpon̂e Amoro.

Ero ke on po tohsom cma re menpesî.

4 On wara marha wîîkes awya Apa,

apoko kicicme amna yehtoponho cma re mîhcamnoyasî.

Tpoko kicicme cehsom komo yehtoponho amna nîhcamnoyasî,

ero wa xa marha cma re mîhcamnoyasî amna yehtoponho hara.

On wara marha cma re wîîkes awya,

amna yaan̂e me roro esko Apa.

Amna yemetanmetopo mko nai okwe.

Ero ke ero yipu yai cma re amna maar̂asî.

Kicicitho ro mak nas amna chew okwe,

amna pohkan̂e.

Ero ke amna yukurupen̂e me xa marha esko Amoro,

kacoko.

Ero wa kacoko Kaan yakro amtapowataw so,

kekn̂e tî Xesus yîwya so.

5 Taa,

on wara wîîkesî xa hara awya so,

kekn̂e tî Xesus tînpanatanmekrî komo ya,

ahce wa matu pawana mokyataw ahyaka so kosope.

Rakatawro xa na mokya ahyaka so apoyino.

Awru komo exihra ro mak na nai ero yimaw.

Ero ke rakatawro rma na mîîce amîtwono yaka.

Ai oyakno,

mîîke na yîwya,

cuure xe cma re wasî 3 mak.

6 Meyeno moko oroto opoyino.

Iyuru exihra ro mak nas okwe amna yaw,

mîîke na amîtwono komo ya.

7 On wara tko na aweyukya noro mîîmo yawno,

Ahce okwe.

Tahruso nas omîn okwe.

Nîwînîkyaxe marha omxîkrî komo okwe,

oyenaw.

Ero ke yîhtora thakwa wasî tîmtome awya.

Ero ke owî cma re ewrucpera masî,

nîîke na awya so.

8 On wara wîîkes awya so,

kekn̂e hara tî Xesus,

Yîhtora na nai cuure tîmtome awya.

Omîtwono me awexirî ke thakwa kîhcesî rma,

kahra na nai.

Nîhcesî rma tko pahkî tpanapickarî ke mak awya.

Cuure tak nîmyas awya.

Yiixe awehtopo wicakî rma na nîmya awya,

kekn̂e tî Xesus yîwya so.

9 On wara marha wîîkes awya so,

kekn̂e hara Xesus,

yiixe awehtopo komo poko amtapotacoko Kaan yakro ahsîtome tak awya so.

Epon̂e wara marha ehcoko.

Ero yimaw tak Kaan n̂enpes awya so.

Anarimaw metata ke wahkotoxapu wa na mat okwe.

Ero wa awexitaw so ero awahkototopo komo poko rma knei knei knei kan̂e wa tak ehcoko.

Ero wa kache awya so,

swaaa,

cetahrunkaxmu wara tak nas hara,

cewomsom wara tak awehtome so okre.

10 Ero wa taxe yiixe kehtopo poko kîmtapowataw Kaan yakro,

tahsîyaxe tak okre.

Epor̂ataw marha ceen̂axe tak.

Knei knei ketaw marha kîwya so kwahkototopo poko,

n̂etahrunkesî tak kîhyaka so,

kekn̂e tî Xesus yîwya so.

11 On wara marha wîîkes awya so,

kekn̂e hara tî Xesus yîwya so,

Ahce wa matu amyamro rikomo yîîm komo?

Oyuru xe cma re was Apa,

ketaw amumuru komo awya so,

toopu katî mîmyatu yîwya?

Pîra ro mak.

Oyotî xe cma re was Apa ootî,

ketaw anarimaw awya so,

okoyi katî mîmyatu yîwya?

Pîra marha.

12 Apa,

onahrî xe cma re wasî kapikara pume,

ketaw hara,

cikiri katî mîmyatu yîwya?

Pîra ro mak.

13 Kicicitho rma re amyamro.

Noro yipu rma tko kir̂wan ke mak mîwakrexe amxîkrî komo.

Soroso xa Aamo komo awakrexe so kah yawno,

Kir̂wanî ro Yekatî nîmyas awya so hara,

Noro xe cma re was Apa,

ketaw yîwya,

kekn̂e tî.

Ero wa tî kekn̂e Xesus tînpanatanmekrî komo ya.

14 Taa,

ero yinhîrî tak mer̂pono pîn komo n̂esenmekyatken̂e hara Xesus yaka.

Ero yimaw tî iito xakn̂e worokyam ken̂arî.

Yîmtapotanî ro tî mîk xakn̂e worokyam,

ero ke yîmtapotan me marha thakwa tî xakn̂e hara yiikenarî.

Xesus takî tî worokyam n̂en̂epekn̂e yîhyai.

Ero yinhîrî nîmtapowakn̂e takî tî okre yîmtapotanînhîrî.

Ero ke n̂eserepoketken̂e xa tak esenmexapu komo.

15 Anarî me tko tî ketken̂e anarî kom hara.

On wara tî ketken̂e,

Bewsebu yanme mak worokyam n̂en̂epesî,

worokyam kayaritomon yanme ha kica,

ketken̂e tî n̂examro.

16 Ero yinhîrî takî tî on wara ketken̂e anarî kom hara Xesus ya.

Ai Apa,

cirihnî cma re miir̂asî,

Kah yawno yanme xa nai ham,

kachome tak amna ya apoko,

ketken̂e tî yîwya.

Xesus makî tî yukukma xe xatken̂e,

Ahce wa kyam keyukya?

kachome.

17 Tukukman̂e me rma tko n̂examro nîhtînoyakn̂e Xesus.

Ero ke on wara tî kekn̂e yîwya so,

Ahce wa nai kayaritomo noro maywen komo re mak etar̂metaw?

Etpoko etar̂metaw n̂examro re rma n̂emaywenketîkesî mak tak kayaritomo pen okwe.

Ero wa xa marha naxe mîîmo yawno kom hara.

Ero re yawno komo yetar̂metaw etpoko rma yarîhra tak men nas amn̂e mîîmo pen okwe.

18 Ero wa xa marha nasî Satanas hara.

Noro maywen komo re etar̂metaw etpoko rma ahce wa ma re worokyam kayaritomon me rma nai hara?

Pîra ro mak.

Ero ke ahce kacho opoko mîîket hara,

Bewsebu yanme mak worokyam n̂en̂epesî,

mîîket ha?

19 Bewsebu yanme worokyam yen̂epetaw ketaw ha re owya,

onoke yanme worokyam n̂en̂epetu ha re amumuru komo awya so?

Kacoko ika yîwya so.

20 Kaan Yekatî yanme en̂epetaw owya on wara men kacoko,

Kayaritomo me xa Kaan n̂esenpesî tan kîwya so rma,

kacoko tak.

21 On wara marha wîîkes awya so,

anarimaw mîîmo yosom nai,

karitî.

Tuwuhreke xa nai tîmîn yewyomachome.

Noro yipu yemyawno yarîhra ro mak nasî cen̂epan̂em.

22 Iyopono takî tko na mokya anarimaw.

Karitînhîrî pen tak nar̂mesî.

Yuwuhrethîrî naar̂asî,

Okurun xa tan ham,

kachonho yîwya.

Emyawnonhîrî marha tak naatîkesî.

23 On wara marha wîîkes awya so,

oyakrono me exihra awexitaw so oyemetanmekn̂e me mak maxe okwe.

Ohyaka ekno ciin̂e pîn me awexitaw so en̂epeno ciin̂e me so mak maxe okwe,

kekn̂e tî.

Ero wa tî kekn̂e Xesus tîwîrîyakan̂e komo ya.

24 On wara marha wîîkes awya so,

kekn̂e xa hara tî Xesus yîwya so,

on wara nasî tooto anarimaw,

kicicitho yekatî ka nasî yîropotaw.

Ero yinhîrî ces hara yîropotai.

Miya so tak n̂etar̂asî tîmîn yewtî yeposo.

Turpem pore makî tko n̂etarasî,

ero ke enîhra rma nas okwe.

Nnn,

kesî tak,

omîn exihra ro mak nai tan ham okwe.

Ero ke omîntho yaka rma kîwce hara mî,

kesî.

25 Amn̂e tak tîmîn yaka cewomuche hara taiwaxi tak n̂een̂asî.

Takriso marha n̂een̂asî cemyawnonhîrî.

26 Ero ke worokyam yahsîso ces hara,

anarî komo xa hara,

7 xa hara.

Kicicitho komo xa tak nahsîyasî.

Kicicitho rma re mîk xakn̂e mîîmo yosom,

miya xe xa tko kicicme cehsom mîkyam yînahsîthîrî kom hara.

27 Taa,

ero wa ketaw rma iito tî xakn̂e wooxam hara Xesusu mtapotarî yentan̂e komo chewno.

On wara takî tî kekn̂e Xesus ya,

Tawake xa nai ham anocwan,

yîropotai mewruyakn̂e,

noro,

moomo ke awokpekn̂e noro rma,

kekn̂e tî yîwya.

Kar̂pe tî kekn̂e.

28 On wara tî n̂eyukyakn̂e Xesus,

On warai komo xa tko naxe tawake,

Kaanî mtapotarî yentan̂e komo,

ewetîn̂e komo marha,

kekn̂e tî Xesus wooxam ya.

Ero wa tî kekn̂e.

29 Taa,

ero yimaw tak tooto pen takî tî mohtîketken̂e Xesus yaka.

On wara tî kekn̂e Noro yîwya so,

Kicicme maxe okwe amyamro on yimawno komo.

Ero ke on wara mîîkexe owya,

Cirihnî kyam cirko amna wero ro,

Kaan yanme mohxapu xa Mîk ham,

kachome tak amna ya apoko,

mîîkexe owya.

Cirihra rma wasî cirihnî awero ro so.

Xonasî pen yehtoponho rma mencexe.

Oyehtopo yenpon̂e me rma xakn̂e noro pen.

30 Noro pen xakn̂e Kaan yehtopo yenpon̂e me Ninipe pono komo ya.

Ero wa xa marha nasî Tooto me Ewruxapu hara,

Kaan yehtopo yenpon̂e me nasî on yimawno komo ya hara.

31 On wara men naxe amn̂e on yimawno komo,

n̂examro n̂en̂ekesî suu n̂ixan komo kayaritomonînho,

wooxam ha.

Kicicitho komo mîkyam kica,

kesî poko so.

Roowo yenatîtopo pono mîk xakn̂e noro.

Mooxe rma mokyakn̂e Saromaw penî mtapotarî yentaxi.

Takîhsom mîk xakn̂e Saromaw pen,

ero ke mokyakn̂e entaxi.

Takihsom xa tko nasî tan ahyaw so,

Noro pen yopono xa.

32 Ninipe pononho komo marha tak on yimawno komo n̂en̂ekexe.

Kicicitho komo moxam kica,

kexe poko so.

Yaaro xa Xonas penî mtapotarî n̂encetken̂e,

ero ke kicicme cehtoponhîrî komo poxunketken̂e.

Ero wa xatken̂e Xonas penî mtapotarî poko.

Noro pen yopono xa tko tanî nas hara,

kekn̂e tî Xesus yîwya so.

Ero wa tî kekn̂e.

33 On wara marha tî kekn̂e Xesus esenmexapu komo ya,

Ahce wa miir̂atu aweyuru komo potuhtoche awya so?

Mahruyatu katî enîhnî na.

Kahxapu makataka katî miir̂at ha?

Pîra ro mak.

Weeyu yaponî ro pona xa miir̂axe mîîmo yaka ewomxapu komo weipotome tak,

kekn̂e tî.

34 Taa,

kewru rma nasî kupun weyuru me.

Ero ke kir̂wan̂he exitaw awewru komo tweike rma nas apun komo ahnoro.

Kicicme exitaw awewru komo awarpape mak nas okwe apun komo ahnoro.

35 Ero ke kir̂wan̂he men ciicoko awewru komo aweyuru komo me exirî ke.

Awarpanaw men maxe okwe kicicme exitaw aweyuru komo.

36 Ahce wa nai amîn komo kir̂wan̂he exitaw aweyuru komo?

Ahnoro mak weipesî miya ro mak.

Ero wa xa marha maxe amyamro hara.

Tweike xa exitaw apun komo,

awarpanawno ciki exihra ro mak exitaw,

tweike tak nasî apun komo ahnoro,

kekn̂e tî Xesus yîwya so.

37 Ero yimaw tî iito xakn̂e Parisew Xesusu mtapotarî yentan̂e.

On wara tî kekn̂e Xesus ya,

Ohyaka cma re mîmokyasî eseresmaxi,

kekn̂e tî.

Ero ke noro yaka takî tî cekn̂e Xesus.

N̂eremekn̂e tî iito ceseresmachome.

38 N̂eserepokekn̂e tko tî Parisew esemokara rma eseresmarî poko.

Ahce kacho esemokara n̂eseresme hara kica?

kekn̂e tî tîhnaw.

39 Ero ke on wara tî kekn̂e Kporin komo yîwya,

On wara maxe amyamro Parisew komo,

paayu korokan̂e wa maxe,

yîmkarî korokan̂e wara mak okwe,

yai korokan̂e pîn wara.

Ero wa maxe awehtopo komo poko.

Poore mak metakir̂wamexe kica.

Aropotaw so reha kicicitho ponaro mak maxe okwe.

Anarî komo yemyawnonho towtopo ponaro xa maxe kica.

40 Akpîra cesehtînosom komo mak amyamro okwe.

Ahce wa awakîcetken̂e so Kaan awya so?

Poreno makî katî nakîhcekn̂e awya so?

Pîra ro mak.

Aropotarî komo meero wa nakîhcekn̂e,

kekn̂e tî.

41 On wara xa ehcoko,

yupurantamnî komo wakrecoko.

Ahce na exitaw ahyaw so ero yiipu poi rma tîmcoko yîwya so.

Ero wa awexitaw so kir̂wan̂he tak nasî awehtopo komo ahnoro okre,

kekn̂e tî Xesus Parisew ya.

42 On wara marha tî kekn̂e Xesus yîwya,

Metwîrîmexe ro mak amyamro okwe Parisew komo.

On wara maxe kica,

anahrî komo poxun raconho rma re mîmyaxe Kaan ya.

Mîn hak warai mîraconkexe Kaan ya tîmtome.

Takîhso tko exihra maxe hara okwe apoyino komo poko,

Kaan xe awehtopo komo ponarora marha maxe okwe.

Yaaro rma awemyawno komo raconho mîmyaxe Kaan ya.

Takîhso cexpore marha tko nasî,

Kaan xe awehtopo komo ponaro marha cexpore nasî.

Ero wa awehtopo komo poko twen̂ekarî exihra cexpore nasî.

43 Metwîrîmexe ro mak amyamro Parisew komo.

On wara marha maxe kica,

awesenmetopo komo yaw awexitaw so enîn̂e yapon po mak awerema xe so maxe.

Kwarawantacho yaw awexitaw so hara tpoxwe xa mencexe iitono komo mtapotarî,

Tan mai kpanatanmekn̂e,

kacho.

44 Metwîrîmexe xa marha amyamro Xutew panatanmetopo mewren̂e komo,

Parisew komo marha.

Kir̂wan wa so mesenpexe tohnaw ro mak kica.

Waihxa pen yocho wara rma maxe okwe.

Esenpora nasî ahruxa pen komo yocho.

Ero yipu yari cexe cetarisom komo twen̂ekarî mak.

Tan nasî tooto yocho,

kahra thakwa naxe.

Ero wara maxe amyamro hara,

kekn̂e tî Xesus yîwya so.

45 Taa,

iito marha tî xakn̂e Moisese nmewretho pokono hara.

Noro takî tî kekn̂e Xesus ya.

Apa,

kekn̂e tî,

ero wa ketaw awya amna meero mîwîrîyakes okwe.

46 Nhnk,

kekn̂e takî tî Xesus yîmtaka,

metwîrîmexe ro mak amyamro meero Moises pen nmewretho pokono kom hara.

On wara maxe kica amyamro,

tawsîn̂em ke tîmkawnoyem wara xa apoyino komo miir̂axe,

iyopono yarpon̂e wara maxe okwe.

Ero yipu poko ehcoko,

mîîkexe yîwya so.

Amyamro tko awamoyaran ke rma n̂examro yakronomara maxe ero yipu poko,

cewn̂an ke cik meero akronomara maxe kica.

47 Metwîrîmexe ro mak okwe amyamro.

Pahxan pen komo n̂etapetken̂e aporin pen komo,

tweronoman̂e pen kom ha.

Amyamro tak mîmînmexe n̂examro pen yocho.

48 On wara kacho rma mîn n̂examro pen yocho yîmînmacho awya so,

Kir̂wan̂he rma xatken̂e kporin pen komo,

tweronoman̂e pen waihkan̂enho pen kom ha,

kacho rma mîn ha.

49 Kropotarî komo yenîn̂e Mîkî Kaan,

takîhso enîn̂e.

Ero ke on wara kekn̂e Noro pahxa apoko so,

N̂examro yaka tak wen̂epes amn̂e weronoman̂e komo.

Xesus nantomatho komo marha wen̂epesî yîhyaka so.

N̂examro pen tak waihkexe kr̂a anarî pen komo mak.

Anarî pen komo n̂emetanmekyaxe hara.

Ero wa onantomatho komo n̂iir̂axe okwe.

50 Ero wa maxe amyamro apona so ciitome weronomano rin̂enho pen komo waihkachonho ahnoro.

Mehxa ro rma roowo yakîhtotoponho n̂ixa ro rma weronomano rin̂e pen komo waihketken̂e poyino komo.

Mer̂pora ro mak waihketken̂e okwe.

Ahnoro n̂examro pen n̂epanîyasî Kaan on yimawno komo waihkarî ke.

51 Abew pen ka n̂etapetken̂e yihcirî me ha kapu.

Okomn̂i tak Sakarias pen n̂etapetken̂e hara.

Kaan mîn mîtwo rma noro pen n̂etapetken̂e,

tîmsom yakn̂itopo mîtwo rma.

Yaaro tan wîîkes awya so on yimawno komo waihkarî ke n̂examro pen n̂epanîyasî Kaan amn̂e.

52 Metwîrîmexe ro mak amyamro Moises pen nmewretho pokono komo.

Kaan poko kîhcamhokacho yewkacho mowyaxe mak kica.

Noro poko awehcamhoka xera maxe amyamro kica.

Anarî komo reha cehcamhoka xe naxe.

Kaanî mtapotarî yanwekrî ke awya so tko ehcamhokara rma thakwa naxe okwe,

kekn̂e tî Xesus.

Ero wa tî kekn̂e kpanatanmetopo pokono ro komo ya.

53 Ero wa ketaw tak on wara tî xatken̂e Parisew komo,

Xutew panatanmetopo mewren̂e komo marha,

camra ro mak takî tî nîmtapowatken̂e Xesus yakro.

Ahce wa mîîke on poko?

Ahce wa mîîke mîn poko hara?

ketken̂e tî yîwya.

Yîtîtmamra ro makî tî ketken̂e yîwya.

54 Ero wa nîmtapowatken̂e Xesus yakro Noro yewkukmachome.

Kicicme yîmtapotarî yenta xe xatken̂e en̂ekapotome kr̂a tak tîmsom pokono yenîn̂e komo ya.

Ero wa tî xatken̂e kica.