Taa,

ero yimaw takî tî tooto pen mokyatken̂e Xesus yaka mer̂pono pîn komo ro mak.

N̂etapikyatken̂e mak oko takpî cexirî ke so.

Iito rma tî xatken̂e Xesusu npanatanmekrî komo.

N̂examro ka panatanmekyakn̂e cokorî Xesus.

On wara tî kekn̂e yîwya so,

Kicicme mak naxe kica Parisew komo.

Puruma wahrututpamnotopo ken̂arî wa mak naxe kica.

Kir̂wan wa so n̂esenpexe tohnaw ro mak okwe.

Ero ke n̂examro warahra ro mak ehcoko.

2 Ahnoro tooto komo yehtopo n̂esenpes amn̂e.

Eyamxapunhîrî tak n̂esenpesî,

ekatîmnînhîrî marha n̂esekatîmyasî ahnoro.

3 Anarimaw awarpanaw mak na mîmtapowatu.

Ero wa amtapotachonhîrî rma tak n̂esences amn̂e katpanaw tak.

Epanakari mak na mîmtapowatu,

anarimaw mîîmo yamtakpon yaw mak na mîmtapowatu,

rakatawno yaw xa.

Iito amtapotachonhîrî rma tak n̂esences amn̂e.

Mîîmo meretwono komo n̂ekatîmyaxe miyan komo n̂entarî me rma,

kekn̂e tî.

Ero wa tî ka kekn̂e Xesus tînpanatanmekrî komo ya.

4 On wara marha wîîkes awya so oyakno komo,

kekn̂e takî tî iina mohxapu komo ya hara.

Awaihkan̂e komo pona erasîra ehcoko,

apun komo waihkan̂e me mak naxe hara.

Ero ke awaihkache ahce wa so na awemetanmekîra so tak naxe.

5 Anarî tko nasî hara pona awerahtîmtopo komo xa tak ha.

Awaihketu so rma na Noro hara.

Awaihkache na Noro reha wehto imo ywaka awar̂man̂e me tak nas hara oco.

Ero ke Noro pona xa tak erahtîmcoko,

kekn̂e tî Xesus yîwya so.

6-7 On wara wîîkes hara awya so,

kekn̂e xa hara tî Xesus,

Atî wicakî wa mîmyatu torowo yepetho?

2 exepeyu kyam mak mîmyaxe 5 yepetho rma,

torowo yepetho ha.

Epethîmnî mak mîk torowo.

Noro yipu poko rma tko yîtwen̂ekarîntara ro mak nasî Kaan.

Tîpîn̂e xa wa maxe amyamro torowo yopo ro mak,

mer̂pono pîn yopo rma.

Ero ke aponaro so xa tak wa nasî Kaan.

Ahpoci komo meero nukuknomesî.

Ero wicakî yakenon mîn yîhpoci,

yîhtîpîrî pokono,

kesî Kaan apoko so.

Ero ke erasîra ro mak ehcoko,

kekn̂e tî Xesus yîwya so.

8 On wara marha wîîkes awya so,

kekn̂e xa hara tî Xesus tînpanatanmekrî komo ya,

on wara ehcoko,

oyakrono me cesekatîmsom me ehcoko.

Ero wa awexitaw so ero wa xa marha nasî Tooto me Ewruxapu apoko so hara amn̂e kah yaw.

Kaan yancun komo naxe iito.

N̂examro n̂entarî me apoko so n̂esekatîmyasî Noro,

Oyakrono moso okre,

kesî apoko so.

Ero wa kesî ancu komo n̂entarî me.

9 Xesus yakrono pîn ow ha,

ketaw reha awya so ero wa xa marha men kesî Noro apoko so hara n̂examro n̂entarî me rma.

Oyakrono pîn mîkro,

kesî apoko so okwe.

Ero wa kesî Kaan yancun komo n̂entarî me rma,

kekn̂e Xesus.

10 On wara marha kekn̂e Xesus,

Kicicitho me na nîmtapowatu anarî komo Tooto me Ewruxapu poko.

Ero wa ehtoponhîrî rma nîhcamnoyasî Kaan.

Anarimaw Kir̂wanî ro Yekatî poko na nîmtapowatu kicicitho me hara okwe.

Ero wa ehtoponhîrî reha yîhcamnopîra ro mak nasî Kaan okwe.

11-12 Apanatanmekn̂e komo me nasî Kir̂wanî ro Yekatî.

Amn̂e tak aaxatî pîn komo awar̂axe so cesenmetopo komo yaka awen̂ekapotome so Kaan mîn yenîn̂e komo ya.

Kayaritomo komo yaka marha na awar̂atu so anarimaw hara awen̂ekapotome so yîwya so.

Iina awar̂ataw so,

Ahce wa wîîke kopi yîwya so?

kahra ro mak ehcoko.

Ahce wa xa n̂examro weyukya?

kahra marha ehcoko.

Awen̂eketaw so tak apanatanmekyaxe so Kir̂wanî ro Yekatî rma awen̂ekan̂e komo yeyuhtopo poko,

kekn̂e tî Xesus.

Ero wa tî kekn̂e iina esenmexapu komo ya.

13 Taa,

ero yinhîrî tak on wara tî kekn̂e yîwya iina esenmexapu komo chewno rma,

Apa,

oyakno cma re mîpanatanmekyasî.

Aamo pen komo yemyawnonho yîraconkakî men awakno ya tîmtome,

mîîkesî cma re yîwya,

kekn̂e tî Xesus ya.

14 Apohana,

kekn̂e tko tî Xesus yîwya.

Onoke ma re oriyakn̂e awen̂ekan̂e komo me,

awemyawno komo yekamn̂e me marha?

kekn̂e tî Xesus yîwya.

15 Ero ke on wara tî kekn̂e hara Xesus iina mohxapu komo ya,

Twerî men ehcoko awemyawno komo poko awepokacho komo poko.

Ahce kacho tan matu roowo po?

Awemyawno komo yepamnon̂e me awehtome so makî katî tan matu?

Pîra ro makî.

16 Ero ke anarî pokono wara takî tî n̂ekatîmyakn̂e Xesus yîwya so.

On wara tî kekn̂e,

Pahxa xakn̂e tupurantayem.

On wara xakn̂e noro,

tahwore xa natîkwakn̂e yînatîrî,

ehyatkaw so n̂eperwakn̂e okre.

17 Amn̂e tak eperîrî yenmetopo me exitaw eken ken̂ehra tak xakn̂e mîîmo mer̂pora exirî ke eperîrî.

Ero ke n̂esehtînoyakn̂e tak noro.

On wara kekn̂e,

Ahna kyam on wiir̂a,

onatîrî yeperîrî?

18 On wara wai ham,

onatîrî yeperîrî mîntho tak wixkesî.

Ekenhîrî na tak porin xa tak wiir̂as hara mîîmo onatîrî yeperîrî mîn hara.

Ero yipu yaka tak wenmekyas onatîrî yeperîrî.

Oyemyawno marha wenmekyas iina,

kekn̂e tî tîhnaw.

19 Ero yipu yenmetîkache on wara tak wîîkes oyekatî ya rma,

Oyekatî,

mer̂pora ro mak nasî awemyawno okre.

Pahkî enatîra nasî,

yaake cimn̂ipu rma.

Ero ke cerepore mak esko.

Eseresmakî,

uupa yukun marha erko,

etahworeko marha.

Ero wa mak esko okre,

wîîkesî oyekatî ya rma,

kekn̂e tî.

Ero wa tî n̂esehtînoyakn̂e tupurantayem.

20 On wara tko kekn̂e Kaan yîwya,

akpîra cesehtînosom amoro ham okwe.

Oroto tak awekatî waar̂asî kosope.

Awaipuche tak onoke nahrî me tak nai hara anatîthîrî yeperîtho,

an̂enmekîthîrî ha?

kekn̂e Kaan yîwya.

21 Taa,

noro pen wara xa marha maxe awemyawno komo yepamnotopo ponaro mak awexitaw so.

Kaan yawno nai awemyawno kom hara.

Ero yipu yepamnotopo ponarora ro mak maxe okwe,

kekn̂e tî Xesus.

Ero wa tî kekn̂e iina esenmexapu komo ya.

22 Ero yinhîrî tak on wara tî kekn̂e Xesus tînpanatanmekrî komo ya hara,

Ero ke on wara wîîkes awya so,

awemyawno komo poko eserepokara ro mak ehcoko amyamro reha.

Ahce thakwa re tahya amn̂e okwe?

kahra ehcoko.

Ahce thakwa re oponon hara amn̂e okwe,

kahra marha ehcoko.

23 Ahce kacho me awakîcetken̂e so Kaan ha?

Erewsî yen me makî katî awakîcetken̂e so?

Pîra ro makî.

Aponon komo yapon me makî katî apun nakîhcekn̂e hara?

Pîra marha.

Ero ke ero yipu poko eserepokara ro mak ehcoko.

24 Enko xe tarin̂em komo,

tînatîrî cirihra ro mak nasî.

Eperîrî yenmekîra marha nasî mîîmo yaka.

Mîîmo cirihra ro mak nasî tînatîrî yeperîrî yenmetopo.

Noro yipu rma tko nînahmesî Kaan.

Tîpîn̂e rma re tarin̂em komo n̂een̂asî.

Tîpîn̂e xa tak awen̂axe so tarin̂em komo yopo ro makî.

25 Ahce wa matu apor̂mamtopo komo poko hara?

Kekawnoresî kyam oroto meia metru wicakî mak.

Oyesetînotopo ke mak kekawnoresî,

ketaw awya so,

sîrî mîîket ha ma re awya so kaw n̂he tak ha?

Pîra ro mak.

Ekawnorera ro mak maxe awanme ro so okwe.

26 Apehceme ciisom poko rma mehn̂exe thakwa.

Ero ke ahce kacho meserepoketu miyan poko rma?

27 Epemrutun yatîhtacho yîhtînocoko hara.

Ekaritora ro mak nas epemrutun cenporem me xa cehtopo poko.

Mawrî marha ekposîra nasî.

Cenpore rma tko nas okre.

Cenpore rma re xakn̂e Saromaw pen cepethîkem yaw cesenpetaw poono yaw.

Noro pen yopo cenpore nasî epemrutun cewn̂e rma.

28 Ero wa Kaan n̂iir̂asî cuupu,

cenpore n̂iir̂as okre yohnonotho rma.

Oroto mak ceen̂asî,

enmapuche takn̂isom me nas hara cuuputho.

Soroso xa tak apononmexe so.

29 Eserepokara tak ehcoko anahrî komo poko,

awokru komo poko marha.

Ahce thakwa re tahya okwe?

Ahce thakwa re ceer̂a okwe?

kahra ro mak ehcoko.

30 Ero wa kexe mîk hak rowon pono komo okwe.

N̂examro warahra reha ehcoko amyamro.

Aponaro so rma nas Aamo komo kah yawno ha.

Tînahrî xe thakwa naxe,

tponon xe marha naxe,

kesî wa ha Noro apoko so.

31 Kaan maywen me awehtopo komo ponaro xa matko ehcoko ha.

Ero wa awexitaw so ero yipu mko tak Kaan nîmyas awya so,

kekn̂e tî Xesus tînpanatanmekrî komo ya.

32 On wara marha wîîkes awya so,

kekn̂e takî tî Xesus yîwya so,

oyoku warai komo cik amyamro.

Erasîra ro mak ehcoko.

Kayaritomo me rma awir̂axe so Apapa kah yawno amn̂e.

Tawake xa tak nasî Noro ero yimaw kayaritomo me awiriche so.

33 On wara xa ehcoko,

awemyawno komo tak tîmcoko epethîrî pona yupurantamnî komo wakrechome tak awya so.

Ero wa awexitaw so atpînî ro yaka apurantan komo yenkan̂e wara tak maxe.

Awemyawno yepamnotopo komo rma mîn ero wa awehtopo,

kah yawno yepamnotopo ha tko,

enatînî ro okre.

Iitono yarîhra ro mak nasî cen̂epan̂em.

Wohra marha nasî xîkîwî.

34 Roowo pono mak yepamnoyataw awemyawno komo roowo pono ponarono me thakwa maxe okwe.

Kah yaka reha epamnoyataw awemyawno komo iitono ponaro xa tak maxe okre,

kekn̂e tî.

Ero wa tî kekn̂e Xesus yîwya so.

35-36 On wara marha wîîkes awya so,

kekn̂e xa hara tî Xesus tînpanatanmekrî komo ya,

kayaritomo yanton wara xa ehcoko.

On wara naxe kayaritomo yanton komo kir̂wan̂he cexitaw so,

yaw cetapickacho tak namruyaxe tponon komo.

Potuhcexe marha tîramhan komo.

Tosom komo toche tooto pitacho yenso noro mohtopo ponaro rma naxe.

Noro mokyataw hara,

knei knei knei ketaw tak metata poko yohno rma tak nahrunkexe yîhyaka.

37 Tawake naxe ero warai komo,

kayaritomo yanton komo.

Osom mokuche tmohtopo ponarono me rma n̂examro n̂een̂as okre.

Ero ke Noro makîrha tak namruyasî yaw cetapickacho hara tponon ha.

Yîwînkîra ehxapu komo tak n̂eremanmekyasî.

Noro rma tak n̂etakesî yînahrî kom hara eseresmachome so.

38 Kosope na mokya kayaritomo tîmîn yaka,

rakatawro na anarimaw,

enmaporo na anarimaw.

Ahcemaw na tmokyataw tmohtopo ponaro rma n̂een̂asî tanton komo.

Tawake naxe noro yipu komo kayaritomo mohtopo ponarono komo.

Ero ke noro yipu komo wa xa marha ehcoko amyamro.

39 Ahce wa katî nîîke cen̂epan̂em awya so?

Ero yimaw xa men kmokyasî,

nîîke katî awya so?

Pîra ro mak.

Ero wa ketaw ha re cewke tak maxe noro mokrî ponaro.

Awemyawno komo yarpora ro mak maxe yîwya.

40 Ero ke ero wa xa marha Tooto me Ewruxapu mohtopo ponaro ehcoko hara.

Mokyas ha men noro.

Oroto xa na mokya,

kahra rma awexitaw so mokyasî,

kekn̂e tî Xesus yîwya so.

Ero wa tî kekn̂e tînpanatanmekrî komo ya.

41 Ero yinhîrî on wara takî tî kekn̂e Petru Xesus ya hara,

Apa,

anarî pokono wa mekatmo panatanmekno ritopo.

Onoke warai komo xa mîpanatanmekî ero warai poko,

kayaritomo yanton komo poko ha?

Amna panatanmetopo mîn ha,

miyan komo panatanmetopo rma katî mîn,

mekatmo ha?

kekn̂e tî Xesus ya.

42 On wara tî n̂eyukyakn̂e Kporin komo,

Takîhso ehcoko,

yuwun̂ura marha ehcoko.

Ero wa awexitaw so akayaritomon komo tak awir̂axe so tîmîn yawno komo yenîn̂e me.

Moxam tak men yînahmacoko amn̂e yînahmatopo me exitaw,

kes awya so.

43 Tawake maxe okre akayaritomon komo mtapotachonho yawro ro awexitaw so.

Amn̂e tak Noro mokyataw hara cewetîn̂e me awen̂axe so.

44 Yaaro tan wîîkesî,

ero warai poko awexitaw so cemyawno yenîn̂e me tak awir̂axe so miyan komo yenîn̂e me rma.

45 On wara tko na natu anarî kom hara kayaritomo yanton komo,

cecmamtîkaxmu wara tak na nîhtînoyatu tkayaritomon komo.

Ahcemaw na mokya apapa,

ketu mak na.

Ero ke takrono komo tak na nîhyokyatu Noro yanton komo rma.

Kîrkomo nîhyokyaxe,

wooxam komo marha.

N̂eseresmetu mak na kica.

Wok marha na n̂eer̂atu twenîmso ro kica.

46 Ero ke Noro ponarora ro mak exitaw so men mokyasî kayaritomon komo.

Ero kaamo po xa na mokya,

mînto kaamo xa na mokya,

kahra ro mak exitaw so mokyasî.

Tmokuche tak kacipara imo ke noro yipu pen komo namesî ro mak okwe.

Tponarono pîn komo cheka tak n̂examro pen n̂en̂epes okwe.

Ero wa tanton komo n̂iir̂asî,

cewetîn̂e pîn kom okwe.

47 Tîhyosom me tak naxe noro yipu komo okwe.

On wara nasî kayaritomo n̂examro yîhyotopo poko,

anarî komo rma re tkayaritomon komo mtapotarî n̂encexe.

Ero poko ehcoko,

kacho n̂encexe.

Cetapickacho komo ponarora ro mak naxe.

Nuwun̂waxe mak yîmtapotarî yewetîtopo poko.

Noro yipu komo tak nîhyokyasî emapona roro oco.

48 Anarî komo reha entara thakwa naxe tkayaritomon komo mtapotarî,

Ero poko men ehcoko,

kacho yentara.

Ero ke noro yipu komo nîhyokyasî rma ha re,

wahra mak ha tko.

Anarî ya tak on wara kes hara,

tanton ya,

Mer̂pono pîn poko kemyarîcesî mer̂pono pîn yentarî ke omtapotarî.

Ero ke ero yipu poko esko amoro mer̂pono pîn poko,

kesî.

49 Taa,

on wara marha wîîkes awya so,

kekn̂e xa hara Xesus yîwya so,

Roowo pona wehto yar̂maxi wa kmokye oona.

Oroto rma ero yipu yetahsî xe ro mak was okwe.

50 On wara tko wasî,

cemicisom wara ka wasî.

Oyemicitopo wara rma nas amn̂e oyerewîmtopo.

Expora wasî ero yipu yenatîtopo ponaro.

51 Etpoko tawake ciino riso wa mokyakn̂e Xesus,

mîîketu na re opoko.

Pîra ro mak okwe.

Kicicme etpoko ciino riso xa matko kmokye.

52 On wara tak men naxe tooto komo amn̂e mîîmo yawno komo,

5 exitaw ero re yaw.

3-înhîrî komo xera kr̂a tak naxe 2-înhîrî komo.

Anarimaw 2-înhîrî komo xera kr̂a tak naxe 3-înhîrî kom hara.

Ero wa men naxe okwe.

53 Ero wa xa marha naxe yîîm kom hara,

tumumuru komo xera rma naxe okwe.

Ero wa xa marha naxe yumumuru kom hara tîîm komo xera hara.

Ero wa xa marha naxe yîson kom hara,

cemsîrî komo xera naxe.

Emsîrî komo marha naxe tîson xera hara.

Tîmrerî pici xera marha naxe yîson komo.

Ciin̂o yon xera marha naxe wooxam komo.

Ero wa naxe etîxera okwe,

kekn̂e tî Xesus.

Ero wa tî kekn̂e tînpanatanmekrî komo ya.

54 Taa,

ero yinhîrî on wara tî kekn̂e xa hara Xesus tîhyaka esenmexapu komo ya,

Ahce wa mîîketu tuuna yewru yeen̂ataw awya so,

oesce n̂ixa awomyataw ahce wa mîîketu?

Tuuna mokya ham,

mîîkexe tak.

Yaaro ero wa mîîkexe.

Mokyasî rma tuuna.

55 Suu n̂ixa apepenataw ocowo,

Ocoro tak nai ham amn̂e,

mîîkexe.

Yaaro mîîkexe,

ero wa tak nai ha.

56 Kir̂wan wara cesenposom komo mak amyamro kica.

Takîhso rma re maxe kaapu yentopo poko.

Tuuna mokya ham,

mîîkexe yaaro rma.

Takîhso marha maxe roowo yentopo poko hara.

Ahce kacho,

Oroto ero wa xa Kaan ya kiitopo me tak nai ham,

kahra mat hara okwe?

57 Ahce kacho awanme ro so rma yîhtînopîra mat hara okwe kir̂wan̂he awehtopo komo?

58 Anarimaw apoyino na nîrwona apoko ahce na yepethîkarî ke awya.

Awahsîya na,

awar̂a marha na kayaritomo yaka.

On wara men esko awar̂ataw,

esama yaw rma awcetaw so akro esentakî.

Ahri ka,

kepemetîkesî rma oyakno yamoro ka,

kasko yîwya yîrwomra tak ehtome apoko.

Apoko yîrwonataw rma awar̂a xa hara men ken̂ekan̂e yaka.

Noro tak na awahsîpe porisia ya hara.

Porisia tak na awahruya kahrutopo yaka.

59 Iito thakwa mas okwe epatakan me.

Epethîkaxapu yepematîkache mak awya mepatakes hara,

kekn̂e tî.

Ero wa tî Xesus kekn̂e tîhyaka esenmexapu komo ya.